Te Bong Aio
Ara burabeti ae maiu e karaoa tibwangana ni kaona te aonaaba n ana Boki Moomon. Ti riai n ira are e karaoia.
Tariu ao mwaneu aika tangiraki, n Ana Boki Moomon te kibuntaeka ae “te bong aio”1 e okioki kabonganakina ni mutiakin marooro, berita, ao reirei. Te Uea Beniamina, n ana kabanea ni marooro e tuangiia aomata, “Kam kona n ongo au taeka aika N nang taekin nakoimi n te bong aio; … kam na kauki taningami bwa kam aonga n ongo, ao nanomi bwa kam aonga n ataia, ao ami kaantaninga bwa aonga ni kaotaki nanon ana mwakuri te Atua aika a raba nakoimi.”2 Maungatabu ni kabuta bon aekakin te tabo anne. Ti roko n ongoraei marooro ibukin “te bong aio,” bwa ti na kona n “kokoaua n taai nako”3 nakon te Uea ao Ana euangkerio. Te iango are e karawawataki iaon “te bong aio” bon kakaawakin kabouan ara motinnano n ana Boki Moomon, are e aranna Iotebwa Timiti “te boki ae te kabanea n eti mai buakon booki nako i aon te aonaaba.”4
I taua inanon baiu kaobiin ana Boki Moomon. Aio au boki ae e a mane man 1970, ao e rang kakaawaki irou. Man taraakina e a mane imwiin kabongaakina, ma akea riki te boki ae kakaawaki inanon maiu ao n au koaua nakon riki aei. Ni warekakina I karekea te kakoaua iroun te Tamnei bwa Iesu Kristo bon natin te Atua,5 ao Ngaia au Tia Kamaiu,6 bwa koroboki aikai bon ana taeka te Atua,7 ao e a tia ni kaokaki te euangkerio.8 Koaua akanne a tiku ni matoa inanou. N aron are e taekinna te burabeti Nibwaai, “E kimwareirei tamneiu ni bwaai aika a kaineti ma te Uea.”9
Maing nakon te Atai: Unimwaane Ronald A. Rasband, mitinare ni kairake; Beretitenti Harold Wilkinson, beretitenti n te Eastern States Mition; ao Unimwaane Marion D. Hanks, Mataniwi ni Kabuta n te Itingaun.
Aio karakinana. Ngke I kairake ni mitinare, I taua ana reirei Unimwaane Marion D. Hanks, are e kawariira n te Eastern States Mition. E a tia n riki bwa te beretitenti n te British Mition mai imwaina, ao uoman ana mitinare aika a mena i rarikira n te bong aio: tariu aika tangiraki Unimwaane Jeffrey R. Holland ao Unimwaane Quentin L. Cook.10 N ai aroia ana mitinare i England, e kaewenakoira bwa ti na wareka ana Boki Moomon uoua te tai. I karaoa te mwioko anne. Te moan wareware n na mwakeni ke ni katikiraini bwaai ake a kaineti ke ni kakoaua ibukin Iesu Kristo. I kabongana te bentira ae uraura, ni katikirainiia rongorongo aika a mwaiti. Te kauatai, Unimwaane Hanks e taku bwa ti na katanei tuua ao reirei n te euangkerio, ao n te tai aei I kabongana te buruu ni mwakeni koroboki aika a tabu. I wareka ana Boki Moomon uoua te tai, n aron are e taekinaki, ao imwiina uoua riki te tai, ni kabongana te baboboo ao te roroo ni mwakeni rongorongo ake a kakaawaki irou.11 N aron ae kam nooria, e mwaiti au koroboki.
E mwaiti riki ae I karaoia n au wareware nakon ti mwakenan kiibu. Ni katoa au wareware n ana Boki Moomon, mai moana nako buki, I kaonaki n te tangira ae bati ibukin te Uea. I namakinna bwa e a nene au kakoaua ni koauan Ana reirei ao aroia ni kaineti ma “te bong aio.” Te boki aei e bootau ma atuna, “Kakoauan Taekan Iesu Kristo.”12 Ma te kamatebwai anne ao te kakoaua n tamnei are I karekei, I a riki bwa te mitinare n ana Boki Moomon ao ana reirei Iesu Kristo.13
“Te bong aio,” temanna ana mitinare ae te kabanea ni korakora n Ana Boki Moomon bon Beretitenti Russell M. Nelson. Ngke e moan weteaki bwa te Abotoro, e anga ana reirei i Accra, Ghana.14 Ake a roko bon aomata aika rine, n raonaki ma uean Africa, are e taetae ma ngaia rinanon te tia raitaeka. Te uea bon ataein te reirei ae e a tia ni kamatebwaia te Baibara ao e tatangira te Uea. Imwiin ana marooro Beretitenti Nelson, e kawaraki iroun te uea, are e titiraki n taetae n imatang, “Bon antai raoi ngkoe?” Beretitenti Nelson e kabwarabwara ae ngaia ana Abotoro ae katabuaki Iesu Kristo.15 Ana titiraki are imwina te uea “Tera ae ko kona n reireinai n taekan Iesu Kristo?”16
Beretitenti Nelson e anaa ana Boki Moomon ao e kaukia nakon 3 Nibwaai 11. N ikotaki Beretitenti Nelson ao te uea a wareka ana kabwarabwara te Tia Kamaiu nakoia Nibwaite: “Nooria, bon Iesu Kristo Ngai, are a kakoaua ibukina burabeti bwa e na roko nakon te aonaaba. … Ngai ootan ao maiun te aonaaba.”17
Beretitenti Nelson e angan te uea katotoon ana Boki Moomon, ao e kaeka te uea, “Ko kona n anganai taian taiman ke rubi, ma akea riki ae e kakaawaki irou nakon ataakin riki rongorongon te Uea Iesu Kristo.”18
Tiaki ti anne te katooto n aron ara burabeti ae tangiraki n tibwa ana Boki Moomon. E a tia n anga katotongan ana Boki Moomon nakoia bubua n aomata, n tainako ni kaota ana kakoaua iroun Iesu Kristo. Ngkana e kaitibo Beretitenti Nelson ma iruwa, beretitenti, uea, kautuun tautaeka n aba, taan kairiiri ni bitineti ao bootaki n aro n aekaia nako, n ana etekuata te Ekaretia ke n aia tabo, e anga ma te karinerine te boki aei ni kaoti koroboki aika a tabu. E kona n anganiia bwaai aika a mwaiti riki ake a niiraki n te reeben are e kona n tekateka iaon aia taibora ke tetike ke inanon kaebineti bwa kauringaan rokona. N onean mwiina, e anga are te kabanea ni kakaawaki irouna, ae raka riki nakon rubi ma taiman, n aron are e kabwarabwara te uea.
“Koauan ana Boki Moomon,” Beretitenti Nelson e taekinna, “iai mwaakana ni kamarurung, ni karaunano, ni kaota, ni buoka, ni kakorakora, ni kabebete, ao ni kakukurei tamneira.”19 I a tia ni mataku ngkai a tauaki ni baia naake a butimwaia mairoun ana burabeti te Atua kaobiin ana Boki Moomon. Akea te bwaintangira ae kakaawaki riki.
N te tai ae tibwa bon nako naba ao e kaitibo ma te moan aine mai Gambia n ana aobiti ike e a nanorinano n anganna ana Boki Moomon. E aki toki ikanne. E kauki baana ni wareki nakoina, n reirei ao ni kakoaua iroun Iesu Kristo, Ana Mwakuri ni Kamaiu, ao Ana tangira ibukiia Natin te Atua ni kabane—n taabo nako.
Ara burabeti ae maiu e karaoa tibwangana ni kaona te aonaaba n ana Boki Moomon.20 Ma e aki kona ni kaonrakea te aonaaba n ana Boki Moomon n ti ngaia. Ti riai n ira are e karaoia.
N anaakin nanou n ana banna ni katoto, I a tia ni kataia n nanorinano ao n kakorakoraaki riki n tibwa ana Boki Moomon.
N te tai ae tibwa nako I karaoa katabeau i Mozambique. Kain te aba ae tikiraoi aei a inimaki ma te maiu ni kainnano, rootaki marurungiia, akean te mwakuri, buakakan kanoan te bong, ao untaba n tautaeka. E reke kaitiboou ma te beretitenti n te aba, Filipe Nyusi. N ana bubuti, I tataro ibukina ao ana botanaomata; I tuangnga bwa ti na katea ana tembora Iesu Kristo21 i abana. Ni banen kaitibora, I anganna katotoon ana Boki Moomon ni Portuguese, n oin ana taetae. Ngke e kakaitau ni butimwaea te boki, I kakoaua n te onimaki ao te berita ibukiia ana botanoaomata, are e reke n ana taeka te Uea iaon baana.22
N te taina, ngai ma kainnabau, Melanie, ti kaitibo ma King ao Queen Letsie III mai Lesotho ni mweengaia.23 Iroura, te kabanea ni kakaawaki n rokora bon anganakiia kaobiin ana Boki Moomon ao imwiina tibwauan au koaua. Kauringan bwaai aika a riki ao tabeua riki, te kibu ae roko n au iango ni koroboki aika a tabu: “Bwa e aonga bwaninin au euangkerio ni katanoataaki irouia naake a mamaara ao aki reirei nako tabotabon aonaaba, ao i mataia ueea ao taan tautaeka.”24
I a tia n tibwa ana Boki Moomon ma ana Ambatita Inria ae Pandey25; nakon te United Nations i Geneva ao ma Patriarch Bartholomew ae Rine26 man te Ekaretia n te Eastern Orthodox ao a mwaiti riki. I a tia n namakina Tamnein te Uea n raoniira ngke I angania “atibun maninganingan ara ekaretia aei”27 ao ni kaota au koaua iroun Iesu Kristo, atibun maninganingan ara onimaki.28
Ngkai, tariu ao mwaneu, ko aki kainnanoia n nako Mozambique ke India ke ni kaitibo ma uea ao toka n anganiia te boki aei n reirei aika a tabu ma berita. I kaoko, n te bong aio, bwa ko na angan raoraom ao am utu, raom ni mwakuri, am kouti n te butibooro, ke te tia ribana n am mwakete te boki aei. A kainnanoi ana taeka te Uea ake a reke n te boki aei. A kainnanoi kaekaan titiraki n te maiu ni katoabong ao n te maiu ae akea tokina ae e na roko. A riai n ata kawain te berita are e kaweneaki ibukiia ao ana tangira te Uea ibukiia. A bane ikai n ana Boki Moomon.
Ngkana ko anganiia ana Boki Moomon, ko kauki aia iango ao nanoia nakon ana taeka te Atua. Ko aki riai ni uouoti katoto aika boretiaki. Ko kona ni waekoa n tibwaia man am tareboon man mwakoron koroboki aika tabu n te Gospel Library app.29
I iangoia ni kabane ake a kona ni kakabwaiaaki man te euangkerio ni maiuia, ao ni kanakoa nakoia kaobiin Ana Boki Moomon. Uringnga ni kaairia ma am koaua ao e kanga te boki aei n tia ni kakabwaia maium.
Raou aika tangiraki, ngkai ana Abotoro te Uea ngai, I kaoi ngkami bwa ti na iriira ara burabeti ae tangiraki, Beretitenti Nelson, ni kaonakin te aonaaba n ana Boki Moomon. Kainnanoana e rang korakora; ti riai ni karaoia ngkai. I berita bwa kam na ira buakon te mwakuri ae “te kabanea ni korakora iaon te aba,” ikotakiia Iteraera,30 ngkai kam kaungaaki ni karoko irouia naake a “tuai n ata te koaua ibukina bwa aki ataia bwa a na karekea ia.”31 A kainnanoa am koaua ao am kakoaua n aron te boki aei n tia ni bita maium ao ni kaniiko riki nakon te Atua, Ana rau,32 ao “taekan Ana kimwareirei.”33
I kakoaua bwa n teina mai karawa ana Boki Moomon e katauraoaki i Amerika n taai akekei bwa e na roko n taetaekina ana taeka te Atua, ni uootia aomata nakon Iesu Kristo ao Ana euangkerio are kaokaki n “te bong aio.” N aran Iesu Kristo, amen.