Te Reirei n te Tangira ae Akea Tokina

Iroun Unimwaane Hugo Montoya

Man te Itingaun

Ana tangira Tamara are i Karawa ibukiia Natina n tatabemaniia e koaua. E mena ikekei ibukiia n tatabemaniia.

Reirei n te tangira ae akea tokina e kaotaki ni maiuakinan tua aika korakora: Tangira Iehova ae Atuam n nanom ni kabanea, n tamneim ni kabanea, ni korakoram ni kabanea, ni wanawanam ni kabanea; ao tangira raom n ai aron tangiram I bon iroum.¹

I uringa au moan winta ngke I maeka ikai i Utah—e tino n tabo nako. Ngkai I roko man te Rereua are Sonoran Desert, te moan bong I rang kukurei iai, ma imwiin tabeua te bong, I a ataia N na moantaai n uti ni kanakoa te tino man te kawai.

N te ingabong teuana, i nuukan buakan te tino, I a maonotiti, n tiabora te tino, ao I noora kain rarikiu ni kauka ana karati n itera te kawai. E ikawai riki nakoiu, ngaia are I taku bwa ngkana I waekoa n tia, I kona ni buokia. Ngaia I kabaibati bwanaau, I titirakinna, “Tariu, ko kainnanoa buokam?”

E moangare man taku, “Ko rabwa, Elder Montoya.” Imwiina e katika ana bwai n uka te tino man ana karaati, kamaiua te intin, ao inanon tabeua te miniti e bane te tino mai i moan ana auti. Imwiina e rinuukan te kawai ma ana mitiin ao e titirakinaki, “Elder, ko kainnanoa te ibuobuoki?”

Ma te moangare I taku, “Eng, ko rarabwa.”

Ti tauraoi n ibuobuoki imarenara ibukina bwa ti itangitangiri imarenara, ao kainnanon tariu e riki bwa kainnanou ao kainnanou e riki bwa kainnanona. N aki taraia bwa tera ana taetae tariu ke te aba raa ae roko ma iai, ti itangitangiri ibukina bwa ngaira taari, natin te Tama ae tii temanna.

Ngke e katanoata te mwakuri n ibuobuoki, Beretitenti Nelson e taku, “Ti na katea te mwakuri n ibuobuoki ae boou riki, ae mimitong riki, ao ni mwamwannano riki ni buokiia aomata.”² Irou, ni mimitong riki nanona are bon mai iroum, ae nano, ae ai aron raoi ana kawai te Tia Kamaiu: “ngkana kam I tangitangiri,”³ temanna ma temanna.

E aki tau totokoan are ko riki bwa te totoko nakoia tabeman, e aki tau ae ko na tii noora te aomata ae kainnano ae mena iaon te kawai ao ae e rirarikim. Ti a kabonganai kawai nako ni buokiia kain rarikira, e ngae ngkana ai tibwa te moan tai ke ti te taina kaitiboakim ma ngaia n te maiu aei.

Bukin tera tangiran te Atua te moan tua ae kakaawaki?

I taku bwa ibukin Kakaawakina iroura. Ngaira Natina, e noori kainnanora, ti katan irouna, ao Ana tangira e kamanoira. Ana baire e anganiira te inaomata; ngaia are, tina kona ni karaoi kairua.

E kariaia naba bwa tina kataaki ao ni kaririaki. Ma e ngae ngke ti karaoi kairua ke ni bwaka n te kariiri, te baire e katauraoa te Tia Kamaiu bwa ti aonga ni kamaiuaki ao n oki nako matan te Atua.

Kakaitara inanon maiura e kona ni karekea te nanokokoraki ibukin kakoroan bukin berita ake a tia ni karaoaki ibukira. Taiaoka onimakina Tamara. E kawakina ana berita n tainako, ao ti kona n atai bwaai ake e tangiria n reireiniira iai.

E ngae ngke karaoan ae eti, aron maiura e kona ni bitaki man te raoiroi nakon te buakaka, man te kakukurei nakon te kananokawaki. Te Atua e kaekai ara tataro ni kaineti ma ana nanoanga ao ana tangira ae akea tiana, n oin Ana tai.

Te karanga are e moi iai Eria e mwautakataka n akea ranna.⁴
Ana katebe Nibwaai ae karaoaki man te biti ae tamaroa e uruaki.⁵
Te ataeinimwaane e katinanikuaki ao e kabaneaki man te reirei.
Te nati ae a kaman kariariaaki e mate n te bong are e bungiaki iai.

A bibitaki tein aroaro.

Ngkana a bitaki aro man te raoiroi ao n nakoraoi nakon te buakaka man nakobuaka, ti kona n teimatoa ni kukurei ibukina bwa te kukurei e aki katan iaon te aroaro ma bon anuara nakon te bwai are e riki. E taku Nelson, “Te kimwareirei are ti namakinna e aki irekereke ma te bwai are ti rinanona ni maiura ma ti man bwaai ni kabane ake ti kabotoi maiura iaona.”⁶

Ti kona n aoriira ao ni kakantaningai bwaai bwa a na bitaki ibon irouia, ke ti kona n taratarai ao ni karaoi bwaai aika a boou.

Eria e nako Tarebata, are e maeka iai te aine ae mate buuna are e anganna te amwarake ao te mooi.⁷
Nibwaai e karaoa te kai ni katebe man te kai ao e nako ni kaeman bwa kanaia.⁸
Te ataeinimwane e tekateka n ongora ao ni koroboki man te winto, ao n te bong aei e riki bwa te tia reirei n te katenrinan n reirei.
Taanga a karikirakea te onimaki ae korakora riki iroun te Tia Kamaiu ao a onimakina te baire ni kamaiu. Aia tangira ibukin te teei are a kaman kakantaningaia are e mate e waekoa ni korakora riki nakon nanokawakiia.

Ngkana I ongo te titiraki “Tamara are i Karawa, ko bon mena ikanne? Ao ko ongo man kaekai aia tataro ataei [n tatabemaniia]?,”⁹ I kan kaeka, E bon mena ikanne, E ongo, ao E na mena ikanne ibukim ao ibukiu n tainako. Ngai Natina, Ngaia Tamau, ao I reiakinna bwa N na riki bwa te karo ae tamaroa n ai arona.”

Ngai ma kainnabau ti kataia ni boutokaia natira n tainako, ibukin aro nako, ao ni bwaai ake ti kona ni karekei. Natira n tatabemaniia a onoti, kakaawakiia iroun te Atua e korakora, ao n aki tarai kanganga, kairua, kabwaka ake a karaoi, te Atua e tangiriia, ao ai arora naba.

Ngke I karekea te wewete aei bwa N na riki bwa te Mataniwi ni Kabuta, n te kabanea ni bong imwain mwanangara nako Salt Lake, ni kabane natira ma aia utu a ikotaki ni mweengara n te kainutu, are tia kaota iai ara tangira ao ara kakaitau. Imwiin te reirei, I anga te kakabwaia n te nakoanibonga nakoia natira n tatabemaniia. A bane n tang. Imwiin te kakabwaia, natiu te mwane are te ikawai e kaota ana kakaitau n tei ibukiia ni kabane ibukin te tangira ae korakora are ti a tia n anganiia man te bong are a bungiaki iai ni karokoa ngkai.

Kakabwaiaia natimi e ngae ngkana ai 5 ke 50 aia ririki. Raoniia, mena irarikiia. E ngae ngke karekean bwaai bon te tibwanga are e kateaki mai karawa, ti aki riai ni mwaninga n tibwai taai ni kakukurei ma natira.

Ana tangira Tamara are i Karawa ibukiia Natina n tatabemaniia e koaua. E mena ikekei ibukiia n tatabemaniia. I aki ataia bwa E kanga ni kararoia, ma E bon karaoia. Ngaia ma Ana moan nati a katiteuanaaki ni karaoan ana mwakuri ae mimitongin te Tama, “ni karekea te aki mamate ao te maiu ae akea tokina ibukin te aomata.”¹⁰ A tia ni kanakoa te Tamnei ae Raoiroi bwa e na kairiira, ni kauringiira, ao ni karaui nanora ngkana e riai.

E anga ana kaetieti nakon Natina ae Tangiraki bwa e na karika te aonaaba ae tamaroa. E anga te kaetieti nakon Atam ao Ewa ao e anganiia inaomataia. E a tia ni kananakoia taan uarongorongo inanon ririki ma ririki bwa ti aonga ni kona ni karekea Ana tangira ao Ana tua.

E mena n te Buakonikai ae Tabu ni kaeka te kairake are Iotebwa n ana titiraki are e nako mai inanona ao ngke e weteia n arana. E taku: “Natiu ae Tangiraki teuaei. Ongo Irouna!”¹¹

I kakoaua bwa kaotan ana tangira te Atua ae moan te korakora ibukira e riki i Ketetemwane, are e tataro iai Natin te Atua ae maiu, “Tamau, ngkana tao e konaki, ao e na nako mai Rou te mangko aei: ma akea au taeka, ma bon ane I Roum.”¹²

I a tia n ataia bwa te mwakoro ae uarereke anne, I kona n ota n ana Mwakuri ni Kamaiu Iesu Kristo ni karikirakea au tangira ibukin te Tama ao Natina, ni kakerikaaka kan karaoan te bure ao te aki ongotaeka, ao ni karikirakea nanou ni karaoa ae tamaroa riki ao ae nakoraoi riki.

Iesu e nakonako n aki maaku n aki nanokokoraki nako Ketetemwane, n onimakina Tamana, n ataia bwa E riai n toutoua nen taonani kurebe n ti Ngaia. E rinanon te maraki ao ni kamangoraki ni kabane. E kabuakakaki, motikaki taekana, ao e tauraki n te kaibangaki. Inanon marakina ao korakaina iaon te kaibangaki, Iesu e kabotoa ana iango iaon kainnanon tinana ao Ana reirei ake e tangiriia. E anga maiuna.

N te kateniua ni bong e a uti. Akea kain te ruanimate; E tei i angatatin Tamana. A kantaningaia bwa tina rineia ni kawakin ara berita ao n oki ni maeka irarikiia. Te kauoua n tabo aei tiaki te kabanea n tabo; ti aki ara bwai te mweenga iaon te aba, ma ngaira aomata aika akea tokiia n rinanon te maiu ae kakai toki.

Iesu bon te Kristo, Natin te Atua ae maiu. E maiu, ao ibukinba bwa E maiu, ni kabane natin te Atua a na maiu n aki toki. Te kakaitau nakon Ana karea ni kamaiu, ti kona ni bane ni maeka ma Ngaiia. N aran Iesu Kristo, amen.