Rongorongon te Kaunganano
I kaungai ngkami bwa kam na teimatoa ni kakorakorai ngkami bwa kam aonga ni kona n okira Tamara are i Karawa ao Iesu Kristo.
Tariu ao mwaneu, I rangi ni kukurei n ikotaki ma ngkami n te maungatabu ni kabuta aei n Ana Ekaretia Iesu Kristo ibukiia Aika Itiaki ni Boong aika Kaitira. Ti a tia n namakina ami onimaki ao ami tangira n taabo ake kam mena iai. Ti a tia ni bane ni kanakoraoaki man reirei aika kaunganano, kakoaua aika korakora, ao anene aika rangi tamaroa.
I kaungai ngkami bwa kam na teimatoa ni kakorakorai ngkami bwa kam aonga ni kona n okira Tamara are i Karawa ao Iesu Kristo. Te tabo are ko mena iai iaon kawain te berita ae tabu, ko na korakai inanon am tai ni kaitarai kariiri n te maiu aei ke ana totoko Tatan.
N aron are e tuangai tinau ngke I ngurengure n aron matoatoan te bwai teuana, “Oo, Hal, eng e bon matoatoa. Ma e bon riai n riki n arona anne. Te Maiu aei bon te tai ni kataaki”
E kona n taekinna ma te karaurau, ma te moangare, bukina bwa uoua bwaai aika e atai. E ngae ngke e rinanon te kangaanga, ma e kakawaki irouna bwa e na okira mweengana ni maeka ma Tamana are i Karawa. Ao e ataia ae e kona ni karaoia rinanon ana onimaki iroun te Tia Kamaiu.
E namakinna bwa E a kaan ma te Atua. Inanon boong ake e a moanna n ataia bwa e a kaan mate, e maroro ma ngai taekan te Tia Kamaiu ngke e wene iaon ana kainiwene. Iai te mataroa nakon te ruu teuana ae kaan ma ana kainiwene. E moangare ao e taraa te mataroa ngke e taekinna ma te karaurau ae e nang Nooria. I uringnga ngke I taraa te mataroa ao n iangoa te ruu are irarikina.
E a mena ngkai n te aonaaba n tamnei. E teimatoa ni karekean ana kouru are e na oki ni maeka ma Tamana are i Karawa rinanon kataakina ni maiuna n rabwata.
Rongorongon ana kaunganano are e katikui ibukira a kabwarabwaraaki inanon Moronaai 7, are e kaungaa iai natina Moomon te mwaane ae Moronaai ma ana botannaomata. Bon rongorongon te kaunganano nakoia te roro are imwiina kaanga are iroun tinau nakoia ana utu. Moomon e a manga tibwauaa rongorongon te kaunganano anne nakoia ni kabane ake iai nanoia nako iai, rinanon katakiia ni kabane inanon te maiu aei, ibukin te maiu ae akea tokina.
E moanna Moomon ni moan kibun Moronaai 7 ma ana kakoaua iroun Iesu Kristo, anera, ao Tamnein Kristo, are e anganiira te kona n ataa te raoiroi man te buakaka ao n rinea ae eti.
E moanibwaia Iesu Kristo, n aron ake a karaoia naake a bane n nakoraoi n anga te kaunganano nakoia ake a kekeiaki ni karokoia ni mweengaia i karawa:
“Bwa akea te aomata ae kona ni kamaiuaki, n aron ana taeka Kristo, ti ngkana a onimakina arana; ngaia are, ngkana arona bwa a toki bwaai aikai, ao e a tia naba n toki te onimaki; ao ai kananoangara aron te aomata, bwa a riki n aron ae akea te kabomwi are e a ti a ni karaoaki.
“Ma nooria, tariu aika kam tangiraki, I motika taekan bwaai aika a raraoi riki ibukimi, bwa I motikia bwa iai onimakinan Kristo iroumi ibukin ami nimamannei; bwa ngke arona bwa akea onimakinana ao ngkanne kam aki tau ni warekaki i buakoia aomatan ana ekaretia.”1
E noora te nimamannei Moomon bwa kaotan korakoran aia onimaki. E noriia bwa a onimakina te Tia Kamaiu. E kaungaia man kinaakin te onimaki anne. E teimatoa Moomon n anganiia te ungannano ni buokiia bwa ana nooria ae aia onimaki ao nimamanneia e na karikirakea aia koaua ao aia onimaki n aia tokanikai are e reke man korakaia:
“Ma ngaia are, tariu aika kam tangiraki, N na taetae nakoimi ni kaineti ma te kaantaninga. Kam na kangaa ni kona ni karekea te onimaki, ma ti ngkana iai te kantaninga iroumi?
“Ao teraa are kam na kantaningaia? Nooria, I taku nakoimi bwa kam na karekea te kantaninga rinanon ana mwakuri ni kamaiu Kristo ao mwaakan mangautina, bwa kam na kateirakeaki nakon te maiu are akea tokina, ao aio ibukin ami onimaki irouna n aron te berita.
“Ngaia are, ngkana iai ana onimaki te aomata e na riai n iai te kantaninga irouna; bwa ngkana akea te onimaki ao bon akea te kantaninga irouna.
“Ao riki, nooria, I taku nakoim bwa e bon aki kona n reke te onimaki irouna ma te kantaninga, ma ti ngkana e nimamannei, ma n nanorinano inanona.”2
Ngkanne e kaungaia Moomon man kakoauaana ae iaon kawaia ni karekei bwaintangira ake a kaonaki nanoia ma ana tangira Kristo ae itiaki. E kabwarabwara aron rekereken iteran nako te euangkerio aika kakaokoro n te onimaki iroun Iesu Kristo, te nimamannei, te nanorinano, te Tamnei ae Raoiroi, ao te kaantaninga ae matoa ni karekean te maiu are akea tokina. E kaungai nanoia n te kawai aei:
“Bwa akea ma ibuakoia ae butimwaeaki iroun te Atua, ma ti ngkana e nimamannei ma n nanorinano nanona, ao e taekinna ni mwaakan te Tamnei are e Raoiroi bwa Iesu bon te Kristo, ao e na riai n iai irouna te tangira ae kororaoi; bwa ngkana akea te tangira ae kororaoi irouna ao bon te akea ngaia; ngaia are e riai n iai te tangira ae kororaoi irouna.”3
Iangoan taai aika nako, I kona n noria ngkai bwa te bwaintangira n te tangira ae kororaoi anne—ana tangira ae itiaki Kristo—ni kakorakora, ni kairiiri, ni kamatoaia, ao ni bita tinau n ana kekeiaki ni kawaina nakon mweengana.
“Ao te tangira ae kororaoi e taotaonaki n nano, ao e akoi, ao e aki bakantang, ao e aki kainikatonga, ao e aki ukoukora oin nanona, e aki kakai un, e aki iangoa te buakaka, ao e aki kimwareirei n te buakaka ma e kimwareirei n te koaua, e keiakin bwaai ni kabane, e kakoauai bwaai ni kabane, e kantaningai bwaai ni kabane, ao e teimatoa n nanomwaka ni bwaai ni kabane.
“Ngaia are, tariu aika kam tangiraki irou, ngkana akea iroumi te tangira ae kororaoi, ao bon akea ngkami, bwa akea kabwakan te tangira. Ngaia are, kateimatoaa am tangira ae kororaoi, are te kabanea ni korakora i aon bwaai nako, bwa bwaai ni kabane a na bon bane ni bwaka—
“Ma te tangira ae kororaoi bon ana tangira Kristo ae itiaki, ao e teimatoa n uaa te toki; ao ane e kuneaki irouna n te kabanea ni bong, ao e na bon nakoraoi ibukina.
“Ngaia are, tariu aika kam tangiraki irou, tataro nakon te Tama ma korakoran nanomi ni kabane, bwa kam na kaonaki n te tangira aio, are e a tia ni katoka iaoia ni kabane ake taan irira Natina, are Iesu Kristo ni koaua; bwa kam aonga n riki bwa natin te Atua; bwa ngkana e kaoti ao ti na riki n arona, bwa ti na nooria n arona ngkai; bwa tia aonga ni karekea te kantaninga aio; bwa ti aonga ni kaitiakaki n arona ae e itiaki.”4
I rangi ni kakaitau ibukin te kaunganano are e oti n ana banna ni katooto Moomon ma ana reirei. I a tia ni kakabwaiaaki iai n aron naba are i karekea mai iroun tinau. A tia burabeti man ana tai Atam nakon te bong aei, rinanon te angareirei ao n te banna ni katooto, n anganai te korakora.
Norakin te okoro iroiuia te koraki ake i kinaiia ma aia utu, ao I a tia ni baireia bwa na aki taekin rongorongon aia kangaanga ke bwaintangira are iai irouia ae korakora nakoia aomata. E ngae n anne te bwai ae I a tia nooria e kaungaa nanou ao ni bitai nakon ae raoiroi riki.
Man te kangaanga ae na kona n riki man ukoukoran ana bwai aika e karabai, ao n na karina te ribooti iaon ana kaunganano kainabau ae mataata. I karaoia ma te karaurau. Bon te aomata ae eaki rangi ni boo ibuako ao n aki ukora kaaitauakina ke kamoamoakina.
Ti a tia ni mare inanon te maan ae 60 te ririki. Ao ibukin bwaai ake ia tia n reiakin ae ngaia I a atai ngkai nanon taeka man booki aika tabu n aron aikai: onimaki, kaantaninga, te nimamannei, te teimatoa, n aki ukoukori oin nanora, kimwareirei n te koaua, n aki iangoi bwaai aika buakaka, ao kabaneana te tangira ae kororaoi.5 N aron au taneiai anne I kona n kakoauaa ae aomata a kona n anai iango aika tamaroa akanne inanon maiuia ni katoabong ngkai a tokanikai inanon kataakiia inanon maiuia.
A mwaiti ibuakomii aika kakauongo ngkai ake a kinaiia aekan aomata akanne. A mwaiti mai ibuakomi aika bon aomata aikanne. Ti bane ni kainnanoi aekan ni katooto ni kaunganano aikanne ma raoraora aika a tangiriira.
Ngkana ko tekateka ma temanna bwa te titita ke te tari n ibuobuoki nakoina, ko tei ibukin te Uea. Iangoa te bwai ae E na kona ni karaoia ke n taekinna. E na kaoia bwa a na Nakoina. E na kaungaiia. E na atai ao ni kamoamoa moanakin taian bitaki aika a kainnanoi ni karaoi. Ao E na riki bwa te banna ni katooto ae kororaoi ibukiia bwa ana katotongnga.
Akea ae kona ni karaoa anne n te tai aei, ma inanon ongoraam nakon te maungatabu aei, ko kona n ataia ae iaon kawaim. E atai ni kabane am kangaanga te Tia Kamaiu. E ata aron am konabwai n rikirake inanon te onimaki, am kantaninga, ao am tangira ae kororaoi.
Tuua ao berita aika tabu aika E anganiko bon tiaki kataakim ibukin babairean arom. Bon bwaai n tituaraoi aika a na uotiko rake ni karekean ana bwaintituaraoi ni kabane te Atua ao n okiran mweengaia Tamam are i Karawa ao te Uea, aika a tangirko.
Iesu Kristo e kabooi ara bure. Ti na kona ni karekea te kakabwaia ibukin te maiu ae akea tokina anne ngkana iai Onimakinana ibukin rairan nanora ao n riki n aron te ataei, ae itiaki ao n tauraoi ni karekea ana bwaintituaraoi te Atua ae moan te korakora.
I tataro bwa ko na butimwaea Ana kakao ao ko na anganiia natin Tamara are i Karawa ake tabeman.
I tataro ibukiia mitinare ni kabutaa te aonaaba. A bia kona ni kairaki iroun te tamnei ni kaungaia aomata nako bwa a na tangiria ao ni kakoauaa ae te kakao bon mairoun Iesu Kristo rinanon Ana toro are a tia ni katokaa Arana iaoia.
I Kakoaua bwa E maiu ao e kaira Ana Ekaretia. Ao Bon ngai Ana Tia kakoaua. Beretitenti Russell M. Nelson bon ana burabeti te Atua ae maiu ibukin te aonaaba ni kabane. I ataia bwa e bon koaua. N aran Iesu Kristo ae tabu, amen.