Aio Ara Tai!
E a tia ni kanakomaira ikai te Atua, n te tai aei, inanon rongorongon te aonaaba.
N te 1978, I tei inanon te marae ni butibooro n te tabo ni mataku ae onrake n 65,000 taan mataku. I matau bon taan kaaitara aika mwaiti are taraana a tangiria ni kamaunaai. Bon au moan takakaro n riki bwa te tia totoko mai buki n te Nuka ibukin te National Football League, ao ti takakaro n te tai aio n Super Bowl champions. N taekinna ma te koaua, I titiraki bwa I a tau ke I tuai n roko n te tabo aei. I a kerikaki nakon au tai ni kare, ao ngke I karenako te boro, I a rawata riki n oreaki nakon are I a tia n ororeaki mai mwaina. N te tai anne, I wene i nano i aaia taan takakaro aika rawawata, I mimi bwa tera ae I karaoia ikekei. E a reke au iango. N a kariaia au nanououa bwa a na konaai, ke Na kunea te ninikoria ao te korakora ni waki ao n reitia nako?
Associated Press
I aki ataia n te tai anne bwa e na kanga te taneiai anne ni katauraoai ibukin taai aika a na roko. I kainnanoa te reiakinaki bwa N na kona ni korakora ao n onimakinai ni kaitarai aaro aika kangaanga.
Te takakaro ae te butibooro tao e na aki rangi ni bonganana n aekan taian kangaanga ake ko na kaitarai. N angiin taian keiti, a na akea te tabo ni mataku ae na on irouia taan mataku. Ma korakoran am babaire a na iai mwiina ae kakawaki ae akea okina.
Tao ti aki toki n namakinna n taainako ae ti aki tau nakon te kakaewenako. Ma Tamara are i Karawa e nooriira bwa taan katea Ueana ae aki mamaaku. Ngaia anne bukin ae E kanakomaira inanon te babaire aei n rongorongon te aonaaba. Aio Ara Tai!
Kakauongo nakon are e a tibwa tia n atongnga Beretitenti Russel M. Nelson imwin rikina bwa te Beretitenti n te Ekaretia:“ Ara Tia Kamaiu ao te Tia Kabooi maiura Iesu Kristo e na karaoi tabeua ana mwakuri aika korakora imarenan ngkai ao ngkana E a manga oki. Ti na mimi n noori kanikina are te Atua te Tama ao Natina, Iesu Kristo, a tararua te Ekaretia inanon te rietata ao te mimitong” (Revelation for the Church Revelation for Our Lives,“ Riaona, Meei 2018, 96).
Te Kabanea ni korakora ni Mwakuri? Kanikinaean kamimi? E na kangaa aron tarakin anne? Tera Ae Ti na Riai Ni Karaoia, Ngkana Tiaki Ata Te Bwai Ae Tina Karaoia? I aki atai ni kabane kaekaia, ma I ataia bwa te Uea e kainnanoira bwa ti na tauraoi! Kamwakuran te nakoanibonga ma te kororaoi e tuai ataaki kakawakina.
Ti kakoaua Ana burabeti te Atua? Ti kona ni kunea ao ni kakoroa bukin ara kantaninga? Eng, ti kona, ao eng ti riai, ibukina bwa aio ara tai!
Ngkana ti ongo rongorongoia Ana toro te Atua aika korakora ake a roko imwaira—n aekan Moote, Maria, Moronaai, Aramwa, Ita, Iotebwa ao a mwaiti riki—a taraa n rangi ni korakora nakon te maiu. Ma tiaki ngaia anne ae a kaokoro ma ngaira. Bon aomata n aekara are a kaitara ma kangaanga. A kakoaua te Uea. A karaoa te rinerine ae eti n taai aika riai. Ao, ma te onimaki inanon Iesu Kristo, a karaoa te mwakuri are tangiraki n aia tai.
Goodsalt
Iangoa te tia ninikoria are Iotua n te O Tetemanti. Bon te tia ririmwin Moote ae anga nanona, temanna te tia kairiiri ae korakora n rongorongona. Imwin nakon Moote, bon ana tai Iotua. E kairiia tibun Iteraera nakon te aba ni berita. E kanga ni karaoa anne? Iotua e bungiaki ao ni ikawai inanon te tauronaki i Aikubita. Akea ana aenboki ke tamnei ni kairiri n te video ni buokia. Bon akea naba ana tareboon! Ma iai te berita aio irouna mairoun te Uea:
“Ngke ngai Moote, N na airi ma ngaia N na aki kaakia, ao N na bon aki kitanna.
“Ko na marurung man korakora” (Iotua 1:5–6).
Ngke I boou ao te Kaitingaun ae aki tataneiai, I karekea weteau n te tareboon ae katawe man Aobitin te Moan Beretitentii, ni butiaki ngkana N na onea mwiin te burabeti ni kawara te ataeinimwane n te onaoraki—n te tai ae waekoa. Aran te ataeinimwane bon Zach. E tabe ni katauraoia bwa e na riki bwa te mitinare ma e reke n te kabuanibwai ao e kakaiaki ikoakin atuna.
Ngke I turaiwa nakon te onaoraki, e biriaitua au iango. Ana mwakuri te burabeti—ko manikangare? Tera ae N na kaitara ma ngaia? N na kanga ni buoka te ataeinimwane aio? E tau au onimaki? Te tataro nako iai ao te ataia bwa iai irou te kariaiakaki n te nakoanibonga ae tabu e riki bwa kamatoakiu.
Ngke I roko, Zach e wene ni kainiwenen te onaoraki. Te oteri e tei n tauraoi ni kookia nakon nakon te ruu ni korokoro n te aro bwa taokita a kona ni katoka te maraki ni kaburorona. I taraa te tina ae tang ao te rao ae ataei n tei irarikina, ao I ataia raoi bwa Zach e kainnanoa ana kakabwaia te nakoanibonga. Raona e a tia ni karekea te Nakoanibonga ae te Merekitereka, ma ngaia are I butiia bwa e na katoaai. I namakina mwaakan te nakoanibonga ngke ti angan Zach te kakabwaia. Ngkanne e uotaki nako ni waetata ibukin te korokoro, ao n te namakin ae rau e kamatoa bwa te Tia Kamaiu E na karaoi bwaai nakon Rabakauna.
Taian titaabu a karaoa aia kabanea ni kataratara imwain te korokoro. A kunea, bwa inanon mimiia akea te korokoro ae e kainnanoaki.
Imwiin bwain aoraki aika bati, Zach e a reirei n nakonako ao ni manga taetae. E a tia ni karaoa ana mwakuri ni mitinare ao ngkai e a katea ana utu.
Ni koauana, tiaki nanona anne ma e marurung man ana kakabwaia te nakoanibonga. I a tia n anga kakabwaia n te nakoanibonga n te onimaki ae titearona, ao te Uea e aki kariaia te kamarurungaki ni maiuna. Ti kakoaua Ana kantaninga ao ni katuka mwiina Nakoina. Ti aki kona n taainako n rinea otinakon mwiin ara mwakuri, ma ti kona n rinea te tauraoi ni mwakuri.
Tao kam na bon aki kona n tuangaki man te Moan Beretitentii bwa kam na onoi mwia n tain te kangaanga n te maiu. Ma ti bane ni weteaki nakon karaoan bwaai ni bitakin te maiu ngkai ti tei ibukin te Uea. E na bon aki kitaniira. Aio Ara Tai!
Betero, ana mataniwi n Abotoro te Tia Kamaiu, e mena iaon te booti ae rinanon te buaka ngke e nora Iesu n nakonako iaon te ran. E tangiria ni kan Kawaria, ao E taku nakoina te Tia Kamaiu,“Nakomai.” N te aro n ninikoria ao n te kakai, Betero e kitana kamanoana n te booti ao e moana nakonakona nakon te Tia Kamaiu. Ma ngke e kabotoa ana iango Betero iaon te ang ae baibati, ao e e bwaka ana onimaki. “E maaku, ao ngke e a tiba moan inako, ao e takarua, ni kangai te Uea ko na kamaiuai. Ao n te tai ae waekoa Iesu E arora baina, n taua.” (Taraa Mataio 14:22–33)
Ngkana a roko kangaanga ni maiura, e nga ae ti na taraia? Uringnga iai n taainako teuana te buoka ae onimakina ibukin te korakora ao te ninikoria. Bain Iesu e takin nakoira, n aron are takinaaki nakon Betero. Ngkana ti Kawaria, E na kamaiura. Ana bwai ngaira. E taku, “Tai maku ba I kamaiuko, I weweteiko n aram bon au aomata ngkoe”(Itaia 43:1). E na rimoa inanon maium ngkana ko Karinna. Te rinerine e nakoim. (Taraa Russell M. Nelson, “Karika te Atua Bwa Boton Ara Iango,” Riaona, Nob. 2020, 92–95.)
N tokin te maiu aei,“ e onnon Iotua nakoia ana aomata, “kam na rinea ae kam na toro i rouna;… ao ngai ma kaini batau, ti na toro i roun te Uea” (Iotua 24:15). Bukin ana rinerine aika e karaoi ni beku ibukin te Uea, e riki Iotua bwa te tia kairiri ae korakora n ana tai. Raraou aika tangiraki, aio ara tai! Ao ara rinerine a na bairea kawaira (taraa Thomas S.Monson, “Decisions Determine Destiny” [Brigham Young University fireside, Nov. 6, 2005], speeches.byu.edu).
Ngke I tabe ni mwakuri bwa te bitiobi, iai ara motoo n ara uoote: Rinerine aika raraoi e booraoi ma te kukurei—n akea tokina. Kairake a rirarikiu n te mwaneaba ni kangai, “Bitiobi I tabe ni karaoa au rinerine aika raoiroi!” Anne taben te bitiobi!
Tera ae ti nanonna n rinerine aika raraoi”? “Temanna ngkoa,e titirakina Iesu, “Tera te tua ae korakora i buakon taian tua?” E kaeka:
“Ko na tangira Iehova ae Atuam n nanom ni kabanea, ao n tamneim ni kabanea, ao ni wanawanam ni kabanea.
“Moa te tua aei ao e korakora.
“Ao ai aron naba are te kauoua, are e kangai, Ko na tangira raom n ai aron tangiram i bon i roum” (Mataio 22:37–39).
I aki atai aromi, ma ngke I wareki tuua aika uoua aikai, I kunea te kateniua, n tua ae karabaaki: ko na tangiriko.
Ko a tia ni iangoia bwa ko na tangiriko n ai aron te tua? Ti kona n tangira te Atua ni koaua ao n tangiriia Natina ngkana ti aki tangirira?
Te tia kairiri ae wanawana e reireina te aomata ae kataia n tokanikai n ririki ake e kabanei ni karaoan ana rinerine aika a bubuaka man uruana aron maiuna. E bwakaraki n te maamaa ao n nanououa bwa akea ae na tangiria.
E taku ana tia kairiri, “E ataiko te Uea, e tangiriko, ao e rang kukurei [ma] ngkoe ao te kawai ae ninikoria ake ko touii.” Ma e a manga taku, “[Ko] kan ongo te tua are ko na tangiriko n te aro bwa ko kan namakina tangiran te [Atua] bwa ko aonga n tangiria tabeman.”
Ngke e ongo tarina te reirei aio, e nora te maiu ni maata aika boou . E taku imwiina, “I a tia ni kabanea maiu ni kataia ni kakaea te rau ao te mwannanoaki. I a tia ni kataia ni kakaei bwaai aikai n taabo aika kaairua. Tii n tangiran Tamara are i Karawa ao te Tia Kamaiu are I kunea iai te raunnano. I ataia bwa a tangirai bwa N na tangirai, bon tii ngaia raoi te kawai are I kona n namakina Aia tangira ibukiu.”
Tamara ae i Karawa e tangirira bwa ti na tangirira—n aki kainikatonga ke n tinanikubeka, ma ti na noorira n te aro are E noorira: bwa Natina aika mwananoaki. Ngkana te koaua aio e rinnako inanom, e na rikirake am tangira ibukin te Atua. Ngkana ko karineko ma te karinerine ae kororaoi, Atua, a uki nanora ni kan karaoa anne naba nakoia tabeman. Mwaitin ataakin bonganara ae mai iroun te Atua, e na nakoraoi riki ara atatai n te koaua aei: are te Atua are e tia ni kanakomaira, ngkai, n te tai ae moan te tamaroa inanon rongorongon te aonaaba, n te aro bwa ti na kona ni karaoa te kabanea n tamaroa ma tarena ao bwaintangira aika a reke iroura. Aio Ara Tai! (Taraa Russel M. Nelson, “Becoming True Millennials” [worldwide devotional for young adults, Jan. 10, 2016], ,broadcasts.ChurchofJesusChrist.org.)
Iotebwa Timiti e reirei bwa burabeti ni kabane, n aia ririki nako, “a kantaninga ma onraken te kukurei ni kantaninga nakon te bong are ti maiu iai; … a anene ao ni korea taekana man taetae ni burabetia ara bong aei; … ngaira aomata are tatangiria te Atua ake [rineia] bwa a na uota taekan mimitongin boong aikai” (Teachings of Presidents of the Church: Joseph Smith [2007], 186).
Ngkana ko kaitarai kangaanga ni katoa bong, uringa te kakoaua are anga Unimwane Jeffrey R. Holland:“Ma e mwaiti tabera, ma a na riki ni mimitong man nakoraoi karaoakiia. … Te tokanikai n te kabanea ni kaboo aio e a tia ni katanoataaki. Te tokanikai e a tia n tauaki mwiina inanon taian boki… ,booki aika tabu!” (“Be Not Afraid, Only Believe” [address to Church Educational System religious educators, Feb. 6, 2015], broadcasts.ChurchofJesusChrist.org).
N tain te wikente n te Itita ae tamaroa aei, I kaoi ngkami bwa ti na kaai n tataro ao n kakorakoraira bwa ti aonga n tau raoi ibukin mimitongina n te boong are e na roko iai ara Tia Kamaiu. E tangirira te Tia Kamaiu nakon ae ti ataia, ao E na kaekai ara tataro! Ao bwa ngkana ti mena iaon te marae ni butibooro, inanon te onaoraki ke n oin mweengara, ti kona n riki bwa te mwakoro ae bongana nako iai—bwa aio ara ta! N aran Iesu Kristo, amen.