Ana Tangira te Atua, iroun Sabrina Squires

Tianuare 22–28: “Otanganiko n te Raoiroi ma Mwaakan te Atua”

1 Nibwaai 11–15

Ngkana iai ana mwakuri te Atua ae rang korakora ibukin Ana burabeti bwa e na karaoia, E aki toki n angan te burabeti anne te mii ni burabeti aika korakora. Mote, Ioane, Riaai, ao Iotebwa Timiti a bane n reke te mii ni burabeti ae aekan anne irouia—te mii ae karababaa aia taratara ao ni buokiia n noora korakoran ao kamimiin aron raoi ana mwakuri te Atua.

Nibwaai e reke naba te aeka ni mii anne ae onea maiuna. E noora ana mwakuri ni kamaiu te Tia Kamaiu, aroia ana kariki Riaai ibukin n taai aika ana roko n te aba ni berita, ao Ana mwakuri te Atua n boong-aika kaitira. Imwiin te mii ni burabeti aei, e a tauraoi raoi ngkai Nibwaai nakon te mwakuri are e mena imwaaina. Ao warekan taekan te mii aei e kona ni buokiko ni katauraoiko naba—bwa iai naba Ana mwakuri te Atua ae ko na karaoia n Abanueana. Ngkoe naba mai ibuakoia “aika itiaki aika kain ana ekaretia te Tiibu te Teei” are e nooraki iroun Nibwaai, “ake a maenako nako aon te aonaaba; ao a otangaia n te raoiroi ma mwaakan te Atua ao te mimitong ae korakora” (1 Nibwaai 14:14).

Iango ibukin Reiakinana n te Mweenga ao n te Taromauri

1 Nibwaai 11

Te Atua e kanakomaia Iesu Kristo bwa kaotan Ana tangira.

Ngke e titirakina te anera Nibwaai bwa tera nanon te kai are ni miin Riaai, e ti kona ni kangai te anera, “E tei ibukin ana tangira te Atua.” Ma e aki, e kaotia nakon Nibwaai rinanin nako kanikinaa ao bwaai aika a riki man maiun te Tia Kamaiu. Taratarai kanikinaa aikai ao bwaai aika a riki ngkai ko wareka ao n iangoa raoi 1 Nibwaai 11. Tera ae ko kunea ae buokiko ni kaotako bwa bukin tera Iesu Kristo bon kaotan Ana tangira te Atua ae korakora?

Ko na bae ni iangoa naba matakuakinan te witeo man te Baibara n te Gospel Library are e irekereke ma te bwai ae riki are e noria Nibwaai. E kanga te Tia Kamaiu n tia ni buokiko n namakina Ana tangira Tamam are i Karawa?

Taraa naba Susan H. Porter, “Ana Tangira te Atua: Te Kabanea ni Kakukurei nakon te Tamnei,” Riaona, Nobembwa 2021, 33–35.

1 Nibwaai 12–14

I kona n “otanganaki n te raoiroi ao te mwaaka.

Nibwaai e na bon aki tiku ni maiu n norii angiin baike e noori ni miina ni burabeti. Bukin tera ngkai ko iangoia bwa e rangi ni kakaawaki ibukin Nibwaai n atai bwaai aikai? Bukin tera e kakawaki aei ibukim bwa ko na ataia? Tabeki titiraki aikai ni katoa tai are ko wareki bwaai ake e noori Nibwaai inanon miina (taraa 1 Nibwaai 12–14). Tera namakin aika ko karekei ibukin tibwangam n ana mwakuri te Uea “ae korakora … ma n kamiimi”? (1 Nibwaai 14:7). Tera tabeua bwaai aika korakora man kamiimii ake E a tia ni karaoi ibukim?

Karaua iangoa riki te berita are n 1 Nibwaai 14:14. E kanga te Tia Kamaiu ni kakoroa bukin te berita aei inanon maium? (Tabeua te katooto, taraa David A. Bednar, “Ma Mwaakan te Atua ao te Mimitong ae Korakora,” Riaona, Nobembwa 2021, 28–30, riki kabanea ni mwakoro ake uoua.)

1 Nibwaai 13:1–9; 14:9–11

Tera “te ekaretia ae korakora ao n ribaaki” are e nooria Nibwaai?

Beretitenti Dallin H. Oaks e kabwarabwara bwa “te ekaretia ae korakora ao n ribaaki” are e kabwarabwara Nibwaai bon “aekan kareke iango ke bootaki ake a kaitara te koaua iaon te Atua. Ao te tautoronaki are e ukoria te ekaretia aio ni katoka iaoia aika itiaki bon tiaki te tautaekanaki n te rabwata nakon ae te tautoronaki ni iango aika bure (Teei bwa Ana Tia Kakoaua te Atua,” Ensign, Maati 2015, 32). E kanga te Tia Kamaiu ni buokiko n totokoi—ao n otinako man—te tautoronaki ni iango aika kairua?

1 Nibwaai 15:1–11

E na kaekaai te Atua ngkana I bubuti ma te onimaki.

Ko a tia n namakinna ae kanga ko tuai ni karekea te kaotioti i bon iroum—bwa te Atua e tuai taetae nakoim? Tera te reirei are e anganiia tarina Nibwaai ngke a namakina te aro aei? (Tara 1 Nibwaai 15:1–11.) Kona kanga ni kamwakura ana reirei Nibwaai inanon maium?

1 Nibwaai 15:23–25

Taua ni kamatoaa ana taeka te Atua e buokai n totokoa ana kariiri Tatan.

E aki toki Nibwaai ni iai baika a moanibwai ae e na taekin nakoia tarina. Ma e korakora riki nanona nakon te bwai are e tuangiia n 1 Nibwaai 15:23–25. Tera ana rongorongo Nibwaai, ao bukin tera n am iango ngkai e rangi ni bane nanona nako iai?

E reirei Unimwaane David A. Bednar bwa “ana taeka te Atua” a kona n nanonaki bwa koroboki aika tabu, aia taeka burabeti aika maiu, ao bon nakon Iesu Kristo. Tera n am iango ae nanonaki n te “nene ni matoa” nakon koroboki aika tabu ao aia taeka burabeti aika maiu? Tao tera nanon ae “nene ni matoa” nakon Iesu Kristo? Ko kona n noori kaekaan titiraki aikai n ana rongorongo Unimwaane Bednar “Ma Ti Aki Kan Mutiakiniia” (Riaona, Meei 2022, 14–16).

E kanga te nene ni matoa nakon ana taeka te Atua ni buokiko n totokoa teuare buakaka? Kanoakin te taibora n aron aio e kona ni buoka barongaakin am iango:

	… buokai n tokanikai iaon roon ana kariri te riaboro? (taraa 1 Nibwaai 12:17)	… buokai n “aki mutiakin” kaibwabarun ao kainikatongan te aonaaba? (1 Nibwaai 12:18)
E kanga te nene ni matoa nakon koroboki aika tabu ao aia taeka burabeti aika maiu…
E kanga te nene ni matoa nakon te Tia Kamaiu …

Taraa naba “The Iron Rod,” Anene n Taromauri, nambwa 274; Jorge F. Zeballos, “Building a Life Resistant to the Adversary,” Riaona, Nobembwa 2022, 50–52.

Booki aika tabu kanga ai aron te kai te biti are e kairira nakon te kai ni kamaiu.

Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

1 Nibwaai 11:16–33

Tamara are i Karawa e kanakoa Iesu Kristo nako aon te aba ibukina bwa E tangiriira.

• N reireina Nibwaai aron Ana tangira te Atua, te anera e kaota nakon Nibwaai bwaai aika a riki man maiun te Tia Kamaiu. Ko kona ni karaoa ae aron anne ma natim—anganiia tamnein te bwai ae riki are e noria Nibwaai n 1 Nibwaai 11:20, 24, 27, 31, and 33 (taraa Korobanna n te Euangkerio, nambwa. 30, 35, 39, 42, 57). Ngkai ko wareki kiibu aikai, buokiia natim ni kunei tamnei ake a titebo ma kiibu. Tera ae ti reiakinna iaon Iesu Kristo man kiibu ao tamnei aikai?

• Anenean te anene n aron “He Sent His Son” (Aia Boki n Anene Ataei, 34–35) e kona ni buokiia natim n namakina Ana tangira te Atua. Imwiin tiami n anene, titirakiniia natim bwa tera ae a reikainna man te kuna. Tera riki ae ti kona n reiakinna iaon Ana tangira te Atua man 1 Nibwaai 11:22–23?

Kabonganai korobanna ni buokiia ataei n reiakinaki. Ngkana ko reireiia ataei karaki man koroboki aika tabu, buokiia ni katamneia n aia iango. Ko kona ni kabonganai tamnei, witeo, taore ake ko kataetaei, kunnikai ni kaotioti, ao a bati riki.

1 Nibwaai 13:26–29, 35– 36, 40

E reirei koaua aika a kakawaki Ana Boki Moomon.

• Ni buokiia natim n ataa kakawakin koaua aika “bebete ao ni kakawaki” inanon Ana Boki Moomon, ko kona ni korea te tamnei ao kaoiia natim ni bita ke ni kanakoi mwakoron te tamnei ni karikia bwa e na taraa ni kaokoro. Ko kona ni kabonganaa aio n reireiia bwa bwaai ake inanon te Baibara a bitaki ao ni kanakoaki inanon te tai teuana ma teuana. Botaki ni wareka 1 Nibwaai 13:40 ao marooro bwa e kanga Ana Boki Moomon (“taian kabanea n rongorongo”) ni buokiira n atai “bwaai aika a bebete ma ni kakawaki” ake a tia ni bua man te Baibara(te moan rekooti). Tera koaua aika “bebete ao ni kakawaki” ake ko a tia n reiakin man Ana Boki Moomon?

• Te witeo “The Book of Mormon—a Book from God” (Gospel Library) e kona ni buokiia natim n noria bwa bukin tera e kakawaki karekean booki aika uoua te Baibara ao Ana Boki Moomon. Ataei a na tangiria ni manga karaoa te kamataata n te tamnei man te witeo.

Ana Boki Moomon—te Boki mairoun te Atua

Unimwaane Tad R. Callister e kabwarabwara kakawakin ana Boki Moomon bwa raon te Baibara ni kaotakin ana reirei te Atua aika a koaua ao Ana Ekaretia.

Ana Boki Moomon e kaoka koauan te euangkerio ake a bua inanon tain Kitanan te Koaua.

1 Nibwaai 15:23–24

Kanene ni kamatoa nakon ana taeka te Atua e buokai n totokoa te kariiri.

• Anganiia te tai natim bwa a na tibwa te bwai ae a uringa ni miin Riaai. E na ibuobuoki kabonganaan tamnei, n aron teuana are man te kabwarabwara n te wiiki ae nako. Tera ae e tukiia aomata bwa a na roko n te kai? Tera ae e buokiia bwa a na roko iai? Ko na bae n tuangiia bwa a na kakaea te kai te biti inanon te tamnei. Baane wareka 1 Nibwaai 15:23–24 ni kakaea bwa tera ae tei ibukin te kai te biti ao e na kangaa ni buokiira.

Ibukin iango riki tabeua, taraa te beeba ni kaongora n te namwakaina aio n te Rao maekatiin.

Miin Nibwaai ni burabeti iaon Maria, iroun James Johnson