Kabonganaakin Nakomai, Iriirai—Ibukin te Mweenga ao te Taromauri

Antai ae E Katauaki Ibukin te Bwai n Ibuobuoki Aei?

Te bwai n ibuobuoki aei bon ibukiia ake a tangiria n reirei man Ana Boki Moomon—n tatabemaniia, n te utu, ao inanon kiraati n te Taromauri. Ngkana ko tuai ni kamatebwaia koroboki aika tabu n taai aika a nako, e kona ni buokiko te bwai n ibuobuoki aei ni waakina am kamatebwai. Ngkana ko a kaman karekea te anua ae tamaroa ni kamatebwaian koroboki aika tabu, e kona te bwai n ibuobuoki aei ni buokiko ni karekei am atatai aika a na rangi ni uaana riki.

N Tatabemaniia ao n Utu n te Mweenga

Te tabo ae nakoraoi ibukin reiakinan te euangkerio bon te mweenga. A kona am tia reirei n te taromauri ni boutokaiko, ao ni kona ni karekea te kaungaaki mairouia kaain te uoote ake tabeman. Ma te kamaiuaki man te maiu n tamnei, ngkoe ma kaain am utu kam riai ni kamwarakeaki n ana “taeka te Atua ae raoiroi” (Moronaai 6:4; taraa naba Russell M. Nelson, “Taeka ni Kaukuki,” Riaona, Nob. 2018, 6–8).

Kabongana te bwai n ibuobuoki aei ni kawai aika a na ibuobuoki nakoim. Bwaai n ibuobuoki aikai a kamataatai tabeua koaua aika akea tokiia ake a kona ni kuneaki n Ana Boki Moomon ao n iango aika a uotakirake ao waaki ni kakukurei aika a na kona ni buokiko ni kamatebwai booki aika tabu bon iroumi, ma am utu, ke ma raoraom. Ngkana ko kamatebwai, ira ana kairi te Tamnei ni ukori koaua aika akea tokiia aika a uaana nakoim. Tarai ana rongorongo te Atua ibukim, ao irii taian kairi mairoun te tamnei aika ko karekei.

Taan Reirei ao Taan Reiakinaki n te Taromauri

Ngkana ko anga reirei nakon te kiraati n te Moanrinan, te kairake ke te kiraati n te Reirei n Tabati, te kooram n te Nakoanibonga ae te Aaron, aia kiraati Ataeinnaine, ko kaungaaki bwa ko na kabonganai kamataata n te bwai n reirei aei n am tai ni katauraoi n anga reirei. Nakomai, Iriirai—Ibukin te Mweenga ao te Taromauri bon te karikiram ibukin am kiraati n te Taromauri. Iango ibukin reirei n te bwai n reirei aei a karaoaki ibukin te kamatebwai n te mweenga ao te taromauri. N am tai ni katauraoi n anga reirei, moanna man karekean oin am taneiai man koroboki aika tabu. Te kabanea ni kakawaki ni katauraoakim e na riki ngkana ko ukeuke inanon koroboki aika tabu ao ni karekea ana kairi te Tamnei ae Raoiroi. Taratarai koaua aika akea tokiia aika a na kona ni buokiko bwa ko na kona n riki n aron Tamara are i Karawa ao Iesu Kristo. Nakomai, Iriirai e kona ni buokiko n atai tabeua koaua aikai ao ni mataata n nanon kiibu aikai.

Katikua n am iango bwa reiakinan te euangkerio, nakon te kabanea n tamaroa, e boboto iaon te mweenga ao ni boutokaaki n te Taromauri. N taekana teuana, tabem ni koaua bon boutokakiia aomata aika ko reirieniia n aia tai ni kekeiaki ao ni maiuakina te euangkerio ni mweengaia. Anganiia aia tai n tibwauai aia taneiai, aia iango, ao aia titiraki iaon reirei man booki aika tabu. Kaoiia bwa a na tibwauai koaua aika akea tokiia aika a tia ni kunei. E rangi ni kakawaki riki aei nakon karaoan bwaai n reirei riki tabeua.

Moanrinan

Am katauraoi n reireiniia kaain te Moanrinan e moanaki man kamatebwaian Ana Boki Moomon bon iroum ao ma am utu. Ngkai ko karaoia, tauraoi nakon kamataata n tamnei ao atatai aika nano n mairoun te Tamnei ae Raoiroi n am kiraati n te Moanrinan. Bwabwaina te tataro; ao e na kona te Tamnei ni kaungako ma iango aika a na kona ni buokiia n reiakina ana euangkerio Iesu Kristo.

N am tai ni katauraoi n anga reirei, ko na bae ni karekea te iango ae raka riki kairam mairoun te tamnei man rinanoan waaki n anga reirei n te bwai n ibuobuoki aei. Kamataata n tatabeua nako inanon Nakomai, Iriirai—Ibukin te Mweenga ao te Taromauri iai inanona te tiekition ae atunaki “Iango ibukin Reiakinaia Ataei.” Iangoi iango aikai bwa iango aika a na kona ni buokiko ni moana namakinan te kairi mai ieta. Ko kinaia ataein am kiraati n am Moanrinan—ao ko na kinaia riki ngkana ko reitaki ma ngaiia n te kiraati. Te Atua e kinaiia naba, ao E na anganiko kawai aika tamaroa ibukin reiakinaia ao ni kakabwaiaia.

E kona n ae a na bae n tia ataein am kiraati ni karaoi tabeua waaki ni kakukurei inanon Nakomai, Iriirai ma aia utu. E Tamaroa Anne. E tamaroa kaokiokan bwaai. Iangoia ni kaoiia ataei bwa a na tibwaia ma ngaiia n tatabemaniia nako te bwai ae a reiakinna ni mweengaia—ngkoe naba ko riai ni bairei kawai ibukiia ataei bwa a na tibwatibwa e ngae ngke aki reiakinna ni mweengaia. Ataei a reiakinii riki koaua n te euangkerio ngkana a kaokiokaki koaua aikai rinanon waaki ni kakukurei aika a kakaokoro. Ngkana ko nooria bwa te mwakuri ni kauring e raoiroi ibukiia ataei, iangoia bwa ko na kaokiokia, riki ngkana ko reireiniia ataei aika a uarereke riki. Ko kona naba n rinanon te mwakuri ni kauring man te reirei are mai mwaaina.

N namwakaina ake nimaua Tabati inanona, a kaungaaki taan reirei bwa a na onea te reirei n Nakomai, Iriirai are e kaotaki n te kanimaua n Tabati ma teuana ke e mwaiti riki man waaki n angareirei inanon “Abentekiti B: Ibukin te Moanrinan—Katauraoaia Ataei nakon Maiuakinan ana Kawai ni Berita te Atua.”

Aia Kiraati Kairake ao te Reirei n Tabati ibukiia Ikawai

Teuana raoi oin bukina ngkai ti ikotaki n te kiraati n te Reirei n Tabati bwa ti na boutokaia ao ni kaungaira n te tatabemaniira nako ngkai ti kekeiaki n ira Iesu Kristo. Te kawai ae bebete ni karaoan aei bon tabekan te titiraki n aron “Tera ae e a tia n reireiniko te Tamnei ae Raoiroi n te wiiki aei n am tai ni kamatebwaia Ana Boki Moomon ma Nakomai, Iriirai?” Kaeka nakon te titiraki aei e kona ni kairiko nakon marooro aika uaana ae e na karekea te onimaki iroun Iesu Kristo ao Ana euanglkerio.

Ngkanne ko kona ni bubuti te marooro ae boboto iaon kamatebwaian iango inanon Nakomai, Iriiria. Te katooto, te iango ni kamatebwai e kona ni kataua ukoran Aramwa 36 ao ni koroi ni karinanani taeka aika a reirei taben te Tia Kamaiu n te rairannano. Ko kona n tuangiia kaain te kiraati bwa a na tibwaua ao n taetae iaon taeka aika a kunei. Ke ko kona ni kabanea teutana te tai ni kaai ni karaoi ni karinani n te kiraati.

Te Kooram n te Nakoanibonga ae te Aaron ao aia Kiraati Ataeinnaine

Ngkana a bootaki kaain te kooram n te Nakoanibonga ae te Aaron ao aia kiraati Ataeinnaine ni katoa Tabati, n tabetai ao e kaokoro bukin karaoakiia ma te kiraati n te Reirei n Tabati. Irarikin ara ibuobuoki imarenara n reiakina ana euangkerio Iesu Kristo, a bootaki naba kurubu aikai n reirei iaon taekan kakoroan nanon te mwakuri ni kamaiu ao te karietataaki (taraa Aeniboki ni Kabuta: Te Beku n Ana Ekaretia Iesu Kristo ibukiia Aika Itiaki ni Boong aika Kaitira, 1.2). A karaoa aei iaan ana kaetieti te beretitentii n te kiraati ao te kooram.

Ibukin aei, ao a riai bootakin te kooram ke te kiraati ni moanaki iroun temanna kaain te kooram ke te beretitentii n te kiraati ni kaira te marooro iaon aia kekeiaki n, aron te katooto, maiuakina te euangkerio, karaoa te mwakuri n ibuobuoki nakoia kainnano, tibwaua te euangkerio, ke n irii mwakuri n te tembora ao n rongorongon te utu.

Imwiin te bootaki n reirei aei, te tia reirei e na kaira te kiraati ke te kooram ni bootaki n reiakina te euangkerio. Taan kairiiri aika ikawai ke kaain te kiraati ke te kooram a kona n anganaki aia tai n anga reirei. Te beretitentii n te kiraati ke te kooram, n reitakina ma taan kairiiri aika ikawai, a karaoi mwioko aikai.

Aomata ake a mwiokoaki bwa a na anga reirei a riai ni katauraoia man kabonganakin bwaai n anga reirei inanon te kamataata n te wiiki n Nakomai, Iriirai. Inanon taian kamataata, te kanikina aei e na kaotii waaki ni kakukurei aika tau nakoia kairake. E ngae n anne, iango riki tabeua iaon te kamataata a kona ni kabonganaki bwa bwaai ni kamatebwai ibukiia kairake.

Ibukin te katooto n te akenta ibukin bootaki n te kooram ao te kiraati, taraa abentekiti D.