Te Kukurei ae Akea Tokina
E koaua, ae te kukurei ao te maiu ae akea tokina ma kaain ara utu bon ngaia boton ana babaire ni kakukurei te Atua.
Raoraora, tarira, ao mwanera aika kam tangiraki, kam uringnga ngke kam moan kakoaua ke n ukora koauan, te kukurei ae akea tokina?
Ma bon aron te maiu aei. Ti “tabe n rikirake.” N tabetai ao iai kangangan te reitaki n te utu. Ao te aonaaba aei, e beroro, e ibetutu, e kairoro, ma te mwamwanaki ao te uarao. Ma eng, ma mai “nanora raoi ni koaua,”1 ti kakoauaa, ke ti kani kakoauaa, n te tabo teuana, te anga teuana, bwa bon iai ao e kona n reke te kukurei ae akea tokina.
“Te kukurei ae akea tokina” bon tiaki te kanoa ni mii. E koaua, te kukurei ae akea tokina ao te maiu ae akea tokina ma kaain ara utu bon ngaia boton ana babaire te Atua. E katauraoa te kawai are karika kakukurein mwanangara n okiria.
E bati te bwai ae ti riai ni kukurei man kakaitau iai. E ngae n anne, akea iroura ae kororaoi, ke te utu ae kororaoi. E na iai inanon ara reitaki te tangira, te itamwaomwao, anuara aika onoti ma bon iai naba te totoko, te rawawata, ao n tabetai te maraki ae korakora.
“Ba aroia aomata, ngkai a bane ni mate iroun Atam, ao ai aroia naba iroun Kristo a na bane ni kamaiuaki.”2 Ti maiu inanon Iesu Kristo n te maiu ae aki mamate—Ana bwaintangira are te mangauti. Ngkai ti maiu inanon te onimaki ma te ongeaba, te maiu inanon Kristo bon te kukurei ni maiura ae akea tokina ma te Atua ao ara utu.
N te kawai ae akea n ai arona, are ana burabeti te Uea e kairiira nakon te Tia Kamaiu, inanon otenanti n te tembora ao berita aika tabu ake a kaan riki ngkai a roko n taabo aika mwaiti riki. Iai tibwangara ao ara konabwai ni karekei atatai aika tabu n aron, te tangira, te rairannano, te ikabwarabure imarenara ma ara utu, n te tai aei ao ae akea tokina.
N karekean te kariaia, I tibwai uoua karaki, aika tabu ake a karakin nakoiu raoraou are a boboto iaon Ana mwakuri Iesu Kristo n bootiia utu ngke katoka marakia aomata inanon roro ma roro.3 “Akea tiana ma akea tokina,”5 “e korakora riki nakon ana kabaebae te mate,”6 Ana Mwakuri ni Kamaiu Iesu Kristo e anganira te rau inanon maiura ake mai mwaina ao te kantaninga inanon maiura ae imwaira.
Ngke a kaaina Ana Ekaretia Iesu Kristo ibukiia Aika Itiaki ni Boong aika Kaitira, raoraou ao kainnabana a karekea te kimwareirei ngke a ataia bwa bon tiaki tokin te utu ngke “e karaureia te mate.” N ana auti te Uea, a kona iai utu ni katiteuanaki n te tai ae akea tokina (kabaeaki).
Ma e rawa raoraou aei ni kabaeaki ma tamana. “E bon aki raoiroi arona nakon tinau. Bon tiaki te karo ae tamaroa nakoia natina.” e reitia n taku. “E riai n tataninga moa tamau. Bon akea nanou ni karaoi mwakuri aika tabu ibukina n te tembora ke ni kabaeaki ma ngaia.”
Inanon teuana te ririki, e aki mamatam, tataro, ao e reitaki ma te Uea ibukin tamana. Tokin te tai, e a tauraoi. E karaoi mwakuri aika tabu ibukin tamana n te tembora. Imwina, e taku, “Ngke I matu ao e kaoti nakoiu tamau inanon te mii, e kunnikainna n ae mainaina. E a tia ni bitaki. E taku, ‘Taraai. I a rang n itiaki. Ko rabwa ibukin karaoan mwakuri aika tabu ibukiu n te tembora.’” E reitia n taku tamana, “Teirake ao manga naako riki nakon te tembora; bwa e tataningaa bwabetitoana mwanem.”
E taku raoraou, “Au bakatibu ao naake a tia ni mate a bon kakariaria karaoan aia otenanti n te tembora.”
“Ngai irou,” e taku, “te tembora bon n nen te kamaiuaki, te reirei, ao kinaakin ana Mwakuri ni Kamaiu Iesu Kristo.”
Kauoua ni karaki. Temanna naba raoraou e botumwaka ni kakaea rikina. E tabe ni kakaea aran tibutoruna te unimwane.
N te ingabong teuana, e taku raoraou bwa e namakina te rau are roko mairoun te aomata n ana ruu. E tangiria te mwaane aei ni kuneaki man ataaki arana irouia ana utu. Te mwaane aei e namakina te rawawata ibukin baike e a tia n rairi nanona mai iai. Te mwaane aei e kaongoa raoraou aei bwa ngaia bon tiaki raraana DNA teuaio are e a bon tia n taku n te moantai bwa tibutoruna te unimwane. “Are nanona bwa,” e taku raoraou aei, “Ngke I a kunea aran tibutoru te unimiwane ao ngaia I a tibwa ataia ae bon tiaki kaain ara utu bwa e bure te rekooti are angkoa tibutoru te unimwane.”
E itiaki taekan te reitaki aei, e taku raoraou aei, “I namakina te rau. E bati okoron ae ko kinaia bwa antai am utu.” E iango raoraou aei, “Te mwaanga ae bwaoua tiaki nanona bwa te aroka ae mate. Aron rokora n te aonaaba aei e memere kakawakina nakon kinaakira bwa antai ngaira ngkana ti kitanna.”
Koroboki aika tabu ao baika tabu aika ti karekei n aron te kamaiuaki ma te rau, ai uana naba ma naake a mena n te aonaaba n tamnei a kaota kakawakin nimaua ana reirei te euangkerio.
Te moan: Boton ana babaire te Atua ni kamaiu ao ni kakukurei, bon Iesu Kristo, ao inanon ana Mwakuri ni Kamaiu, e reke iroura te berita bwa e na manga bootaki tamneira ao rabwatara “n aki manga kamaenakoaki, bwa [ti] aonga ni karekea te kukurei ae bwanin.”6
Kauoua: Mwakuri ni Kamaiu—katiteuanaki inanon Kristo—e reke iroura ngkana ti kaota te onimaki ao ni kaoti uaan ara rairannano.7 N te maiu ae mamate, ao n te maiu ae aki mamate. Otenanti n te tembora a bon aki kona ni bitira ke ni bitia naake a mena n te aonaaba n tamnei. Ma otenanti aika kakannato aikai a uotira nakon berita aika tabu ma te Uea, are anganira te bonnano ma Ngaia ao bon imarenara.
E bwanin kukureira ngkana ti namakina ana nanoanga ao kabwaraan ara bure iroun Iesu Kristo. Ao ngkana ti maiuakina te nanoanga ao te ikabwarabure imarenara, te nanoanga are ti karekea ao are ti anga e kona ni kaeti mwakuri aika katanginano inanon n te maiu aei.8
Kateniua: E atai arora ao e tangiriira n ae kororaoi te Atua. “E na aki kamaemaeaki te Atua,”9 ke ni kona ni mwamwanaki. N te nanoanga ma te motiraoi ae kororaoi, E mwaneira inanon baina ngaira ake ti nanorinano man karinerine.
N te tembora ae Kirtland, e karekea te mii ni burabeti Iotebwa Timiti ibukin tarina ae Alvin bwa e a kamaiuaki n te abanuea ae te tiretio. E mimi te burabeti ae Iotebwa ibukina bwa e mate Alvin imwain ae karekea te otenanti ni kamaiu ae te bwabetito.10 E karaunano bwa e anga ana kabwarabwara te Uea ae kangai bwa “e na motiki [taekara] ni kaineti ma [ara] mwakuri, ao ni kaineti ma baike e tangiri [nanora].”11 E na kakoaua tamneira n ara mwakuri ao nanora.
Ti kakaitau bwa ti ataia ae aomata aika a maiu ao “maate ake a rairannano a na kamaiuaki, inanon aia ongeaba nakon otenanti n ana auti te Atua”12 ao Ana Mwakuri ni Kamaiu Kristo. N te aonaaba n tamnei, naake a mena inanon te bure ma te kairua a bon anganaki te kona n rairannano.13
N iterana are teuana, naake a bon rinea karaoan ae buakaka, ao ake a bon tataona aia rairannano, ke ake bon iai aia atatai ngke a urua ana tua te Atua ibukin aia iango bwa e bebete te rairannano, a na bon motikaki taekaia iroun te Atua ao “a na manga uringi [aia] bure.”14 Tiaki kona n urua te tua n te Kaonobong, ao ni kantaninga kabwaran ara bure ngkana ti kana te toa n te Tabati. Ngkami mitinare ao naake a taku bwa karekean ana kairi te Tamnei e bon aki reke man te ongeaba nakon tuan te mwakuri ni mitinare ke tuua, taiaoka ataia bwa te ongeaba nakon kainibaire ao tuua a kaoa te Tamnei. Akea mai iroura ae riai n tuka te rairannano. A moanna n reke kakabwaia man te rairannano ngkana ti moana ara rairannano.
Kaaua: E anganira te tibwanga te Uea bwa ti na riki n ai Arona ngkana ti karaoi aia otenanti koraki ake a kainnanoia ao aki kona ni karaoia n te tai aei. E onrake iai nanora ao ti kakororaoaki15 ngkai ti a riki bwa “taan kamaiu … iaon maungan Tion.”16 Ngkai ti beku ibukia tabemwaang, te Tamnei ae Raoiroi ni Berita e titambwana te otenanti ao ni katabua ane anga ao ane karekea. Ane anga ao ane karekea a kona ni karaoi berita aika tabu, ao inanon te tai a karekei kakabwaia ake anganaki Aberaam, Itaaka, ao Iakobwa.
Kabanea, kanimaua: Tuan te Aroaro17 e reirei bwa bonnanon te rairannano ao te kabwarabure a kaoira bwa ti na anga baike ti tangiri man kainnanoi.
N tabetai ao ara tauraoi ni kabwarai aia bure aomata e katerea nakoia aomata ao bon nakoira bwa e koaua te rairannano ao karekean kabwaraan ara bure. N tabetai te tauraoi n rairannano ao te konamaki ni kabwarai buure a roko n taai aika kakaokoro. Ara Tia Kamaiu bon te Tia Tei imarenara ma te Atua, ao E buokira ni kinaira ibon iroura ao imarenara ngkana ti kaania. Riki ngkana ti namakina te maraki ma te korakai, kamaoan te reitaki ae uruaki inanon ara reitaki e bon matoa, ao tao e taraa n aki kona n reke iroura. Ma e anganiira te korakora ao te wanawana karawa ao e rietaata riki nakon ara kona i bon iroura ni karekea te aki bwarannano ao te teimatoa.
Ti namakina te kabebeteaki ngkana ti ataia bwa iai raora. E ataa ara kangaanga Ara Tia Kamaiu.18 N ana ibuobuoki Ara Tia Kamaiu, ti kona ni kaki kainikatongara, marakira, ao ara bure nakon te Atua. Ma ti kona naba n namakinna bwa ti a tamaroa riki ngkai ti onimakinna bwa e na kamarurunga ara reitaki.
Te Uea, are E bon norii man atai raoi bwai ni kabane, e na kabwara ana bure ane E bon baireia; ngaira (aika ti kabwaka) ti riai ni kabwarai aia bure aomata nako. Ngkana ti kaniia te Tia Kamaiu, tiaki tii taraira. E uarereke ara motiki taeka ao ti bwaina riki kabwaraan buure. Onimakinan Korakorana, Ana nanoanga, ao Ana kamaiu19 e kona ni kainaomataira man te kauntaeka, te un, te bwainikirinaki, te maroa, te motibuaka, ao kakaewenako n te rabwata ma te iango ake bon irian te maiu aei. Te kukurei n aki toki tiaki nanona bwa ai bon tii te kukurei naba inanon te reitaki. Ma teuana te ngaa te ririki are e na kabaeaki iai Tatan20 e na anganira ara tai are ti kainnanoia bwa ti na karikirakea te maiu n tangira, te aki motikitaeka, ao karekean buokan ara kangaanga inanon maiura are e na katauraoira nakon te maiu ae akea tokina.
Ti nora karawa ma ara reitaki ibon imarenara.21 Ana mwakuri ma mimitongin te Atua bon uotan te kukurei ae akea tokina.22 Te maiu ae akea tokina ao te karietataaki bon ataakin te Atua ao Iesu Kristo, inanon te mwaaka n Atua, ike bon Ngaia n nera ni koaua.23
Tariu ao mwaaneu, E maiu Tamara are i Karawa ao Ana Rikitemanna. A anga te rau, te kukurei, ao te kamaiuaki nakoia reeti ao neewe nako, ao nakoira n tatabemanira. E kaira te kawai ana burabeti te Uea. E teimatoa n iai kaotioti ni boong aika kaitira. Ke ti kaniira nakon te Tia Kamaiu inanon ana auti ae tabu te Uea, ao ke E kaniira riki nakon te Atua ao nakoia raora, ngkai ti botii nanora ma anuan Kristo aika te tangira, koaua, ao te nanoanga inanon roro nako—n te tai aei ao ae akea tokina, inanon te kukurei ae akea tokina. Inanon Iesu Kristo, e kona ni karaoaki aei; inanon Iesu Kristo, e koaua aei. I kaota au kakoaua, n Arana ae tabu, Iesu Kristo, amen.