Itaia ngke e koroboki iaon ninira ni boki

Beberuare 26–Maati 3: “E na Aranaki Bwa … Uean te Raoi”

2 Nibwaai 11–19

Koreakin taeka iaon bwatua aika biiti e aki bebete, ao te mwaawa iaon ana bwatua Nibwaai aika uarereke e aki tau. Ngaia ae bukin tera Nibwaai e kabanea a na konaa ni kaewei katootoon ana koroboki Itaia aika rangin ni mwaiti nakon ana rekooti? E karaoa aei bwa e tangiriira bwa ti na kakoauaa Iesu Kristo. “E kukurei nanou,” e koreia, “ni kakoaua nakoia au botanaomata koauan rokon Kristo” (2 Nibwaai 11:4). Nibwaai e a kaman noora te bwai ae na riki nakoia ana aomata n rooro aika a na roko. E noria bwa, e ngae ngke e korakora kabwaiaia, a na rikirake ni kainikatonga, ni itabaraaraa, ao n nano ni bwain te aonaaba (taraa 1 Nibwaai 12; 15:4–6). E noori naba kangaanga n aron aikai n ara bong (taraa 1 Nibwaai 14). Itaia e korei kauring ni kaitarai aro aika bubuaka aikai. Ma angan naba Nibwaai te kantaninga n tamaroan taai aika a na roko—tokin karaoan te buakaka, ikotakiia aika a kakaonimaki, ao “te oota ae moan te korakora” ibukiia aomata ake a “nakonako i nanon te roo” (2 Nibwaai 19:2). A riki aikai ni kabane ibukina bwa “[e] bungiaki te teei” are e na katoki kakauntaeka ni kabane—“Uean te Raoi” (2 Nibwaai 19:6).

Iango ibukin Reiakinana n te Mweenga ao n te Taromauri

N na kanga n oota riki n ana reirei Itaia?

E ataia Nibwaai ae “a aki mataata ana taeka Itaia” (2 Nibwaai 25:4). Ma e tibwai naba iango ni buokiira ni kunei nanon ana koroboki Itaia:

• “Bwa kam na kabotaui ana taeka” nakoimi (2 Nibwaai 11:2). Angiin ana reirei Itaia a rawata nanoia ao aron kabonganakiia. Te katooto, ngkana ko wareka aron te tabo ni maeka n 2 Nibwaai 14:5–6, iangoia bwa a kanga kiibu aikai ni kaineti nakon mweengam. Titirakiniko, “Tera ae tangiria Tamau are i Karawa bwa na reiakinna?”

• Tarai taian kanikina ibukin Iesu Kristo (taraa 2 Nibwaai 11:4). Angiin ana reirei Itaia bon taekan te Tia Kamaiu ao a tibwaaki rinanon taian kanikina. Te katooto, e kanga kabwarabwaraan te Tia Kamaiu n 2 Nibwaai 19:2? Tera ae ko reiakinaki n te kanikina aio ibukin Iesu?

• “Ukeuke bwa kam na “kaonaki n tamnein te taetae ni burabeti” (2 Nephi 25:4). Ngkai ko kamatebwai, tataro ibukin ana kairi te tamnei. Ko na bon aki ota n te moan tai ni bwaai ni kabane, ma e kona te Tamnei ni buokiko n reiakina te bwai ae ko kan ataia.

Ko na kunea naba bwa e na rangi n ibuobuoki ngkana ko nakon ibuobuoki n te kamatebwai inanon koroboki aika tabu, n raonaki ma bwaai aika a na taraaki mai inano, atuun mwakoro, ao Bwaai ni Kairi nakon Koroboki aika Tabu. Te bokinreirei n te intitute n Ana Boki Moomon ao te O Tetemanti iai rongorongo riki tabeua ake a kona ni buokiko ni reiakina aron te tabo, te tai ao bwaai aika a riki rimoa n ana reirei Itaia.

2 Nibwaai 11–19

E anga ana koaua Itaia ibukin Iesu Kristo.

Ibukina bwa e kabonganai taetae ni kabotau Itaia, e kona n rangi n bebete aki taraan ana kakoaua ae korakora iaon Iesu Kristo. Kakaea te Tia Kamaiu inanon 2 Nibwaai 13:13; 14:4–6; 15:1–7; 16:1–7; 17:14; 18:14–15; 22:2. Tera ae a reireiniko kiibu aikai Ibukina?

Te taetae ni burabeti n 2 Nibwaai 19 6 e karinanii nakoan Iesu Kristo aika mwaiti. E kanga n kakoroi nanon nakoa aikai inanon maium?

Taraa naba Ulisses Soares, “Iesu Kristo: Te Tia Tararua Tamneira,” Riaona, Meei 2021, 82–84.

2 Nibwaai 12–13; 15

Tani kainikatonga ao bwain te aonaaba ana kamangoraki.

E a tia Nibwaai n noora te kainikatonga anne are e na karika bwakaia ana aomata (taraa 1 Nibwaai 12:19). Ngaia ae e na aki kakubanako ngkana e tibwauai Nibwaai ana kauring Itaia ni kaitaraa te kainikatonga. N mwakoro 12 ao 13, kakaei taeka ake e kabonganai Itaia ni kabwarabwara te kainikatonga, n aron te kamoamoa ao te karietaata. N 2 Nibwaai 15:1–24, kakaei taeka ake a nako ma aia kanikina ni kakabwarabwara mwiin te kainikatonga. Ngkanne ko na kataia n taekin ni kakimototoa te bwai are ko a tia ni warekia ni bon oin am taeka. Iangoia bwa kona kanga n rineia bwa ko na nanorinano.

Taraa naba “Mwakoro 18: Beware of Pride,” Teachings of Presidents of the Church: Ezra Taft Benson (2014), 229–40.

te kanikina ibukin te tieminari

2 Nibwaai 12:2–3

Te tembora bon Ana auti te Uea.

Itaia e arana te tembora bwa “maungan ana auti te Uea” (2 Nibwaai 12:2). Bukin tera te maunga bon te kanikina ae tamaroa ibukin te tembora?

Ko na kanga ni kabwarabwaraa nakon temanna bwa bukin tera ti kainnanoa te tembora? Ko na kona ni kunei kaekaaia inanon 2 Nibwaai 12:2–3 ao ana rongorongo Beretitenti Russell M. Nelson “Te Tembora ao Aan Maiun Tamneim” (Riaona, Nobembwa 2021, 93–96). Man are ko warekia, tera ae tangiria te Uea bwa ko na reiakinna ao n rinanona inanon Ana auti ae tabu? Baikara bwaai ake ko a tia n rinanoi n te tabo anne?

Ko kona ni kunei titiraki n te intawiu ibukin te beeba ni kariaia nakon te tembora n iteraniba 36–37 inanon Ibukin Kakorakoraia Kairake: Te Kairi ibukin Karaoan Rinerine. Iangoia ni wareki titiraki teuana imwin teuana ao titirakiniko, tera ae e reiakinai te titiraki aio n aron ana kawai te Uea? E kanga ni buokai n “nakonako n ana kawai”?

Taraa naba Gospel Topics, “Temples,” Gospel Library; “High on the Mountain Top,” Anene n Taromauri, nambwa 5.

2 Nibwaai 12–19

Iesu Kristo e na kamaiuia Ana aomata.

E ngae ngke e nori waaki aki bubuaka, Itaia e nora te kaantaninga ibukin taai aika a na roko. Iangoia ni kamatebwai n tatabeua nako mwakoro aika imwiin. Korea teuana ke ae mwaiti riki koaua are e reiakinaki man mwakoro nako iaon ara bong 2 Nibwaai 12:1–5; 14:2–6; 15:20–26; 19:2–8. Bukin tera ngkai ko namakinna bwa a kakaawaki taian mwakoro aikai ibukira bwa ti na mataata iai?

Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.

Taraa aron tein waakina. Inanon booki aika tabu ti kona ni kunei inanona banna ni katooto aika ana kaotii nakoira aron ana mwakuri te Uea. Inanon 2 Nibwaai 11–19, ko kona ni kunei aron tein waakina are e kaotia bwa e kanga te Uea ni kauring ao ni kabwarai aia bure aomata ake a rairi nanoia.

Iango ibukin Reiakinaia Ataei

2 Nibwaai 12:2–3

Te tembora bon Ana auti te Uea.

• Itaia e kabwarabwara te tembora bwa “maungan ana auti te Uea.” Natim a na kukurei ni karaoa ae aongkoa a tamwarakea te maunga ngkai ko wareka 2 Nibwaai 12: 2–3. Buokiia ni kunei mwakoro n taeka inanon kiibu aikai are e kabwarabwara bwa bukin tera iai taian tembora.

• Ni kamatataa te mwakoro n taeka ae “ti na nakonako iaon kawaina” man 2 Nibwaai 12:3, ko kona ni karaoa te kawai iaontano, ae kaineti nakon te tembora. Ngkai a nakonako natim iaon te kawai, a kona n taekin bwaai ake a kona ni karaoi bwa a na nakonako ni kawain te Uea.

• Tao a kona natim ni korea tamneiia ae a nakon te tembora. A kona naba n anene ke n ongora nakon te kuna are iaon te tembora, n aron “I Love to See the Temple” (Aia Boki n Anene Ataei, 95). Buokiia bwa a na kunei mwakoro n taeka n te anene are e reirei taekan te tembora ao tera ae ti karaoi ikekei.

2 Nibwaai 11:4–7; 17:14; 19:6

Iesu Kristo bon au Tia Kamaiu.

• E mwaiti te ara iaon Iesu Kristo n 2 Nibwaai 11:4–7; 17:14; 19:6. Buokiia natim ni kunei ao marooro bwa tera nanoia. Te katooto, “Kristo” nanona “ae kabiraki” ao “Imanuera” nanona “Raora te Atua.” Tera nanon aara aikai ae a reireiniira iaon Iesu?

• Kaota mwakoron te witeo “The Christ Child” (Gospel Library) are e kaotiia aomata aika a kakaokoro ake a nora Iesu te moan tai. Katoka te witeo ngkana e kaoti aekan aei, ao titirakiniia natim bwa tao tera aia namakin aomata aikai. Tera ae ti na namakinna ngke tao ti mena ikekei? E na kanga aron ara namakin ngkana ti a manga Noria?

2 Nibwaai 15:20

Tatan e kataia ni kaminoai n taekan te raoiroi ao te buakaka.

• Kaotia nakoia natim te bwai ae mao ke ae mangingi, n aron mwakoron te remon, inanon nnen te kanre. Bootaki wareka 2 Nibwaai 15:20. E kanga Tatan ni karaoi bwaai ake a buakaka bwa a na tara n raoiroi? Ko kona ni kaota naba te 90 n tekan are moan te witeo ae “You Will Be Freed” (Gospel Library). Bukin tera te tia akawa e karaba ana matau? Bukin tera Tatan e karaba te bure? E na kanga Iesu Kristo ni buokiira n totokoa kaririakira iroun Tatan?

Ibukin iango riki tabeua, taraa te beeba ni kaongora n te namwakaina aio n te Rao maekatiin.

Panama City Panama Tembora

Panama City Panama Tembora. “Ana auti te Uea e na kateaki iaon taubukin taian maunga, … ao a na mwananga aaba ni kabane nako iai” (2 Nibwaai 12:2).

iteraniba ibukin te waaki ni kakukurei: te tembora bon Ana auti te Uea