Iesu Kristo: Te Tia Tararua Tamneira
Ngkana ti raira raoi nanora man ara bure, ti kariaia ana mwakuri ni kamaiu Kristo bwa e na mwakuri i nanon maiura.
Tariu ma mwaaneu aika tangiraki, ni ingabongin te Itita aei ao e kukurei nanou ngkai I iangoa te mwakuri ae te kabanea ni mimitong, te kabanea n rietata, ae akea tiana are e riki n rongorongon te aonaba—ana mwakuri ni kamaiu ara Uea, Iesu Kristo. Ana taeka te burabeti Itaia ae teretere e karababa korakoran ao tamaroan maiun te Tia Kamaiu n ruo ao n anga maiuna ibukiia natin te Atua ni kabane:
“E koaua ba e anai rawawatara, ao n uouoti nanokawakira, ma ti taku bwa E boaki ma n oreaki iroun te Atua, ao e karawawataki.
“Ma E ewaraki ibukin ara bure, E kamanatuaki i bukin ara buakaka: e mena i aona te boaki are e reke iai ara raoi; ao ti kamaiuaki n oreana.”1
Man ana anganano ni katokaan iaona aia bure aomata nako, te mwakuri n iowawa are e boneraaki iai nakon te kaibangaki, ao ana tokanikai iaon te mate n te kateniua ni bong,2 Iesu e katabua riki te otenanti ae te Toa ae Te Riao are e tia ni katokaaki iaoia Iteraera n tai ake ngkoa.3 Kakoroan nanon te taetae ni burabeti, E anga Oin Rabwatana ao raraana ae kakaawaki bwa te kabanea ni korakora n anganano,4 are a kabwaia kanikina ake a kabonganaaki n te Toa are Teriao.5 Ni karaoan aei, Kristo e rinanon te karawawataki n te rabwata ao n te tamnei are e aki kona n oota iai ana iango te aomata. E taku te Tia Kamaiu:
“Ma nooria, Ngai, te Atua, I a tia ni karawaawataaki ni bwai aikai ibukia aomata ni kabane, …
“Te karawaawata are e karika nakoiu, Ngai ae te Atua, te kabanea ni korakora i buakomi ni kabane, bwa N na ruru ibukin te maraki, ao ni wawanako te rara man bwangabwangan kuniu, ao n rawaawata n te rabwata ao te tamnei—ao n tangiria bwa N na aki nimma te mwangko ae e mao, ao ni keerikaaki—
“E ngae n anne, te mimitong nakon te Tama, ao I nimma ao ni katia au katauraoi ibukia natia aomata.”6
Kristo e karaoa nanon Tamana7 rinanon ana anga karea n nanoanga ae akea tiana. E tokanikai iaon kamarakin te mate n rabwata ao n tamnei,8 are e roko n te aonaba man te Bwaka,9 ao e anganira te kona ni karekea te kamaiuaki ae akea tokina.10
Iesu bon tii ngaia te Aomata ae kona ni karaoa te anga karea ae akea tokina man kororaoi ibukira ni bane.11 E bon rineaki ao ni kaman katabuaki n te Bowi ae Kakannato i Karawa, i mwain karikan te aonaba.12 Reitana, e bungiaki iroun te tina ae mamate, E karekea te mate n rabwata, ma mairoun te Atua, ngkai ngaia Ana Rikitemanna te Tama, E karekea te mwaaka n anga Oin maiuna ao n manga uti.13 Reitan anne, Kristo e maiuakina te maiu ae kororaoi are akea teutana barekana ao, ngaia are, e aki rotaki ni kaitaraa te motiraoi ae mai iroun te Atua.14 Iai tabeua taabo te Burabeti Iotebwa Timiti e reirei:
“E aki kona n roko te kamaiuaki nakon te aonaba n akea ana mwakuri Iesu Kristo.
Te Atua … e katauraoa te karea n te bwaintangira ae Oin Natina, are e riai karokoana n taina ni … kauka te mataroa bwa e aonga te aomata n okira te Uea.”15
E boni ngae ngke e a tia te Tia Kamaiu ni kanakoa korakoran te mate n rabwata rinanon ana karea,16 E aki kanakoa oin tabera n raira n nano ibukin riaon tuua ake ti karaoi.17 Ma, E anganira te kakao ae onoti bwa ti na raoiakinaki nakon Tamara are i Karawa. Rinanon Iesu Kristo ao Ana mwakuri ni kamaiu, ti kona ni karekea te bitaki ae korakora n te iango ao te nano, ni karekea te aroaro ae boou, nakon te Atua ao te maiu aei.18 Ngkana ti rairi raoi nanora man ara bure, n kaeta nanora ma ara kantaninga nakon te Atua ao Ana tua nako, ti kona ni karekea kabwaran ara bure ao n namakina korakoran te Tamnei ae Raoiroi n ae bati. N te nanoanga, ti totokoa karekean te rawaawata are e rinanona te Tia Kamaiu.19
Te bwaintangira ae te rairannano bon kaotan ana akoi te Atua nakoia Natina, ao boni kaotan mwaakana ae akea kabotauana are e na buokira n tokanikai iaon buure ni kabane ake ti karaoi. Bon kaotan naba te tataonannano ao te atataiaomata iroun Tamara are i Karawa ae Akea Tokina ni mamaarara ao kabwakara. Beretitenti Russell M. Nelson, ara burabeti ae tangiraki, e arana te bwaintangira aei bwa “kiingin te kukurei ao te rau n te iango.”20
Raoraou aika tangiraki, I kaota au koaua nakoimi bwa ngkana ti raira raoi nanora man ara bure,21 ti kariaia ana mwakuri ni kamaiu Kristo bwa e na mwakuri i nanon maiura.22 Ti na tokanikai man ana kabaebae te bure, ao ni karekea te kimwareirei i nanon maiura, ma ni kona ni karekea te maiu ae akea tokina, are e a tia ni katauraoaki man moan katean te aonaba ibukia ni kabane ake a kakoaua Iesu Kristo ao a nako Ina.23
Irarikin are katauraoan te bwaintangira ae mimitong aei, E anga naba te Tia Kamaiu te kabebete ao te rau ngkai ti kaitarai karawaawata, kataaki, ao mamaarara n te maiu aei, n ikotaki ma bwai ake a riki nakoira n te buti n aoraki ae ti taonaki iai. E na rau nanomi bwa Kristo e atai n tainako karawaawata ake ti karekei n te maiu aei. E oota ni kabane ni bwaai aika mao, te kainnano ni maraki, marakin te rabwata ma te iango ao kakaewenako n te maiu n tamnei ae ti kaitarai. E onrake te Tia Kamaiu n te nanoanga, ao E tauraoi n tainako ni buokiira. E kona ni karaoa aei ibukina bwa E rinanona ao e katokai iaona marakira ao mamaraara.24
Ma te nimamanei ao te nanorinano, E rinanon ae korakora riki ni bwaai ni kabane ao e kariaia bwa e na riribaki, kakeaki, man kamaemaeaki irouia aomata, n tia ni kaikoakaki ibukin riaoan tuua iroura ma ara bure nako. E rawaawata ni bwaai aikai ibukia aomata ni kabane ao e katokaa iaona buren te aonaba,25 ao E riki bwa te boto n tararuan tamneira.
Ngkai ti kaanira ma Ngaia, n anga ngaira nakon Ana tararua, ti na boni kona ni katokaa i aora amona, are e aoraoi, ao Rawatana, e bebete, n te aro are ti a karekea te karaunano ma te motirawa are e beritanaki. Irarikina, ti na karekea te korakora are ti bane ni kainnanoia n tokanikai iaon kangaanga, mamaara, ao rawaawatan te maiu aei, are e na bon rang matoatoa ngke arona bwa akea Ana ibuobuoki ke mwaakana ni kamaiu.26 Ti reireiaki ni koroboki aika tabu bwa “ko na kaki iaon Iehova rawawatam ae E anganiko, ao e na buokiko.”27 “Ao ngkanne ke e angani[ra] te Atua kabebetean uota[ra], rinanon Ana kimwareirei Natina.”28
Rabanen te ririki ae nako, I ongo rongorongon motirawan te taanga ae tangiraki irou, Mario ao Regina Emerick, ake a rangi ni kakaonimaki nakon te Uea ao a motirawa abong te bong imarenaia, are e riki man kangaangan te COVID-19.
Temanna natiia te mwaane, are e beku bwa te Bitiobi i Brazil, e raranga te rongorongo aei nakoiu: “E bon rangi ni matoa tarakin aroia au karo ni kitana te aonaba aei n aroia aei, ma I kona n namakina bain te Uea i nanon maiu ribuakon te kangaanga aei, ibukina bwa I karekea te korakora ao te rau are e riaon au kantaninga. Rinanon au onimaki iroun Iesu Kristo ao Ana Mwakuri ni Kamaiu, I karekea te ibuobuoki mai ieta ni kakorakoraia ao ni karau nanoia au utu ao naake a buokira n te tai ni kakatai aei. E boni ngae ngke e a aki riki te kakai are e kantaningaki irouia ara koraki, ma I nora te bitaki are e riki nakon oin maiu ao maiuia kaain au utu. I namakina te rau ae akea kabotauana are e ninianako nanou, ma n anganai te kantaninga ao te aki nanokokoraki n ana tangira te Tia Kamaiu ibukiu ao i nanon ana babaire ni kakukurei te Atua ibukia natina ni kabane. I noria bwa inanon bong ae e korakora iai te rawaawata, bain te Tia Kamaiu a aroraki n tainako nakoia ake a ukoria ma nanoia, korakoraia, n aia iango, ao ni marurungiia.”
Tariu ma mwaaneu aika tangiraki, n Tabatin te Itita aei, I kaota au koaua bwa e a tia n uti Iesu man te mate ao E maiu. I kaota au koaua bwa mai Irouna ma Ana anga karea ni kamaiu, te Tia Kamaiu e katauraoa te kawai n tokanikai iaon te mate, n rabwata ao tamnei. Irarikin kakabwaia aika tamaroa, E anga nakoira te mweraoi ao te raunnano n taai ni kangaanga, n aron baike a tibwa tia n riki nakoira. E na rau nanomi bwa ngkae ti kaki ara onimaki iroun Iesu Kristo ao Ana Mwakuri ni Kamaiu, n teimatoa ara onimaki ni karokoa te toki, ti na karekea ana berita Tamara are i Karawa, are e karaoi bwai ni kabane ni korakorana ni buokira n oki nako Ina. Aio Ana mwakuri ao Mimitongina!29 I kaota au koaua bwa Iesu bon te Kristo, te Tia Kamaiua te aonaba, te Meetia are e taekinaki, te Mangauti ao te Maiu.30 Ao I tibwai koaua aikai nakoimi n Arana ae tabu, Ana rikitemana te Tama, ara Uea, Iesu Kristo, amen.