mga babaye nga naglakaw

Septyembre 10

Unsaon Ko Pagkakaplag og Kahupayan diha ni Jesukristo Kon ang usa ka Minahal Namatay?

1 Mga Taga-Corinto 14–16

icon sa pagtinambagay

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Sa unsang paagi ang pagduol ngadto sa Ginoo makatabang kanato sa pag-atubang sa mga hagit ug mga pagsulay?

• Mag-atiman alang niadtong nanginahanglan. Kinsay atong nailhan nga nagkinahanglan sa atong mga pag-ampo ug sa atong pagpakighigala?

• Magdapit sa tanan sa pagdawat sa ebanghelyo. Unsa nga mga plano sa pagpakigbahin sa ebanghelyo ang nahisgotan na diha sa mga miting sa konseho sa kabatan-onan sa ward? Sa unsang paagi makaapil ang atong klase o korum?

• Maghiusa sa mga pamilya alang sa kahangtoran. Sa unsang paagi ang paghimo sa buhat sa family history makalig-on sa atong mga relasyon ngadto sa Langitnong Amahan ug ni Jesus?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Kon usa ka tawo nga atong gimahal mamatay, kini makahugno. Ang pagkamabulag gikan sa atong gimahal nagdala og mga pagbati sa lawom nga kasakit ug kaguol. Apan gitudlo ni Pablo nga sa kataposan ang “kamatayon gilamoy sa kadaogan” (1 Mga Taga-Corinto 15:54) tungod sa Pagkabanhaw ni Jesukristo. Sa laing pagkasulti, ang “kahapdos sa kamatayon”––ang sakit ug pagkawalay paglaom nga atong bation sa mortalidad––“gituhop diha ni Kristo” (Mosiah 16:7–8; tan-awa usab sa 1 Mga Taga-Corinto 15:54–57).

Sa pila ka adlaw, ang tanan mosinati og kamatayon sa usa ka minahal. Unsaon nimo pagtabang niadtong imong gitudloan sa pagpangita og kahupayan atol niadtong malisod nga mga panahon pinaagi sa hugot nga pagtuo diha ni Jesukristo? Paghunahuna mahitungod niini nga pangutana samtang ikaw nangandam sa pagtudlo pinaagi sa pagbasa sa 1 Mga Taga-Corinto 15, Mosiah 16:7–9, ug Doktrina ug mga Pakigsaad 42:44–46.

Pagkat-on og Dungan

Mahimo nimong dapiton ang mga sakop sa klase o sa korum sa pagpakigbahin sa dihang sila mibati og usa ka butang nga makahapdos. Dayon makapangutana ka kanila kon ngano kahang gigamit ni Pablo ang pulong nga “hapdos” sa paghulagway sa kamatayon (tan-awa sa 1 Mga Taga-Corinto 15:54–56). Hatagi sila og pila ka minutos sa pagrebyo sa 1 Mga Taga-Corinto 15 ug sa pagpakigbahin og mga kamatuoran nga ilang nakaplagan mahitungod kon unsaon sa pagbuntog sa hapdos sa kamatayon. Dayon hunahunaa ang mga kalihokan sama niadtong anaa sa ubos sa pagtabang sa kabatan-onan nga mas masabtan og maayo kon unsaon sa Manluluwas nga makahupay kanato kon usa ka tawo nga atong gimahal mamatay.

• Mahimo nimong bahinon ang mga sakop sa klase o sa korum nga magpares ug hangyoa ang matag pares sa pagrebyo og dungan sa pila ka mga tudling sa kasulatan diha sa “Suporta nga mga Kapanguhaan.” Makasulat sila og mga tubag ngadto sa usa ka pangutana sama sa “Unsa nga importanting mga kamatuoran ako naglaom sa paghinumdom kon mawad-an ako og usa ka minahal sa kinabuhi?” Hangyoa sila sa paglakip og impormasyon gikan sa mga tudling sa kasulatan sa ilang tubag. Dayon dapita sila sa pagpakigbahin ngadto sa klase sa mga kamatuoran nga labing makahuluganon ngadto kanila ug ngano.

• Paghunahuna sa pagrebyo og dungan sa usa ka asoy gikan sa usa ka mensahe sa kinatibuk-ang komperensiya nga nagpakita kon giunsa sa usa ka tawo pagkaplag og paglaom diha ni Jesukristo sa dihang usa ka tawo nga ilang gimahal namatay. Ang mga ehemplo nag-apil sa mensahe ni Sister Reyna I. Aburto nga “Ang Lubnganan Walay Kadaogan” (Liahona, Mayo 2021, 85–86) o ang mensahe ni Elder S. Mark Palmer nga “Mahimong Kalipay ang Atong Kaguol” (Liahona, Mayo 2021, 88–89). Mahimo kang madani sa pagpakigbahin sa imong kaugalingong kasinatian o sa pagdapit sa kabatan-onan sa pagpakigbahin kon giunsa nila sa pagkaplag og kahupayan ug paglaom diha ni Jesukristo human ang usa ka gimahal namatay.

• Human naghunahuna sa mga panginahanglan sa mga sakop sa imong klase o sa korum, pagpakita og usa o sobra pa nga mga video nga anaa sa “Suporta nga mga Kapanguhaan.” Dapita ang kabatan-onan sa pagpakigbahin sa ilang mga panghunahuna. Sa unsang paagi ang pagkasayod nga si Jesukristo nabanhaw pag-apekto kon giunsa nato pagtan-aw ang kamatayon? Dapita ang mga sakop sa imong klase o sa korum sa pagpakigbahin sa ilang mga pagpamatuod mahitungod sa Manluluwas ug sa Iyang Pagkabanhaw ug giunsa niini nga kahibalo pagdala og paglaom.

• Ang Juan 11 naghulagway sa kasinatian sa Manluluwas diha sa kamatayon sa usa ka minahal––Iyang higala nga si Lazaro. Tingali ang klase o ang korum makabasa sa mga bersikulo 1–45 og dungan, ug samtang sila magbasa, sila makahimo sa pagpakigbahin sa mga butang nga ilang nakat-onan gikan sa ehemplo sa Manuluwas. Unsa ang atong makat-onan gikan niini nga asoy nga makahatag kanato og kahupayan kon usa ka tawo nga atong minahal namatay? Unsaon nato nga makasunod sa ehemplo sa Manluluwas nga “magbangotan uban niadto nga nagbangotan … ug sa paghupay niadto nga nagkinahanglan og kahupayan”? (Mosiah 18:9). Unsa ang atong makat-onan gikan sa Doktrina ug mga Pakigsaad 42:45–46 nga makatabang kanato sa pagbuhat niini?

batan-ong lalaki nga namalandong

Ang atong pagpamatuod sa Pagkabanhaw ni Jesukristo naghatag kanato og paglaom kon ang usa ka minahal mamatay.

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Isaias 25:8; 1 Mga Taga-Corinto 15:20–22; Mosiah 16:7–9; Alma 7:11–12; 11:42–44; 22:14; 28:12–14; 40:11–12

• Dallin H. Oaks, “Unsa ang Nabuhat sa Manluluwas alang Kanato?,” Liahona, Mayo 2021, 75–77

• Moisés Villanueva, “Gipangga sa Ginoo sa Tanan ko nga mga Panahon,” Liahona, Nob. 2021, 44–46

Pagtudlo sumala sa Pamaagi sa Manluluwas

Ang pagtudlo naglakip sa pagpangalagad uban sa gugma ug sa pagtabang sa uban nga madawat ang mga panalangin sa ebanghelyo, ug kini nga tabang sa kanunay mao gayod ang gikinahanglan sa usa ka dili kaayo aktibo nga sakop sa klase. Kitang tanan gikinahanglan nga magtinabangay sa pagtabang niadtong kinsa nanlimbasog, ug isip usa ka magtutudlo ikaw mahimong anaa sa talagsaon nga kahimtang sa pagtabang.