“Nooria! Boni Ngai Atuan Taian Kakai”
Taian kakai, kanikina kamiimi a kaoti ibuakoia taan iriira Iesu Kristo n taai aikai, i nanon maium ao ni maiu.
Tariu ao mwaaneu aika kam tangiraki, I kaitau n te tibwanga ae onoti n tei i matami n te bong aei. I katiteuanaki ma naake a taetae n te maungatabu aei, I kaotioti nakoimi bwa e maiu Iesu Kristo. E kaira Ana Ekaretia; E taetae nakon Ana burabeti Beretitenti Russell M. Nelson, ao E tangiria ni kabane natin Tamara are i Karawa.
N Tabatin te Itita aei ao ti bukamarua Mangautin Iesu Kristo, ara Tia Kamaiu ao te tia Tia Kabooira,1 te Atua ae Korakora, Uean te Rau.2 Ana Mwakuri ni Kamaiu, are e kabwaninaki ni Mangautina imwin tenibong n te tabo ni mate ae tangoaki, e tei bwa te kabanea n rietaata ni kakai n rongorongon te aonaaba. “Bwa Nooria,” E taku, “Ngai te Atua; ao boni Ngai Atuan taian kakai.”3
“A tia n toki kakai ibukina bwa e a tia Kristo n nako karawa, ma n tia n tekateka i angatain te Atua?”4 e titiraki te burabeti ae Moomon n Ana Boki Moomon. E taku, “A tuai; ao a aki toki naba anera ni karaoa te ibuobuoki nakoia natia aomata.”5
Imwin te tauraki n te kaibangaki, e kaoti ana anera te Atua nakon Maria, ao aine tabeman, a roko n te tabo ni mate bwa a na kabira rabwatan Iesu. E taku te anera:
“Kam aera kam ukoukora Teuare e maiu ibuakoia mate?”6
“Akea ikai, bwa E a uti.”7
E taekina te kakai aei te burabeti ae Abinataai n Ana Boki Moomon:
“Ao ngke arona bwa e tuai uti Kristo mai buakoia maate, … a na bon akea te mangauti.
“Ma iai te mangauti, mangaia ae akea ana tokanikai te ruanimate, ao e anaaki kammarakin te mate iroun Kristo.”8
Ana mwakuri ni kakai Iesu Kristo e karika tabekan aia taeka Ana reirei ae kangai: “Antai Teuaei, ngkae E tuangia ang ma te ran ao a ongo i Rouna.”9
Ngke a iriira Iesu Kristo Abotoro ao a ongo ana taeka n tataekina te euangkerio, a noori kakai aika bati. A noria are “a nooraba mataki, ao a nakonako mwauku, a kaitiakaki rebera, ao a ongotaeka taningabono, ao a kautaki mate, ao a reireiaki akana a aki kaubwai n te euangkerio.”10
Taian kakai, kanikina, kamiimi a kaoti ibuakoia taan iriira Iesu Kristo n taai aikai, i nanon maium ao ni maiu. Taian kakai bon mwakuri aika tabu, kanikinaean, ao kaotan mwaakn te Atua ae akea tiana ao te kakoaua bwa bon titebo Ngaia “ngkoananoa, ngkai, ao n aki toki.”11 Iesu Kristo, are bong ngaia ae karika taari, e kona n raoi irouna; Teuare e anga te noraba nakoia mataki e kona ni kaira ara taratara nako karawa; Teuare e kaitiakiia rebera e kona ni katoki aorakira; Teuare e kamaiua te aomata are e aki konamaki e kona ni weteira bwa ti na teirake n ana taeka ae “Nakomai, iriirai.”12
E mwaiti iroumi ae a tia n noori kakai, riaon are kam kantaningai. Tao a na bae n taraa n uarereke ngkana a kabotauaki ma kateirakean te mate iroun Iesu. Ma buburana e aki kaokoroa te kakai, bwa e roko tii mairoun te Atua. A taku tabeman bwa baika a bon manennanti ke te katekeraoi. Ma e kabukakaia Nibwaai naake a “kaakea mwaakan ma ana kakai te Atua, ao a kamoamoaia n aron oin wanawanaia ma rabakauia, bwa aonga ni kareke mwane ma ni karawawataia aika a kainnano .”13
A reke taian kakai man te mwaaka ae tabu iroun Teuare “mwaaka ni kamaiu.”14 Taian kakai bon kanoan ana babaire ae akea tokina te Atua; taian kakai bon toman karawa ma aonaba.
N te tai teuana ao ti mwananga Ngai ao Titita Rasband nako Goshen, Utah, ibukin te bwabwaro ae te Itaramata are e na karaoaki n te kanakobwanaa nakoia e raka iaon 600,000 aomata n 16 taetae aika kakaokoro.15 E na boboto te burokuraem aei iaon Kaokan ana euangkerio Iesu Kristo, ma titiraki ake a roko mairouia kairake n ikawai man mwakoron nako te aonaaba. Ngai ao Titita Rasband, ti tarai titiraki aikai; a anganira te kona ni kaota ara koaua iroun Iotebwa Timiti bwa bon ana burabeti te Atua, mwaakan karekean te kaotioti i nanon maiura, reitinakon Kaokakin ana euangkerio Iesu Kristo, ao koaua ma tuua ake a kakaawaki iroura. E mwaiti ae a ongora ngkai ae kaain te bootaki anne.
Te babaire bwa e na waaki te kaongora man te Buakonikai ae tabu i Nu Ioki, ike e kakoaua iai Iotebwa Timiti ni kangai: “I nooria uoman Aomata, are a bon kangaanga kabwarabwaraan raneaneaia ao mimitongiia irou, man tei i etau inanon te akea. Temanna mai ibuakoia e taetae nakoiu, ni weteai n arau ao n taku, ni kotea are temanna—Natiu ae Tangiraki Teuaei. Ongo Irouna!”16 Anne, taria ao mwaneia, bon te kakai.
Ti a kairoroaki n te butinaoraki are taonaki iai te aonaba bwa ti na karaoa te kaongora i Goshen, Utah, are e a tia Ana Ekaretia Iesu Kristo ibukiia Aika Itiaki ni Boong aika Kaitira, ni manga karaoa, ibukin te rawerawe, mwakoron Ierutarem ae ngkoa. Ngai ao titita Rasband ti nako Goshen bon tabeua te maire n tairikin te Tabati anne ike ti nora iai te bubu ae matenten ae kaoti man te tabo are ti na nako iai. E korakora te urarake n te tabo anne, ao ti raraoma bwa tokina e na rotaki te kaongora. Ao te bwai ae riki, uabwi te miniti nakon onoua, are bon tain te kaongora, e mate te iti n te tabo anne. E mate te iti! Akea naba te kaongora. Ngkanne iai teuana te tianaraita are a taku tabeman bwa e kona ni buoka aei, ma akea raoi te koaua bwa e kona ni kamaeui bwai ni mwakuri n te tai anne.
Ngaira ake kaain te burokuraem aei, taan karaki, taan anene, ao taan mwakuri, ao 20 kairake ni ikawai man ara utu—a bane nanoia n te kaongora are e kantaningaaki. I kararoai man ranin mataia ao mangaongaoia ao I butiia te Atua bwa e na karokoa te kakai. “Tamau are i Kawara,” I waaki n tataro, “I aki babati n bubutiko ibukin te kakai, ma n te tai aei I butiko. E riai ni waaki te kaongora aei ibukiia ara kairake n ikawai n mwakoron nako te aonaba. Ti kainnanoa maiun te iti ngkana arona bwa Nanom.”
Itiua te miniti imwin onoua, n aron are e tia ni mate te iti, e a manga maiu. A mwakuri bwaai ni mwakuri, te katangitang ao bwaai n taetae ao tamnei ao baike a kainnanoaki ibukin te kaongora. Ao ti a waekoa n waaki. Aio bon te kakai.
Ngke ti oki rikaaki Ngai ao Titita Rasband n ara kaa n te tairiki anne, E roko aia rongorongo Beretitenti ao Titita Nelson: “Ron, ti tangiria bwa kam na ataia ae ngke ti ongo bwa e mate te iti, ti tataro bwa e na riki te kakai.”
E koreaki ae kangai ni koroboki aika tabu: “Bwa Ngai, te Uea, I a tia n arora baiu ni kaota mwaakan karawa; kam aki kona n nooria ngkai, ma n te tai ae aki maan ao kam na nooria, ao n ataia bwa boni Ngai, ao are N na bon roko ao n tautaeka ma au aomata.”17
Aei raoi te bwai ae riki. E a tia N arora Baina ao e maiu te iti.
Taian kakai a makuri rinanon mwaakan te onimaki, ngke Beretitenti Nelson e reireiniira mwaakaroiroin te reirei n te kabanea n tetere. E reirei te burabeti Moronaai nakoia aomata, “Bwa ngkana akea te onimaki i buakoia natiia aomata ao te Atua e bon aki kona ni karaoa te kakai teuana i buakoia; ngaia are, e bon aki kaotia ni karokoa moa ae a tia n onimaki.”
E reitinako:
“Nooria, bon aia onimaki Aramwa ma Amureki are e karika bwakan te nne ni kaikain nako aontano.
“Nooria, bon ana onimaki Nibwaai ma Riaai are e karika te bitaki nakoia Reimwanaite, are a bwabetitoaki n te ai ma te Tamnei ae Raoiroi.
Nooria, bon ana onimaki Amon ma tarina are e karika te kakai ae korakora i buakoia Reimwanaite. …
“Ao bon akea temanna n te tai teuana ae e a tia ni karaoa te kakai ni karokoa moa mwiin aia onimaki; ngaia are a kakoaua moa Natin te Atua.”18
I kona n reiti kibu aikai, “Bon aia onimaki kairake n ikawai ake iai tibwangaia, taan mwakuri, taan kaiiri ao kaain te Ekaretia, te Abotoro, ao ana burabeti te Atua are e ukora te kakai ae korakora n te aro are e a manga maiu te iti n te tabo ni kaongora i Goshen, Utah.”
A kona n roko kakai bwa kaekan te tataro. Tiaki n ae a bon roroko naba nakon are ti kantaningai, ma ngkana ti onimakina te Uea, E na buokiko, ao E na bon eti. E na kangaraoi kakai nakon baike ti kainnanoi.
E kariki kakai te Uea n kauringira mwaakana, Ana tangira ibukira, Baina mai karawa nakon ara waaki n te maiu aei, ao Nanona n reireira baike a rangi ni kakaawaki. “Ane iai ana onimaki irou bwa e na kamaiuaki,” E tuangiia Aomata aika Itiaki i nanon 1831, ao e tei te berita anne ni karokoa te bong aei, “ao e tuai roko ana tai ni mate, e na kamaiuaki.”19 Iai tuua ake a kateaki i karawa, ao ti riai nako iai n tainako.
Iai taai are ti kataninga te kakai bwa e na kamaiuaki temanna ae ti tangiria ni kaitara te mwakuri ae aki riai, ke nakon kamaraua nanon ane e korakai man tiotionako. Ngkana ti tarai bwaai ni matara n aomata, ti tangiria bwa e na rinnako te Uea, ni karaoa te uruaki. Man n te onimaki, e na kaoti te kakai, e ngae ngke tao tiaki n te tai ke te kaeka are ti tangiria. Nanona e memere ara kakaonimaki ke tao tiaki tau nakon Ana ibuobuoki? Bon tiaki. Ti tangiraki iroun te Uea. E anga maiuna ibukira, ao e teimatoa Ana Mwakuri ni Kamaiu ni kanakoi rawaawatara ma burera ngkae ti rairannano ao ti kaania.
E a tia te Uea ni kauringira, “Ao tiaki naba arou nako aromi nako.”20 E taku, “Nakomai nakoiu, ngkami ake kam kua ao kam rawawata, ao N na motiki rawami”21—motirawa man te nanououa, bwarannano, maaku, aki ongotaeka, tabeaianga ibukin tangiraia rao, ibukin buaia ke mii aika aki koronanoia. Te rau ibuakon te mangaongao ao te rawaawata bon te kakai. Uringa ana taeka te Uea: “I aki tuangko te rau n am iango ni kaineti ma aio? Tera riki te kakoaua ae e korakora ae e na reke iroum nakon are mai iroun te Atua?”22 Te kakai bwa Iesu, are Iehova ae Kakanato, Natin Teuare Moan te Rietata, e kaeka ma te rau.
N aron are E kaoti nakon Maria n te onaroka, e weteia n arana, E weteira bwa ti na kammwakura ara onimaki. E ukeuke Maria bwa e na beku I rouna ao n tabeakinna. Mangautina bon tiaki te bwai ae kantaningaia, bwa e bon booraoi ma are n te babaire ni kakukurei.
“Ruo rikaaki man te kaibangaki,”23 a wanigareia naake aki kakoaua i Kaewarii. E kona ni karaoa te kakai anne. Ma E ataa te moan ma te toki, ao nanona bwa e na kakaonimaki nakon Ana babaire Tamana are i Karawa. E riai n aki bua iroura te banna anne.
E a tia n tuangira i nanon ara tai n rawaawata, “Noori taian ikoaki aika i rarikiu, ao mwiin naba taian neera i baiu ma waeu; kakaonimaki, kawakin au tua, ao kam na abaaba n abanuean karawa.”24 Anne, tariu ma mwaaneu, bon te kakai are e berita nakoira ni kabane.
N Tabatin te Itita aei, ngkai ti bukamarua te kakai n Mangautin te Uea, ngkai ngai Ana Abotoro Iesu Kristo I katuka iaomi bwa kam na namakina mwaakan te Tia Kabooira i nanon maium. Ao e na kaekaki am tabeka nakon Tamara are i Karawa ma te tangira ao te motinano are kaotia Iesu Kristo i nanon Ana waaaki ni mwakuri. I tataro bwa kam na tei n nene man kakaonimaki imwaain baike a na roko. Ao N na kakabwaiai ngkami bwa kakai a na roko iroum n aron are ti rinanona i Ghosen—ngkana bon nanon te Uea. Taratarai kakabwaia mai ieta i nanon maium ngkai ko “ukoukora Iesu aio ake a korea rongorongona burabeti ma abotoro, bwa e aonga n ae ana akoi te Atua te Tama, ao te Uea naba ae Iesu Kristo, ao te Tamnei ae Raoiroi, are a kakoaua ibukiia, a na iai ao n tiku iroumi n aki toki.”25 N aran Iesu Kristo, amen.