Ninikoria n Taetaekina te Koaua
N te tai are ti a reiakina iai te koaua, e anganiira ara tai te Uea bwa ti na karaoa te bwai ae E na karaoia ngke arona bwa E mena ikai n te bong aei.
N te 1982, ao iaon kawaina ni bane au tikurii iaon te topography (rabakau iaon taekan te aba) man te reirei ibukin te kamwakuri.
Ni banen te ririki, e kaoai raou n reirei temanna bwa ti na marooro. I uringnga bwa ti kitaniia kaain te kiraati ake tabeman ao n nakon te tabo teuana irarikin taabo n takakaro. Ngke ti a roko ikekei, e taekina nakoiu arona n rairaki n te aro, ao e aki ti kaota te boki nakoiu, ma e a anganai te boki. Ni bon koauana, I aki uring ana taeka ni kabane aika e taekin, ma I uringa raoi te tai anne ao te bwai ae I namakinna ngke e taku, “I tangiria ni kaota au koaua nakoim bwa e koaua te boki aei, ao e a tia ni kaokaki ana euangkerio Iesu Kristo.”
Imwiin ara marooro, I okira mweengau, I rairi tabeua baan te boki, ao I katokaa iaon te bao. Bukina bwa ti a roko n tokin te ririki, ao ngkai ai bon kabanean au ririki n au tikurii n te topography, I aki rang kabanea au iango nakon te boki ke nakon raou n reirei are e a tia n tibwauaia ma ngai. Ko kona ni kaman ketinna bwa tera aran te boki. Eng, bon Ana Boki Moomon.
Nimaua te namwakaina imwiina, ao a roko mitinare n au auti; a bon tia ni kitana te auti ngke I a oki man au mwakuri. I weteia ni kaokiia. Ti bane n tekateka iaan te bwaranta n au auti ae uarereke, ao a reireinai.
N au kakaae ibukin te koaua, ao I titirakiniia bwa e ngaa te aro ae koaua ao na kanga ni kunea. A tuangai mitinare ae I kona ni kunea kaekaan anne ibon irou. Ma te kaantaninga ao te nano ae korakora, I butimwaea aia kakaewenako bwa n na wareki tabeua mwakoro man Ana Boki Moomon. I tataro ma te nano ae koaua ao ma nanou raoi (taraa Moronaai 10:4–5). Te kaeka nakon au titiraki e bon mataata, ao tabeua te bong imwiina, ni koauana n Meei 1, 1983—ao I bwabetitoaki ao ni kamatoaaki bwa kaain Ana Ekaretia Iesu Kristo ibukiia Aika Itiaki ni Boong aika Kaitira.
N te bong aei, ngke I iangoi aron bwaai aika a tia n riki, ao I noora raoi aron kakawakin ninikorian raoraou n reirei ngke e kaota ana koaua iaon te koaua are e kaokaki ao ni kaota nakoiu kakoauaan Kaokan ana euangkerio Iesu Kristo ae kona n noraki, ae Ana Boki Moomon. Te mwakuri ae bebete anne, ma e bon rang kakawaki nakoiu, e karika te reitaki imarenau ma mitinare ngke I kaitibo ma ngaia.
E a tia ni kaotaki nakoiu te koaua, ao imwiin au bwabetito, I riki bwa temanna ana reirei Iesu Kristo. N ririki ake imwiina, ao man aia ibuobuoki koraki ake a tia ni katabeaki n aroia taan kairiiri, taan reirei, ao raoraou ao rinanon naba au kamatebwai ibon irou, I ataia bwa ngke I rineia bwa n nang riki bwa ana reirei Iesu Kristo, ao I aki ti kariaia tabeu ni kamanoa te koaua ma n na taetaekinna naba.
Ngkana ti kariaia bwa ti na kakouaua te bwai ae koaua, ao n iria, ao ngkana ti kataia n riki bwa ana reirei Iesu Kristo ni koaua, ao akea ara beeba ni kakoaua ni kaotia bwa ti na aki manga kona ni karaoi buure, ke ni manga kataaki nanora bwa ti aonga ni kitana te koaua, bwa ti na aki manga burebureaki, ke ti na aki manga rinanon taian kangaanga. Ma te atatai n te koaua e reirei bwa ngkana ti rin inanon te kawai ae ineti man irariki are e na uotiira rikaaki nako matan Tamara are i Karawa, ao bon iai te kawai n tainako ni kamaiura man taian kangaanga aikai (taraa 1 I-Korinto 10:13); e na bon iai n taainako te nanououa n ara rinerine imwain ae ti nanououa n ara onimaki (taraa Dieter F. Uchtdorf, “Come, Join with Us,” Liahona, Nob. 2013, 21); ao kabaneana, iai kakoauakina ae ti aki kona ni katukaki n ti ngaira ngkana ti rinanon taian kangaanga, ibukina bwa te Atua e kawariia Ana aomata inanon aia tai ni kangaanga (taraa Motiaea 24:14).
N te tai are ti a reiakina iai te koaua, e anganiira ara tai te Uea bwa ti na karaoa te bwai ae E na karaoia ngke arona bwa E mena ikai n te bong aei. Ni koauana, E kaotia nakoira man Ana reirei te bwai ae ti riai ni karaoia: “Ao kam na waaki ni mwaakan Tamneiu, n tataekina au euangkerio, ni kakauoman, n arau, n tabekaarake bwanaami n ai aron tangin te buu, n taekinii au taeka n ai aroia ana anera te Atua.” (Reirei ao Berita aika Tabu 42:6). Te tai ibukin te mwakuri ni mitinare irouia ara roronrikirake e bon kakawaki!
Taiaoka, ataeinimwaane, tai taona ami tai ni katauraoi n nako ni beku bwa mitinare ibukin te Uea. Ngkana ko aitara ma kangaanga ake a na kona ni kanakobuaka am babaire n nako ni mitinare—n aron tukan am reirei n te tai aei, karaure ma raom te aine n akea ataakina bwa ko na kona ni manga kaitibo mangaia rimwi, ke ni kitana am mwakuri —uringa ana banna ni katooto te Tia Kamaiu. Inanon Ana mwakuri, E kaitara naba ma te kangaanga, n aron te kakauntaeka, te bwainikirinaki, ao mwangkon Ana mwakuri ni kamaiu ae mao. E ngae n anne ao E tangiria ni karaoi ana kaantaninga Tamana ao n anga te kimwareirei Nakoina. (Taraa Ioane 5:30; 6:38–39; 3 Nibwaai 11:11; Reirei ao Berita aika Tabu 19:18–19.)
Ataeinnaine, kam rang ni butimwaeaki, ngkana bon nanom raoi, ni mwakuri n ana nne ni kurebe te Uea, ao ngkai ko katauraoiko nakon te mwakuri ni mitinare, ko na aki kona ni katukaki man aeka ni kakaewenako aikanne.
Nakoia ni kabane ake a baireia bwa a na beku Ibukina, I berita nakoim bwa te mwakuri inanon 24 ke 18 namwakaina e na bane n am tabo ni mitinare n aron are a na bane naba ngkana kam tiku ni mwengami, ma aia tai n tataninga ataeinimwaane ao ataeinnaine aika tau n te Ekaretia aei n te tabo ni mitinare a rang n onoti. Reken te tai n tei ibukin te Tia Kamaiu Iesu Kristo ao Ana Ekaretia e aki riai ni katinanikuaki. Mwakuri n aron teimatoam n tataro, karikirakean ao kaotakin am koaua tabeua te tai ni katoa bong, kamatebwaiakan booki aika tabu n taai aika mwaiti, ao te kaitibo ma aomata aika ko na aki kona ni kaitibo mangaiia ngke ko tiku ni mwengam, bon taneiai aika a rang ni kakawaki. Te karinan n taneiai anne e katukaki naba ibukiia kairake ake e a tia te Uea ni weteia bwa a na beku bwa mitinare n ibuobuoki. Ko rang ni butimwaeaki ao n tau. Taiaoka n aki kamemerea aron kakawakin te mwakuri ni mitinare, bukina bwa e karekea naba te taneiai ae akea aron kabwarabwaraana. “E korakora kakawakia aomata imatan te Atua” (Reirei ao Berita aika Tabu 18:10), n raonaki ma bon kakawakim.
N okim man am mwakuri n ibuobuoki, tao raom te aine ke raom te mwaane e aki tabe ma ngkoe, ma ko na tia n reiakina raoi aron te reitaki ma aomata ae nakoraoi. E na nakoraoi riki am reirei man te taneiai ae ko a tia ni karekea inanon katauraoam imwain am mwakuri, ao kabaneana, ko na karekea te nano ae bwanin ni kan taetaekina euangkerion te rau, ao n taetaekina koauan te koaua are e a tia ni manga kaokaki.
Ibukimi ngkami ake kamwa tia ni mare ao ni kakaokoro aron maiumi, kam rang kainnanoaki naba n ana mwakuri te Uea. Katauraoi ngkami. Maiuakin maiu aika kamarurung, ukora te riki n toronibwai n rabwata ao n tamnei, ibukina bwa karaoan bwaai aika e na karaoi te Uea ibukiia Natina aki ti katauaki nakon te roro-ae ti teuana. Kabanean kakukurein taai ake I a tia ni karaoi ma kainabau tabeua te ririki n nako a reke ngke ti mwakuri irarikiia taanga, ao n taabo ma aomata, aika a tei n okoro.
Te taneiai ae I karekea ni banen au tikurii n te topography e reireinai ae ti kamanoa n taainako te koaua ngkana ti taetaekinna ao kamanoan te koaua anne bon te bwai ae e na kakaraoaki. E na aki riai ni karaoaki kamanoan te koaua n te unuun ma e na karaoaki ma te nano n tangira ae koaua, te tibwatibwa, ao ni kaoia aomata ake ti kaota ara koaua nakoia, n tii iangoi mweraoin rabwataia ao tamneia natin Tamara are i Karawa (taraa Motiaea 2:41).
N te maungatabu ni kabuta n Okitobwa 2021, Beretitenti Russell M. Nelson, ara burabeti ae tangiraki, e reireiniira bwa te aki boraoi n iango ma ake tabeman, iai ikanne te bwai ae ti atongnga bwa te eti ao te kairua. Iai raoi ikanne te koaua ni koaua—te koaua ae akea tokina. (Taraa “Te Koaua ae Itiaki, Reirei ae Itiaki, ao Kaotioti ae Itiaki,” Riaona, Nob. 2021, 6.)
E reireiniira koroboki aika tabu, “te Koaua bon te atatai ni bwaai n aroia ngkai, ao n aroia ngkoa, ao n aroia n taai aika a na roko” (Reirei ao Berita aika Tabu 93:24).
Ara atatai iaon te koaua e bon aki kaotiira bwa ti tamaroa riki nakoia ake tabeman, ma e reireiniira te bwai ae ti riai ni karaoia bwa ti aonga n okira te Atua.
Ngkai ko teimatoa ni waaki inanon Kristo ao ma te nanomatoa n aki ti taetaekina te koaua ma ni maiuakina te koaua, ko na karekea te mwengaraoi ao te rau n tain te mangaongao aika kona kaitarai ni boong aikai.
Ti kona n oreaki nako n taian kakaewenako ake ti kaitibo ma ngaai inanon maiura, ma ko na ataia bwa ngkana ti kamwakura ara onimaki iroun Iesu Kristo, ao “[karawawatakira] a na riki ma tii n te tai ae uarereke” (Reirei ao Berita aika Tabu 121:7) inanon nako te maiu ae akea tokina. Taiaoka, tai katei tain am kangaanga ao am kakaewenako ake a na toki iai. Onimakina Tamam are i Karawa ao tai bwara n nano, bwa ngkana a bwara nanora, ti na bon aki kona n ataia bwa e na kanga aron tokin kawaira n abanuean te Atua.
Taua ni kamatoa te koaua, n reirei man bwaai n ibuobuoki n te koaua:
-
Koroboki aika tabu (taraa 2 Nibwaai 32:3).
-
Aia taeka burabeti (taraa Amota 3:7).
-
Te Tamnei ae Raoiroi (taraa Ioane 16:13).
I kaota au koaua iroun Iesu Kristo ao aio bon Ana Ekaretia. Iai ara burabeti ae maiu, ao ti namakina te inaomata n tainako ngkana ti kawakina te koaua ma te ninikoria. N aran Iesu Kristo, amen.