Kam Na Kainaomataaki
Iesu Kristo bon te oota are ti na tabekiarake rinanon tain roon ara tai ni maiura.
Tariu ao Mwaneu aika tangiraki, I rang kakatonga ngkai e reke au taetae nakoimi mai Aberika. Bon te kakabwaia te rabakau ae boou n taai aikai ao ni kamanena n te kawai ae rangi mwakuri raoi n reitaki ma ngkami ike kam mena iai.
N Tebetembwa 2019 Titita Mutombo ao Ngai, ngkai ti mwakuri bwa taan kairiri n te Maryland Baltimore Mition, e reke ara tai ni kawari taabo ibukin rongorongon te Ekaretia Palmyra, New York, ngke ti ira aia bowi taan kairiri n te mition. Te kabanea n tabo ae ti kawaria bon te Buakonikai ae Tabu. Ara iango ni kawarakin te Buakonikai ae Tabu tiaki bwa ti na karekea te kaotioti ae raka ke ae ti na nooria, ma ti namakinna bwa E mena te Atua n te tabo ae tabu aio. A kaonaki nanora n te kakaitau ibukin te burabeti ae Iotebwa Timiti.
Iaon kawaira n oki, Titita Mutombo e ataia bwa I matangare ngke I tabe n turaiua, ngaia are e titiraki, “Tera bukin kukureim?“
I kaeka,“Au Nathalie ae tangiraki, e tokanikai n taainako te koaua iaon te kairua, ao te roo e aki kona ni waakinako i aonnaba ibukin ana euangkerio Iesu Kristo ae tia ni kaokaki.”
Te Atua te Tama ao Iesu Kristo a kawara Iotebwa Timiti te teei ni uota te oota nakon are karabaaki, ma ngaia are ti na karekea te “ataibwai ibukin bwai n aroia ngkai, …ao ngkekei, ao ngkana a [na riki]“ (Reirei ao Berita aika Tabu 93:24).
Imwiin ae riaon 200 te ririki, a mwaiti aika a kakaei koaua aika kainanoaki bwa aonga ni inaomata man tabeua katei ni kawai ao taian kewe aika e kabuti teuare e buakaka n te aonnaba. A mwaiti aika “a kamatakiaki n aia kamwamwane aomata” (Reirei ao Berita aika Tabu 123:12). N ana Reta nakoia I-Ebeto, Bauro e reirei: “Ko na uti, ngkoe ae ko matu, ao teirake mai buakoia maate, ao E na kaotako Kristo” (I-Ebeto 5:14). E berita te Tia Kamaiu bwa E na riki bwa te ota nakoia n aki toki, nakoia aika ongo Ana taeka (taraa 2 Nibwaai 10:14).
Tenibwi ma nimaua te ririki n nako, au karo ma tinau a kamatakiaki ao a kakorakoraia ni kakae bwa a na ataa te koaua ao a tabeaianga bwa a na kakaea ia. Au karo ma tinau a bungiaki n te kawa, ike katei ni kawai e matoatoa iai ni maiuia aomata ao utu. A uaia ni kitana aia kawa ngke a bon ataei nakon te kaawa ae bubura, ni kakaea te maiu ae raoiroi riki.
A iein ao ni moana aia utu n te aro ae bebete. E kan koro te mwaiti ae waniman n ara auti ae uarereke—au karo ma tinau uoman mwaneu ao Ngai, ao ai tariu ae mamaeka iroura. I iangoia ngkana ngaira raoi kain te utu, bwa ti aki kariaiakaki n amwarake n te taibora ma ara karo ao tinara. Ngkana e oki ara karo man ana mwakuri, ngke e rin n te auti, ti tuangaki bwaa ti na otinako tinaniku. A aki tau ara tairiki, bwa ti aki kona ni maatu bukina bwa akea te inanoi ao te tangira ni koaua n aia mare ara karo ma tinara. E aki tii uarereke mweengara, ma bon te tabo naba ae roo. Imwain kaitibora ma mitinare, ti iriri taromauri aika kakaokoro ni katoa Tabati. E oota raoi bwa ara karo ma tinara a kakaea te bwai teuana ae aki kona n anga te aonaba.
E bon waaki nako aio ni karokoa ti kaitibo ma Unimwane ao Titita Hutchings, taian moan mitinare n taanga ae a weteaki bwa a na nako ni mwakuri i Zaire (e aranaki n te bong aei bwa DR n te Congo ke congo-Kinshasa). Ngke ti moana kaitiboora ma mitinare aika tikiraoi aikai, ae aiaroia anera ake a roko mairoun te Atua. I ataia bwa iai te bitaki n ara utu. Imwiin ara bwabetito, ti a moana rikirakera ni karekea te aeka ni maiu ae boou ibukin te euangkerio ae kaokaki. Ana taeka Kristo e a moanna ni kaota nanora. A moanna ni kangkang iroura, bwa taian koaua ake ti karekei a moanna n oota ao ti kona n noora te oota, ao te ota aei e rikirake n ota ao n ota ni katoa bong.
Ataakina bwa bukin tera te euangkerio e buokira n uarokoira nakon te riki n aiaron te Tia Kamaiu. Buburan mweengara e aki bitaki; ao arora naba ni bobotaki. Ma I kakoaua bitakin nanoia au karo ma tinau ngkana ti tataro ni katoa bong, n te ingabong ao n te tairiki. Ti kamatebwaia Ana Boki Moomon, ti karaoa ara botaki ni utu; ti a riki raoi ngkai bwa te utu. Ni katoa Taabati ti uti n te aoa 6.00 a.m. ni katauraoi n nako n taromauri, ao ti mwananga inanon aoa aika bati ni kaea te Taromauri ni katoa wiiki n akea te ngurengure. Bon te kakukurei noran te waaki ae ti waakinna. Ngaira, ake ti nakonako inanon te roo, ti kakioa nako te roo mai buakora (taraa Reirei ao Beritaa aika Tabu 50 25) ao n noora “te oota ae korakora“ (2 Nibwaai 19:2).
I uringa teuana te bong, ngke I aki kan uti ni moan taai n te ingaabong ibukin ara tataro ni utu, I ngurengure nakoia mwaneu, “Akea riki te bwai ae ti kona ni karaoia n te mweenga aei, tii te tataro, tataro, tataro.” E ongo au taeka tamau. I uringa te bwai ae karaoia, are kaota te tangira ma e matoatoa n reireinai, “Ngkana ko na mena n te auti aio, ko na tataro, tataro, tataro.”
Ana taeka tamau a tang inanon taningau ni katoa bong. Tera ae ti karaoia Ngai ma Titita Mutombo ao natira n te bong aei? Ti tataro, tataro ao n tataro. Aio rikiara.
Te mwaane are bungiaki ni mataki ao ni kamaiuaki iroun Iesu Kristo, imwiin titirakinana irouia kaain rarikina ao taian Bwaritaio, e taku:
“Te mwaane are arana Iesu e karaoa te bokaboka, ao e kabiri matau, ao e taku nakoiu, Nako nakon te nei are Tiroam ao kabururu: ao I nako ao I kabururu ao I a nooraba. …
“… I ataa [te] bwai [teuana] bwa … I bon mataki ngkoa [ao] I a noraaba ngkai” (Ioane 9:11, 25).
Ti bane ni mataki ao ni kona ngkai n nooraba. Te euangkerio ae kaokaki e bita ara utu man te tai anne. Atakina bwa bukin tera n te euangkerio e a tia ni kakabwaiaia te ka tenroro n au utu ao e na reitinako ni kakabwaiaia roro aika mwaaiti aika a na roko.
Iesu Kristo bon te oota are oota inanon te roo. “Ane irai ao e na bon aki nakonako n te ro, ma e na karekea te oota ni kamaiu” (Ioane 8:12).
Ni kaan ni koro teuana te ririki i marenan 2016 ao 2017, aomatan te tabo ae Kasai a kaitara te kanganga ae kakamaaku. Bon te tai ae rotongitong ibukiia aomata bukin te kauntaba i marenaia taan buaka aika kaain te aba ni kawai ao ana taanga te tautaeka. E a butanako te mwakuri n iowaawa n taian kawa i Kansai Central Province nakon ana tabo Kansai ae rababa. A mwaiti aomata aika kitan mweengaia ibukin maiuia ao a karabaiia n te buakonikai. Akea kanaia ao te ran, ke te bwai riki teuana ao ibuakoia uakai bon tabeman membwa n Ana Ekaretia Iesu Kristo ibukiia Aika Itiaki ni Boong aika Kaitira n te aono ae Kananga. Tabeman mai buakoia kaain te Ekaretia a tiringaki irouia tautia.
Tari Honoré Mulumba man te Nganza Uoote i Kananga ao ana utu bon tabeman mai buakoia aomata ake a bon tiku ni karabaia n aia auti, n aki ataia bwa a na nakea bwa te kawai e a karaoaki bwa te tabo ni katii. N te bong teuana tabeman kaain rarikiia aika tan buaka a ataia bwa te Tari Mulumba ao ana utu a mena ikekei, bwa n te tairiki teuana a otinako ni kakaea te uaanikai n aia tabo n aroka te utu bwa kanaia. A roko koraki n tautia nakon mweengaia ao ni katikiia nako ao n tuangiia bwa a na rineia n raoniia tautia ni karaoi aia mwakuri ke a na kamateaki.
Te Tari Mulumba ma te ninikoria e tuangiia, “Ngai kaain Ana Ekaretia Iesu Kristo Ibukiia aika Itiaki ni Boong Aika Kaitira. Au utu ao ngai I a tia ni butimwaea Iesu Kristo ao n iai au onimaaki Irouna. Ti na tiku n kakaonimaki nakon ara berita ao ni kariaia ni mate. “
A tuangia, “Ngkai ko a tia n rinea Iesu Kristo, rabwatami a na kanaki irouia kamea. “ao a berita bwa a na oki. Ma aki manga oki, ao te utu a tiku ikekei inanon uoua namwakaina ao n aki manga nooria riki. Te Tari Mulumba ao ana utu a kawakina ootan aia onimaki bwa e na oota. A uringa aia berita ao a kawakinaki.
Iesu Kristo bon te oota are ti na tabekiarake rinanon tain roon ara tai ni maiura (taraa 3 Nibwaai 18:24). Ngkana ti rineia n rimwiin Kristo, ti rineia bwa ti na bitaki. Te mwane ke te aine ae bitaaki ibukin Kristo e na riki bwaa te kaben iroun Kristo, ao ti na titiraki n aron are tabekia Bauro, “Te Uea, teraa ae ko tangirai bwa N na karaoia?“ (Mwakuri 9:6). Ti na “tou mwiin mwanekana“ (1 Betero 2:21). Ti na “nakonako, n are nakonako iai“ (1 Ioane 2:6). (Taraa Ezra Taft Benson, “Born of God,” Tambuli, Okitobwa 1989, 2, 6.)
I kakoaua bwa E mate, ao taunaki, ao ni manga uti n te kateniua ni bong ao e rierake nako karawa n te aro bwa ngai ao ngkoe ti na karekei kakabwaia aika te aki mamate ao te karietataki. Boni Ngaia “te oota, te maiu, ao te koaua“(Ita 4:12). Boni Ngaia te otanga ao te tia katoka te mangaongao n te aonnaba. Boni Ngaia bannan te tamaroa ibukin te karietataki, are bon Iesu Kristo. N aran Iesu Kristo, amen.