Tianuare 1–7: Kakoauan Taekan Iesu Kristo

Iteraniba ni Kabwarabwaran Ana Boki Moomon

Imwain ae ko roko n 1 Nibwaai mwakoro 1, ko na noria ae Ana Boki Moomon bon te Boki ae raka arona. Te iteraniba ni kabwarabwarana e kaota rongorongon rimoa ae akea aekakina—n ikotaki ma rokoia anera, te rekooti ngkoa ae taunaki n te maunga inanon tienture, ao te ataeinimwaane ae e raira te rekooti man mwaakan te Atua. Ana Boki Moomon tiaki ti te rongorongo ni kawai ibukin aron maekaia te botanaomata i Amerika. E ukora kairoroaia aomata ni kabane “bwa Iesu bon te Kristo” (Iteraniba ibukin atuun Ana Boki Moomon), ao bon te Atua ae e kaira aron koreana, aron kawakinana, ao katauraoana bwa e na tauraoi nakoira. N te ririki aei, ngkai ko wareka Ana Boki Moomon, tataroakinna, ao ni kamwakuri reirei ake iai, ko na bon kaoa mwaakan te Tia Kamaiu inanon maium. Ao ko na namakina kairam n taekinna, n aroia Taan Kakoaua ake Teniman n aia kakoaua, “Ao a bon kamiimii [i] matau.”

Iango ibukin Reiakinana n te Mweenga ao n te Taromauri

Iteraniba ibukin atuun Ana Boki Moomon

Kamatebwaian Ana Boki Moomon e kona ni kakorakoraa au onimaki iroun Iesu Kristo.

N te iteraniba ibukin atuun Ana Boki Moomon e katauraoa ae raka riki nakon ae ti atuuna. Irarikin bwai ake tabeua, e karinani baika a mwaiti n te kantaninga ibukin te rekooti ae tabu aei. Taratarai kantaninga aikai inanon te iteraniba iaon atuun te Boki. Titiraki n aron aikai a kona ni buokiko ngkai ko iango inanom: Bukin tera ngkai ti karekea Ana Boki Moomon? E kanga Ana Boki Moomon ni kaokoro ma booki ake tabeua?

Tao aio te tai ae tamaroa ni karaoan te baire ibon ibukim ke n te utu ibukin warekan Ana Boki Moomon n te ririki aei. Ningai ao te tabo raa ae ko na wareware iai? Ko na kanga ni kaoa te Tamnei inanon am kamatebwai? Iai te bwai ae e onoti ae ko kakaea ngkai ko kamatebwai? Te katooto, tao ko na kakaei kiibu aika a kakoroa nanon te kantaninga are ko kunea inanon te iteraniba iaon atuun te Boki. Ko kona ni kawakin kiibu ake ko karinanii ake a na katea am onimaki iroun Iesu Kristo.

Taraa naba 2 Nibwaai 25:26; Motiaea 3:5–8; Aramwa 5:48; 7:10–13; Ereman 5:12; 3 Nibwaai 9:13–18; 11:6–14; Moronaai 10:32–33.

Te berita ae taekinaki n taetae ni burabeti. E taku Beretitenti Russell M. Nelson, “I berita bwa ngkai ko iangoi raoi baike ko kamatebwai [n Ana Boki Moomon], a na uki wintoon karawa, ao ko na karekei reken am titiraki ao kairam ibukin oin maium” (“Ana Boki Moomon: Tera Aron Maium Ngkana Arona bwa Akea?,” Riaona, Nobembwa 2017, 62–63).

Kabwarabwaran ana Boki Moomon; “Aia Koaua Taan Kakoaua Aika Teniman”; “Aia Koaua Taan Kakoaua Aika Waniman”

I kona n riki bwa te tia kakoaua n Ana Boki Moomon.

Te Tamnei ae Raoiroi e na kakoaua nakoim bwa e koaua Ana Boki Moomon, e ngae ngke ko tuai n noori bwaatua koora n aroia Taan Kakoaua ake Teniman ao ake Waniman aika a tia noori. Ngkai ko wareki aia taeka, iangoia bwa e kanga aia kakoaua ni kakorakora am koaua.

Tera ae kaungako n aron tibwaan aia koaua taan kakoaua aikai iaon ana Boki Moomon? Iangoia bwa ko na kanga ni tibwaua am koaua iaon ana Boki Moomon—riki n arona ni kakoauaa Iesu Kristo. Te katooto, iangoia bwa ko marooro ma raoraom ae e tuai n ongoongo taekan Ana Boki Moomon mai imwaina. Tera ae ko na tuanga teuanne ke neienne? Kona kanga ni kaungaa raoraom bwa e na warekia? Iangoia n rinanoa Kabwarabwaran ana Boki Moomon. Ko na bae ni kunei kabwarabwara ikanne ake a na uaana n tibwaia ma raoraom. Witeo aika imwiina a na kona naba n anganiko iango tabeua:

Iangoia ni korei rinanin bwaai ake ko na tibwaia ma raoraom iaon Ana Boki Moomon. Kataia tibwa Ana Boki Moomon ni kabongana te Book of Mormon app.

Taraa naba Ronald A. Rasband, “This Day,” Riaona, Nobembwa 2022, 25–28; Gospel Topics, “Book of Mormon,” Gospel Library; “An Angel from on High,” Anene n Taromauri, no. 13.

Taan Kakoaua Aika Teniman a kaota aia koaua n Ana Boki Moomon.

“Ana Koaua te Burabeti ae Iotebwa Timiti”

Rokon Ana Boki Moomon bon te kakai.

Ngkana iai ae titirakiniko bwa e roko mai iaa Ana Boki Moomon, tera am taeka? Kona kanga ni kabwarabwara aron te Atua n irekereke ma anganakira Ana Boki Moomon? Ngkai ko wareka ana kakoaua Iotebwa Timiti, taraia bwa e kanga ni kabwarabwaraa. Man are ko a tia ni warekia, tera am iango n Ana namakin te Atua iaon kakawakin Ana Boki Moomon?

Taraa naba Ulisses Soares, “Rokon Ana Boki Moomon,” Riaona, Meei 2020, 32–35; Saints, waorium 1. The Standard of Truth, 21–30; Gospel Topics Essays, “Book of Mormon Translation,” Gospel Library.

Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

Iteraniba ibukin atuun Ana Boki Moomon

Warekan ana Boki Moomon e buokai ni karekea te onimaki iroun Iesu Kristo.

• Kataua bwa am ataei a taraa ao n taua kaobiin ana Boki Moomon. Buokiia bwa a na kotea kauouan atuun te boki, Kakoauan Taekan Iesu Kristo. Ko kona naba ni buokiia ni kunea, iaon te iteraniba n atuun te boki, te mwakoro n taeka ae Iesu bon te Kristo, te Atua ae Akea Tokina, are e kaotia nakoia aba nako.” Buokiia n ataia bwa nanon aei bwa Ana Boki Moomon e reireiniira taekan Iesu Kristo. Tuangiia ni kakimototoa bwa e kanga Ana Boki Moomon n tia ni kakorakoraa am onimaki iroun Iesu Kristo. Ko kona naba n titirakiniia bwa tera te karaki ae mamaten nanoia n ana Boki Moomon. Anene “Book of Mormon Stories” (Aia Boki n Anene Ataei, 118–19) e kona ni kauringiia iaon tabeua karaki akanne.

Kabwarabwaraan ana Boki Moomon

Ana Boki Moomon bon kingin atibun te maninganinga n ara ekaretia.

• Iteraniba n te waaki ni kakukurei n te wiiki aei ao te tamnei ae inano e kona ni buokiia am ataei ni kamataataia iaon ana taeka Iotebwa Timiti ni kabwarabwaraan Ana Boki Moomon: “Ana Boki Moomon bon [ngaia] kingin ara ekaretia.” E na rangi ni kakukurei naba katean ke korean tamnein te aake (arch) ma kingin atibun te maninganinga mai ieta. Tera ae na riki ngkana e kanakoaki kingin atibun te maninganinga? Tera ae e na kona n riki ngkana akea Ana Boki Moomon? Kam kona n uaia ni wareka te kabanea ni barakarabe n te kabwarabwara ni kakaea bwa tera riki ae ti reiakinna ngkana ti butimwaea te koaua n Ana Boki Moomon. Ti na kanga n karika Ana Boki Moomon bwa kiingin atibun te maninganinga n ara onimaki iroun Iesu Kristo?

Ana Boki Moomon bon kiingin atibun maninganingan ara ekaretia.

“Aia Koaua Taan Kakoaua aika Teniman”; “Aia Koaua Taan Kakoaua aika Waniman”

I kona n riki bwa te tia kakoaua n Ana Boki Moomon.

• Ni buokiia am ataei ni kamataataia bwa tera nanon ae te riki bwa te tia kakoaua, ko kona ni kabwarabwara nakoia te bwai are ko a tia n noria ae a tuai n noria. Ngkanne kariaia bwa a na karaoa ae ti te arona naba ma anne. Aio e kona ni kairi nakon te marooro iaoia aomata ake 11 ake a nora te bwaatua koora are e rairaki mai iai ana Boki Moomon. Ngkai kam uaia ni wareka aia kakoaua, kam kona ni marooro bwa bukin tera taan kakoaua aikai a tangiriia aomata tabeman n ataa aia kakoaua. Antai ae ti tangiria n tuangnga taekan ana Boki Moomon?

“Ana kakoaua te Burabeti ae Iotebwa Timiti”

Ti karekea Ana Boki Moomon man mwaakan te Atua.

• Ni buokiia am ataei n reireiniia bwa e kanga te Atua n anganiira Ana Boki Moomon n aron are e kabwarabwaraaki n “Ana Kakoaua te Burabeti ae Iotebwa Timiti” nakoia. Ko kona naba ni kabongana “Mwakoro 1: Ti Kangaa ni Karekea Ana Boki Moomon” (ni Karaki man Ana Boki Moomon, 2–4). Am ataei a na kukurei naba ni karaoa te takakaro iaon karaki tabeua te tai.

Ibukin iango riki tabeua, taraa te beeba ni kaongora n te namwakaina aio n te Rao maekatiin.

E anga Bwaatua Koora Moronaai, iroun Gary L. Kapp