Te Tamaroa n Oneaki Mwiina n te Mannang: Kawain te Kabwarabure
Ni maiu n te kawai are ko anga te tamaroa n oneaki mwiina n te mannang man maium bon te mwakuri n onimaki ae iriira te Tia Kamaiu.
N ana Moan boki Tamuera bon iai te karaki ae e aki bati n ataaki ae karakinan Tawita, uean Iteraera n taai aika a na roko, ao te aine ae arana Abikara.
Imwiin maten Tamuera, Tawita ma ana mwaane a kiitana te Uea ae Tauro, are e kataia n anaa maiun Tawita. A tararuaia tiibu ao ana toro te aomata ae kaubwai ae arana Nabara, te aomata ae kii-unuun. E kanakoia 10 ana mwaane Tawita bwa a na kamaura Nabara ao ni butiia te amwarake ao bwaai ake a rangii kainanoi.
E kaeka Nabara nakon ana bubuti Tawita ma te aki karaunano ao e kaokiia ana mwaane n akea kanoan-baia.
Ma te nano n uun, e a katauraoiia ana mwaane Tawita bwa a na kaitaraa Nabara ao ana kaainga, ao n taku, “Ao e kaoka ae buakaka n anganai ba boon ae raoiroi.”1 Temanna te toro e a tuanga Abikaira, are buun Nabara, taekan ana kateibuaka buuna nakoia ana mwaane Tawita. E kawaetata Abikaira n ikotii amwarake ao bwaai ake a bati ni kainnanoaki ao e a mwananga.
Ngke e kaitibo ma ngaia Abikaira, e “bobaraki i matan Tawita ao e kabo matana ma aontano,
“Ao e katorobubua i rarikin waena, ao e kangai, Au toka, e na mena boon te bure i aou, i bon i aou. …
“Ma ngaia aei, … E a tia Iehova n tauko ba ko na aki rin i nanon te raraa ni bure iai, ma n ira tangam n oini baim. …
“… Ao ngkai te bwai n tituaraoi aei ae e uotia am toro nakon au toka, a na anganaki rorobuaka. …
“I butiko, ba ko na kabwara ana bure am toro te aine. …
“Ao e taku Tawita nakon Abikaira, E na karaoiroaki Iehova, ae Atuaia Iteraera, ae kanakomaiko n te bong aei ba kona butimaeai:
“Ao e na materaoi rabakaum, ao ko na kabaia, ngkoe ae ko tauai n te bong aei ba N na aki rin n te raraa ni bure iai, ao ba N na aki ira tangau n oini baiu. …
“Ao Tawita e anai baike e uoti nakoina, neierei mai nanoni baina ao e taku nakoina, Naako ma te raoi nakon am auti; … I kan ongo ni bwanaam, ao I mutiakiniko.”2
A kaai n taonnako ma te rau.
N te rongorongo aio, e kona n nooraki Abikaira bwa te aekaki n aine ae mwakaroiroi ke kanikinaean bannan Iesu Kristo.3 Rinanon Ana anga karea, E kona n kanakoi kabaebae man ara bure ao rawawatan nanora ao n anganiira te boutaka ni maiura are ti kainnanoia.4
N ai aron Abikara are e kukurei n anaa iaona ana bure Nabara, ai aron naba te Tia Kamaiu—n te kawai ae aki konaa n iangoaki—E anai ara bure nako aona ao aia bure naake a tia n kammarakiira ke n kauniira.5 I Ketetemwane ao iaon te kaibangaki, E anai buree aikai. E anganiira te kawai bwa tina kanakoa te nano n irantaanga ni karekeikai. Te “kawai” anne bon rinanon te kabwara bure—e kona n riki bwa te bwai ae e rangi ni kangaanga arona ao te kabanea naba n tamaroa n namakin ae kona konaa n rinanona. N te kawai nakon te kabwarabure, mwaakan ana anganano Iesu Kristo e kona n rootii maiura ao ni moana kamaiuan nanora ma tamneira.
Beretitenti Russell M. Nelson e a tia n reirei bwa te Tia Kamaiu e anganiira te konaa ni kabwarabure:
“Rinanon Ana Mwakuri ni Kamaiu, ko kona ni kabwarai aia bure ake a tia ni kamarakiko ao n aki kona ni butimwaai bukinaia n aia mwakuri n aki ako nakoim.
“E bebete riki kabwaraan ana bure te aomata ae e kabwara ana bure ma te koaua ao te nanorinano. Ma e na anganiko te Tia Kamaiu te konabwai ni kabwarai aia bure ake a tia ni bwainikiriniko ni ikawai aika mwaiti. Ngkanne aia mwakuri ni kamarakiko a na aki kona ni manga karawawataa tamneim.”6
Uotakin amwarake ma bwaai ake a nang kainanoaki iroun Abikaira e kona n reiakiniira bwa te Tia Kamaiu e anga nakoia ake a tia n maraki ke n ikoaki te akoaki ma te ibuobuoki are ti kainanoia bwa ti aonga n manga okirii arora ngkoa.7 Tiaki katukaki bwa tina aitara ma mwiin aia mwakuri aomata i bon iroura; ti bon konaa naba n manga kaokaki ao n anganaki te tai bwa tina kamaiuaki man rawawatan te nano ao mwakuri ake a kona n roko imwiina.
E a tia n taetae te Uea ni kaangai: “Ngai, te Uea, N na kabwara ana bure are I taku bwa N na kabwara, ma ngkami kam riai ni kabwarai aia bure aomata ni kabane.”8 E kantaningaira te Uea bwa tina ikabwarabure ibon ibukira.9 Ma E aki tuangiira bwa ti na karaoia n akean Ana ibuobuoki, Ana tangira, ao Ootana. Rinanon ara berita aika tabu ma te Uea, ti kona n tatabemaniira ni karekea kakorakoraara, kairara, ao te ibuobuoki are ti kainanoia bwa ti na kaai ni kabwarai buure ao ni kabwaraaki ara bure.
Taiaoka ataia ae kabwaraan ana bure temanna tiaki nanona bwa kona reitinako n tiku inanon te maraki. “Ti kona n mwakuriia kabwaraan ana bure temanna ao n teimatoa n namakina ana wirikiriki te Tamnei bwa kona kararoako mai irouia.”10
N aron Abikaira ngke e buoka Tawita bwa e na aki karekea bwa “karawawataana”11 ao n karekea te ibuobuoki are e kainnanoia, ngaia are te Tia Kamaiu e na buokiko. E tangiriko, ao E na kaitibo ma ngkoe iaon kawaim “ma te kamaiu n Baina.”12 E kainnanoa am rau.
I a tia n karekea kakoauaan ana kakai Kristo n kamaoan nanou ae rawawata. Man ana kariaia tamau, I a tibwaia bwa I ikawairake n te mweenga ae I aki namakina iai te mano n taainako man mwiin te taetae n tinaraaeaki. Inanon kairakeu, I rangi n ribaa tamau ao iai unin nanou mwiin te maraki anne.
Inanon ririki ao au kekeiaki n kakaea te rau ao kamaiuau iaon kawain te kabwara bure, I a ataia ae Natin te Atua are e mate ibukin au bure, bon te Tia Kabooi Maiura are e na kamaiuiia naba ake a tia ni kamarakai. I a bon aki kona n onimakina te moan koaua ngkana I aki onimakina te kauoua.
Ngkai e rikirake au tangira ibukin te Tia Kamaiu, ao e rikirake naba kan onean mwiin te maraki ao te un ma Baina ni kamaiu. Bon te kataneiai inanon ririki aika bati, e kainnanoa te ninikoria, taotaonaki n nano, katiaan raoi te beku, ao reiakinara bwa tina onimakina mwaakan te Tia Kamaiu n kamaiu. E tiraua te mwakuri ae N na karaoia, ma nanou e aki teimatoa n rawawata. I a tia n anganaki te “nano ae boou”13—te nano are e a tia n namakina ana tangira ae nano te Tia Kamaiu, are e tiku irarikiu, are e kairai ma te nano n taotaona n nano nakon te tabo ae tamaroa riki, are e tang ma ngai, ao e atai rawawatau.
E tia te Uea n anganai kakabwaia aika bati ni buoka te kainnano n aron are e uotii Abikaira nakon Tawita. E a tia n anganai taan ibuobuoki inanon maiu. Ao ae moan kakawaki ao n korakora bitakina bon au reiitaki ma Tamau are i karawa. Rinanon te Tia Kamaiu, I karabwarabwa bwa I a tia n ataa ana tangira te Tama ae e aamarau, ao e kaawakinai ao ni kairai.
E taku Unimwaane Richard G. Scott: “Ko aki kona ni kamaunaa te bwai ae ea tia n riki, ma ko kona n kabwara bure.14 Te kabwara bure e bon kamaoi ikoaki aika buakaka, kananokawaki, ibukina bwa e kariaia ana tangira te Atua n tokanikai n urui ana kairoro te namakin ni kairiribai. E kaitiaka am namakin ma am iango ibukin te kabomwii. E karaoa nneia ibukin katiakakiia, kamaiuakiia, kaokan tangiran te Uea.”15
Tamau e a tia naba ni karekea te bitaki n nano ae kakai n ririki aika a tibwa nako ao e ukora ana anai nano te Uea—te bwai ae I aki kantaningaia n te maiu aei. Teuana riki te kakoaua nakoiu ibukin bwaninin ao mwaakan te bitaki ae kona n reke mai iroun Iesu Kristo.
I ataia bwa e kona n kamaiua te tia bure ao naake e bure te aba nakoia. Bon ngaia te Tia Kamaiu ao te Tia Kabooa te aonnaba, are E anga maiuna bwa ti aonga ni manga maiu imwiin te maiu aio. E taku: “E mena Tamnein te Uea iaou, bukina bwa e a tia ni kabirai bwa n na tataekina te euangkerio nakoia akana aki kaubwai, e kanakomaiai ni kamaiuia ake a uruaki nanoia, bwa n na tuangiia taenikai tekainaomataaki, ao akana a mataki te manga nooraba, ao bwa a na kainaomataia akana a uruaki nanoia.”16
Nakoia ni kabane ake a uruaki nanoia, tautoronaki, ikoaki, ao tao naake a matakii man te maraki ke te bure, E anga te kamaiuaki, te kamarurungaki, ao te kainaomataki. I kakoauaa bwa te kamaiuaki ao te kamarurungaki are E anga e bon koaua. Ana tai temanna n kamaiuaki bon nakon temanna ma temanna, ao ti aki kona n motika taekan ana tai temanna. E kakawaki bwa ti na anganiira te tai ae riai ibukin kamaoan ao te akoako nakoira inanon karaoan aio. Te Tia Kamaiu moan te nanoanga ao e tei n tauraoi n anga te ibuobuoki are ti kainnanoia.17
Iaon te kawai nakon te kabwarabure ao te kamarurungaki e na roko te rinerine n aki reita te kawai aika aki raraoi ke reitakira n ara utu ke taabo riki tabeua. Nakoia naake ti kona n anai nanoia, ti kona n anga te akoi ibukin te buakaka, te tangira ibukin te kairiribai, te aamarau ibukin te aki akoakoi, te mano ibukin te nanokawaki, ao te rau ibukin te itabaraara.
Ngkana ko kona n anga te bwai ae ko aki anganaki bon mwakoron te kamaiu ae mwakaroiroi rinanon te onimaki iroun Iesu Kristo. Ni maiu n te aro are ko anga, n aron are e taekinna Itaia, te tamaroa e oneaki mwiina n te mannang18 bon te mwakuri n onimaki are e ira ana katooto te Tia Kamaiu are e karawawataaki iai ni kabane bwa E aonga n buokiia ni kabane.
Iotebwa mai Aikubita e maiuakina te maiu ma mannang. E ribaaki irouia tarina, e babakanikawaiaki, kabonakoaki nakon te tautoronaki, e bure kabureakina, ao mwanuokinaki taekana iroun temanna are e berita bwa e na buokia. E ngae n anne e bon onimakina naba ana Uea. “E memena Iehova iroun Iotebwa”19 ao e katabui ana kangaanga nakon te kakabwaia ao rikirakena—ao kamaiuan ana utu ao ni kabanea Aikubita.
Ngke e kaitibo ma tarina Iotebwa ngkai ai te tia kairiiri ae kakannato i Aikubita, ana kabwarabure ao ana taratara ae onoti a oti n ana taeka ake e taekin:
“Ao ngkai kam na tai raraoma, ao tai un iroumi, ngke kam kaboai ngkoa nako ikai: bwa E kanakomaiai te Atua imwaimi bwa na kamaiua te aba. …
“Ma ngaia ae tiaki ngkami aika kam kanakomaiai, bwa te Atua.”20
Rinanon te Tia Kamaiu, maiun Iotebwa e riki bwa “te tamaroa n oneaki mwiina n te mannang”21
Kevin J Worthen, te beretitenti n BYU, e tia n taekinna bwa te Atua “e kona n karokoa te raoiroi … tiaki tii man ara tokanikai ma bon man ara kabwaka naba ao aia kabwaka tabeman ake a anganiira te maraki. Te Atua bon te tamaroa ao e mwaakaroiroi.”22
I kakoauaa bwa te banna ni katooto ae moan te korakora n te tangira ao te kabwarabure bon ara Tia Kamaiu, Iesu Kristo, are ngke e korakora marakina e taku, “Tamau, Ko na kabara aia bure; ba a aki ata ae a karaoia.”23
I ataia ae Tamara are i Karawa e tangira te tamaroa ao te kantaninga ibukiia Natina n tatabemaniia. N Ieremia ti wareka ae kangai, “Ba I bon atai nano nako aika I kariki nako imi, bon ana taeka Iehova, aika nano ni kariki rau.”24
Iesu Kristo bon am Mesia, te Tia Kabooi Maiura ao Tia Kamaiu ae tangiraki, ao e atai kakain nanora ni kabane. E tangira kamarurungakim ao kukureim. E tangiriko. E tang ma ngkoe n rawawatam ao ni kimwareirei n anganiko n aei bwanin. Ti bia anaia nako nanora ao n anaa Baina ae tatangira are e taakinna,25 ngkai ti nakonako iaon tkawain te kabwarabure bon au tataro n aran Iesu Kristo, amen.