Septyembre 24

Unsaon Ko nga Makasunod sa Ehemplo sa Manluluwas sa Pagtabang Niadtong Nanginahanglan?

2 Mga Taga-Corinto 8–13

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa ang atong gihisgotan sa miaging panahon, ug unsa nga mga pagdapit o mga buluhaton ang gihimo? Unsa ang atong nahimo aron malihok kadto nga mga pagdapit o mga buluhaton?

• Mag-atiman alang niadtong nanginahanglan. Unsa ang atong mabuhat o masulti nga makatabang niadtong kinsa tingali mibati nga nag-inusara o nahilayo gikan sa Langitnong Amahan?

• Magdapit sa tanan sa pagdawat sa ebanghelyo. Unsa ang pipila ka paagi nga kita makatabang sa uban aron mobati sa gugma ni Jesukristo?

• Maghiusa sa mga pamilya alang sa kahangtoran. Unsa nga mga ideya kita makapakigbahin sa usag usa sa pagtabang og lig-on sa atong mga pamilya?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Unsa nga mga oportunidad ikaw ug ang mga sakop sa imong klase o ang korum aduna sa pagserbisyo niadtong nanginahanglan nga naglibot kaninyo? Sa panahon sa dihang ang mga Santos sa Jerusalem nag-antos ug nanginahanglan og tabang, misulat si Pablo ngadto sa mga taga-Corinto sa pag-awhag kanila sa paghatag nga kinasingkasing, “dili nga magapanuko, ni ingon nga pinugos: kay ang Dios nahigugma sa malipayong maghahatag.” Misaad Siya nga samtang sila mibuhat niini, ang Dios “makahimo sa pagtagana [kanila] sa tanang panalangin” aron nga kini mahimong “magatagana nga madagayaon alang sa tanang maayong buhat” (2 Mga Taga-Corinto 9:7–8).

Mipasabot usab si Pablo ngadto sa ehemplo ni Jesukristo, kinsa “bisan tuod siya dato, nahimong kabos alang kaninyo, nga pinaagi sa iyang kakabos kamo mahimong dato” (2 Mga Taga-Corinto 8:9). Ang Manluluwas andam nga misakripisyo sa mga bahandi sa langit aron Siya makaserbisyo kanato ug makahimo kanato nga dato sa kahangtoran. Paghunahuna og mga ehemplo gikan sa Iyang kinabuhi nga Siya miserbisyo ngadto sa naglibot Kaniya. Agi og dugang sa pagbasa sa 2 Mga Taga-Corinto 8–9 samtang ikaw nangandam sa pagtudlo, hunahunaa ang pagbasa sa mensahe ni Sister Michelle D. Craig nga “Mga Mata aron sa Pagtan-aw” (Liahona, Nob. 2020, 15–17).

Pagkat-on og Dungan

Sa pagsugod sa inyong panaghisgotan, hangyoa ang klase o ang korum sa paghimo og lista sa pipila sa mga rason kon ngano nga ang usa ka tawo mahimong dili moserbisyo sa uban nga nanginahanglan. Unsa ang atong makat-onan gikan sa mga pagtulon-an sa 2 Mga Taga-Corinto 8:9; 9:7–8 nga nagdasig kanato sa pagbuhat pa og dugang sa pagserbisyo niadtong nanginahanglan? Ang mosunod nga mga kalihokan makatabang niadtong imong gitudloan nga mas makasabot kon unsaon pagtabang og amuma alang niadtong naglibot kanila.

• Makadaghang higayon diha sa mga kasulatan, ang Ginoo mitudlo kon giunsa niya pagbati ang mahitungod sa pag-amuma alang sa mga kabos ug timawa. Ang pipila ka mga ehemplo gilista diha sa “Suporta nga mga Kapanguhaan.” Usa ka paagi sa pagrebyo niini nga mga pagtulon-an mao ang pagbahin sa imong klase o korum ngadto sa mga pares ug hangyoa ang kada pares sa pagtuon sa pipila sa mga kasulatan. Hangyoa sila sa paghisgot kon unsa ang gitudlo sa mga tudling mahitungod sa pag-amuma alang sa kabos ug sa timawa. Ngano nga ang pag-amuma alang sa kabos ug timawa importante kaayo ngadto sa Langitnong Amahan ug ni Jesukristo? Dapita ang kabatan-onan sa pagplano og mga paagi nga sila makatabang sa tinagsa niadtong nanginahanglan.

• Usahay kita magkapuliki sa atong kaugalingong mga kabalaka nga mapakyas kita sa pag-ila sa mga panginahanglan niadtong naglibot kanato. Diha sa iyang mensahe “Mga Mata aron sa Pagtan-aw,” girebyo ni Sister Michelle D. Craig ang asoy sa Dios nga nag-abli sa mga mata sa usa ka batan-ong lalaki (tan-awa sa 2 Mga Hari 6:15–17). Unsa ang atong makat-onan gikan niini nga asoy? Unsa ang atong makat-onan gikan sa ubang mga asoy nga iyang gipakigbahin mahitungod sa pag-ila sa mga panginahanglan sa uban ug sa pagtabang ngadto kanila? Ang mga sakop sa klase o sa korum makapakigbahin usab og mga kasinatian kon ang usa ka tawo makaila sa ilang mga panginahanglan ug mangalagad ngadto kanila. Kanus-a kita makaila sa mga panginahanglan sa uban ug mangalagad ngadto kanila? Sa unsang paagi kita mobati kon modawat o mohatag sa ingon nga pagpangalagad?

• Ang mga sakop ba sa imong kalse o korum makasabot kon unsaon sa pagtuman sa ilang katungdanan sa pagtabang og amuma alang niadtong nanginahanglan? Hunahunaa ang paghisgot og dungan sa Mosiah 4:16–21 ug sa 18:8–10, ingon man ang kalabot nga mga seksiyon sa Kinatibuk-ang Tamdanan nga Basahon (10.2.2 alang sa mga korum sa Aaronic nga Pagkapari o 11.2.2 alang sa batan-ong mga babaye). Unsa kita nadasig sa pagbuhat isip usa ka resulta sa pagtuon niini nga mga kapanguhaan? Hunahunaa ang pagplano og mga paagi nga ikaw makabuhat sa pagtabang ngadto niadtong nanginahanglan diha sa imong klase o korum, ward o komunidad. Ang mga kinutlo diha sa “Suporta nga mga Kapanguhaan” naghatag og pipila ka ideya. Alang sa mga oportunidad sa pagserbisyo diha sa inyong dapit, tan-awa sa JustServe.org.

Ang atong Kristohananong serbisyo makapanalangin sa mga kinabuhi niadtong naglibot kanato.

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Mateo 25:31–45; Santiago 1:27; Mosiah 2:17; Alma 34:27–28; Mormon 8:35–39; Doktrina ug mga Pakigsaad 104:14–18 (Ang importansya sa pag-amuma alang sa kabos ug timawa)

• Jeffrey R. Holland, “Dili ba Kitang Tanan Makililimos?,” Liahona, Nob. 2014, 40–42

Pagtudlo sumala sa Pamaagi sa Manluluwas

Ang mga kasulatan ug mga pulong sa mga propeta ug apostoles sa ulahing mga adlaw mao ang tinubdan sa mga kamatuoran nga atong gitudlo. Sa matag oportunidad, dasiga ang imong mga gitudloan nga modangop ngadto sa pulong sa Dios alang sa giya, mga tubag sa mga pangutana, ug suporta.