Kakororaoaki Irouna
Kakororaoakira e bon ti kona n riki rinanon ana akoi te Atua.
Tamara are i Karawa ao ara Tia Kamaiu, Iesu Kristo, iai mwaakaia ni kamaiura, ao ni bitiira. A kona ni buokiira n riki n Aroia.
Tabeua te ririki n nako, temanna tibura te mwaane ae uarereke, Aaron, e a moanna n reke ana kangaanga ni marurungina. E a moanna ni kai kua, a reke babangaki iaona, ao n aki tara ni marurung. Imwiin ana tutuo, ao e a kuneaki bwa e korakora irouna aplastic anemia, te aoraoki are riin rabwatana e aki kona ni karika te rara ae uraura, mainaina ao tautian rabwatana. N akean bwainaorakiana ao katokana ae tawe, raraana e aki kona raoi n totoki nakona ke ni buakani manaoraki, ao tao te bwaka, te ikuaki, ke te aoraki e na karika te kangaanga ni maiuna.
Inanon te tai ae maan, Aaron e aki toki ni kakarinaki raraana bwa e na aki reke n te kangaanga. E kabwarabwaraa te taokita bwa ti reken marurungina ngkana e anganaki te rara ae mena nte rii, ao te kabanea n tamaroa ibukin karaoan te mwakuri aio, bon anganakina mairoun oin tarina ma mwanena. Ngkana temanna tarina ke mwanena ae e bon titebo raoi ma ngaia, e na kona ngkanne n reke te marurung ngkana e karaoaki te anga rara aio nakoina. A tuoaki tarina ake aman, ao ti temanna, bwa Maxwell, ae e noraki bwa titebo raoi ma ngaia.
E ngae ngke ea reke ae e titebo ma ngaia, te korokoro n angarara aio e bon kona naba n reke iai te kangaanga. Te mwakuri aio e kainanoa ae manin rabwatan Aaron n raraana are e aoraki e na tiringaki man korakoran te bwainaoraki imwaain karekean te rara are man raraan riin tarina ae Maxwell. Ngkanne ibukin aki marurungin tautian rabwatan Aaron, e riai ni kaokoroaki n te onaoraki inanon tabeua te wiiki ao imwiina ni mweengana inanon namwakaina aika mwaiti ma tuana aika onoti, rinorino, ao bwainaoraki.
Te kantaninga man mwiin te anga rara aio bwa rabwatan Aaron e na aki totokoa te rara are e anganaki ao naba bwa taian rara mairoun Maxwell a na kona ni karikii taian rara aika a uraura ao mainaina ao tautia n rabwata are e kainanoaki n rabwatan Aaron. Te korokoro e bon rang n nakoraoi ao ni karika te bitaki ni koaua nakon tein te rabwata. Kamiimiina, e kabwarabwara te taokita bwa ngkana e karaoa te bure ae kakaiaki Aaron ao e tiku teutana raraana n te tabo anne, bureitiman ana bon kona ni kaburea tarina are Maxwell. E riki aei ibukina bwa raraan Aaron e roko man ana cells Maxwell are e anganaki ao iai ana DNA Maxwell iai, ao aio ae e na riki ni karokoa tokin maiuna.
Ni kamaiuan Aaron man raraan tarina e a tia ni kaueka te iango iaon raraan Iesu Kristo ni kabooira ao korakoran Ana Mwakuri ni Kamaiu ae bane n rootiira. I tangiria ni kabotoa te taratara n te bong aei iaon, te bitaki ni koaua ibukin te kamauaki ae e reke ngkana ti kariaia te Uea ni mwakurii kakai inanora.1
Akea korakoran Aaron ibon irouna n tokanikai iaon te aoraki. Rabwatana e aki kona ni karaoi taian cells n te raraa ni boutoka maiuna. Engae ngke tera mwakuri ae e a tia ni karaoi I bon irouna, e bon aki kona ni karekea te marurung nakon raraan riina. N aron Aaron ae e aki kona ni kamaiua ibon irouna, ngaira naba ti bon aki kona ni kamaiura i bon iroura. N aki tabe bwa aekakira konabwaira, ara reirei, wanawanara, ke korakorara ngaira, ti aki kona ni kaitiakiira man ara bure, ni bita rabwatara nakon te aki mamate, ke ni kamaekaira i karawa. E bon ti kona n riki rinanon te Tia Kamaiu Iesu Kristo ao Ana Mwakuri ni Kamaiu ae akea tiana. “Ao akea riki te kawai teuana ke te ara are e a tia n taekinaki iaan karawa are e na kona ni kamaiuaki iai te aomata inanon uean te Atua.”2 Bon man raraana ni kamaiu ae e kaitiakiira ao n kakororaoira.3
E ngae ngke Aaron e aki kona ni kamarurunga ibon irouna, ao bwa te korokoro e na nakoraoi e kainanoaki bwa ena riai ni ira are e tua te kaokita—riki ni bwaai aika a matoatoa, ke ni kanganga. E ngae ngke ti aki kona ni kamaiura ibon iroura, ngkana ti katan nakon nanon te Uea ao ni kawakin ara berita, e uki te kawai ibukin kamaiuakira.4 N aron kamiimiin waakin te bitaki n te DNA n te cells n raraan Aaron, ti kona ni karekea bitakin nanora,5 karekea tein tarakina imoara,6 ao n riki bwa aomata aika boou inanon Kristo.7
Aramwa e kauringiia aomata i Taraemera n aroia te roro ake rimoa ake a tia n rairaki. N taetae iaon Tamana, e kabwarabwa Aramwa bwa “ni kaineti ma ana onimaki bon iai te bitaki ae korakora ae riki i nanona.”8 Ngkanne e titiraki, “Kam a tia n rinanon te bitaki ae korakora aio inanomi?”9 Bon tiaki aomata ae a bitii nanoia. Te Uea ae e karaoa te bitaki ni koaua. Aramwa e rangi ni kamataataa aio. E taku, “Nooria, e bita nanoia.”10 A kananorinanoia ma ni katuka aia onimai iroun te Atua ae koaua ma ni maiu … [ao] a kakaonimaki niua te toki … [ao] a kamaiuaki.”11 A kukurei aomata ni kaukii nanoia ao ni kamwakura aia onimaki, ao imwiina te Uea e bitii nanoia. Ao bon te bitaki ae korakora are e riki! Iaonga te kaokoro ni mauia mwaane aika uoman ae araia Aramwa imwaain ao imwiin bitakin nanoia.12
Ngaira bon natin te Atua ma nera irouna ae kakanato. Ti kona ni bitaki n riki n Aiarona ao ni karekea te “kimwareirei ae bwanin.”13 Tatan, n te itera are teuana, e na tangiriira bwa ti na karawawataaki n arona.14 Iai ara konaa n rinea bwa antai ae tina iria.15 Ngkana ti iriira Tatan, ti anganna korakorana.16 Ngkana ti iriira te Atua, E anganiira korakorara.
E reirei te Tia Kamaiu bwa ti “riai ni kororaoi.”17 Aio e kona n taraa ni kabwaranano. I kona n nora raoi aki tauu ao te korakai n ataan te raroanako imarenau ma te kororaoi. E rereke iroura ae ti iangoia bwa ti riai ni kororaoi, ma e bon kangaanga reken aei. Irakin taian iango man taian booki ni ibuobuoki nte aonnaba ana bon aki anga aei. Bon tii teuana te kawai ao teuana te ara ae e roko mai irouna te kakororaoaki. Ti “kakororaoaki rinanon Iesu te tia raoi n te berita ae boou, are e kakoroa bukin te mwakuri ni kamaiu ae kororaoi aei rinanon waanakon oin raraana.”18 Kakororaoakira e bon ti kona n riki rinanon ana akoi te Atua.
Kan iangoa te rarawata ae na kona n reke iroun tibura Aaron n aron iangoan ao karaoakin bwaai ni irekereke ma ana korokoro ibon irouna n tii ngaia? Ti riai n aki iangoia bwa ti riai n karaoa are e kona ni karaoia te Tia Kamaiu n ti ngaia n te kawai ae kamiimii ibukin kakororaoakira.
Ni kainan ana rekooti Moronaai, e reirei, “Eng, nakomai nakon Kristo, ma ni kakororaoaki irouna, … ao ngkana kam kaakeai bwaai ni kabane aika tiaki aron atua, ma n tangira te Atua ma korakorami, ami iango ao marurungimi, ao ngkanne e na tau ana akoi ibukimi, ao man ana akoi ao kam kona ni kororaoi iroun Kristo.”19 Ai tamaroara te koaua ae korakora man karaunano! E tau Ana akoi ibukiu. E tau Ana akoi ibukim. E tau ana akoi nakoia aomata ni kabane ake a “kua ao man rawawata.”20
N aron te mwakuri ni korokoro nakon Aaron, bon iai n tainako tabeua kangaanga aika a kona n riki. Ni koauana, Aaron e kainanoa te kauatai ni manga anganaki te bone marrow ngke arona bwa iai te kangaanga nakon te moan. Te karabwarabwa, bwa man te bitaki n te nanon n te maiu n tamnei, ti na aki iangoia ngkana e na manga riki. Ngkana ti maiu nakon are Nanona, “n onimakina teuare e tau are iai mwaakana ni kamaiu,”21 bon iai 100 te betiente kakoauakina ae ti na kaitiakaki man raraan te Tia Kamaiu ao n tokina te kakororaoaki Irouna. Bon Ngaia “Atuan te koaua, ao [E] aki kona ni kewe.”22
Bon akea te titiraki iaona bwa te waaki ni bitaki aei e anaa te tai ao e na aki bwanin arona ni karokoa mwiin te maiu aei, ma te berita e bon koaua. Ngkana kakoroan nanon ana berita te Atua e taraa n rangi n raroa, ti na bon teimatoa n tauii berita akanne, n ataia bwa a na bon kakoroaki nanoia.23
Kamiimiin te bitaki nakon marurungin Aaron e uota te kimwareirei ae korakora nakon ara utu. Iangoa te kimwareirei ae korakora i karawa ngkana te bitaki ae korakora e riki inanora.
Tamara are i Karawa ao ara Tia Kamaiu, Iesu Kristo, a tangiriira ao a tutuaraoi ni kan bitiira ao ni kakororaoira. A tangiria ni karaoa aei. Bon oin raoi Aia mwakuri ao mimitongiia.24 I kaota au koaua ae iai mwaakaia ni karaoa aei ngkana ti Nakoia n te onimaki. N aran Iesu Kristo, amen.