Ma Akea Au Taeka, Ma e na Tauaki Am Taeka,, iroun Harry Anderson

Beberuare 19–25: “O Ai Korakorara ana Babaire Atuara”

2 Nibwaai 6–10

E a kaniia 40 te ririki kiitanan Ierutarem iroun Riaai ma ana utu. A mena n te aba ae a iruaa iai, e rang raroanako mai Ierutarem. E a mate Riaai, ao kanoana a moana te itabarara ae e na reitinako inano tienture imarenaia Nibwaite—“ake a kakoauai ana taeka ni kauring ma ana kaotioti te Atua”—ao te naan Reimwanaite, ake aaki (2 Nibwaai 5:6). Iakobwa, are tarin Nibwaai te karimwi ao ngkai e katabuaki bwa te tia reirei ibukiia Nibwaite, e tangiria bwa aomata ni berita a na ataia bwa te Atua e aki mwaninga taekaia, ngaia are ana aki mwaninga Taekana. Aio te rongorongo ae ti bon kainnanoia n te bong aei (taraa Reirei ao Berita aika Tabu 1:15–16). “Ti na riai n uringnga, … bwa ti aonga n aki teweaki nako. … E korakora ana kakabwaia te Uea,” e katanoata Iakobwa (2 Nibwaai 10:20–21). Ibuakon berita akanne, akea riki ae korakora nakon te berita ae “akea tokin te mwakuri ni kamaiu” n tokanikai iaon te mate ao mone (2 Nibwaai 9:7). “Mangaia are,” Iakobwa e motikia ni kangai, “kakukurei nanomi”! (2 Nibwaai 10:23).

Iango ibukin Reiakinana n te Mweenga ao n te Taromauri

2 Nibwaai 6–8

E nanoanga te Uea nakoia Ana aomata ao e na kakoroa bukin Ana berita.

Ni buokiia ana aomata bwa a na oota bwa boni ngaiia mwakoron te bata are Iteraera ao a na riai n onimakina te Atua ao Ana berita, Iakobwa e taekina ana taetae ni burabeti Itaia, are e koreaki n 2 Nibwaai 6–8. Te rongorongo aei bon ibukim naba, bukina bwa aomata Aika Itiaki ni Boong aika Kaitira bon ana aomata ni berita te Atua. Ngkai ko wareware ni mwakoro aikai, iangoi raoi titiraki n aron aikai:

• Tera ae I a tia n reiakinna n taekan ana tangira ni kaboomwi te Tia Kamaiu ibukiu? Tera taeka ke mwakoro n taeka aika a kabwarabwarai raoi ana tangira?

• Tera ae anga te Tia Kamaiu nakoia ake a Ukoukoria?

• Tera ae N na karaoia bwa N na kakaonimaki riki n “taninga” te Tia Kamaiu ao Ana kakabwaia ake E beritani?

2 Nibwaai 9:1–26

E kamaiuai Iesu Kristo man te bure ao te mate.

Teuana te kawai ni kakorakora am kakaitau ibukin ana Mwakuri ni Kamaiu Iesu Kristo bon tii iangoia bwa a na tera ae e na riki nakoira ngkana akea te Mwakuri Kamaiu. Ngkai ko wareka 2 Nibwaai 9:1–26, iangoia ni karinanna ke ni mwakenna n teuana te kara tera ae e na riki nakoira n akean Ana Mwakuri ni Kamaiu Iesu Kristo. Ngkanne, n te rinan ke te kara teuana, ko kona ni kunea bwa tera ae ti kona ni karekea rinanon ana Mwakuri ni Kamaiu te Tia Kamaiu. Ae boboto iaon ae ko warekia, ko na kanga ni kabwarabwara bwa bukin tera ti kainnanoa ana Mwakuri ni Kamaiu Iesu Kristo? Tera ae ko kunei are e anaa nanom bwa ko na neboa “wanawanan te Atua, ana akoi ao ana tangira”? (2 Nibwaai 9:8).

Ni ikotaki ma te reirei nakon kamaiuara mairoun Iesu Kristo, e anga naba te nonoori Iakobwa bwa e kanga ni karaoia. Iangoia n taua mwiin are ko kunea n 2 Nibwaai 9:11–15, 20–24.

E miimi Iakobwa n ana babaire ni kaboomwi te Atua are e takarua “O ai korakorara ana babaire Atuara.” Noora miimina n 2 Nibwaai 9 (angiina a kuneaki n kiibu 8–20). Tera ae ko reiakinna man kiibu aikai ibukin ana babaire te Atua? Tera taneiai riki tabeua ake a tia ni buokiko n namakin tabeua are e namakinna Iakobwa? Bwa kanoan am nebonebo ao kamatebwai, iangoa taraan te anene taromauri ae na kona ni kaota am namakin Ibukina, n aron “How Great Thou Art” (Anene n Taromauri, nambwa. 86).

Taraa naba “Where Justice, Love, and Mercy Meet,” “Jacob Teaches of the Resurrection” (witeo), Gospel Library; Gospel Topics, “Atonement of Jesus Christ,” Gospel Library.

2 Nibwaai 9:7

Akea tokin Ana Mwakuri ni Kamaiu te Tia Kamaiu.

Tera ae ko kona ni karaoia bwa ko na oota riki n ana mwakuri Iesu Kristo “akea tokina”? (2 Nibwaai 9:7). Tao ko kona n tarai ke ni iangoi bwaai are a taraa n akea tokin mwaitiia—boota ni uteute n te marae, bwarikoriko n tano iaon te bike, ke itoi i karawa. E kanga n akea tokin ana Mwakuri ni Kamaiu te Tia Kamaiu? E kangaa ni boni kaeti nakoiu? Tera mwakoro n taeka inanon 2 Nibwaai 9 ae buokiko n namakina te kakaitau ibukin ae e a tia ni karaoia ibukin te Tia Kamaiu?

2 Nibwaai 9:27–54

I kona n nako nakon Kristo ao n iriira ana babaire te Atua.

N te ka 2 Nibwaai 9, e kabonganai uoua kibuntaeka Iakobwa aika a mwaakaroiroi ao ni kakaitara: “ana babaire n nanoanga te Tia Karikibwai ae kakannato” ao “ana babaire ni kamwamwane teuare buakaka” (2 Nibwaai 9:6, 28). Tao ko kona ni korea tamnein te kawai ao ni kaotia Ana Babaire Tamara are i Karawa. Imwiina rinanon 2 Nibwaai 9:27–52. Kakaei kauring ao kakao are e anga Iakobwa bwa buokara ni iriira te babaire aei. Korei ake ko kunei irarikin te kawai aei. E kanga aron Tatan ni kataia ni kairiira nako man ana babaire te Atua? Tera ae ko namakinna ni kairam iroun te Tamnei bwa ko na karaoia ni kaeka nakon ana kauring ao ana kakao Iakobwa aikai?

2 Nibwaai 10:20, 23–25

A na anga karea Iesu Kristo e kona n anganai te kimwareirei.

Ana rongorongo Iakobwa bon te bwai ni kakukurei teuana. “I a taekin nakoimi bwaai aikai,” bwa kam aonga ni kimwareirei, ao n euti atuumi n aki toki” (2 Nibwaai 9:3). Ngkai ko wareka 2 Nibwaai 10:20, 23–25, tera ae ko kunea ae kakukureia nanom? Tera ae ko na karaoia bwa ko na uringi bwaai aikai ngkana ko namakina te bwarannano?

Taraa naba Ioane 16:33; D. Todd Christofferson, “The Joy of the Saints,” Riaona, Nobembwa. 2019, 15–18; “Jacob Encourages the Nephites to Be Reconciled with God” (witeo), Gospel Library.

Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

2 Nibwaai 9:6–10, 19–24

Iesu Kristo bon au Tia Kamaiu.

• Ko na kanga ni buokiia am ataei n oota ao n namakinna bwa a kainnanoa te Tia Kamaiu Iesu Kristo? Te iteraniba ibukin te waaki ni kakukurei n te wiki aei e kona n ibuobuoki. E kabonganaa te kabootau ae bebete n te mwanono ao te kai n tamwarake. Iangoia ni kabongana 2 Nibwaai 9:21–22 ni marooro ma am ataei bwa bukin tera ko kakaitau ibukin Iesu Kristo.

• Teuana te kawai ni buokiia am ataei ni kaotaia bwa e aera a kainnanoa te Tia Kamaiu n reiakinaia taekan te Bwaka. Ko kona ni kaota tamnein Atam ao Ewa, n aron Leaving the Garden of Eden (Gospel Library), ao tamnein Iesu Kristo iaon te kaibangaki. Titirakiniia ataei bwa a na kabwarabwara bwa tera ae e riki n tamnei n tatabeua nako. Ti kanga n riki kanga Atam ao Ewa? Tao te 2 Nibwaai 9:6–10 e kona ni buokiia n noria bwa tera ae karaoia ibukira Iesu Kristo. Kaoia ataei bwa a na tibwai aia namakin ibukin Iesu Kristo. Te anene n aron “I Feel My Savior’s Love” (Aia Boki n Anene Ataei, 74–75) e kona n ibuobuoki.

Reirei koaua ma karaki ao katooto. Kakoaua raoi bwa karaki ao katooto ake ko kabonganai a reireia te koaua. Te katooto, ngkana ko kabonganaa te iteranibaa ni kakukurei n te wiiki aei, reireia bwa e roko n te “mwanono” Iesu Kristo bwa e na buokiira teutana ni kawaira ngkai ti tamwarake n otinako mai iai.

2 Nibwaai 9:20, 28–29, 42–43, 49

“E kukurei nanou n te raoiroi.”

• Ni kaungaia am ataei bwa a na “[kukurei] n te raoiroi” ke n ongeaba ma te kimwareirei nakon te Uea (2 Nibwaai 9:49), tao ko kona n tibwai katooto are e na kona ni karaoa te rinerine ae raoiroi ke n aki te ataei. Kaoia ataei bwa a na teirake ngkana te rinerine e uota te kakukurei ao n tekateka ngkana te rinerine e uota te nanokawaki. N ningai ae ti karekea te namakin n kukurei ibukina bwa ti karaoi rinerine n iriira Iesu Kristo?

• A kona am ataei n reitaki ma aomata (ngkana a tuai mai imwaina) ake a taku n aia iango bwa ana tua te Uea a nanobaba ke a bane taia. Tao ko kona n marooro ngkoe ao am ataei bwa e kangaa aron kabwarabwaraana ngkana ti kukurei ni kawakin taian tua. Bukin tera e kakawaki onimakinan ana reirei te Atua e ngae ngke ti aki rangi ni mataata raoi iai? Ko kona n kaungaia n taraa te 2 Nibwaai 9:20, 28–29, 42–43 ibukin te buoka n iango ao ni maroroakin titiraki aikai.

Ibukin iango riki tabeua, taraa te beeba ni kaongora n te namwakaina aio n te Rao maekatiin.

E Kamaiuia Aoraki Aika a Kakaokoro,, iroun J. Kirk Richards