Kristo ma Abotoro, iroun Del Parson

Maati 25–31: “E na Mangauti … ma te Kamaiu iaon Baina ni Kiba”

Itita

Abotoro ngkoa a ninikoria n aia koaua iroun Iesu Kristo ao ni Mangautina (taraa Mwakuri 4:33). Mirion aomata a kakoaua iroun Iesu Kristo ao a kabanea korakoraia n Iriiria ibukin aia taeka ake a koreaki n te Baibara. Ma tabeman tao a na titiraki: Ngkana Iesu Kristo bon te Tia Kamaiua te aonaaba ae bwanin, ngkanne bukin tera ngkai ti tabeman Ana taan kakoaua ao ti kaain te tabo ae uarereke?

Ana Boki Moomon e tei bwa te kauoua ni kakoaua, te kakoaua ae anainano bwa Iesu Kristo bon te Tia Kamaiua te aonaaba, “e boni kaotia ngaia nakoia aaba ni kabane” (iteraniba ibukin atuun Ana Boki Moomon) ao n anga te kamaiuaki nakoia ake a Nakoina. Irarikina, te kauoua ni kakoaua aei e kamatataa naba bwa tera nanon te kamaiuaki. Aio bukin ae Nibwaai, Iakobwa, Moomon, ao ni kabane burabeti a beku ni “botumwaaka ni korei taeka iaon taian bwaatua”—-bwa a na kaotia nakoia rooro aika a na roko bwa ngaia naba a “ataa taekan Kristo, ao a … kariaria rokon mimitongina” (Iakobwa 4:3-4). Inanon wiikin te Itita aei, iangoi taian koaua inanon Ana Boki Moomon bwa mwaakan te Tia Kamaiu e bon tabangaki ao e onoti—-e kamaiua te aonaaba ae bwanin ao e kamaiuko.

Iango ibukin Reiakinana n te Mweenga ao n te Taromauri

Ibukin Mangautin Iesu Kristo, N na manga bon mangauti.

Bon katein te Itita bwa ko na iangoa raoi Mangautin Iesu Kristo, ma tera raoi ae e nanonaki n ae ti na mangauti? Tera te atatai ae e anganiira Ana Boki Moomon ibukin te mangauti? Tao n tain te Itita aei ko kona ni korei ni karinanii koaua ibukin te mangauti ake ko kunei n 2 Nibwaai 9:6–15, 22; Aramwa 11:42–45; 40:21–25; 3 Nibwaai 26:4–5.

Ko kona naba n taui mwiin koaua aikai iaon ana bitaki te mangauti ni baike ko karaoi ao n aron maium. Te katooto, iangoia bwa ko na kanga ni kabwaninii tiententi aikai: Ngke arona bwa I aki atai bwaai aikai … ao Ibukina bwa I atai bwaai aikai …

Te anene n taromauri n aron “I Ataia bwa E Maiu Iesu” (Anene n Taromauri, nambwa 34) e na buokiko ni iangoia bwa bukin tera Mangautin te Tia Kamaiu e kakawaki iroum. Ngkai ko anene, kakauongo ke wareka te kuna, ko na bae n titirakiniko. “E kaga ni bitaki maiu ibukin mangauti Iesu Kristo?”

Te Gospel Library iai inanona taian witeo ibukin te Itita are e kona n riki bwa mwakoron am kamatebwai. Tao ko a bae n tia ni matakuakina teuana ke ae mwaiti riki ao n iangoia raoi bwa tera ae a karekea nakon mataatam ke te bwai ae e kona ni karaoaki ni Mangautin te Tia Kamaiu.

Taraa naba Ruka 24:36–43; Mwakuri 24:15; 1 I-Korinto 15:12–23; Reyna I. Aburto, “Akea Ana Tokanikai te Ruanimate,“ Riaona, Meei 2021, 85–86; Gospel Topics, “Resurrection,”Gospel Library; “Death, Grieving, and Loss” n te mwakoro ae “Life Help” n te Gospel Library.

Iesu Kristo E katokai Iaona au bure, marakiu, ao kainnanou.

Te Baibara e kamataata n reireia bwa Iesu Kristo e mate ibukin ara bure. Ana Boki Moomon e karabaaba ara atatai iaon ana anganano ao korakain Kristo ni kawai aika a kakaawaki. Ko kona ni kunei tabeua reirei aikai ni Motiaea 3:7; 15:5–9; Aramwa 7:11–13. Imwin warekan kiibu aikai, iangoa tauan mwiin baike ko kunei n te tiaata ae aekakin aei:

Tera ae e maraki iai te Tia Kamaiu?	Tera bukin marakina?	Tera nanon aei irou?

Aio te kawai teuana ni kamatebwai mwakoro aikai: Kakaei anene n taromauri ake ko namakinna bwa titebo n te rongorongo are a reirei iaona. Te ” intekiti mai bukin te boki n anene n taromauri e kona n ibuobuoki. Tera taian mwakoro n taeka man anene aikai ao ni koroboki aika tabu aika a buokiko ni kakaitau n ana mwakuri ni kamaiu te Tia Kamaiu n ae nene riki?

Taraa naba Itaia 53; Ebera 4:14–16; Gérald Caussé, “Te Tia Kakoaua ae Maiu Iroun te Kristo ae Maiu,” Riaona, Meei 2020, 38–40.

Iesu Kristo e kona ni kaitiakai ao ni buokai ni kakororaoai.

E kona n taekinaki bwa Ana Boki Moomon bon rongorongoia aomata aika a bitaki ibukin ana Mwakuri ni Kamaiu Iesu Kristo. Ko kona ni wareki tabeua taneiai aikai inanon Motiaea 5:1–2; 27:8–28; Aramwa 15:3–12; 24:7–19. Ko na bae ni iangoi katooto tabeua ni kamatebwaii naba. Tera ae ko nooria bwa taneiai aikai iai baika a titebo iai? Tera kaokoro aika ko noori? Tera ae a reireiniko taneiai aikai bwa e kanga te Tia Kamaiu ni kona ni bitiko?

Taraa naba Aramwa 5:6–14; 13:11–12; 19:1–16; 22:1–26; 36:16–21; Ita 12:27; Moronaaii 10:32–33.

Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

Ibukin bwa te Tabati aio bon te kanimaua n Taabati n te namwakaina, a kaungaaki taan reirei n te Moanrinan bwa ana kabonganai reirei ake n te “Appendix B: Preparing Children for a Lifetime on God’s Covenant Path.”

Ibukina bwa e a tia ni mangauti Kristo, N na bon mangauti naba.

• Ko kona ni kabongana “Mwakoro 53: E Tauraki Iesu” ao “Mwakoro 54: E a Mangauti Iesu” (man Karaki n te Nu Tetemanti, 136–38, 139–44,) n tuangiia natim aron Mangautin Iesu Kristo. Ke kariaia natim bwa a na tuangko te karaki, ni kabonganai tamnei ake inanon mwakoro akanne.

• Rokon te Tia Kamaiu are Mangauti n te aono n Amerika bon te kakoaua ae korakora ni manga Utina. Iangoia n tuangiia natim rongorongona, ni kabongana 3 Nibwaai 11; 17; te anene ae “Easter Hosanna”; ke te kabanea ni kibu man “Karaki man Ana Boki Moomon” (Aia Boki n Anene Ataei, 68–69, 118–19). Kaungaia natimi bwa a na katamneia bwa kanga te aekakira aron namakinan ikoakin Iesu (taraa 3 Nibwaai 11:14–15) ke te riki bwa temanna te ataei are E kakabwaiaaki (taraa 3 Nibwaai 17:21). Tibwaia imarenami am namakin iaon Iesu Kristo ao Mangautina.

• Ni buokiia natim ni kunea bwa tera ae e reiakinna Ana Boki Moomon iaon te mangauti, ko kona ni kaoia bwa aongkoa ko aki ata te bwai teuana iaon te mangauti ao tuangiia bwa a na kabwarabwara nakoim. Buokiia n noria n 2 Nibwaa 9:10–15; Aramwa 11:41–45; ao Aramwa 40:21–23 ibukin kaekaan titiraki n aron aikai: Tera ae e nanonaki n te mangauti? Antai ae e na manga kautaki? Ao kaungaiia bwa a na kaota aia koaua iaon mangautin te Tia Kamaiu bwa reitan aia kaeka.

E ataa aron kabebetean nanou Iesu Kristo.

• Motiaea 3:7 ao Aramwa 7:11 a kabwarabwarai tabeua baike e rinanona te Tia Kamaiu bwa mwakoron Ana Mwakuri ni Kamaiu. Ko na bae ni wareka teuana man kiibu aikai nakoia natim ao tuangiia bwa a na kakauongo nakon taeka ake a na tuangiia bwa tera ae e korakai iai Iesu ibukira. Imwiina ko kona ni wareka Aramwa 7:12 ni kakaea bwa e aera ngkai E kariaia n rinanona. Taekina koauana bwa Iesu Kristo e namakin marakira ao aorakira ni kabane bwa E aonga n ataa aron karauan nanora.

• Iai aia anene natim ae e mamate nanoia iai ke te kuna iaon Iesu Kristo ao Ana Mwakuri ni Kamaiu? Kam kona ni botaki n aneneia—ke n reiakina teuana ae boou. Maroroakina taekana ke mwakoro n taeka ake ni mwanewena aika a reireiniko iaon te mweraoi ao te rau are anga te Tia Kamaiu nakoira.

Keketemwane, iroun Michael T. Malm

E kona Iesu Kristo ni kaitiakai ao ni buokai ni bitaki.

• Ana Boki Moomon e anga katooto aika mwaiti iaoia aomata ake a tia ni bitaki ibukin Ana Mwakuri ni Kamaiu te Tia Kamaiu. Tao a kona natim n rinea teuana ae a na reiakinna, n aron Enoti (taraa Enoti 1:2–8), Aramwa te Te Ataei (taraa Motiaea 27:8–24), ke kain Aentaai-Nibwaai-Riaai (taraa Aramwa 24:7–19). E kanga te aomata aei ke te kurubu ni bitaki ibukin Ana Mwakuri ni Kamaiu Iesu Kristo? Ti na kangaa n irii aia katooto?

• Ngkoe ma natim kam kona naba n tara kaokoron te bwai ae e itiaki ao te bwai ae bareka ao ni marooro bwa e kanga te bwai ae bareka ni kaitiakaki. Baane wareka Aramwa 13:11–13. Tera ae e karaoia Iesu bwa ti aonga n riki ni itiaki man ara bure? E kanga aei n anganiira te namakin ibukin te bure? E kanga aei n anganiira te namakin iaon te Tia Kamaiu?

Ibukin iango riki tabeua, taraa te beeba ni kaongora n te namwakaina aio n te Rao maekatiin.

Maiuakina ae tau ibukin ana kairiiri te Tamnei. Te Tamnei bon te tia reirei raoi. Ngkai ko ukoukora Ana kairiiri ao ni maiu bwa ko na tau, E na anganiko iango ma namakin bwa ko na kanga ni buokii kainnanoia aomata ake ko reireiniia.

Kamatata n tamnein Kristo ma Nibwaite, iroun Ben Sowards