Bwa Aonga n Ataiko
Nanou ae korakora bwa kam ana kina Iesu n Arana aika a mwaiti ao kam na riki n ai Arona.
Tabeua te ririki n nako, e reke te taneiai ae bita maiu n tain te bootaki n toa n ara uoote i Arizona. Ngke e taekinaki n tataron te toa kukureira ni “katoka [iaora] aran [Iesu Kristo],”1 e kauringai te Tamnei ae Raoiroi bwa Iesu iai arana ae mwaiti. E roko ngkanne te titiraki inanou: “Enga iai aran Iesu ae I riai ni katoka iaou n te wiiki aei?”
Teniua aran Iesu aika a roko n au iango, ao I korei. Aara nikateniua aikai iai inanona anuan maiun Kristo ae I tangiria ni karikirakea n ae bwanin. N te wiiki are imwiina, I kabotoa au iango iaon aara ake teniua akanne ao ni kataia n anai aekan anuaao aroaro akanne ake a irekereke ma aara akekei. Man te tai anne, I reitinako n tititirakinai irou te titiraki aio bwa mwakoron au nebonebo: “Enga iai aran Iesu ae I riai ni katoka iaou n te wiiki aei?” Kaekaan te titiraki anne ao kataakin karikirakean te anua ni maiu are e irekereke ma anuan Kristo e a tia ni kakabwaiaa maiu.
N Ana Tataro ae korakora Ibukira, e katuruturua kakawakin te koaua aio Iesu: “Ao aio te maiu are aki toki, te ataiko ae te Atua ae ti temanna ae koaua, ao Iesu Kristo, ae Ko kanakomaia.”2 N te bong aei I tangiria n tibwauaia ma ngkami te kakabwaia ao te mwaaka ae roko man ataakin Iesu Kristo n Arana aika mwaiti.
Te kawai ae bebete n ataan temanna bon man ataakin arana. E taekinaki bwa “aran temanna i bon iroun te aomata anne bon te kabanea ni karewe ao ni kakawaki n taetae nako.”3 Ko a tia n rinanon te taneiai ae ko wetea temanna ao e bure arana ke ko mwaninga araia? Kainnabau, Alexis, ao Ngai , n taai tabetai, ti wewetea temanna natira bwa “Lola.” Kananokawakina, n aron ae ko ketinna, Lola bon ara kamea! N aki ataia bwa e tikiraoi ke e buakaka, mwaningam aran temanna e kaotia nakon te aomata anne bwa tao ko aki kinaa raoi.
Iesu e kinaia ao ni weteia aomata n araia. Nakon Iteraera rimoa, e taku te Uea, “Tai maaku: ba I kamaiuko ni kaboko, I weweteiko n aram; bon au aomata ngkoe.”4 Ni moaningabongin te Itita, ana kakoaua Maria n noran te Kristo ae mangauti e kamatoaaki ngke Iesu e weteia n arana.5 Ai arona naba, te Atua e wetea Iotebwa Timiti n arana ni kaekaan ana tataro n onimaki.6
N taai tabetai, Iesu e anganiia Ana abotoro araia aika boou are e kaota aroia raoi, aia atatai, ao aia konabwai. Iehova e angan Iakobwa te ara ae boou ae Iteraera, are nanona, “E angan te Atua bwa e na bweena maiuna aomata ae totokanikai iroun te Atua” ke “katokanikaia te Atua.”7 Iesu e angan Iakobo ao Ioane te ara ae Boanereke, are nanona “natin te ba-ni-karawa.”8 Noran aron ana kairiiri nakon taai aika a na roko, Iesu e angan Timon te ara ae Keba ke Betero, ae nanona te bwaa.9
N aekan ae Iesu e kinaira n arara n tatabemaniira, teuana te kawai ae ti kona n roko n ataa raoi Iesu bon man reiakinan Arana aika mwaiti. N aron aran Iteraera ao Betero, aran Iesu aika mwaiti bon aara ae e kinaaki iai are e buokiira ni mataata iaon Ana mition, kantaninga, aroarona, ao anuana. Ngkai ti a moanna n atai aran Iesu aika mwaiti, ti na roko n ataakin raoi Ana mition ae mai iroun te Atua ao aroarona ae e aki ti iangoia. Atakin Arana aika mwaiti e na anganiira naba kairara bwa ti na riki n ai Arona—ni karikirakea anuan maiun Kristo are e uota te kimwareirei ao te kantaninga nakon maiura.
Tabeua te ririki n nako, Beretitenti Russell M. Nelson e kamatebwaia ni kabane koroboki aika tabu iaon Iesu Kristo n te Topical Guide.10 Imwiina E kaoia kairake ni ikawai ni kamatebwaii koroboki aika tabu naba. Ni kaineti ma aran Iesu aika mwaiti, Beretitenti Nelson e taku, “Kamatebwaia ni kabane bwa antai Iesu Kristo man te tataromwaaka ao ni iburoki n ukora mataatam bwa tera nanon aara ake a katokaaki Iaona nakoim i bon ibukim.”11
Imwiin ana kakao Beretitenti Nelson, I a moana karaoan karinanin aran Iesu ake a mwaiti. Aara ake I karinanii ai nakon ngkai 300 aara, ao I ataia bwa a mwaiti riki ae I tuai ni karekei.
Ngkai iai tabeua aran Iesu aika a bon onoti tii Ibukina,12 I tangiria n tibwauai nimaua aara ao nakoana ake e kinaaki iai akea a rekereke ma ngaira. I kaoi ngkami bwa kam na korei karinanin oin ami ara ngkai kam a moanna ni kinaa Iesu n Arana aika mwaiti. Ni karaoakin aei, ko na kunea bwa a mwaiti riki aara tabeua—ae a irekereke ma anuan maiun Kristo—ake ko na tangirii ni katokai iaom bwaana reirei ni berita Iesu.13
Te moan, Iesu bon te Tia Kawakin Tiibu ae Tamaroa.14 Ngkai boni ngaia, Iesu e kinaia Ana tiibu,15 “e weteiia ni araia,”16 ao, ngkai ana tibu te teei te AtuaE anga maiuna ibukiia Ana Tiibu.17 N tii te arona, e tangiriira Iesu bwa ti na riki bwa taan kawakin tiibu aika tamaroa, riki nakoia ara utu ao n riki bwatari ao titita ni ibuobuoki. Teuana te kawai ae ti kaota ara tangira ibukin Iesu bon man kamwarakeaia Ana tiibu.18 Ibukiia tiibu ake tao a boonako, taan kawakin tiibu aika tamaroa a nako nanon te rereua ni kakaia tiibu ao n raoniia ni karokoa a oki ao ni kamanoaki.19 Ngkai taan kawakin tiibu aika a tamaroa, ao ngkana e kona ni karaoaki n am tabo, ti riai n ukoria ni kabanea te tai ni buokiia aomata ni mweengaia. N ara mwakuri ni ibuobuoki, te tekiti ao bwaai n rabakau aika boou a riai ni kabonganaaki nikatoamaua, n aki onea mwiin, kawarakiia.20
Te kauoua, Iesu bon Mataniwiia Ibonga Ibukin Bwaai aika Raraoi aika Nang Roko.21 N ataakina bwa e a kaan roko kamwaneakina, e taku Iesu: “I atongi baikai nakoimi, bwa kam na karekea te rau. Ami bwai i aon te aba te rawawata: ma kam na kabebetei nanomi; I a tia ni kataea ana kai te aba.”22 N te bong aei, ngkai ara aonaaba e a korakora te kakaitara ni iango ao te kakaokoroaki, iai kainanoara ae korakora bwa ti na taetaekina ao ni kaotii aroaroa aika raraoi, kariaan baika a tamaroa n riki, ao te kaantaninga. N aki mutiakin kakaewenakoakira ake mai imwaaina, te onimaki e aki toki ni uotiira nakon taai aika a na roko,23 ae onrake n te kaantaninga, ni karikiira bwa ti na kakoroa nanon ana kakao Iesu ae e na kabebeteaki nanora.24 Te kukurei ni maiuakina te euangkerio e buokiira n riki bwa taan iriira Iesu ni bwaai aika a tamaroa aika a na riki.
Teuana riki aran Iesu ae e kinaaki iai bon Titebo Ngaia, Ngkoananoa, n te Bong aei, ao n Aki Toki.25 Te Teimatoa bon anuan maiun Kristo. Iesu e aki toki ni karaoa nanon Tamana,26 ao Baina e teimatoa n takinaki ni kamaiu, ibuobuoki, ao ni kamarurungiira.27 Ngkai ti a moana n teimatoa ni maiuakina te euangkerio, ti na kona n riki n aiaron Iesu.28 E ngae ngkai te aonaaba e na rinanon te bitaki ni baika a moanibwai ao aomata a katiotioaki ma ni kakamwaeieiaki nako n te angi nako ae te reirei nako,29 te teimatoa ni maiuakinan te euangkerio e buokiira n nanomatoa ao n aki kamwaingaki n tain buakan te maiu.30 Ti kona naba ni kaota teimatoara man butimwaeakin ana kakao Beretitenti Nelson ni “karekea ara tai ibukin te Uea.”31 Korakoran te maiu n tamnei e roko man bwaai aika a uarereke man bebete32 n aron karikirakean “aroarora ao baika ti kakaraoi aika tabu”33 n tataro ni katoabong, rairannano, kamatebwaian koroboki aika tabu, ao buokaiatabeman.
Te kaaua, Iesu bon Atuan Iteraera ae Tabu.34 Maiun Iesu bon te baeten n te maiu ae tabu. Ngkai ti iriira Iesu, ti kona n riki bwa temanna ae tabu i Iteraera.35 Ti rikirake ni maiura ae tabu ngkana ti nanakon te tembora, are e koreaki n te mataroa n rin “E tabu bwa Ana bwai Iehova”. Ni katoa tai ae ti nebonebo n te tembora, ti otinako ma kabwaiara ae korakora ni karika mweengara bwa te tabo ae tabu.36 Nakoia ake akea ngkai aia kariaia n rin n tembora aika tabu, I kaoko bwa ko na kawara am bitiobi ao ni katauraoiko n rin ke n oki nakon te tabo ae tabu anne. Kabanean te tai n te tembora e na karikirakea te tabu inanon maiura.
Teuana te kabanea n ara iaon Iesu bon Kakaonimaki ao Koaua.37 Ngkai Iesu e rangi ni kakaonimaki ao ni kokoaua n taainako, Nanona e korakora ibukin tangirakira bwa tina kaotii aroaro aikai inanon maiura. Ngkana a memere ara koaua, ti kona n tang nakon Iesu, “Te Uea, kamaiuai,” n aron Betero ngke e a moanna ni inako ni buakan naman Kariraia.38 N te bong anne, Iesu e kanakoa baina ni kamaiua te reirei are e inako. E a tia ni karaoa naba anne nakoiu, ao E na karaoa naba aio ibukim. Tai kitana Iesu—E bon aki kona ni kitaniko!
Ngkana ti kakaonimaki ao ni kokoaua, ti iriira ana wewete Iesu n “Tiku irou,” are e kona naba n nanonaki ni “maeka ma ngai.”39 Ngkana ti a kaitaraaki ma titiraki, ngkana ti kaenaenaaki ibukin ara onimaki, ngkana baai ni bwainingare a koteira mai irouia naake n te kateitei ae bubura n te aonaaba, ti teimatoa ni kakaonimaki ao n tiku ni kokoaua. N taai aikai, ti uringa Ana bubuti Iesu, “Tanimai nakoiu n ami iango n taai nako; tai nanououa, tai maaku.”40 Ngkai ti karaoia, E anganiira te onimaki ae ti kainanoia, te kaantaninga, ao te korakora n tiku Irouna n aki toki.41
Tariu ao mwaaneu aika kam tangiraki, ae tangiria Iesu bon Ataakina ibukina bwa Ngaia bon tii te ara iaan karawa ae ti kona ni kamaiuaki iai.42 Iesu bon te kawai, te koaua, ao te maiu—akea ane nako n te Tama, bwa ti Irouna.43 Iesu bon tii te kawai! Ao man bukina akanne, e kaoira Iesu, “Nakomai nakoiu,”44 “Iriirai,”45 “Nakonako ma ngai,”46 ao “Reirei irou.”47
Ma nanou ni kabane, I kaota au kakoaua iaon Iesu Kristo—bwa E maiu, E tangiriko, ao E kinako n aram. Bon Ngaia Natin te Atua,48 ana Riki Temanna te Tama,49 Bon Ngaia ara Bwa, Oora, Otangara, ara tabo ni Katantan, ao te Tia Kainaomataira.50 Boni Ngaia te Ota ae Otanako n te Roo.51 Bon ara Tia Kamaiu52 ao te Tia Kabooi Maiura.53 Boni Ngai te Mangauti ao te Maiu.54 Nanou ae korakora bwa kam na nakomai ni kinaa Iesu n Arana aika mwaiti ao kam na riki n Aiarona ngkai ko kaota Anuana inanon maium. N aran Iesu Kristo, amen.