Tianuare 29–Beberuare 4: “N na Katauraoa te Kawai Imwaaimi”

1 Nibwaai 16–22

Ngke a mwananga ana utu Riaai nakon te aba ni berita, e karaoa te berita aei te Uea nakoia: “N na katauraoa te kawai imwaaimi, ngkana kam kaawakin au tua” (1 Nibwaai 17:13). N ae mataata raoi, te berita anne e aki nanonaki ae e na bebetea te kawai—utu a teimatoa n aki nano teuana, kainikatebe a uruaki, ao a korakai aomata ao a mate, ao a na teimatoa ni kabaa te kaibuke man bwaai ni mwakuri aika tauraoi. E ngae n anne, ngke te utu e rinanon te kaangaanga ke te mwakuri ae taraa ni kaangaanga karaoakina, e kunea Nibwaai bwa te Uea e bon aki raroanako. E ataia bwa te Atua “e na kateimatoai marurungiia [taan onimaki], ma ni kakorakoraia, ao n anganiia kawai ake a na kona iai ni kakoroi bukin bwaai ake e a tia n tuatua bwa ana karaoi” (1 Nibwaai 17:3). Ngkana ko tuai n iangoia bwa bukin tera a riki bwaai aika buakaka nakoia aomata aika raoiroi n aron Nibwaai ao ana utu, ko na kona ni kunei atatai aika nano inanon mwakoro aikai. Ma tao ae kakaawaki riki, ko na noora te bwai ae a karaoia aomata aika raraoi ngkana a riki bwaai aika buakaka.

Iango ibukin Reiakinana n te Mweenga ao n te Taromauri

1 Nibwaai 16–18

E na buokai te Tia Kamaiu ni kaitarai kakaewenako n te maiu.

Ana utu Nibwaai a kaitarai kakaewenako aika matoatoa—n aron ae ti kaitarai. Tera ae ti reiakinna mairoun Nibwaai iaon kaitarakin kariiri ma te onimaki iroun Iesu Kristo? Wareka aron te bwai are e rinanona n 1 Nibwaai 16:17–32; 16:34–39; 17:7–16; 18:1–4; ao 18:9–22. Iangoia n taua mwiin te bwai are ko kunei iaan atu ni iango n aron: “Kakaewenako,” “E kanga Nibwaai ni Kaeka,” ao “E kanga te Uea ni Buokia.” Tera ae ko reiakinna are ko kona ni kamwakuria nakon kakaewenako ake ko kaitarai?

Imwiin reiakinam mairoun Nibwaai ao ana utu, ko na bae ni korei iango riki tabeua iaan atu ni iango aikai: “Kakaewenako Ibukiu,” “N a Kanga ni Kaeka,” ao “E na Kanga te Uea ni Buokai.” Ngkai ko karaoia, ko kona n tarai kiibu n aron aikai: Mataio 11:28–30; Ioane 14:26–27; Motiaea 24:13–15. Te anene n aron: “Where Can I Turn for Peace?” (Anene n Taromauri, nambwa 129), e kona ni kakorakoraa am onimaki iroun te Tia Kamaiu ao te buoka are E anga inanon taai ni kataaki.

Taraa naba Anthony D. Perkins, “Uringiia Am Aomata aika Itiaki n Rawawataia, O Atuara,” Riaona, Nobembwa 2021, 103–5; “He Will Give You Help,” “The Lord Guides Lehi’s Journey,” “The Lord Commands Nephi to Build a Ship,” and “Lehi’s Family Sails to the Promised Land” (videos), Gospel Library; “Life Help,” Gospel Library.

1 Nibwaai 16:10–16, 23–31; 18:11–22

E kairai te Atua rinanon bwaai aika uarereke ma ni bebete.

Ngke e kairiia ana utu Riaai te Atua inanon te rereua, E aki anganiia te mwabe are e kaota kabwarabwaraan nako mwanangaia. Ma e bon, anganiia te Riaona ibukin kairakiia ni katoa bong. Ngkai ko wareka 1 Nibwaai 16:10–16, 23–31, ao 18:10–22, iangoia ni karinani koaua ake a kabwarabwara bwa e kanga te Atua ni kairiia Natina (te katooto, 1 Nibwaai 16:10 e kona n reirei bwa n tabetai te Atua e kairiira ni kawai aika ti aki kaantaningai). Tera bwaai aika titebo aika ko noori imarenan te Riaona ao te Tamnei ae Raoiroi? Tera iai “bwaai aika uarereke” ike E kakoroi iai bukin “bwaai aika korakora” inanon maium?

Taraa naba Aramwa 37:7, 38–47; Reirei ao Berita aika Tabu 64:33–34.

Ngkana Ko Tauraoi ao Ko Na Aki Maaku, iroun Clark Kelley Price

1 Nibwaai 17:1–6, 17–22

Kataakiu e kona n riki bwa te kakabwaia.

Irarikin are Nibwaai ao tarina titebo te kakaewenako ae a kaitaraa n te rereua, aroia n rinanona e bon rangi ni kaokoro. Ko kona n taraa te kaokoro n ana rongorongo Nibwaai n te mwananga inanon te rereua (taraa 1 Nibwaai 17:1–6) ma aia rongorongo tarina (taraa 1 Nibwaai 17:17–22). Tera ae ataia Nibwaai ke ae e karaoia are e buokia ni karekea te taratara n onimaki? Iangoia ni korea taekan te kataaki ae e a tia n riki ke ae riki man te taratara n onimaki ao te kakaitau. Tera ae ko namakinna ke n reiakinna man aio?

Taraa naba Amy A. Wright, “Kristo e Kamaoa Are E Ikoaki,” Riaona, Meei 2022, 81–84; “No Strength without Struggle” (witeo), Gospel Library.

Te tai n ururing ae mabu. Anaa te tai ni iango, tanrikaaki, ururing, ke ni koroboki e kona n kairi nakon reken iango mai ieta. E kona ni buokiira n noria bwa e kanga reirei ke moan tua n te euangkerio n irekereke nakon maiura. Ngkana ko reireiniia aomata tabeman, anganiia te tai n ururing rikaaki ao korei baike a roko n aia iango. Aio e kona naba ni karikirakea kukurein nanoia n tibwa aia iango ao namakin ma tabeman.

1 Nibwaai 19:22–24; 20–22

I kona ni “kabootaui kanoan koroboki aika a tabu” nakoiu.

Ibukina bwa a koreaki koroboki aika tabu n taai ake rimoa, e kona n taraa ae aaki kaineti nakoira ni boong aikai. Ma e a kaman ataia Nibwaai. “I kabootaui kanoan koroboki aika tabu nakon maiura,” e taku, “bwa ti aonga n raka man reireinaki iai” (1 Nibwaai 19:23). Aio teuana bukina ae Nibwaai e kunea te korakora n te mwaaka n tamnei inanon koroboki aika tabu.

Iangoi titiraki aika imwiina ngkai ko wareka 1 Nibwaai 20–22:

1 Nibwaai 20:1–9.Tera ae e reiakinna kiibu aikai ibukiia aomata n ana tai Itaia? Tera ae ko kunei ae e kaineti nakoim?

1 Nibwaai 20:17–22.Tera ae e reiakin kiibu aikai bwa e kanga Tamara are i Karawa ni kairiia aomata n ana tai Itaia? E kanga ni kaoko bwa ko na Iriiria?

Tera riki are ko kunea inanon 1 Nibwaai 20–22 are ko kona ni “kabotaua” nakoim?

Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

1 Nibwaai 16:10, 28–29; 18:8–13, 20–22

Ngkana I kawakin tuua, te Uea e na kairai.

• Ngkana iai am kambwati, te mwabe, ke te bwai teuana ae na buokiira ni kunea kawaira, ko kona ni kaotia nakoia natim. Aio te kawai ae tamaroa ni moana te marooro iaon te Riaona, are ko kona ni warekia n 1 Nibwaai 16:10, 28–29. Tera tabeua bukina ae te kambwati ke te mwabe e na aki mwakuri? Bukin tera n tabetai te Riaona e aki mwakuri ibukiia ana utu Riaai? (taraa 1 Nibwaai 18:9–12, 20–22). Tera ae e a tia n anganiira Tamara are i Karawa ni boong aikai ae e na kairiira n oki Nakoina?

• Ni buokiia natim ni kamwakura te bwai are a reiakinna iaon te Riaona n 1 Nibwaai 16:10, 26–31; 18:8–22, ko kona ni kaoia bwa a na iangoa te babaire ae kakawaki ke ni kangaanga. Tera ae e a tia n anganiira te Atua ni kairiira ni boong aikai ae e mwakuri n aron te Riaona? (Taraa, ibukin te katotoo, Aramwa 37:38–44.) Iangoia n tibwa oin am taneiai are Tamara are i Karawa e kairiko iai.

1 Nibwaai 16:21–32

I kona n riki bwa te banna ni katooto ae tamaroa nakoia au utu.

• Ngkai kam wareka 1 Nibwaai 16:21–32 ni bootaki, buokiia natim ni kunea bwa e kanga and banna ni katooto Nibwaai ni kakabwaia ana utu (taraa naba te witeo “The Lord Guides Lehi’s Journey” [Gospel Library]). Aio e kona ni kairi nakon te marooro bwa e kanga arora ni katootonga Nibwaai. Kaoiia natim bwa a na bairea te bwai teuana ae a na kona ni karaoia n riki bwa te kakairi ae tamaroa iaon temanna kaain te utu.

1 Nibwaai 17:7–19; 18:1–4

Tamara are i Karawa E kona ni buokai ni karaoi bwaai aika a kaangaanga.

• Ataei a tatangiria ni karakinii karaki. Ko kona ni kaoiia ni buokiko ni karakina karakinan Nibwaai ngke e tuangaki bwa e na kabaa te kaibuke (taraa 1 Nibwaai 17:7–19; 18:1–4; taraa naba “Mwakoro 7: Kabaan te Kaibuke,” inanon Karaki man Ana Boki Moomon, 21–22; ke te witeo “The Lord Instructs Nephi to Build a Ship” [Gospel Library]). A kona naba n uaia n anenea te kauoua ni kibu man “Nephi’s Courage” (Aia Boki n Anene Ataei120–21). Tera ae e buoka Nibwaai ni karekea te ninikoria ngke a bwainingareia tarina ibukin kataan kabaakin te kaibuke?

• Nibwaai e aki ata aron karaoan te kaibuke, ngaia are e onimakina kairana mairoun te Uea. Imwiin warekan 1 Nibwaai 18:1 ma ngkoe, natim a kona ni kabwanina te Iteraniba n te waaki ni kakukurei n te wiiki aei. Ngkai a karaoia, marooro ma ngaiia bwa e kanga Tamara are i Karawa ni buokiira ni karaoi bwaai aika a kangaanga, n aron are E buoka iai Nibwaai.

Ibukin iango riki tabeua, taraa te beeba ni kaongora n te namwakaina aio n te Rao maekatiin.

A Karaoi Mwakuri ni Iowawa Nakoiu,, iroun Walter Rane