Maungatabu ni Kabuta
Te Kainibaire ibukin Kaotioti nakon Temanna
Okitobwa 2022 maungatabu ni kabuta
12:41

Te Kainibaire ibukin Kaotioti nakon Temanna

Iroun Unimwaane Dale G. Renlund

Man te Kooram n Abotoro n te Tengaun ma Uoman

Ti na riai ni mataata n te kainibaire n aron mwakurin te Tamnei ae Raoiroi. Ngkana ti mwakuri i nanon te kainibaire, te Tamnei ae Raoiroi e kona ni kaotinakoi atatai aika a nano mani kamiimi.

N aroia aika a bati i buakomi, I a tia ni karekea ae bati iroun Unimwaane Diefter F. Uchtdorf n ririki aika a mwaiti. Anne e kabwarabwaraa, tabeua man kanoan, ae n nang taekinna ngkai.1 Ma ngai are, te kabwara bure nakoina …

Bwairati aika a mwaatai a kiba man korakoran aia wanikiba ao irakin kaetieti man te tabo are taua mwiin te kibakiba ni kaineti ma kabonganaan marae ao kawain kibakiba. Ni kamatataa raoi, bwairati a mwakuri i nanon te kainibaire. E ngae ngke a rangi ni wanawana ke a rangi n taarena ngaiia, man ti kibaia inanon te kainibaire aei are a konaa iai bwairati ni mano ni kakoroa bukin te kaantaninga are e kateaki ibukina.

N te aro naba anne, ti karekei oin ara kaotioti i nanon te kainibaire anne. Imwiin te bwabetito, ti anganaki te bwaintangira ae kororaoi ma e tangira te kakamwakuri, te bwaintangira ae te Tamnei ae Raoiroi.2 Ngkai ti kakorakoraira n tiku ni kawain te berita,3 bon te “Tamnei ae Raoiroi … [ae] e na kaotia [nakoira] bwaai ni kabane [ae ti] riai ni karaoia.”4 Ngkana ti aki koaua ke ti aki rau, ti kona ni butiia te Atua ibukin te ibuobuoki.5 Ana berita te Tia kamaiu e mataata raoi: “Kam na bubuti, ao ane kam na anganaki; … ba ane bubuti ao e anganaki.” ”6 Man ana ibuobuoki te Tamnei ae Raoiroi ti kona ni karika arora mairoun te Atua nakon kawaira ae akea tokina.7

Te berita ni karekean te kaotioti nakon temanna rinanon te Tamnei ae Raoiroi e rangi ni karoko nano, n ai aron te wanikiba n ana tai ni kiba. Ao n aroia bwairati ni waanikiba, ti rian n ota n te kainibaire i nanon are e mwakuri iai te Tamnei ae Raoiroi ni katauraoi kaotioti aika a onoti nakon temanna. Ngkana ti mwakuri i nanon te kainibaire, te Tamnei ae Raoiroi e kona ni kaotinakoi atatai aika a nano mani kamiimi, kairi, ao te rau. Aki irakin te kainibaire aei, e ngae ngke wanawanara ke tarenara, ti kona ni mwamwanaaki ao ni kamarakaki ao n urubekeaki.

Booki aika a tabu a karaoa te moan kanoa n te kainibaire aei ibukin aia kaotioti ae onoti nakon temanna.8 Maiuakinan ana taeka Iesu, n aron aika a kuneaki n booki aika a tabu, e karekea te kaotioti nakon temanna. E taku Unimwaane Robert D. Hales: “Ngkana ti tangiria n taetae ma te Atua, ti na tataro. Ao ngkana ti tangiria bwa E na taetae nakoira, ti na ukori booki aika a tabu.”9

Ti reiakinaki naba man booki aika a tabu arora ni karekei oin ara kaotioti.10 Ao ti bubuti ibukin te bwai ae eti ao ae raoiroi11 ma tiaki ibukin te bwai ae kaitaraa nanon te Atua.12 Tiaki bubuti “bwaai aika a aki riai,” ma nanora aika aki tau ni uotirake oin nanora ke ni kakoroa oin nanora ni kukurei.13 Ma ae moan te kakawaki riki, ti na butia Tamara i Karawa n aran Iesu Kristo,14 ma ni kakoauaa bwa ti na bon karekea.15

Te kauoua ni kanoa n te kainibaire bwa ti na karekei oin ara kaotioti man ti oin ara raraoma, ma tiaki ibukiia tabeman. N taekana teuana, ti kibanako ao n tiku n ara marae ae katauaki ibukira. Kakawakin kinaakin raoi marae e bon reiakinaki ni moan rongorongon Kaokan bwaai. Temanna mai ibuakoia taan Kakoaua ake Waniman nakon Ana Boki Moomon ae Hiram Page, e kaotia bwa ngaia ae karekei kaotioti ibukin te Ekaretia ae bwanin. Iai mai buakoia kaain te Ekaretia ake a mwamwanaaki ao ni karekea ae aki eti ni maiuia.

Ni kaekaana, e kaotia te Uea bwa “akea ae e na karekei tua ao kaotioti n te ekaretia aei ma ti au tia mwakuri ae Iotebwa Timitin … ni karokoa I rinea … temanna ae e na onea mwina.”16 Reirei, tuua, ao kaotioti ibukin te Ekaretia a bon kaineti nakoia burabeti aika a maiu, are a karekei mairoun Iesu Kristo.17 Anne bon taben te burabeti.

N ririki aika a nako, I karekea te tareboon mairoun temanna te aomata are e a tia n tauaki man te tua ibukin ana bure n niniia te tabo. E tuangai bwa e kaotaki nakoina bwa raon te boki ae tabu ae taunaki i aan timantin te kateitei are e kataia n rin iai. E kaotia naba bwa n te tai are e karekea te raka ni boki ae tabu, e ataia bwa e na anganaki te bwaintanigra n rairairi, kaotinakoa te booki ae tabu ae boou, ao ni kaeta te reirei ao te kairiiri n te Ekaretia. I tuanga bwa e kaairua, ao e kakorakora ana bubuti nakoiu bwa n na tataroakinna. I tuanga bwa n na aki. E rangi ni un ao n taetae ni kamatauninga ao n katoka te taetae n te tareboon.18

I aki kainanoia bwa n na tataro ibukin te bubuti aio ibukin teuana bukina ae beebete man kakawaki: bon ti te burabeti ae kakarekei kaotioti ibukin te Ekaretia. E na bon “kaaitaraa ana babaire te Atua”19 bwa tabeman ana karekea te kaotioti, are e katauaki ti iroun te burabeti.

Ana kaotiotite aomata e katauaki ibukin te aomata anne. Ko kona ni karekea te kaotioti, n te katooto, ko na maeka iaa, tera nakoam ae ko na iria, ke antai ae ko na mareia.20 Taan kairiiri n te Ekaretia a kona n reiakina te reirei ao n tibwai reirei aika a roko mairoun te Atua, ma te tibwanga ni babaire aikai a bon tiku iroum. Anne bon am kaotioti ae ko na karekea; anne bon tabem.

Te kateniua ni kanoa n te kainibaaire bwa te kaotioti nakon temanna e na inanoi ma ana tua te Atua ao berita are ti a tia ni karaoi ma Ngaia. Iangoa te tataro ae kaangai taekana: “Tamara are i Karawa, a kabotu mwakurin te Ekaretia. I kona n Neboiko n te Tabati n te maunga ke i aon te bike? I kona ni katauaki bwa n na aki nako n taromauri ao n anaa te toa ma n na teimatoa ni karekei kakabwaia ake a beritanaki ni kawakina te Tabati bwa e na tabu?”21 Ni kaekaan te tataro anne, ti kona n anga te kaeka n ana itera te Atua: “Natiu, I a tia ni kaota au babaire ibukin te bong ae te Tabati.”

Ngkana ti bubuti ibukin te kaotioti n te bwai ae e a bon tia n angaa te Atua te kaetieti iaona, ti kauki nanora nakon aki ataakin raoi ara namakin ao ongo are ti kan ongo. E tuangai te mwaane n te taina ana kangaanga ni kabonganaan te mwane n ana utu. E reke ana iango bwa e na kamangaoa te mwane bwa katokan te kangaanga, e tataroakinna, ao n namakinna bwa e karekea te kaotioti ae matoa bwa e na riai ni karaoia. I ataia e a tia ni mwamwanaaki ibukina bwa e ukora te kaotioti ae kaaitaraa ana tua te Atua. E kauring te Burabeti Iotebwa Timiti, “Akea te bwai ae korakora ana kaikoaki nakon natiia aomata nakon karekean te kairiiri ae kaairua mairoun te tamnei, ngke a iangoia bwa iai irouia tamnein te Atua.”22

Tabeman a kona n iangoia bwa e urua te tua Nibwaai ngke e tiringa Rabwan. E ngae n anne, te koaua aei e aki kakewea katean te tua—te tua are te kaotioti ae onoti nakon temanna e na booraoi ma ana tua te Atua. Akea te kabwarabwara ae beebete ae karaunano, ma N na kaoti tabeua koaua. Te karaki e aki moanaki ma tuangakin Nibwaai ngkana e kona n tiringa Rabwan. Tiaki te bwai ae tangiria bwa e na karaoia. Kamatean Rabwan tiaki ibukin mabiaon Nibwaai ma ibukin katauraoan booki aika a tabu ibukin te botanaomata nakon taai aika a na roko ao aomata ake a beritanaki. Ao e kakoaua Nibwaai bwa bon te kaotioti—ni koauana, n aron aei, bon te tua mairoun te Atua.23

Te kaaua ni kainibaire bon kinaakin te bwai ae e a kaman tia te Atua ni kaotia nakoim, ao n tatauraoi nakon kaotioti riki Mairouna. Ngkana e a tia ni kaekaa te titiraki te Atua ao n aki bitaki te waaki, bukin tera tina kantaningaa te kaeka bwa e na kaokoro? E kaitara ma te kangangaa aio Iotebwa Timiti n 1828. Moan mwakoron ana Boki Moomon ake a tia n rairaki ngke Martin Harris, te tia ibuobuoki ao te tia koroboki n taai akekei, e butiia Iotebwa ibukin te kariaia n anaakin baan booki ake a tia n rairaki ao ni kaotia nakon buuna. E aki koaua raoi Iotebwa bwa tera ae na karaoia, e tataro ibukin te kairiiri. E tuangaki iroun te Uea bwa e na aki anga baan booki nakon Martin.

E a manga bubuti naba Martin n tuanga Iotebwa bwa e na butiia riki te Atua. E a manga tataro riki Iotebwa, ao te kaeka, ae aki kakuba, bon arei naba. Ma e a manga bubuti riki Martin nakon Iotebwa te kateniua n tai ao e a manga tataro riki Iotebwa. N te tai aei te Atua e aki kangai e aki. N anne, taraan ae kangai te Atua, “Iotebwa, ko ataa au namakin ibukin te bwai aei, ma iai inaomatam n rinerine.” N reken karauan man te totoko anne, e a baireia Iotebwa bwa e na kariaia Martin bwa e na anai 116 baan te booki ao ni kaotii nakoia tabeman kaain ana utu. A bua baan booki ake a rairaki ao n aki manga kuneaki. E korakora kabuakaakan Iotebwa iroun te Uea.24

E reiakinna Iotebwa, n aron ae reireia te burabeti n ana Boki Moomon ae Iakobwa: “Kam na tai kaeta te Uea, ma kam na ongeaba n taian reirei mai irouna. Bwa … e reirei ma te wanawana.”25 E anga te kauring Iakobwa bwa kaotin bwaai a riki ngkana ti bubuti bwaai aika ti riai n aki bubuti. E a kaman taekinna bwa Iutaia a na ukoukori “bwaai aika a aki atai nanoia,” taraa “iaon riki te mwaake, ” ao n aki taraa ana tia Kamaiu te aonaaba.26 A bwaka bukina bwa a bubuti bwaai ae aki atai nanoia ao aki oota iai.

Ngkana ti a tia ni karekea ara kaotioti ae kaineti nakon ae riki iroura ao akea te bitaki n te bwai ae riki, E a tia ni kaekaa am titiraki te Atua.27 Te katooto, n taai tabetai ti titiraki ni kaokiokia ni kakoaua raoi bwa ti bon anganaki raoi te kaeka. Ngkana ti a tia n rairi nanora, n onrake n te kimwareirei ao te rau n nano, ao n reke iroura kamaunaan ara bure, ti aki riki ni manga titiraki ma ti kona n onimakini kaeka are e a tia n anga te Atua.28

E ngae ngkana ti kakoauai ana kaeka te Atua ake mai imwaina, ti riai n tauraoi ni butimwaei oin ara kaotioti ake imwiina. Ma ngaia ae, tabeua tokin kawaira a kona n reke n te kiba ae kaineti n aki tikutiku. Ti riai n ataia ae oin ara kaotioti a kona n reke “teutana imwiin teutana” ao “te reirei teutana imwin teutana,”29 bwa te kaotioti ae kaotaki e kona n ae okioki rerekena.30

Kanoan te kainibaire ibukin ana kaotioti te aomata e reitinako ao ni buokaki ni kakorakoraaki. Ma inanon te kainibaire anne, te Tamnei ae Raoiroi e kona ao e na bon kaoti bwaai ni kabane ae ti kainanoia bwa ti na roko ao ni kateimatoa reitinakora iaon kawain te berita. Bwa ti aonga ni kakabwaiaaki ni mwaakan Iesu Kristo n riki nakon are e tangiriira bwa ti na riki nako iai Tamara are i Karawa. I kaoko bwa ko na karekea te nano matoa ni karekea am kaotioti ibukim, oota n are e a tia ni kaotia te Atua, ae booraoi ma booki aika a tabu ao tuua are E a tia n anga rinanon Ana burabeti are e rineia ao i nanon bon ara ataibwai ao inaomatara n rinerine. I ataia bwa te Tamnei ae Raoiroi e kona ao e na kaotii bwaai nakoim ae ko riai ni karaoia,31 N aran Iesu Kristo, amen.

Bwaai aika a na taraaki

  1. Unimwaane Dieter F. Uchtodorf e kakabongana ao kabongana raoi te kabootau n irekereke nakon te waanikiba ni reireia kakawakin tuua n te euangkerio. Te katooto, e a tibwa tia n reita kanoan aia katauraoi ni kiba bwairati nakon reirei n ai aron te tia Kamaiu n “Kanoan ana kanoa n anga reirei te Tia Reirei” ([broadcast for teachers, June 12, 2022], broadcasts.ChurchofJesusChrist.org).

  2. Te Tamnei ae Raoiroi bon te kateniman n te Utu n Atua, e taekinaki n taainako bwa te Tamnei ke Tamnein te Atua, ao a karaoi tabena ae kakawaki n te babaire ni kamaiu. E anga te kakoaua ibukin te Tama ao te Nati, kaoti koauan bwaai ni kabane, kaitiakiia naake a tia n rairi nanoia ao ni bwabetitoaaki, ao bon te Tamnei ae Raoiroi n te Berita (taraa Guide to the Scriptures, “Holy Ghost,” scriptures.ChurchofJesusChrist.org).

  3. Taraa 2 Nibwaai 31:19–21; Motiaea 4:8. Ao bon akea riki te kawai ma ti “kona ni kamaiuaki i nanon uean te Atua.” Iangoia ke ti naaki karekea te kawai riki teuana.

  4. 2 Nibwaai 32:5; taraa naba Reirei ao Berita aika a Tabu 84:43–44.

  5. Taraa 2 Nibwaai 32:4; Russell M. Nelson, “Te Kaotioti ibukin te Ekaretia, Te Kaotioti ibukin Maiiura,” Riaona,, Meei 2018, 93–96.

  6. Mataio 7:7–8.

  7. Taraa “Te Utu: Te Katanoata nakon te Aonaaba”; “Aia boto ni iango Ataeinnaine”; Aeniboki ni Kabuta: Beku n ana Ekaretia Iesu Kristo ibukiia Aika Itiaki ni Boong aika Kaitira, 27.0; 27.2, ChurchofJesusChrist.org.

  8. Taraa 2 Nibwaai 32:3.

  9. Robert D. Hales, “Holy Scriptures: The Power of God unto Our Salvation,” Riaona, Nobembwa. 2006, 26–27.

  10. E reirei booki aika a tabu bwa bwanaan te Tamnei ae Raoiroi e maraara ao n rau, n ai aron te wirikiriki—e aki baibati ke ni karongoaa; e bon bebeete, karaurau, ao e itiaki; e kona ni korakora ao ni buee; e roota te iango ao te nano; e uota te rau, kimwareirei, ao kaantaninga—tiaki te maaku, te aki rau ae korakora, ao te raraoma; i kaoira bwa ti na karaoa ae raoiroi—tiaki ae kamwaraa; ao e uota te kakukurei ao te bwaruaki—tiaki te kamino nano. Taraa 1 Uea 19:11–12; Ominai 1:25; Aramwa 32:28; Ereman 5:30–33; 3 Nibwaai 11:3; Moronaai 7:16–17; Reirei ao Berita aika Tabu 6:22–24; 8:2–3; 9:8–9; 11:12–14; 85:6; Boyd K. Packer, “The Candle of the Lord,” Ensign, Jan. 1983 51–56; Russell M. Nelson, “Ongo Irouna,” Riaona, Meei 2020, 88–92; Russell M. Nelson, “Butimwaai Taai Aika a na roko ma Te Onimaki,” Riaona, Nobembwa. 2020, 73–76; Russell M. Nelson, “Kaotioti ibukin te Ekaretia, Te Kaoitoti ibukin Maiura,” 93–96.

  11. See 3 Nibwaai 18:20; Moronaai 7:26; Reirei ao Berita aika Tabu 88:64–65.

  12. Taraa Ereman 10:5; Reirei ao Berita aika Tabu 46:30.

  13. Iakobwa 4:3; taraa Iakobo 4:3, New International Version; 2 Nibwaai 4:35; Reirei ao Berita aika Tabu 8:10; 46:7; 88:64–65.

  14. Taraa Reirei ao Berita aika Tabu 88:64–65; Guide to the Scriptures, “Prayer,” scriptures.ChurchofJesusChrist.org.

  15. Taraa 3 Nibwaai 18:20; Moronaai 7:26.

  16. Reirei ao Berita aika Tabu 28:2, 7.

  17. Taraa Reirei ao Berita aika Tabu 21:4–5.

  18. Ma te kukurei, a karaoaki babaire ibukina ni karekea te buoka ao katokan aorakina are e rangi ni kainnanoia.

  19. Reirei mairouia Beretitenti n te Ekaretia: Iotebwa Timiti (2007), 197.

  20. Taraa Thomas S. Monson, “Whom Shall I Marry?,” New Era, Oct. 2004, 4.

  21. Taraa Reirei ao Berita aika Tabu 59:9–16.

  22. Joseph Smith, in Times and Seasons, Eberi 1, 1842, 744, josephsmithpapers.org.

  23. N angiin te tai e karaoa te bitaki te Uea, karaoa te bitaki ae karako, ke e karaoa ake aki tau nakon kaotan ana tua, ma aikai a karaoaki rinanon taeka ni burabeti aika a karekeaki ao tiaki iroun temanna are e karekea. Taeka ni Burabeti kaotioti ae roko rinanon ana burabeti te Atua ae rineaki raoi nakon ana wanawana ao otan te Atua. Aika a kariaikaki aikai n aron ana kaotioti te uea nakon Mote ao Iotua bwa a na tiringiia kaain te aba are Kanaan ni kaaitara ana tua “Ko na tai kamateia aomata” (Te Otinako 20:13). Te Uea, rinanon Ana burabeti, e konaa ao e na bita Ana tua ibukin oin Ana babaire. Tiaki inaomata, ma, rinanon ara kaotioti ni bita ao riaon tuua ake a tia n kateaki are e kaotia te Atua nakon Ana Ekaretia rinanon ana burabeti.

    Taraa 1 Nibwaai 4:12–18; ibukin te marooro ae bwanin, taraa Joseph Spencer, 1st Nephi: A Brief Theological Introduction (2020) 66–80.

  24. I bukin bwanin rongorongon baan booki are 116, taraa Saints: The Story of the Church of Jesus Christ in the Latter Days, vol. 1, The Standard of Truth, 1815–1846 (2018), 44–53; taraa naba Reirei ao Berita aika Tabu 3:5–15; 10:1–5.

  25. Iakoba 4:10.

  26. Taraa Iakobwa 4:14–16.

  27. E reirei Iotebwa Timiti, “Ti aki kona ni bubutia bain te Uea ibukin te kaotioti ae onoti ti ngkana bon akea te kaotioti mai imwaina ae bootau ma te aekaki anne.” (in History, 1838–1856 [Manuscript History of the Church], volume A-1, 286–87, josephsmithpapers.org).

  28. Taraa Motiaea 4:3. Ngkana ti reitinako n namakina te kairua ao te raraoma imwiin ara rairannano ae nanonaki raoi, e bon riki ibukin karakon te onimaki iroun Iesu Kristo ao n Ana konabwai ni kona ni kabwanina kabwaraan ana bure ao ni kamaiura. N tabetai ti kakoauaa ae te rainanano bon ti ibukiia tabeman ao e aki kaeti nakoira. Aio bon ibukin raoi akean te onimaki n te bwai are e kona ni katiaa te Tia Kamaiu ibukin Ana Mwakuri ni Kamaiu ae akea tiana.

  29. Taraa Itaia 28:10; 2 Nibwaai 28:30; David A. Bednar, “Line upon Line, Precept upon Precept,” New Era, Sept. 2010, 3–7.

  30. Ma ngkana e aki anganiko te kaotioti te Atua, teimatoa bubutiia. N aron ana reirei Uniwmaane Richard G. Scott: “Waaki nako ma te onimaki. … Ngkana ko maiuna te raoiroi ao ni waaki ma te onimaki, e na aki kariaia te Atua bwa ko na waaki nakon ae raroanako n akea namakinan te kauring ngkana ko a tia ni karaoa te babaire ae bure” (“Using the Supernal Gift of Prayer,” Liahona, Meei 2007, 10).

  31. Taraa 2 Nibwaai 32:5.