Te Atua e mena Ibuakora
E mena te Atua ibuakora—ao e bon irekereke inanon maiura ao e kakamwakuri ni kairiia Natina.
Rinanon nako roro, te Atua e a tia n taetae rinanoia Ana toro, aika burabeti.1 N te ingabong aei, e a tia n reke ara tai n ongo bwanaan ana burabeti te Atua n taetae nakoira ni kabane te aonaaba. Ti tangiriko, Beretitenti Nelson, ao I kaungaia ni kabane n tabo nako bwa a na kamatebwai ao n irii am taeka.
Imwain ae e koro au ka 12 n ririki, ara utu a tia ni kairoroaki uoua te tai bwa tina kiitana mweengara ao ni manga waaki mai moana ibuakon te kamangaongao, te maaku, ao te nanokokoraki are e riki man te buaka ao uamanakon te tautaeka. Bon te tai ae kanakonano irou, ma e bon rang kakamaaku irouia au karo aika tangiraki.
Tinau ao tamau a uota angiin te rawawata mairoura ngaira aman natiia bwa ti aonga ni beebete. A uota te rawawata ao te korakai n aia kabanea n tamaroa. Te maaku e bon bae n rang n rawawata, n anaa mwaitin aia tai ao ni kakerikaaka aia kantaninga.
N te tai aei ao namakinan te bwarannano imwiin te Kauoua ni Buaka n te aonaaba e karekea te bitaki ae moan te korakora n te aonaaba. E katuka ana mwaake iaou.
N taai akekei, inanon maroaau n aoa n tiku ibon irou, I aki toki n titiraki, “A na iai te kantaninga ae e na reke n te aonaaba?”
Anera Ibuakora
Ngkai I iangoa te titiraki aei, I iangoia ara mitinare aika kain Amerika aika kairake ake a beku ibuakora inanon ririki akanne. A tia ni kiitana mweengaraoia ao kamanoaia ni mweengaia n iteran te aonaaba ae raroa ao a mwananga nako Tiaman—abaia aia kairiribai—n anga te kantaninga mai karawa nakoia ara aomata. A aki roko bwa a na ibukibuki, ni kaetiira, ke ni kamama. A tauraoi n anga ma nanoia maiuia ni kairake n aki iangoa reken kabwaiaia mai aon te aba, n tii tangiria ni buokiia tabeman ni karekea te kimwareirei ao te rau are a tia ni karekea.
Irou, kairake aika mwaane ao aine aikai a kororaoi. Tao bon iai kairuaia, ma irou I aki nooria. N na iangoia n tainako n anuaia aika a tamaroa—anera n te ota ao te mimitong, taan ibuobuoki n te nanoanga, raoiroi, ao te koaua.
Ngkai te aonaaba e a onrake n akea te onimakinaki, te maraki n nano, riribai, ao te maku, aia banna ni katoto ao aia reirei kairake aikai a anganai te kantaninga. Rongorongon te euangkerio are a anganai e rianako riki iaon te tua, rongorongon ngkoa, te riribai, te totoko, ao ana babaire temanna ma temanna. E anga taian kaeka mai karawa nakon titiraki aika a kakaawaki ake ti karekei inanon te tai ni kanganga akanne.
Te rongorongo bwa e maiu te Atua ao e tabeakiniira, riki inanon aua ni mangaongao, n nanokokoraki, ao n aki nakoraoi. Bwa E bon kaoti n ara tai ni kaoka te koaua ao te ota—Ana euangkerio ao ana Ekaretia. Bwa E manga taetae nakoia ana burabeti, bwa te Atua e mena ibuakora—ao e bon irekereke inanon maiura ao e kakamwakuri ni kairiia Natina.
E kakubanako n te bwai are ti kona n reiakinna ngkana ti kaniira riki n taraa ana baire ni kamaiu Tamara are i Karawa, te baire ni kakukurei, ibukiia Natina. Ngkana ti namakinna tei aki kakaawaki, teweakinako, ao ni mwanuokinaki, ti reiakinna bwa ti kona ni kakoaua bwa te Atua e aki mwaninga taekara—ni koauana, E anga nakoia natina ni kabane te bwai teuana ae e kangaanga iangoakina: te riki bwa “taan ababa iroun te Atua, ao taan uaia n ababa ma Kristo.”2
Tera ae nanonaki n aei”?
Bwa tina maiu n aki toki, ni karekea bwaninin te kimwareirei,3 ao ni bwaini “kaintokanuea, abanuea, tabo aika a tautaekanaki ao mwaaka.”4
E rang mangori aron ataakina bwa te bwai ae rang tamaroa mai karawa n taai aika a na roko e bon kona n riki—tiaki ibukina bwa antai ngaira ma ibukina bwa antai raoi te Atua.
N ataakin aei, tina kanga ni ngurengure, ke n teimatoa n un? E aera tina kamangoriira ngkana e kaoira aia Uea Uea bwa tina kakoroa bukin tibwangara ni kakukurei ae aki totoki?5
Kamaiu Ibuakora
Ibukin ana tangira nakoira ae kororaoi te Atua ao ana anga karea Iesu Kristo ae akea tokina, ara bure—ae korakora ao ae uarereke—a kona ni kamaunaaki ao n aki manga uringaki.6 Ti kona n tei i Matana n itiaki, n tau, ao ni katabuaki.
E onrake nanou n te kakaitau nakon Tamau are i Karawa. I a ataia bwa E aki katikuia natina bwa ana inimaki inanon te kangaanga rinanon te maiu ae mamate n akea kantaningaan taai aika a na roko aika kakukurei ae akea tokina. E a tia ni katauraoi kaetieti ake e kaota te kawai n oki nakoIna. Ao ni boton aikai ni kabane bon Natina ae Tangiraki, Iesu Kristo7 ao Ana anganano are e karaoia ibukira.
Ana Mwakuri ni Kamaiu ae akea tokina te Tia Kamaiu e bita arora n taraakin ara bure ao ara aki kororaoi. Irarikin are tina tiku inanona n namakina te aki kona ni kamaiuaki ke ni bwara nanora, ti kona n reiakinaki mai iai ao n namakina te kantaninga.8 Te bwaintangira n te kaitiakaki imwiin te rairannano e kainaomataira man ara bure ao n riki bwa te aomata ae tibwa karikaki naba ngkai.9
Ibukin Iesu Kristo, kabwakara e na aki riki bwa anne raoi arora. A kona ni katamaroai arora.
N ai aron ana kataneiai te tia katangitang n te tikera, ti kona n noori kabwakara, burera, ao kairuara bwa te tai ae ti reireiaki iai, ma te tangira ae nano ae korakora riki ibukiia tabeman, ao te kaitiakaki rinanon te rairannano.
Ngkana ti rairi nanora, kairua a bon aki kabaneira. Bon mwakoron rikirakera.
Ngaira ni kabane bon ataei ni kabotauaki nakoia aomata aika mimitong ao n tamaroa ake ti baireaki bwa tina riki nakoi iai. Akea te aomata ae rikirake man te kawakawa nakon te nakonako nakon te biribiri n aki toki n rinanon te bwaka, untaba, ao te nikunikun. Anne arora n reireiakinaki.
Ngkana ti nanomatoa n teimatoa ni kataneiai, ni kataia n tainako ni kawakin ana tua te Atua, ni motinanoia n ara kekeiaki bwa tina rairannano, teimatoa, ao ni karaoi bwaai ake ti reiakini teutana imwiin teutana, tina karikirakea te ota inanon tamneira.10 Ao e ngae ngke ti aki kona ni karekei bwaninin arora n te tai aei, “ti ataia bwa, ngkana e kaoti [te Tia Kamaiu],” tina katotonga arona, bwa “ti na nora arona ni koaua.”11
Ai tamaroara te berita aei!
Eng, te aonaaba e mangaongao. Ao eng, iai kabwakara. Ma ti aki riai ni kabaraaki atura ni bwarannano, ibukina bwa ti kona n onimakina te Atua, ti kona n onimakina Natina, Iesu Kristo, ao ti kona ni butimwaea ana bwaintangira te Tamnei bwa e na kairiira iaon kawaira aei nakon te maiu ae kaonaki n te kimwareirei ao te aro ni kakukurei ae aki totoki.12
Iesu Ibuakora
I aki toki n titiraki, Tera ae e na reirei iai Iesu ao ae e na karaoia ngke arona bwa E mena ibuakora n te bong aei?
Imwiin te Mangauti, Iesu Kristo e kakoroa bukin Ana berita ni kawariia Ana “tibu tabemang.”13
Ana Boki Moomon: Teuana Kakoauan taekan Iesu Kristo e taekina kaotina nakoia ana aomata iaon ana kaotenante Amerika. Iai iroura te rekooti ae kakaawaki aei bwa te bwai ni kakoaua n ana mwakuri te Tia Kamaiu.
Aomata n Ana Boki Moomon a maeka n iteran te aonaaba are teuana—rongorongoia, aia katei, ao tein aia tautaeka a bon rang kaokoro mai irouia aomata ake e reireiniia Iesu n ana tai ni ibuobuoki ngke E maiu. Ma irarikina E reireiniia angiin bwaai ake E reirei iai n te Aba ae Tabu.
Bukin tera e karaoa anne?
Te Tia Kamaiu e reirei n tainako koaua aika aki bibitaki. A kaineti nakoia aomata n roro nako ao n aro nako.
Ana rongorongo bon te rongorongo ae ibukin te kantaninga ao ni kaaina—te kakoaua are te Atua Tamara are i Karawa e aki kiitaniia Natina.
Bwa E Mena te Atua ibuakora!
Uabubua te ririki n nako, te Tia Kamaiu e oki nakon te aonaaba. N raonaki iroun te Atua te Tama E kaoti nakon Iotebwa Timiti ngke 14 ana ririki ao e raonna inanon Kaokan Bwaai n te euangkerio ao ana Ekaretia Iesu Kristo. Man te bong anne ao imwiina, e kaukaki karawa, ao anera a ruorikaaki mai karawa ni uota te rongorongo. Te ota ao te ataibwai a anganaki aomata iaon te aba mai karawa.
Te Uea Iesu Kristo e taetae teuana riki te tai nakon te aonaaba.
Tera ae E taekinna?
Ibukin kakabwaiara, angiina Ana taeka a koreaki n Reirei ao Berita aika Tabu—e tauraoi nakoia aomata nako n te aonaaba ake a tangiria ni warekii ao ni kamatebwaia. Kakaawakira taeka aikai nakoira ni boong aikai!
Ao ti riai n aki kubanako ni kunea bwa te Tia Kamaiu e manga reireiniira riki boton ana rongorongo n Ana euangkerio: “ Ko na tangira te Uea ae Atuam ma nanom ni kabanea, ma marurungim, am iango, ao korakoram ni kabane; ao ko na beku ibukina n aran Iesu Kristo.”14 E kaungaira bwa tina ukoukora te Atua15 ao ni maiuakin ana reirei ake e a tia ni kaoti nakoia Ana toro, burabeti.16
E reireiniira bwa tina itangitangiri imarenara17 ao “n onrake n te tangira ae kororaoi nakoia aomata ni kabane.”18
E kaoira bwa tina riki bwa Baina, n nakonako ni karaoa ae raoiroi.19 “Ti na tai ti itangitangiri n te taeka ao n te newe … ma ti na i tangitangiri n te mwakuri ao n te koaua.”20
E kakaewenakoira bwa ti na ongo Ana taeka; n tangira, n tibwatibwa, ni kaoia ni kabane nakon Ana euangkerio ao Ana Ekaretia.21
E tua nakoira bwa tina katea ana tembora ae tabu ao n rin ao ni beku ikekei.22
E reireiniira bwa ti na riki bwa Ana reirei—bwa nanora e riai n aki ukoukora bon oin korakorara, kaubwai, te kan tangiraki, ke te nakoa. E reireiniira bwa tina “katikui bwain te aonaba aei, ao ukoukori bwaa aika a raoiroi riki.”23
E kaungaira bwa tina ukoukora te kimwareirei, kakukurei, te rau, te koaua, te kakukurei,24 ao te berita n te aki mamate ao te maiu ae akea tokina.25
Tina karaka riki nakon are ti taekinna mai imwaina. Aongkoa Iesu e roko n am uoote, mwaanga, n am mwaanga, ke ni mweengam n te bong aei. A na tera aron anne?
E na ata am namakin ni koaua ao am iango. E na aki kakaawaki taraakim mai tinaniku. E na ataia bwa antai ngkoe. E na ata te bwai are ko tangiria.
E na tabekiia ake a nimamanei ao ake a nanorinano.
E na kamarurungia ake aoraki.
Ake a nanokokoraki e na kaoniia n te onimaki ao te ninikoria ni kakoaua.
E na reireiniira ni kauki nanora nakon te Atua ao ni buokiia tabeman.
E na noora ao ni karinea te kokoaua, nanorinano, etieti, kakaonimaki, nanoanga, ao te tangira ae kororaoi.
Man taraakin matana ao ti na bon bitaki. Tina bitaki n aki toki. Tina bitaki man ataakina ni koaua bwa, te Atua e mena ibuakora.
Tera ae Tina Karaoia?26
I iangoi taai aika a nako ma te nanoanga nakon te ataeinimwaane are I mena inanona n au ririki n ikawairake. Ngkana I kona n okira te tai, N na kona ni karaua nanona ao n tuangnga bwa e na teimatoa iaon te kawai ao n ukeuke. Ao N na tuangnga bwa e na kaoa Iesu Kristo inanon maiuna, bwa te Atua e mena ibuakora!
Nakoimi, tariu ao mwaneu aika tangiraki, ao raraou, ao nakoia ni kabane ake a ukoukora te kaeka, te koaua, ao te kakukurei, I angani ngkami te reirei ae aron aei: Teimatoa ukeuke ma te onimaki ao te taotaonakinnano.27
Bubuti, ao kam na karekea. Karebwerebwe, ao e na kaukaki nakoim.28 Onimakina te Uea.29
Inanon maiura ni katoabong bon tibwangara ae kakaawaki ao ara tai ni kakabwaia ni kaitibo ma te Atua.
Ngkai ti katinanikua te kainikatonga ao ni kaniia Ana kaitokanuea ma te nano ae uruaki ao te tamnei ae raraoma,30 E na kaniia riki nakoira.31
Ngkai ti ukoukora n iriira Iesu Kristo ao n nakonako ni kawaia ana reirei, teutana imwiin teutana, e na roko te bong are e na rinanona te bwaintangira ae akea kabotauana ni karekea bwaninin te kimwareirei.
Raou aika tangiraki, Tamami are i Karawa e tangiri ngkami ma te tangira ae kororaoi. E a tia ni kakoaua Ana tangira ni kawai aika a bati, ma iaon aikai ni kabane ngke E anga Natina ae te Rikitemanna bwa te karea ao te bwaintangira nakoia Natina bwa ti na kona n okiriia ara karo ake i karawa e bon koaua.
I kaota au koaua bwa Tamara are i Karawa e maiu, bwa Iesu Kristo e kaira Ana Ekaretia, ao Beretitenti Russell M. Nelson bon Ana burabeti.
I karababa nakoimi au tangira ao au kakabwaia n tain te Itita ae kakukurei aei. Kauki nanomi nakon te Tia Kamaiu ao te Tia Kabooira, n aki tarai aromi, kataakimi, korakaimi, ke kairuami, ko kona n ataia bwa E maiu, bwa E tangiri ngkami, ao anne bon ibukina, ko aki tiku ni maroa.
Te Atua e mena ibuakora.
Ao aei I taekina ao ni kakoaua n aran Iesu Kristo ae tabu, amen.