Bwaai Aika Ti Reiakin Aika Ti Na Aki Kona ni Mwaninga
Ngkana ko iangoa maium ma te tataro, I kakoaua bwa ko na noori kawai aika mwaiti are e a tia te Uea ni kairiko iai rinanon te maiu ae matoatoa aei.
Tariu aika kam tangiraki, I a tia n rangi n ingainga nakon te bootaki aei ma ngkami. Te kabanea n tai are ti karaoa iai te tetere n te nakoanibonga n te maungatabu bon n Eberi 2019. A mwaiti bwaai aika riki inanon uoua te ririki n nako! Tabeman mai ibuakomi a tia ni mate raoraomi aika kam tangiriia. Tabeman a tia ni bua aia mwakuri, aia kareke mwane, ke marurungiia. Tabeman e bua namakinan te rau ke aia kantaninga nakon taai aika a na roko. E rotaki nanou ibukimi n tatabemani ngkami nako ake kam a tia n rawawata ni bwaai aikai ke ni buan bwaai riki tabeua. I tataro n tainako bwa e na karau nanomi te Uea. Ngkana ko teimatoa ni karika te Atua bwa e na moanibwai ni maium, I ataia bwa E noria ae a na nakoraoi bwaai ni kabane ni maiumi nakon taai aika a na roko.
Ibuakon bwaai aika bua mai iroura ake ti rinanoi, a mwaiti bwaai aika kuneaaki. Tabeman a karekea te onimaki ae korakora riki iroun Tamara are i Karawa ao Natina, Iesu Kristo. A mwaiti aika a tia ni karekea te kawai ae boou n iangoa te maiu aei—riki te taratara ae akea tokina. Ko na bae n tia ni kunea te reitaki ae korakora riki ma aika ko tangiriia ao ma te Uea. Au kantaninga bwa e a tia n rikirake am konabwai n ongo Irouna ao ni karekea te kaotioti. Kataaki aika a kangaanga a karekea n tainako te tai n rikirake are e aki kona n roko n te kawai riki teuana.
Iango rikaaki nakon uoua te ririki n nako. E kanga aron rikirakem? Tera ae ko a tia n reiakinna? Ko na bae n tangiria n okirikaaki nakon 2019 ao n tiku ikekei! Ma ngkana ko iangoa maium ma te tataro, I kakoaua bwa ko na noori kawai aika mwaiti are e a tia te Uea ni kairiko rinanon te maiu ae matoatoa aei, ni buokiko n riki bwa te aomata ae korakora nanom, ao n rairaki—a na aomata te Atua ni koaua.
I ataia bwa a mwaiti a na babaire te Uea aika korakora ao ni kamimi ibukira—n tatabemaniira ao n ikotaki. Ma te nanoanga ao te taotaonaki n nano, E taku:
“Ngkami ataei aika uarereke, ao kam tuai moa n oota bwa korakorara kakabwaia ae a mena i nanon bain te Tama … a katauraoaki ibukimi;
“Ao kam aki kona ni uotii bwaai ni kabane ngkai; e ngae n anne, kukurei, bwa N na kairiiriko i nanon kawaim.”1
Tariu aika kam tangiraki, I kakoaua bwa E a tia, ao ae e bon, kairira naba i nanon kawaim, ngkai ti ukoukoria bwa ti na ongo Irouna. E tangiriira bwa ti na rikirake ao n reirei, riki rinanon—tao n ae onoti rinanon—te kakaitara.
Te kona n reiakina ae bati rinanon te kakaitara. Teraa ae ko atia n reiakinna inanon uoua te ririki n nako bwa ko tatangiria n tainako n ururing? Ti na karekei rekeia aika kakaokoro, ma n na aanga aua reirei aika n au kantaninga ti a tia ni bane n reiakin ao n aki kona ni mwaninga.
Reirei 1: Te Mweenga Bon Boton te Onimaki ao te Nebonebo
N tainako ngkana e kauringiira te Uea ibukin kakamakun boong aika kaitira, E reirei n aei: “Teei n taabo aika tabu, ao n aki mwaing.”2 Taabo aika “tabu aikai” e raonaki ma ana tembora te Uea ao ana autinibootaki. Ma ngkai ti aaki kona n ikotaki n taabo aika ni bukina aika kakaokoro, ti a tia n reiakinna bwa teuana te tabo man taaabo aika tabu bon te mweenga—eng, riki mweengam .
Taari, iai iroumi a na nakoanibonga te Atua. “Bwa kariaia n te nakoanibonga a bon reitaki matoa ma mwaakan karawa.”3 Ngkoe ao am utu kamwa tia ni karekei otenanti n te nakoanibonga. Bwa “e kaotaki mwaakan te aro n Atua [n te nakoanibonga ae], n taian otenanti mai iai.”4 E tauraoi te mwaaka anne nakoim ao am utu ni bon oin mweengam ngkana ko kawakin berita aika tabu aika ko a tia ni karaoi.5
N 185 te ririki n nako n te bong aei Eberi 3, 1836, Eria e kaokaii kiingin te nakoanibonga are e kariaia ara utu bwa a na kabaeaki n aki toki. Anne bukin ae ti namakina ae raoiroi ni karaoan te toa inanon mweengam. Tera ae a rotaki iai kaain am utu ngke a noriko—aia karo, tibuia te mwaane, bumwaane, naati mwaane, ke taari—ni karaoa te otenanti ae tabu aei? Tera ae ko na karaoia ni kateimatoa te namakin ae tabu anne inanon mweengam?
Ko na bae n namakinna ae iai riki ae ko kainnanoia ni karaoia ni karaoa mweengam bwa n nen te onimaki ni koaua. Ngkana ngaia anne, taiaoka karaoia! Ngkana ko a tia n mare, reitaki ma kainabam ngkai raom n reitaki aika ti tebo aromi n te mwakuri ae kakawaki aei. Iai tabeua mwakuri aika kakawaki riki nakon aei. Imarenan ngkai ao te tai are e na manga oki te Uea iai, ti na kainnanoi mweengara bwa te tabo ibukin te rau ao te kamanoaki.6
Katei ao mwakuri ake a kaoa te Tamnei e na karikirakea mimitongin mweengam. Bon titebo naba ma te koaua are te mimitong e na aki kona ni manga reke ngkana iai te bwai ni kateim ke n am otabwanin are e na kaitaraa te Tamnei ae Raoiroi bwa ngkanne “a na bubai karawa.”7
Ko a tia n ataia bwa bukin tera te Uea e tangiriira bwa ti na karoi mweengara bwa boton reiakinan te euangkerio ao maiuakinan te euangkerio? Tiaki ti katauraoakira ibukin, ao ni buokiira ni kamaiuaki, man te aoraki. Kaokoroaki aika ngkai iaon te ikoikotaki e na waekoa n toki. E ngae n anne, katabeam ni karaoa mweeengam bwa te bwai ae kakawaki ae na kamanoa te onimaki e riai n aki toki. Ngkai te onimaki ao te mimitong e kerikaki man te aonaaba ae bwaka aei, kainnanom ni katei taabo aika tabu e na rikirake. I kairoroi ngkami bwa kam na reitinako ni karaoa mweengami bwa taabo ni koaua aika tabu “ao n aki kamwaingaki”8 man te botoniango ae kakawaki anne.
Reirei 2: Ti Kainnanoira n Tatabemaniira
Te Atua e tangiriira bwa ti na uaia ni mwakuri ao ni buokiira ibon imanerara. Anne bukina ngkai E kanakomaira nako aon te aba inanon utuu ao e baireira inanon uoote ao titeiki. Anne bukina ngkai e tuangiira bwa ti na beku ao n ibuobuoki bon nakoira n tatabemanira. Anne bukina ngkai E tuangiira bwa ti na maeka inanon te aba ma tiaki kaain te aba.9 Ti kona ni kakoroa nanon ae bati riki ni bootaki nakon ae ti ngaira.10 Ana babaire ni kakukurei te Atua e na aki korobukina ngkana a tiku Natina n tiotionako imarenaia.
Te aoraki ae butanako ngkai e a tia n onoti n te aro are e a rotiia aomata ni kabane n te aonaaba n te tai ae titeuana. Ngkai a tia n rangi n rotaki riki tabeman nakoia ake tabeman, ti a tia ni bane ni kaewenakoaki n tabeua kawai. Ibukin te bwai aei, katakira aika ti tearona iai mwiina ni buokia ni katiteuanaia natin te Atua ae aki rereke mai imwaina. Ngaia ae, I titiraki, e a tia te kataaki ae tibwaaki aei ni kaniiko riki nakoia kaain rarikim—nakoia tarim ao mwanem ni kabuta te kaawa ao te aonaaba?
Ibukin te bwai aei, tuua ake uoua aika korakora a kona ni kairiira: te moan, n tangira Iehova ae Atuam ao, te kauoua, ko na tangira raom.11 Ti kaota ara tangira man karaoan te beku.
Ngkana iai ae ko ataia bwa e tiku ni maroa, nakoina ni buokia—e ngae ngkana ko namakinna ae ko tiki ni maroa naba! Ko aki kainnanoia bwa e na iai bukina ke te rongorongo ke te mwakuri ae ko na karaoia. Ti taekina mauri ao kaota am tangira. A kona ni buokiko bwaai n rabakau. E ngae ngke iai te aoraki ke akea, natin te Atua n tatabemaniia nako a kainnanoia n ataia ae teuanne ke neienne e aki maroa!
Reirei 3: Am Kooram n te Nakoanibonga e Nanonaki n Ae Raka Riki Nakon ae Ti te Bootaki
N tain butinakon te aoraki, bootaki n te kooram n te Tabati a katokaki ibukin te tai anne. Tabeua kooram a kona ngkai ni marooro rinanon te kaombiuta. Ma, te mwakuri are e a tia te Uea n anganiia kaain te kooram n te nakoanibonga e aki nanonaki ae ai ti te bobotaki naba. Bobotaki bon ti iteran te mwakoron ae katauaki n te kooram n are e kona ni karaoia.
Tariu n te Nakoanibonga ae te Aaron ao kooram n unimwaane, karababa otam bwa bukin tera iai ara kooram. E kanga te Uea ni kantaningaiko bwa ko na kabonga am kooram ni kakoroa nanon Ana mwakuri—ngkai? Ukoukora te kaotioti mairoun te Uea. Kananorinanoko! Bubuti! Kakauongo! Ngkana ko a tia ni weteaki bwa ko na kairiiri, marooro bwa te beretitentii ao ma kaain te kooram. Bwa tera am aobiti n te nakoanibonga ke am wewete, karika te Atua bwa e na moamoa inanon katabeakim ngkai te membwa n am kooram ao n am ibuobuoki. Rinanon te kimwareiei n te kokoaua are ko na uotia ni kakoroa bukina ngkai ko “ingainga ni kan karaoa te waaki ae raoiroi.”12 A mena kaain te kooram n te tabo ae onoti ni kabirimwaka ikotakin Iteraera irouia aika maiu ao ake a tia ni mate.
Reirei 4: Ti Ongo Iroun Iesu Kristo n Ae Nakoraoi Riki Ngkana Ti Teimatoa
Ti maeka n te tai are e taetae ni burabetiaki n taai aika a maan n nako, ngke “bwaai ni kabane a na mangaongao; ao n akea te nanokokoraki, e na bwara nanoia aomata; bwa e na roko te maaku i aoia aomata ni kabane.”13 E koaua anne imwain butinakon te aoraki, ao e na bon koaua imwiina. Te bwai ae karina n riki n te aonaaba e na reitinako ni kekerake. Ni kaitaraana, bwanaan te Uea tiaki “te bwana ae korakora ae riao karongoana, ma … bon [te] bwanaa ae rau ae kororaoi bebetena, ae [kanga aron] te wirikiriki, ae bon [ninianako] te tamnei.”14 N te aro bwa ko na ongo te bwana ae maraara aei, ngkoe naba ko riai n teimatoa!15
N taai aikai, te buti n aoraki e a tia ni katoki waaki ni kakukurei ae na kona ni kaon maiura. N te tai ae waekoa ti na kona n rineia ni kanoa te tai anne riki ma karongoa ao bwaai aika a riki n te aonaaba . Ke ti kona ni kabongana ara tai n ongora bwanaan te Uea ni wirikirikiia Ana kairi, karaunano, ao te rau. Te tai ae aki karongoa bon te tai ae tabu—te tai are ti na karekei ara kaotioti ao ni kateimatoa te rau.
Babairea arom ni karekea am tai n ti ngkoe ao ma raom ae ko tangiria. Tibwauai am iango nakon te Atua n te tataro. Karekea am tai n rangi ni katabeko ma booki aika tabu ao n nebonebo n te tembora.
Tariu aika kam tangiraki, a rangi ni mwaiti bwai aika e tangiria te Uea bwa ti na reiakin man oin ara taneiai n tain butinakon te aoraki aei. I a tia ni koroi ti aua. I kaoi ngkami bwa kam na korei oin am taneiai, iangoia raoi ma te karaurau, ao n tibwauaia ma naake ko tangiriia.
E a tia te tai ae na roko ni kaonaki ma te kantaninga ni kawakinan irouia aomata a na berita ae tabu te Atua16 Te Uea e na karikirakea weteakiia Ana toro aika a tau n taua te nakoanibonga ni kakabwaiaia, kamwengaraoia, ao ni kakorakoraia aomata ao ni buokia ni katauraoa te aonaaba ao kaina ibukin Kauaokina. Bon ibukin kabwaiara ngaira n tatabemaniira nako bwa ti na kakoroa nanon te kantaninga ke te kainibaire nakon te katabu ae tabu aika ti a tia ni karekei. Ti kona ni karaoa aei! I kakoaua, man kaotan au tangira nakoimi n tatabemani ngkami, tariu aika tangiraki, n aran Iesu Kristo, amen.