Kristo Ngke e Reireiniia Ana Reirei, iroun Justin Kunz

Maati 18–24: “Aio te Kawai”

2 Nibwaai 31–33

Ibuakon ana kabanea n taeka Nibwaai ake a koreaki, ti kunea te katanoata aei: “E a tia n tuatua te Uea bwa N na karaoia, ao I riai n ongeaba nakoina” (2 Nibwaai 33:15). Aio te kabwarabwara ae raoiroi ibukin maiun Nibwaai ae kakimototoaki. E kataia ni kaotaa n ana kaantaninga te Atua ao e ninikoria n ongeaba nako iai—tao e nanonna n ae e kona ni kabua maiuna ni karekean bwaatua mairoun Raban, kabaan te booti n mwananga rinuukan taari, ke ni kakaonimaki n reireia ana reirei Kristo n ae matata man mwaaka. Nibwaai e kona n taetae n anainano ibukin kainnanoan ae “kam na waaki nako, inanon Kristo,” n ira te “kawai ae eti man irariki are e na kairi ngkami nakon te maiu ae akea tokina” (2 Nephi 31:20, 18), ibukina bwa anne te kawai ae e iria. E ataia man ana taneiai bwa, e ngae ngke e kangaanga n taai tabetai te kawai aei, ma e bon kakukurei naba, ibukina bwa “akea riki te kawai teuana ke te ara are e a tia n taekinaki iaan karawa are e na kona ni kamaiuaki iai te aomata i nanon uean te Atua” (2 Nibwaai 31:21).

Iango ibukin Reiakinana n te Mweenga ao n te Taromauri

2 Nibwaai 31

Iesu Kristo ao Ana reirei bon ti ngaiia kawai nakon te maiu are akea tokina.

Ngkana ko na kauarerekea te kawai nakon karekean te maiu are akea tokina inanon ti tabeua taeka, tera ae ko na taekinna? Taraia bwa e kanga ana kabwarabwara Nibwaai inanon 2 Nibwaai 31. Iangoia ni korea tamnein te kawai ao koroi inanon te kawai tabeua reirei ke mwaneka aika ko kunei inanon mwakoro aikai. Ko kona ni karinna nakon am tamnei oin am kakimototo n te bwai are e iangoia Nibwaai ibukin reirei n tatabeua nako.

Ngkana ko wareka 2 Nibwaai 31:18–20, ukora mwiin am kekeiaki ni “waaki nako” ni kawain te euangkerio.

Taraa naba “Press Forward, Saints,” Boki n Anene, nambwa. 81.

Iriirakin ana reirei Iesu Kristo e na uotiira nakon te maiu ae akea tokina.

2 Nibwaai 31:4–13

Iesu Kristo e katea te banna ni katooto n te ongotaeka ngke E bwabetitoaki.

E ngae ngke e karaoaki am bwabetito ngkoananoa ke 80 te ririki n nako, bon te tai ae kakawaki. Ko rin n te berita ae akea tokina n ira Iesu Kristo. Iangoa am bwabetito ngkai ko wareka taekan ana bwabetito te Tia Kamaiu n 2 Nibwaai 31:4–13. Kaekaan titiraki n aron aikai a kona n ibuobuoki:

• Bukin Tera e bwabetitoaki Kristo? Bukin tera ngkai I rineia bwa N na bwabetitoaki?

• Tera berita aika I karaoi ngke I bwabetitoaki? Tera ana berita te Uea ibukin karaoan anne? (tarai kiibu 12–13; taraa naba Motiaea 18:10, 13).

• N na kanga ni kaotia ae I bon teimatoa n iriira Iesu Kristo?

2 Nibwaai 31:15–20

“Te aomata are e teimatoa ni karokoa te toki, boni ngaia are e na kamaiuaki.”

Ngkana ko wareka 2 Nibwaai 31:15–20, titirakiniko, “N na kanga n ataia ae I teimatoa ni karokoa te toki?” Tera ae ko reiakinna mairoun Nibwaai ae buokiko ni kaekaa te titiraki aei?

E reirei Unimwaane Dale G. Renlund: “Te teimatoa ni karokoa te toki tiaki te mwaneka ae kaokoro n ana reirei Kristo—ae kanga ti katiai mwaneka ake aua ao imwiina ti aorioriira, kangkangtii wiira, ao n tataningaa te mate. Tiaki, te teimatoa ni uaa te toki bon te kakamwakuri ao kaokiokan touan mwaneka ni bon oin nanona” (“Lifelong Conversion” [Brigham Young University devotional, Tebetembwa. 14, 2021], 2, speeches.byu.edu). Ko na kanga ni kaokioki mwaneka n ana reirei Kristo (te onimaki, te rairannano, te bwabetito, ao karekean te Tamnei ae Raoiroi)?

2 Nibwaai 32; 33:2

E na kaota te bwai ae N na karaoia te Atua, rinanon ana taeka Kristo ao te Tamnei ae Raoiroi.

Ko a tia n namakina te aki koaua ibukin mwaneka ake imwiina ni maium? Iai tabeaiangaia ana aomata Nibwaai n aron naba anne (taraa 2 Nibwaai 32:1). Tarai ana kaeka Nibwaai n 2 Nibwaai 32:2–9. A na kanga n taekinna n oin am taeka n te bwai ae reirei iaona Nibwaai? Tera baika a riki ake a tia n reireiniko ae a koaua ana taeka Nibwaai?

Iangoia ni koroi ni karinani iango ke kangaanga (ngkai ao n te tai ae na roko) are ko kainnanoa iai ana kairi te Atua. Tera ae ko kona n reiakinna man 2 Nibwaai 32 ae na buokiko ni kona ni karekei kairi mai Irouna? Tera ae e kona ni kairiia aomata bwa a na “kamatoai nanoia ni kaitara te Tamnei ae Raoiroi”? (2 Nibwaai 33:2).

Ngkai ko iangoi ana reirei Nibwaai, iangoia bwa ko na kanga ni kamatebwai ana taeka te Tia Kamaiu. Ko kona ni kabwarabwara bwa kanga te tinaeki, te amwarake, ke te baka? Tera te kaokoro, ae roko n am iango? Iangoia bwa ko na kanga ni karaoa am taneiai ma ana taeka te Tia Kamaiu n aron riki te baka. Tao ko kona ni karekei iango mairouia raoraom ke kaain te utu.

Kakukurei ngkami n ana taeka Kristo. A mwaiti kawai aika ko kona n ni kanuaiko n ana taeka Kristo, n raonaki ma te tataro ibukin te kairi mai ieta, titiraki taian titiraki imwain ao n tain am kamatebwai, kabwarabwaraakin taeka, n iangoia inanom, te uaia ni maroro, koroi taekaia, kakaei koaua n te euangkerio, ao kamwakuri reirei man booki aika tabu nakon maium (taraa 1 Nibwaai 19:23).

Ko na kanga ni kaoa te Tamnei ae Raoiroi bwa e na teimatoa n riki bwa raoraom ni maium, nakon ae ti n taai tabetai? Wareki ana iango ake teniua David A. Bednar ni karaoa ana iraorao te Tamnei ae Raoiroi bwa te “bwai ae reitinako” inanon “Receive the Holy Ghost” (Riaona, Nobembwa 2010, 94–97). Ko na kanga ni kabongana ana reirei?

Taraa naba Gospel Topics, “Revelation,” Gospel Library; “Daily Bread: Pattern” (video), Gospel Library.

2 Nibwaai 33

Ana Boki Moomon e anai nanora ni kabane bwa ti na kakoaua Kristo.

N 2 Nibwaai 33, ngke Nibwaai e kaina ana koroboki, e kabwarabwara bwa bukin tera ngkai e korea te mwakoro aei n te moan tai. Tera bukina ake ko kunei n te mwakoro aei? Iangoi raoi karaki ao reirei ake ko a tia ni wareki n 1 Nibwaai ao 2 Nibwaai. E nga ae e a tia n rangi n anaa nanom ao am onimaki iroun Kristo?

Taraa naba “Nephi Records His Final Testimony” (witeo), Gospel Library.

Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.

Iango Ibukin Reiakinaia Ataei

2 Nibwaai 31:4–13

Ngkana I bwabetitoaki, ao I ira Iesu Kristo.

• Iai tamnein Iesu ngke e bwabetitoaki n tokin te kamataata aei. Tao a kona ni kabongana am ataei n tuangko te bwai ae ataia n te bwai aei (taraa naba Mataio 3:13–17). Bukin tera Iesu e tangiriira bwa ti na bwabetitoaki n Arona? A kona am ataei ni kakauongo nakon bukiia ngkana kam bootaki ni wareki mwakoron 2 Nibwaai 31:4–13. E na bae n rangi n ibuobuoki ngkana e kona teuare ke neiere e a tibwa tia ni bwabetitoaki n tibwaua ana taneiai.

2 Nibwaai 31

Iesu Kristo e reireinai arou n oki nakon Tamara are i Karawa.

• Ni buokiia am ataei ni kamatenanoi reriei n 2 Nibwaai 31, a kona ni korotamneia te kawai ma tamnein Kristo ni banen te beeba. Ko kona ni buokiia ni kakaei ke ni koroi tamnei ake a tei ibukin mwaneka iaon te kawai anne, n aron te onimaki iroun Kristo, te rairannano, te bwabetito, ana bwaintituaraoi te Tamnei ae Raoiroi, ao te teimatoa ni karokoa te toki. A kona ni kotei tamnei ngkana a wareka 2 Nibwaai 31:17–20 ni bootaki.

2 Nibwaai 32:3–5

I kona ni kanuaai n ana taeka Kristo.

• N reirei iaon “kanuaiko” n ana taeka Kristo, ko kona n tuangiia am ataei bwa a na katea kain aron are ngke a kanuaki ni kanaia ae mamate nanoia iai. Inanon 2 Nibwaai 32:3, tera ae taekinna Nibwaai ibukin te bwai ae ti na kanuaira iai? E kanga kanuakim n ana taeka te Atua ni kaokoro man ti warekana? Tao a kona am ataei ni katei kain taian kaokoro. Tibwauaia ma ngaia kakabwaia aika ko a tia ni karekei ngkai ko a tia ni kanuaiko iaon koroboki aika tabu.

2 Nibwaai 32:8–9

Tamara are i Karawa e tangirai bwa N na tataro n tainako.

• Imwiin warekan 2 Nibwaai 32:8–9, kabwarabwara nakoia am ataei bukina ngkai e aki tangiria Tatan bwa ti na tataro. Bukin tera ngkai e tangiriira te Atua bwa ti na bwaina te “tataro n taainako”? A kona am ataei ni koroi ni karinani ke ni koroi tamnein kangaanga aika a kona n tataro ibukiia. Ngkanne kam kona n anenea te kuna are e reirei taekan te tataro, n aron “Ko Kauti Nako n te Ingabong ao Ko Tataro?” (Boki n Anene, nambwa. 140). Ko kona n onoi mwiin tabeua taeka n te anene ma taeka ake a tia ni koroi. E kanga te Atua ni kakabwaiaira ngkana ti tataro n tainako?

Ibukin iango riki tabeua, taraa te beeba ni kaongora n te namwakaina aio n te Rao maekatiin.

Kakoroi Bukin Bwaai ni Kabane aika a Raraoi, iroun Liz Lemon Swindle