Akea Ana Tokanikai te Ruanimate
Rinanon ana Mwakuri ni kaboomwi ao Mangautin Iesu Kristo ae mimitong, naano ake a uruaki a kona ni kamaoaki, te nanorawawata e riki bwa te rau, ao te un e kona n riki bwa te kaantaninga.
N Tabatin te Itita ae mimitong aei, ara ataei a kimwareirei n anenea, “N tain te tiburing ae tikiraoi, e a uti Iesu Kristo ao ni kitana te ruanimate ike e kaweneaki iai rabwatana, e urua ana kabaebae te mate.”1
Ti karabwarabwa ibukin ara atatai ni Mangautin Iesu Kristo. Ao irarikina n tabeua bwaai aika a riki inanon maiura, ti na namakina te uruaki n nano imwiin buan temanna ae ti rangi n tangiria. Rinanon te buti n aoraki ae kabuta te aonaaba ai tibwa ngkai naba, angiina ibuakora a bua raoia aika tangiraki—tao man aia utu ke raoraoia.2 Ti tataro ibukiia naake a nanokawaki ni buaia raoia n te aro aei.
E taku Beretitenti Russell M. Nelson:
“N aki tabe bwa iraua am ririki, ti tang ibukiia naake a tangiraki ake a bua maiuia. Te tang bon teuana kaotan te tangira ae koaua ae itiaki. …
“Irarikina, e aki bwanin ara kakaitau ni kakukurein te manga ikotaki imwiina n akean te maenako ae karika te tang ngkai. Tii te kawai ngkana iai te mate a na akea te nanokawaki ao a na akea te tangira n te maiu aei.”3
Ti kona n iangoia bwa a kanga raoraon Iesu, ake a ririmwina ao ni Buokia,4 a namakina iaoia kakoauan Matena.5 Ti ataia bwa a “tang man katu ranninmataia.”6 Ni bongin te Tauraki n te Kaibangaki, n aki ataia bwa tera ae na kona n riki n te Tabati, a bae n rootaki n te rawawata n nano, ni miimi bwa a na kanga ni waaki nako n akea aia Uea irarikiia. E ngae n anne, a reitinako ni karaoa aia ibuobuoki Nakoina ni karokoa a mate.
Ioteba ae te I Arimataia e bubutia Birato bwa e na anganna rabwatan Iesu. E uoota rikaaki rabwatana, e niniria n te kunnikai ae te rinen, ao ni kawenea n te bwanga ni mate ae boou, ao ni karabinoa te atiibu nakon mataroan te bwanga ni mate.7
Nikotemo e uota te mura ae e renganaki ma te aroe. E buoka Ioteba n uota rabwatana ao n niria n te kunnikai ae te rinen ma bwaai aika a boiarara.8
Maria te I Maketara ao tabeman riki aine ake a rimwin Ioteba ao Nikotemo, a taraia bwa e na kaweneaki iaa rabwatan Iesu, ao a katauraoi bwaai aika a boiarara ao te bwaa bwa a na kabiria iai.9 Ni kaineti ma matoan te tua n te bong anne, a tataninga ao ni moantaai ni katauraoa ao ni kabira rabwatana ibukina bwa te Kaonobong bon te Tabati.10 Ngkanne, ni karangainan te Tabati, a nako n te bwanga ni mate. Imwiin ataakina ngkai ai akea rabwatan te Tia Kamaiu ikekei, a nako n tuangiia ana reirei ake bon ana Abotoro Iesu. A iraki irouia Abotoro nakon te nne ni mate ao a nooria bwa akea kaaina. Ni kabane ma tii Maria te I Maketara ae e a waekoa naba n nako, e miimi bwa tera ae riki nakon rabwatan te Tia Kamaiu.11
Maria are te I-Maketara e tiku n te nne ni mate n tii ngaia. Tii tabebong te bong mai imwaaina, e a tia n noora kananoangan maten raoraona ao ana Mataniwi. Ngkai akea kanoan te nne ni mate, ao e aki ataia bwa E mena iaa ngkai. E rangi ni korakora butimwaean aei irouna, ao e a tang. N te tai anne, te Tia Kamaiu ae e uti e kawaria ao n titiraki bwa e aera ngkai e a bon tang ao antai ae ukoukoria ni kakaea. N ana iango e taku bwa e taetae nakoina te tia ununiki, e titiraki bwa, ngkana e a tia n anaa rabwatan ana Uea, e na tuangnga bwa e mena iaa bwa e aonga n anaia.12
N au iango e a tia te Uea ni kariaia Maria are te I-Maketara bwa e na tang ao ni kaota marakina.13 Imwiina E weteia n arana, ao e rairaki nako Ina ao e Kina. E noora Kristo ae e uti ao bon te tia kakoaua ni Mangautina ae moan te mimitong.14
N aromi, n tabeua aanga, I kona n taekina te rawawata are e namakinna Maria te I Maketara ao raoraona ngkai a tang ni maten aia Uea. Ngke ruaiwa au ririki ni maiu, e bua tariu te ikawai n tain te mwaeiei ae rangi n urubwai. Ibukina ngkai e riki n ae aki kantaningaaki, e anganai teutana te tai n iangoa te bwai ae e riki. E uruaki nanou man te nano rawawata, ao I bon titirakinai, “Tera ae riki nakon tariu? E ngaara? E nakea? N na kona ni manga nooria?”
N te tai anne I tuai ataa raoi ana babaire ni kamaiu te Atua, ao iai nanou ni kan ataia bwa ti roko mai iaa, tera oin bukin maiura, ao tera ae na riki nakoira imwiin matera. Ti aki bane ni karekei naano akanne ngkana a mate ara utu aika tangiraki ke ngkana ti rinanon kangaanga inanon maiura?
Tabeua te ririki imwiina, I a moanna n iangoa tariu n te kawai ae onoti. I bae n iangoia aongkoa are e a karebwerebwe iaon ara mataroa. I bae ni kauka te mataroa, e na bae n tei ikekei, ao n tuangai, “I aki mate. I maiu. I aki kona ni kawariko, ma ngkai N na tiku ma ngkoe ao n aki manga nako.” Te iango anne, e kuri n titebo ma te mii, e buokai ni keiakina te maraki are I namakinna ngke e mate. Ana iango are e kan mena irarikiu e aki toki n roko n au iango. N tabetai I bae ni karekeaa taraan te mataroa n tarataraia, ni kantaningaia bwa e na karebwerebwe ao N na manga nooria.
Tao 40 te ririki imwiina, n tain te Itita, I tabe n iangoa Mangautin Iesu Kristo ao ni moanna n iangoa tariu. N te tai anne, iai te bwai ae katika au iango. I uringa iangoakina aongkoa are e a roko n noorai.
N te bong anne I ataia bwa te Tamnei ae Raoiroi e anganai te raunnano n te tai ae karawawata. I a tia ni karekea te koaua ae tamnein tariu e aki mate; e bon maiu. E teimatoa n rikirake inanon maiuna n tamnei. I ataia ngkai bwa “[tariu] e na boni manga uti”15 n te tai ane e mimitong anne, ibukin Mangautin Iesu Kristo, ti na manga bane ni kautaki. N reitaki ma anne, E a tia n anganiira te kona ibukira ni kabane bwa ti na manga ikotaki ma ara utu ao ni karekea te kimwareirei ae akea tokina imatan te Atua ngkana ti rineia bwa ti na karaoi ao ni kawakin berita aika tabu ma Ngaia.
E reirei Beretitenti Russell M. Nelson:
“Te mate bon te bwai ae riai ibukin maiura ae akea tokina. Akea ae ataia ngkana e na roko, ma e bon kakawaki nakon ana babaire ni kakukurei te Atua are e korakora. Ibukin ana Mwakuri ni Kamaiu te Uea, mangautina n te kabane e bon koaua ao bon te maiu ae akea tokina e kona ni karaoaki nakoia aomata ni kabane. …
“… Ibukiia ara utu aika tangiraki ake a nanokawaki ake a kitanaki … kammarakin te mate e toki man te onimaki ae teimatoa inanon Kristo, ma te kaantaninga ae tamaroa ma ni kororaoi, tangiran te Atua ao aomata ni kabane, ao te nano ae korakora ni beku ibukiia. Te onimaki anne, te kaantaninga anne, te tangira anne ti tau n roko ni mweengan te Atua ae tabu, ma raora ae akea tokina ao ara utu, ni maeka ma Ngaia.”16
I kakoaua bwa “ngke arona bwa e tuai n uti Kristo mai buakoia maate, ke n tuai n urui ana kabaebae te mate bwa e aonga n ae akea ana tokanikai te ruanimate, ao a na bon akea kammarakin te mate, ao a na bon akea te mangauti.
“Ma iai te mangauti, mangaia ae akea ana tokanikai te ruanimate, ao e anaaki kammarakin te mate iroun Kristo.
“Bon ngaia ootan ao maiun te aonaba; eng, ae te oota ae aki totoki, ae aki kona ni karaoaki; eng, ao te maiu naba ae aki totoki, bwa a na manga akea te mate.”17
E katanoata te Tia Kamaiu, “Boni Ngai te manga-uti, ao te maiu: ane e onimakinai, ngkana tao e boni mate, ao e na boni manga maiu.”18
I kakoua bwa rinanon ana Mwakuri ni kaboomwi ao Mangautin Iesu Kristo ae mimitong, naano ake a uruaki a kona ni kamaoaki, te nanorawawata e riki bwa te rau, ao te un e kona n riki bwa te kaantaninga. E kona n ramwaneira ni baina n nanoanga, ae karaunano, kakorakoraira, ao ni kamaiuira ngaira n tatabemaniira nako. N aran Iesu Kristo, amen.