E Aoraoi Amona ao E Bebete Uotana

Iroun Titita J. Anette Dennis

Te Moan Kauntira n te Beretitentii ni Kabuta n te Bootaki n Aine

Ti na uringa bwa aomata n tatabemaniia n te aonnaba aio bon natin te Atua ao E tangiriia n tatabemaniia nako.

Te karaki bon rongorongon te mwaane ae arana Jack ae iai ana kamea ae te tia tiri-kaai ae arana Cassie. Jack e bon rangi ni kuukukurei iroun Cassie ao e aki toki n kakamoamoaa bwa te kamea ae rangi ni mwaatai. Bwa e aonga ni kakoauaaki aio, ea kaoiia raraona tabeman Jack bwa ana matakuakina Cassie. Imwiin rokoia n te kirabu n kaeman, Jack ea kaotinakoa Cassie bwa e na biribiri itinaniku ngke e rin ngaia n karina araia.

Ngke e nang waaki, ea ingainga Jack ni kan kaotii rabakaun Cassie aika kamiimi. E ngae n anne, Cassie e rangi ni bitaki anuana. E aikoa kan ongo nakon ana tuatua Jack n aron are e bon kakaraoia ma nanona. Tii te bwai ae kan karaoia bwa e na tiku irarikina.

E a ebu Jack ao n bwainrang man un iroun Cassie; ngaia are a moantaai naba n oki. E bon aki naba kan kiba n toka ibukin te kaa Cassie, e tabekia Jack ma te aki taotaona n nano ao n butoia nakon nnena. E a un ngke raona ake irarikina a bwainingarea anuan ana kamea inanon kawaia n okira mweengaia. E aki oota Jack bwa e aera ngke e aaki ongeaba Cassie. E a tia n kataneiaaki raoi, ao nanona bon tii te kan ongeaba ao n beku ibukina.

Imwiin rokoia n mweengaia, e a moana ana tutuo Jack nakon Cassie ngkana iai ikoakina, ke manna, n aron are e bon kakaraoia. Ngke ea katoka baina iaon bwabwaana, e a namakin te bwai ae mwaimwai ao ea kunea bwa e onrake baina n te raraa. Ma mamaana ao nakon nanona, e a kunea bwa iai ikoakin Cassie ae e nano iaan raoi riin bwabwaana. E a manga kunea riki teuana ni moan waena are te atai, nakon naba riina.

Jack e anaa Cassie ni mwanokaia ao ea tang. E bon rangi ni maama n aron are ea tia n motika taekan Cassie n te aro ae e aki riai. E boou aroaron Cassie inanon te ngaina anne bwa ngaia e bon ikoaki. Anuana e rootaki man marakina, korakaina ao ikoakina. Akea irekerekena ma tao aki kan ongeabana nakon Jack ke tao e aki tangiria.¹

I ongo te karaki aio ririki aika nako ao I bon tuai mwaninga taekana. Iraman mai buakora aika a ikoaki? Kanga tawera motikan taekaia tabeman man taraakiia ao aroia, ke akean aia kakamwaakuri, ngke ti oota raoi, ti a konaa ngkanne ni kaeka ma te nanoanga ao te kan ibuobuoki nakon ae ti a kamwaita riki rawawataia ma ara motiki taeka?

I a tia n kuneaki n bure n aio n taai aika a mwaiti inanon maiu, ma te Uea ea tia n reireinai ma te taotaonakinnano rinanon au taneiai ao inanon au tai n ongora aia taneiai raou aika mwaiti. I roko ni kakaitau riki n ana katooto ara tia Kamaiu ae tangira ngka E kabanea mwaitin Ana tai ni mwakuri ni ibuobuoki nakoia aomata ma te tangira.

Ana taneiai natiu te aine ae te kabanea n uarereke e irekereke ma kaangangan maurina ma ngke e uarereke iai. Iai taai ae bati inanon maiuna ae e namakinna ae e aaki kona n reitinako. Ti na teimatoa ni karabwarabwa nakoia aneran aon te aba ae a tia ni mena irarikira n taai akekei: n tekateka ma ngaia, ongora nakoina, tang ma ngaia, ao n tibwai marenaia bwain tangira aika a onoti, oota n tamnei, ao te reitaki n te tangira. Iaan kaantaninga aika tamaroa, rawawata a tia n tabekakirake ni kaua itera.

Unimwaane Joseph B. Wirthlin, n mwanewean 1 I-Korinto, e taku, “Ngkana tao I taetae n aia taetae aomata ma anera, ao ngkana akea te tangira i rou, ao I riki n ai aron te burati ae karongoa, ma te timbara ae tangitang.”²

E reitianako:

“Ana rongorongo Bauro nakon te rabwata n Kiritian aikai e bebete ao n kaineti: Akea te bwai ae ko karaoia ae ena kona n karika te bitaki ngkana akea te tangira ae kororaoi iroum. Ko kona n taetae n ianena, iai te bwai n tangira n te taetae ni burabeti, oota n bwaai aika kamiimi, bwaina te atatai; e ngae ngkana iai am onimaki ni kamwaingii maunga, n akean te tangira ae kororaoi iroum ko na bon aki raka.

“‘Te tangira ae kororaoi bon ana tangira Kristo’ [Moronaai 7:47]. Te Tia Kamaiu e kaota te tangira anne.”³

Ni Ioane ti wareka ae kangai, “Ane ana ataingkami aomata ni kabaneia ba au reirei ngkami aei, ngkana kam i tangitangiri.”⁴

A mwaiti aia maroro ara taan kairiri n te Ekaretia ake a tia n anga iaon te tangira ae kororaoi, katiteuanaaki, te tangira, akoi, kabwara bure, ao nanoanga. I kakoaua bwa te Tia Kamaiu e kaoira bwa tina maiuakina te maiu ae rietata, ao e mimitong⁵—Ana kawai n te tangira ike ni kabane a kona n namakinna bwa a bon riai ni mena ikekei ao a kainanoaki.

Ti tuangaki bwa ti na tangira aomata,⁶ ma tina aki motiki taekaia.⁷ Ti a katuka te amo ae rawawata anne; tiaki ara bwai n uouotia.⁸ N oneanimwii, ti kona n anaa amon te Tia Kamaiu n tangira ao n nanoanga.

“Bane mai nako Iu, ngkami akana kam kua ao kam rawawata, ao N na motiki rawami.

“Amoa amou i aomi, ao reireii Rou; …

“Ba e aoria amou, ao e bebete uotau.”⁹

Te Tia Kamaiu e aki kariaia te bure ma e anganiira Ana tangira ao n taakina te kabwara bure ngkana ti rairannano. Nakon te aine are e reke ni wenenibure, E taku, “Ao ngai I aki motika naba taekanI ko na nako: ao, tai manga bure.”¹⁰ Naake E ringiia a namakina Ana tangira, ao te tangira anne e kamaiuia ao n bitiia. Ana tangira e kairiia bwa a na tangiria ni bitii maiuia. Maiuakinan Ana kawai e uota te kimwareirei ao te rau, ao E kaoiata beman nakon te aro n maiu aio ma te amarau, akoi, ao te tangira.

E taku Unimwaane Gary E. Stevenson, “Ngkana ti kaitara ma kataaki ao kangaanga, te aoraki ao te ikoaki, te Uea—ara Tia Kawakin Tibu, ara Tia Tararuaira—e na kanuaira n te tangira ao te akoi. E na kamaoi nanora ao ni kamarurungi tamneira.”¹¹ Ngkai ngaira taan iriira iesu Kristo, tiaki ae tina karaoa naba te aekaki anne?

E tuangiira te Tia Kamaiu bwa tina reirei Irouna¹² ao n karaoi baike ti noorii bwa E karaoi.¹³ E tei ibukin te tangira ae kororaoi, te tangira ae itiaki. Ngkai ti reiakiniira baike E tangiriira bwa tina karaoi—ti aki ibukin katabeara ke ibukin kakabwaia ake tina kona n karekei ma man te tangira ae itiaki Ibukina ao Tamara are i Karawa¹⁴—Ana tangira e na bwaro rinanora ao karaoa are E tuangiira bwa e na koro bukina ao tiaki tii ngaia ma inanon taina ao e na aki kangaanga ao n bebete¹⁵ ao ni kimwareirei riki nakon are ti kantaningaia. E na tangira karaoana; e kona n anai ririki aika bati, n arou, ma ngkana iai nanora bwa e na riki te tangira bwa ara kaantaninga, E kona ni butimwaea te nano anne,¹⁶ te koraa ke te ati anne, ao inanon taina e na riki bwa te aroka ae tamaroa, ao n onrake n te uaa ae e karewerewe.¹⁷

Ti aneneia n teuana mai buakon te kuna n taromauri: “Antai ngai bwa N na motika taekan temanna ngkana I aki kororaoi? N te nano ae aki beroro e raba iai te rawawata ae e aki nooraki n te mata.”¹⁸ Antai mai buako ra ae tao iai rawawatana ae raba? Te kairake ke te ataei ae e aki kan kairaki, naati aika a raure aia karo, te tina ke te karo ae akea buuna, ake iai aorakin rabwataia ke aia iango, ake a tiotio aia onimaki, naake a rinanon te kakaokoroaki ke ribakiia ibukin aia katei, ake a namakina te maroaa, ake a kan mareaki, naake a reke n anua aika kareke, ao a mwaiti riki ake a kaitara ma aekakin kangangan te maiu aei—ao riki ake kanga a taraa n kororaoi maiuia n taraakina.

Akea mai buakora aika a kororaoi maiuia ke a kororaoi ania utu; ngai naba temanna. Ngkana ti iran taangaia ake a rinanoi naba kataaki ao aki nakoraoiia, e kona n buokiia n namakinna bwa aki maroaa n aia kanganga. A riai n namakinna aomatani kabane bwa bon nneia aio ao a kainanoaki n rabwatan Kristo.¹⁹ Ana kaantaninga Tatan ae moan te korakora bwa e na bwenauaia natin te Atua, ao e tia n totokanikai, ma iai korakoran te katiteuanaaki.²⁰ Ao arora ni kainnanoate nakonako n mwanokaia ake a rinanonkangangan te maiu ae mamate aio!

Ara burabeti, Russell M. Nelson, e taku, “Aroaro n aki ako ke babakanikawai nakon temanna ibukin ana reeti, rikina n aine ke ni mwaane, rabakau nte reirei, katei ke bwaai riki aika kaokoro e bon aki raoiroi imatan te Tia Karikiira! Aroaro n aki ako aikai e karikiira bwa tina maeka iaan kinaakira bwa ngaira Natina mwaane ao aine ni berita!”²¹

Ngkai Beretitenti Nelson ea tia n kaoira ni kabane bwa tina rin ao n tiku iaon te kawai ni berita are e kairiira n oki nakon Tamara are i Karawa, e a tia naba n kanakoa te taeka n reirei aio: “Ngkana raoraora ao ara utu … a kiitana te Ekaretia, teimatoa n tangiriia. Tiaki am bwai bwa kona motiki taekan ana rinerine temanna n aron naba ae ngkoe ko kantaningaia ibukin tikum ma te kakaonimaki.”²²

Raoraou, tina uringnga ae aomata nako iaon te aonnaba aio bon natin te Atua²³ ao E tangiriia n tatabemaniia.²⁴ Iai aomata n am kawai ae ko namakina bwa kona motiki taekaia? Ngkana eng, uringa ae aikai taai aika a tamaroa ibukira bwa tina kataneiaira n tatangira n aron ana tangira te Tia Kamaiu.²⁵ Ngkai ti iriira Ana katooto, ti kona n amoniira ma Ngaia ao n buokia n namakina te tangira ma te mweengaraoi inanoia ni kabane natin Tamara.

“Ti tangiria, bukina bwa e tangirira moa.”²⁶ Ngkana ti kaonrakeaki ma ana tangira te Tia Kamaiu, Amona ni koaua e kona ni bebete, ao Rawawatana e kona ni bebete.²⁷ Aikai ake I kakoauai n aran Iesu Kristo, amen.

Bwaai aika a na taraaki

1. Taraa Jack R. Christianson, Healing the Wounded Soul (2008), 27.

2. 1 I-Korinto 13:1; taraa Moronaai 7:44–48.

3. Joseph B. Wirthlin, “The Great Commandment,” Riaona, Nobembwa 2007, 28.

4. Ioane 13:35, e kairaki ma katuruturuana; taraa naba te kibu 34.

5. Taraa Russell M. Nelson, “Opening Remarks,” Riaona, Nobembwa 2018, 6–8.

6. Taraa Mataio 22:36–40; Ioane 13:34–35.

7. Taraa Mataio 7:1–4; Dieter F. Uchtdorf, “The Merciful Obtain Mercy,” Liahona, Meei 2012, 70–77; taraa naba Robert C. Gay, “Taking upon Ourselves the Name of Jesus Christ,” Liahona, Nob. 2018, 97–100.

8. Te tibwanga anne a mwiokoaki iai tenaan bitiobi ao beretitenti n te titeiki. “Bitiobi n tatabemaniia ao beretitenti n te titeiki bon te ‘tia motikitaeka i Iteraera’ (Reirei ao Berita aika Tabu 107:72). Man te kariaiakaki aio a buokiia membwa n rairiinanoia man te bure ao n roko iroun Kristo, are e kabwarai buure (taraa 32.1 ao 32.3)” (Aeniboki ni Kabuta: Beku n Ana Ekaretia Iesu Kristo ibukiia aika Itiaki ni Bong aika Kaitira, 31.1.7, ChurchofJesusChrist.org).

9. Mataio 11:28–30; e kairaki katuruturuana.

10. Ioane 8:11, e kaiiraki katuruturuana; taraa naba kiibu 3– 10.

11. Gary E. Stevenson, “A na Botaki Nanoia n te Nano ae tii Teuana,” Riaona, Meei 2021, 23.

12. Taraa Mataio 11:29.

13. Taraa 3 Nibwaai 27:21–22.

14. Taraa Mataio 22:37–39.

15. Taraa Motiaea 24:15.

16. Taraa Aramwa 32:27.

17. Taraa Aramwa 32:41.

18. Lord, I Would Follow Thee,” Anene n Taromauri, nambwa. 220.

19. Taraa 1 I-Korinto 12:12–27; taraa naba Jeffrey R. Holland, “Songs Sung and Unsung,” Liahona, Meei 2017, 49–51.

20. Taraa Sharon Eubank, “By Union of Feeling We Obtain Power with God,” Liahona, Nov. 2020, 55–57; taraa naba Dale G. Renlund, “The Peace of Christ Abolishes Enmity,” Liahona, Nob. 2021, 83–86; Sharon Eubank, “Turning Enemies into Friends” (Brigham Young University devotional, Tianuare. 23, 2018), speeches.byu.edu.

21. Russell M. Nelson, “Choices for Eternity” (worldwide devotional for young adults, Meei 15, 2022), broadcasts.ChurchofJesusChrist.org.

22. Russell M. Nelson, “Choices for Eternity,” broadcasts.ChurchofJesusChrist.org.

23. Taraa I-Rom 8:16.

24. Taraa Itaia 49:16; I-Rom 8:35, 38–39.

25. Taraa Ruka 6:31–38.

26. 1 Ioane 4:19. “E koaua ti taekinna ikai te moan tua ae moan te korakora are e anganaki te utu—n tangira te Atua ma nanora ae bwanin, n akea te tabwarabwara ma iangoana riki, ao anne, ma nanora ni kabane, te mwaaka, te iango ao te korakora. Tangiran te Atua bon te moan korakora n tua n te aonaaba. Ma te moan korakora n koaua n te aonaba bwa bwa e tangiria te Atua n aron raoi anne—te nano ae koaua, n akea te nanououa ke ni boraraoi , Nanona mwakana, ana iango, ao korakorana” (Jeffrey R. Holland, “Te Bwai ae Te Kabanea ni Kakannato,” Riaona, Nob. 2021, 9).

27. Taraa Mataio 11:28–30.