Iesu Kristo Bon Kakorakoraaia Kairake

Iroun Unimwaane Dieter F. Uchtdorf

Man te Kooram n Abotoro n te Tengaun ma Uoman

Katuka am onimaki iroun Iesu Kristo. E na kairiko n te kawai ae eti. Bon ngaia korakoram.

N te katauraoi ibukin te rongorongo n te bong aei, I tia ni karekea korakoran te wirikiriki bwa n na marooro nakoia ataeinaine ao ataeinimwaane.

I marooro naba nakoia te koraki ake a tia n riki bwa kairake, ao nakoia naba ake aki kona n ururingnga kairakeia.

Ao I marooro naba nakoia te koraki ake a tangiriia ara kairake ao n tangiriia bwa a na nakoraoi aroia ni maiuia.

Ibukin te roro ae rikirake, iai au rongorongo riki ibukimmairoun ara Tia Kamaiu, Iesu Kristo.

Ana Rongorongo te Tia Kamaiu Nakoim

Raraou aika kaIrake aika kam tangiraki, ngke arona bwa e mena ikai ngkai te Tia Kamaiu, tera ae E na taekinna nakoim?

I kakoaua bwa E na moanna man bunran Ana tangira ae korakora i bukim. E na bae n taekinna ma taeka, ma e na bon korakora riki—man ti Taraana—bwa e na bon aki kaairua, e na roota nanom, kaona tamneim!

Ao riki, i bukina bwa ti bane ni mamaara ao n aki kororaoi, ana bon roko n am iango raraoma tabeua. Ko na bae n uringii am kaairua are ko a tia ni karaoi, taai ake ko iraanako te kariiri, bwaai ake ko iangoi bwa ko riai n aki karaoi ma ko a tia ni karaoi—ke ni iangoia bwa ko riai ngkoa ni katamaroa karaoaia.

E na bon namakina anne Te Tia Kamaiu, ao I kakoaua E na bon karaua nanom ma A na taeka are E a tia n taekinna n booki aika tabu:

Tai maaku.”⁵

“Tai Nanououa.”²

“Kakukureiko.”³

“Kabebetea nanom.”⁴

I aki kataningaia bwa E na aki tabe ma kairuam. E na bon aki naba kauarerekea. E aki, E na bae n tuangko bwa ko na raira nanom—ko na kitanii am bure, ni bitaki, bwa E aonga n kona n kabwarai am bure. E na bon kauringko bwa 2,000 te ririki n nako E katokaa i Aona buure akanne bwa ko aonga n kona n raira nanom. Aio bon mwakoron te babaire ibukin te kukurei ae bwaintangiraaki nakoira mairoun Tamara are i Karawa.

E na bon katerea naba am berita Iesu ma Ngaia—are ko karaoia ngke ko bwabetitoaki ao ni kabouii ni katoa te tai are ko kana te toa—e na anganiko te reitaki ae okoro ma Ngaia. Te aeka ni reitaki are e kabwabwaraaki n booki aika a tabu ake a ikotaki bwa e aonga, n Ana buoka, ko kona n uotii rawawata nako.⁵

I kakoaua bwa te Tia Kamaiu Iesu Kristo e na bon kan nooriko, n namakina, ao n ataia bwa Ngaia bon korakoram. Bwa man Ana ibuobuoki, akea tian te bwai ae ko kan kakoroa nanona. Bwa akea tian am konabwai. E na bon tangiriko bwa ko na taraiko n aron Ana taratara i bukim. Ao anne ae rangi ni kaokoro man aron ae nooriko iai te aonaaba.

E na bae ni katanoataa Te Tia Kamaiu, n akea riki taekana, bwa bon natin te Atua ae Mwaaka ngke te aine ke te mwaane. Tamam are i Karawa bon te kabanea ni mimitong n aomata n te aonaaba ae bwanin, ae onrake n te tangira, kimwareirei, itiaki, tabu, ota, nanoanga, ao te koaua. Ao n te bong teuana E tangiriko bwa ko bwaibwai n ana bwai nako.⁶

Bon anne bukina ngkai ko mena ikai i aon te aba—bwa ko na reiakinaki, rikirake, ao ni rikirake n tamaroa ao riki nakon are e kaantaningaia ni kabane i bukim ngke e karikiko Tamam are i karawa.

Ni karaoan aio bwa e na koro bukina, E kanakomaia Iesu Kristo bwa am Tia Kamaiu. Bon te babaire i tinanikun Ana babaire ni kukurei ae korakora, Ana Ekaretia, Ana nakoanibonga, booki aika a tabu—ni kabane.

Anne bon tokin kawaim. Anne i bukim n taai aika a na roko. Anne bon am rinerine!

Koaua ao Rinerine

I nanon ana babaire te Atua i bukin kukureim bon inaomatam n rinerine.⁷ Bon anne, E tangiriko Tamam are i Karawa bwa ko na rinea te kimwareirei ma Ngaia ae akea tokina, ao E na buokiko bwa ko na karekea, ma E na bon aki kairoro nakoim.

Ma ngaia are E kariaia bwa ko na rinea: te Ota ke rotongtong? Te raoiroi ke buakaka? Te kimwareirei kekKarawawataaki? Te maiu ae akea tokina ke maten te tamnei?⁸

Ongoraeana kanga te rinerine ae bebete, ke e aki? Ma n tabetai, ikai i aon te aba, e taraa riki ni kangaanga nakon are tao e kantaningaaki.

Te kangaanga ti aki tarai raoi bwaai n aron ae ti riai n nooria raoi n taainako. E kabotaua te Abotoro Bauro n ai aron te taratara “rinanon te kiraati, ae rangi n roo.”⁹ E rangi ni mwaiti te mangaongao n te aonaaba bwa tera ae eti ao ae kairua. A kabouaaki koaua bwa aonga n taraa n tamaroa waaki aika a aki raraoi ao te raoiroi e taraa n buakaka.¹⁰

Ma ngkana ko kakorakorako n ukora te koaua—koaua aika akea tokiia, ao aki bibitaki—am rinerine a na riki ni itiaki riki. Eng, ko na bon teimatoa ni karekea te kataaki ma kangaanga. A teimatoa n riki bwaai aika a bubuaka. Bwaai aika a kamino nano. Bwaai ni karua ni kai. Ma ko kona n taobarai ngkana ko ataia bwa antai ngkoe, tera bukin rokom ikai, ao ngkana ko onimakina te Atua.

Ngaia are ko kunea iaa te koaua?

E karekeaki n ana euangkerio Iesu Kristo. Ao bwaninin te euangkerio anne e reiakinaki n Ana Ekaretia Iesu Kristo ibukiia Aika Itiaki ni Boong aika Kaitira.

E taku Iesu Kristo, “Boni Ngai te kawai, ao te koaua, ao te maiu: akea ane e nako n te Tama, bwa ti i Rou.”¹¹

Ngkana iai am rinerine aika a kakaawaki ae ko na karaoia, Iesu Kristo ma a Ana euangkerio ae kaokaki bon rinerine aika taian kabanea n raoiroi. Ngkana iai am titiraki, Iesu Kristo ma Ana euangkerio ae kaokaki bon kaeka aika kabanea n tamaroa. Ngkana ko namakina te mamaara, Iesu Kristo bon korakoram.

E anga te korakora nakoia ake a kua; ao nakoia ake a namakina te aki konamaki, E karikirakea te korakora.

Te koraki ake a kakantaninga te Uea a na kaitiakaki man Korakorana.¹²

Ibukin Kakorakoraia Kairake

Bwa buokam ni kunea te Kawai ao ni buokiko bwa ko na karaoa ana reirei Kristo bwa te bwai ni kairiiri ni maium, Ana Ekaretia Iesu Kristo ibukiia Aika Itiaki ni Boong aika Kaitira e a tia ni katauraoa te bwai n ibuobuoki ae boou, ao manga rinanoaki Ibukin Kakorakoraia Kairake.

Riaon 50 te ririki ngkai, Ibukin Kakorakoraia Kairake. e a tia n riki bwa te kairi ibukiia roronrikirake nako Ibukia Aika Itiaki. I teimatoa ni kawakina te kaobi n au buua, ao n tibwaia ma aomata ake a titiraki mwaaka n taekan arora. E a tia ni kaboouaki ao ni karaoaki bwa e na kaitaraai riki kangaanga ma kariirii n ara bong aikai. Te kainibaire ae boou Ibukin Kakorakoraia Kairake e a tauraoi iaonrain n 50 taetae aika a kakaokoro ao bon te bwai ni ibuobuoki ae kakawaki ni karaoan rinerine inanon maium. Bon te ibuobuoki ae kakawaki ibukin karaoan rinerine inanon maium. Taiaoka karekea bwa am bwai ao tibwaia ma raraom.

Te bitaki ae boou aei Ibukin Kakorakoraia Kairake. e kabwarabwaraaki Te Kairi Ibukin Karaoan Rinerine.

Ni kamataata raoi, te kabanea n tamaroa ni kairiiri ae ko kona ni karekea ibukin karaoan rinerine bon Iesu Kristo. Iesu Kristo bon kakorakoraia kairake.

Ma ngaia are te kaantaninga Ibukin Kakorakoraia Kairake. bon kairam Nakoina. E reireiniko koaua aika akea tokiia n ana euangkerio ae kaokaki—koaua bwa antai ngke, antai Ngaia, ao tera ae ko konaa ni kakoroa nanona man Korakorana. E reiakiniko bwa ko na kanga ni karaoi rinerine aika a raraoi ake a reke man koaua aika akea tokiia akanne.¹³

E kakawaki naba nakoim bwa ko na ataia bwa Ibukin Kakorakoraia Kairake tera ae aki anga. E aki karaoi babaire i bukim. E aki karekea nakoim te “eng” ke “tiaki” i bukin taian rinerine ake ko na kona ni kaitarai. Ibukin Kakorakoraia Kairake e boboto i aon kamatoaan am rinerine. E boboto i aon aroaro, moan tua, ao reirei nakon aroaro ae kakaokoro.

Te Uea, rinanon Ana burabeti, e teimatoa ni kairiirira n te kawai anne. E bubuti nakoira bwa “ti na karikirakea korakoran tamnei[ra] ni karekei kaotioti.”¹⁴ E kaoira bwa ti na “ongo Irouna.”¹⁵ E weteira bwa ti na Iriiria ni kawai aika a rietaata ao ni tabu riki.¹⁶ Ao ti reiakinna n te kawai ae ai aron anne ni katoa wiiki i nanon Nakomai, Iriirai.

I taku bwa te kairi e na anganiko rinanin kunnikai ae ko na aaki bwainii, taeka ae ko na aki taekinii, ao tamnei ae ko na aki mataku iai. Ma anne e na bon ibuobuoki raoi n te Ekaretia n te aonaaba? Ma te kawai anne ngaia ae na katauraoiko raoi ibukin maiuakinan anuan maiun Kristo?

E taku Iotebwa Timiti, “I reiakiniia etin moan tua, ao a tararuai aroaroia.”¹⁷

Ao e tuangiia ana botanaomata te Uea ae Beniamina n ana Boki Moomon, “I aki kona n tuangkami bwaai ni kabane ake kam na bure iai; bwa bon moan te mwaiti aanga ma kawai, ao a mwaiti ake I aki ko na n uring.”¹⁸

E reitia n taku te Uea Beniamina, “Ma I kona n tuangikami aio, … taratarai ngkamiami iango, ao ami taeka, ma aroaromi, ao ongeaba nakon ana tua te Atua, ao n teimatoa n te onimaki n … ara Uea, ni karokoa tokin maiumi.”¹⁹

E kairua bwa ana iai tuua? E bon aki. Ti kainnanoi ni katoa bong. Ma e bon aki eti taraan ti te tua nakon ae ko aki katurua am iaongo iaon te Tia Kamaiu. Ko riai n ataia bukin te ra ao bwaau, ao i mwiina iaongoi mwiin am rinerine. Ko riai ni katuka am onimaki iroun Iesu Kristo. E na kairiko n te kawai ae eti. Bon ngaia korakoram.²⁰

Mwaakan te Reirei ae Koaua

Ibukin Kakorakoraia Kairake e mataata n tataekinan ana reirei Iesu Kristo. E mataata iai te kakao nakoim bwa ko na karaoi rinerine ake a boboto iaon ana reirei Kristo. Ao e rangi ni matata iai kabwarabwaraan kakabwaia ake e beritanii Iesu nakoia ake a Iriira Ana Kawai.²¹

E reirei Beretitenti Russell M. Nelson: “Ngkana am iango ae korakora bwa karikan te Atua bwa e na kakorakorako [ni maium], …rinerine aika a mwaiti a na bebeete. … Kangaanga aika a mwaiti a riki bwa tiaki kangaanga! Ko na ata ae te kabanea n raoiroi ni kaira maium. Ko ataia bwa tera ae kona mataku iai ao ni warekia, te tabo raa e kona kabanea am tai iai, ao antai ae kona reitaki mangaia. Ko ataia bwa tera ae ko tangiria ni kan kakoroa bukina. Ko kina te aomata ae ko … kan katotoonga.”²²

Te Aroaro ae Tamaroa Riki

E rangi n tamaroa anua ma aroaro ae kateia Iesu Kristo ibukiia Taan ririmwiina. Ao te kakao ni ukora mwaakan Nanona ao maiuakinan Ana koaua bon te kabanea n rietata ni aroaro ae riai!

Rinerine n rabwata ao n tamnei aika a kakawaki a riai n aki nako man ana rinerine te aomata, ke are e angaraoi ke ni kinaaki.²³ Te Uea e aki kangai, “Karaoa are ko bon tangiria.”

E kaangai, “Ke e Tautaeka te Atua.”

E kaangai, “Nakomai, Iriirai.”²⁴

E kaangai, “Maeka n ae tabu riki, rietata riki, kawai aika a tau riki.”

E kaangai, “Kaawakinii au tua.”

Iesu Kristo bon te katooto nakoira ae kororaoi, ao ti kataia ma korakorara ni kabane n tamneira bwa ti na Iriiria.

Raoraou aika kam tangiraki, N na kaokia riki, ngke arona bwa e tei ikai n te bong aei te Tia Kamaiu, E na bunra nakoim Ana tangira ae akea tokina, Ana onimaki iroum ae bwanin. E na tuangko bwa ko kona ni karaoa aio. Ko kona ni karika maium ae kakimwareirei, ao ni kakukurei ibukina bwa Iesu Kristo bon korakoram. Ko kona ni kunea te nano n onimaki, te rau, te mano, te kakukurei, ao n ataia bwa ngkoe ibukin ngkai ao akea tokina, ibukina ko na kunea ni kabane iroun Iesu Kristo, ao n Ana Euangkerio, n Ana Ekaretia.

Man aikai I kaota au kakoaua raoi ngkai ana Abotoro te Uea ae Iesu Kristo ao ni katuka iroumi au kakabwaia ae nako mai nanou n au kakaitau ae korakora ao au tangira i bukimi, n aran Iesu Kristo, amen.

Bwaai aika a na taraaki

1. Ruka 5:10; 8:50; 12:7; Reirei ao Berita aika Tabu 38:15; 50:41; 98:1.

2. Reirei ao Berita aika Tabu 6:36.

3. Mataio 14:27; Ioane 16:33; Reirei ao Berita aika Tabu 61:36; 68:6; 78:18.

4. Ioane 14:1, 27.

5. Taraa Mataio 11:28–30.

6. Taraa Reirei ao Berita aika a Tabu 84:38.

7. Ko kona n taekinna bwa ana baire te Tama e karaoaki bwa ko aonga ni kona ni kaota nanom rinanon am rinerine bwa ko aonga ni kona ni karekea bwaninin mwiin are ko tangiria mai i nanom. N aron ae reireia Unimwaane Dale G. Renlund, “Ana kouru Tamara are i Karawa n te nakoa ni karo bon tiaki karaoaia Natina bwa a na karaoa ae eti; bon karikaia Natina bwa a na rineia ni karaoa ae eti ao n tokina n riki n ai Arona” (“N te Bong aei Kam na Rineia,” Riaona, Nobembwa 2018, 104).

8. Taraa 2 Nibwaai 2:26–27.

9. 1 I-Korinto 13:12.

10. Taraa Itaia 5:20.

11. Ioane 14:6.

12. Taraa Itaia 40:29–31.

13. Ngkai ngaira Aika Itiaki ni Boong aika Kaitira, ti teimatoa ni kinaaki n are ti karaoi ao ake tiaki karaoi—aroarora. E kona n tamaroa aio, ma e na bon tamaroa riki ngkana ti kinaaki n are ti ataia (te koaua are a kaira aroarora) ao i bukin antai ti ataa (te Tia Kamaiu—ao a kanga aron ara tangira i Bukina ni kairii aroarora).

14. Russell M. Nelson, “Te Kaotioti ibukin te Ekaretia, Te Kaotioti ibukin Maiura,” Riaona, Meei 2018, 96.

15. Russell M. Nelson, “Ongo Irouna,” Riaona, Meei 2020, 88–92.

16. Te anga ae boboto iaon moan tua n te kairi ae boou Ibukin Kakorakoraia Kairake e inanoi ma waaki ake tabeua ae kabwarabwaraaki man ana Ekaretia te Tia Kamaiu, ni ikotaki ma Taetaekina Au Euangkerio, mwakuri ni ibuobuoki, te waaki ae boboto n te mweenga Nakomai, Iriirai kanoan reirei, n aia waaki Ataei ao Kairake Reirei n ana Kawai te Tia Kamaiu, ao Aeniboki ni Kabutaae boou. Kamatatana, te Uea e karikirakea ara konabwai n tamnei. E kaota aron karikirakean te onimaki irouia ana aomata inanon te berita ae tabu n boong aika kaitira.

17. Teachings of Presidents of the Church: Joseph Smith (2007), 284.

18. Motiaea 4:29. N te aro, are aio aron are a kataia ni karaoia Bwaritaio n ana tai Iesu. Ni korakoraia ni katokiia aomata man uruakan te tua, a karaoi bubua tuua ae nako man otaia man koraki aika tabu. Kairuaia Bwaritaio aron aia iaongo n aia tua bwa a na mano iai. Imwiina, ngke e kaoti te tia Kamaiu, a bon aki Kinaa.

19. Motiaea 4:30; e kairaki katuruturuana.

20. Bukin teuana ae kainnanoaki n boong aikai te kawai ae boboto iaon moan tua bon rikiraken kakaokoro ni katei n ana Ekaretia te Uea. Moan tua akea tokiia ao a kabutaa te aonaaba. Tua aika a onoti ke kammwakuran tua akanne a mwakuri raoi ni taabo tabeua ma tiaki taabo tabeua. Tera ae bootira iroun Iesu Kristo ao koaua ae akea tokina E reirei, e ngae ngke waaki aika a onoti a bibitaki i nanon te tai ao ni katei aika a maiti. Ngaia are te kangaanga ni karinanan ake a konaa ni karaoaki ni kabane ao ake aaki tiaki ti are aki kona ni karaoaki ao n aki kateimatoaaki. Te kangaanga bon are e bita ara iango man te kakorakora ni koaua, Iesu Kristo.

21. N ririki aika a bwakanako, e taekinii taeka aika a korakora aikai Beretitenti Boyd K. Packer: Reirei ni koaua, oota, bitakin anua ni maiu ao aroaro. Kamatebwaian reirei n te euangkerio e na kanakoraoa te aroaro ni waekoa nakon kamatebwaian aroaro e na kanakoraoa te aroaro“ (“Do Not Fear,” Liahona, May 2004, 79).

    E reirei aekan te koaua Beretitenti Ezra Taft Benson: E mwakuri te Uea mai i nanona nako tinanikuna. Te aonaaba e mwakuri mai tinanikuna n. … Te aonnaba e kona n katea aron te aomata, ma Kristo e kona n bita aron te aomata” (“Born of God,” Ensign, Nov. 1985, 6).

    Ngke e nora te buakaka n te aonaaba ao ni katobibia Aramwa te burabeti n ana Boki Moomon, e rairaki nakon ana taeka te Atua ibukina e ataia e “iai korakorana iaon aia iango aomata nakon te kabaang, ke te bwai riki teuana, are e a tia n riki nakoia—ngaia are Aramwa e iangoia [bwa] e riai bwa ana kata tamaroan ana taeka te Atua” (Aramwa 31:5).

22. Russell M. Nelson, “Kariaia te Atua Bwa Boton Ara Iango Inanon Maiura,” Riaona, Nob. 2020, 94. Beretitenti Russell M. Nelson e kamataata te kawai aei ngke reireinira taekan karinean te bong ae te Tabati: “Inanon uarerekeu, I kamatebwaia aia mwakuri tabeman ake a tia ni karaoi rinanin bwaai aika a na karaoi ao bwaai aika a na aki karaoi n te Tabati. Ao bon imwina riki are I reiakinna man koroboki aika tabu bwa arou ao anuau n te bong ae te Tabati e katerea te kanikina imarenau ma Tamau are i Karawa. Ma te mataata anne, I aki manga kainnanoa rinanin bwaai ake a na karaoaki ao bwaai ake a na aki karaoaki. Ngkana N na karaoa te babaire bwa te mwakuri ni kakukurei e raoiroi ke e aki ibukin te Tabati; I titirakinai, ‘Tera te kanikina ae i tangiria bwa N na angan te Atua?’ Te titiraki anne e karika au rinerine iaon te Tabati bwa e na oota raoi” (“Te Tabati bon te Bong ni Kakukurei,” Riaona, Meei 2015, 130).

23. E reirei Unimwaane David A. Bednar bwa “tuan te raoiroi … e buokiira n taraa riki are iaon baika ti bon tangiri ao tangiran ake a bon nako mai i nanora man karekean nonoori n koaua aika a akea tokiia man kakawaki ngkai ti rinanon waaki aika a kakaokoro, kakaewenako, rinerine, ao baika a riki ni maiura n te maiu aei” (“Tuan Au Euangkerio,” Riaona, Meei 2021, 123–24).

24. Ruka 18:22.