E na Oneaki Nanokawakira bwa Kakatongara
I kaoia ni kabane ake a namakina te rawawata, ni kabane ake a titiraki bwa tera ae e na riki imwina ngkana ti mate, bwa kam na onimakina Kristo.
Tabeua te ririki n nako, ngke I ira te boowi n te Salt Lake City, I butimwaeaki iroun ara burabeti ae tangiraki, Russell M. Nelson. N arona n akoi are e tataneiai iai ao ana kawai, e titiraki, “Mark, e uara tinam?”
I tuangnga bwa I a tia n raonna mai imwaina n te wiiki anne ni mweengana i New Zealand ao e a bon rikirake ni kara ma e onrake n te onimaki ao te kaunganano nakoia ake a kina.
Imwiina E taku, “Taiaoka n anganna au tangira … ao tuangnga bwa I ingainga ni manga kaitibo ma ngaia.”
I bon kubanako ao I titiraki, “Iai mwanangam ae ko baireia nako New Zealand n te tai ae kimototo?”
E kaeka ma te nano n akoi ae kokoaua, “O I aki, N na kaitibo ma ngaia n te maiu ae e na roko.”
Akea te bwai ae e raka n ana kaeka. Bon kaotan te namakin ae ririki ae kororaoi ae eti. Inanon te tai ae onoti anne, te tai ae aki iangoaki, I ongo ao I namakina te kakoaua ae itiaki mairoun te burabeti ae maiu bwa te maiu e reitinako imwiin te mate.
N te wiikente ni maungatabu aei, kam na ongo mairouia abotoro aika a maiu ao burabeti ni kakoaua Mangautin Iesu Kristo. “Aan te koaua n reirein ara aro bon aia kakoaua Abotoro ao Burabeti, ibukin Iesu Kristo bwa E mate, e taunaki, ao e manga uti n te kateniua ni bong[;] ao e waerake nako karawa, … ao bwaai ni kabane ake a irekereke ma ara aro bon ti bwaai aika a katan nakon te [koaua aei].”1 I berita bwa ngkai ko kakauongo ma nanom ni koaua, te Tamnei e na kamatoa n am iango ao inanom koauan kakoaua aikai.2
Ana abotoro Iesu ake ngkoa a bitaki n aki toki imwiin kaotina nakoia imwiin matena. Tengaun ma ibuakoia a nooria i mataia bwa E a tia n uti man te mate. Tooma, ngke ti ngaia ae akea, e tua, “Ngkana I aki noori … I bon aki kakoaua.”3 Imwiina Iesu e kauringa Tooma: “Tai rawa n onimaki, ma ko na onimaki.”4 Imwiina te Uea e reirei te tibwanga ae kakaawaki n te onimaki: “A a kabaia akana a onimaki ngkana a tuai noorai, ao a kakoaua”5
Te Uea are e a tia ni manga kautaki e anganiia Ana abotoro tibwangaia bwa a na kakoaua ibukina. N aroia ara Abotoro aika a maiu n te bong aei, a katikui nakoaia n te aonaaba ao a kabanei nikiran bongin maiuia ma te ninikoria n tataekinna bwa te Atua e a tia ni kauta Iesu aei. Korakoran aia kakoaua e kairiia ngaa ma ngaa ake a butimwaea te kakao bwa a na bwabetitoaki.6
Te rongorongo ae mimitong n ingabongin te Itita e boboto nakoia Kiritian ni kabane. Iesu Kristo e a tia n uti man te mate, ao ibukin aei, ngaira naba tina manga maiu imwiin matera. Te atatai aei e anga nanon ao te kantaninga nakon maiura. Ngkana ti waakinako inanon te onimaki, ti na bitaki n aki toki, n aroia Abotoro ake ngkoa. Ngaira, n ai aroia, ti na kona n teimatoa inanon te kangaanga ma onimakinan Iesu Kristo. Te onimaki aei e anganiira naba te kantaninga ibukin te tai ngkana “a na oneaki nanokawakira bwa kakatongara.”7
Au onimaki e a tia ni waaki imwiin te tai n rawawata.
Tamau ao tinau bon taan kawakin tiibu i New Zealand.8 A kukurei ni maiuia. Ngke a taanga ni kairake, a kakabwaiaki irouia natiia teniman ataeinnaine aika uarereke. Te kabanea n uarereke arana Ann. N te bong teuana n tain te motirawa a ikotaki n te karaanga, Ann ae 17 namwakaina e touanako kawaina. Imwiin tabeua te miniti n aia raraoma ni kakaenako, e a kuneaki ni mate inanon te ran.
Te kabuanibwai aei e karika te rawawata ae aki kona n taekinaki. Tamau e koroboki ririki ake imwiina bwa mwiin maten natiia ao e kangaanga bwa a na ngare ke ni karekea te kukurei. E karekea naba kan ataakin te kaeka nakon te titiraki ae moan te kakaawaki n te maiu: “Tera ae e na kona n reke nakon Ann ae bati n tangiraki? Tina kona ni manga nooria? E na kanga ara utu ni manga kukurei teuana riki te tai?
Tabeua te ririki imwiin te kabuanibwai aei, uoman kairake ni mitinare man ana Ekaretia Iesu Kristo ibukiia Aika Itiaki ni Boong aika Kaitira a roko n ara oo ni man. A waaki n angareirei iaon koaua ake a reke n Ana Boki Moomon ao te Baibara. Koaua aikai a raona kamatoakin te koaua bwa Ann n te tai aei e maiu n te aonaaba n tamnei. Ibukin Mangautin Iesu Kristo, ngaia naba e na mangauti. A reirei bwa Ana Ekaretia Iesu Kristo e a tia ni manga kaokaki nako aon te aba ma te burabeti ae maiu ao abotoro ake tengaun ma uoman. Ao a reirei te reirei ae onoti man kakukurei bwa utu a kona ni kabaeaki n aki toki man te kariaia n te nakoanibonga ae ai aron are e anga Iesu Kristo nakon Ana mataniwi n Abotoro, Betero.9
Tinau e waekoa ni kina te koaua ao ni karekea ana kakoaua te Tamnei. Tamau, e ngae n anne, e inimaki ni karaoa ana babaire ibukin te ririki are imwiina imarenan te nanokokoraki ao ana wirikiriki te Tamnei. E bon rawa naba, ni bita aron maiuna. Te ingabong teuana imwiin te tairiki n aki mamatu, ngkai e ririaki n te ruu ae uarereke, e rairaki nakon Tinau man taku, “N na bon bwabetitoaki n te bong aei ke N na bon aki.”
Tinau e tuangiia mitinare te bwai are e riki, ao a waekoa ni kina ana onimaki tamau ae kaanga te taura are e na otanako ke e na mate.
Bon inanon te ingabong anne ara utu a mwananga nakon te bike ae uakaan. N aki ata te bwai ae riki, ngaira ataei ti bikiniki iaon te tano ae katabuki ngkai mitinare aika Boyd Green ao Gary Sheffield a kairiia au karo nako taari ao a bwabetitoiia. Ni karaka riki te mwakuri n onimaki, Tamau e motinnanoia ibon irouna nakon te Uea bwa n aki tabe ma tera ae riki, e na bon kokoaua inanon maiuna ni kabane nakon ana berita ake e karaoi.
Teuana te ririki imwiina te tembora e katabuaki i Hamilton, New Zealand. Tabeua te tai imwiina ara utu, ma temanna are e tei ibukin Ann, ti katorobubua ni katobibia te bao ni karea inanon ana auti ae tabu te Uea. Ikekei, man te kariaia n te nakoanibonga, ti a katiteuanaaki bwa te utu ae akea tokina n te otenanti ae beebete man tikiraoi. Aio are e uota te rau ae korakora ao te kimwareirei.
Ririki ake imwiina Tamau e tuangai bwa n akean te kabuanibwai are e riki nakon Ann, e na bon aki kona n nanorinano ni butimwaea te euangkerio are e kaokaki. E ngae n anne Tamnein te Uea e teimatoa ni karekea te kantaninga are a reirei iai mitinare bwa e bon koaua. Aia onimaki au karo e reitinako n rikirake ni karokoa e kaura korakora aia koaua ni kaota ao ni kaira te kawai are e karaurau man nanorinano ni kairi aia baire inanon mauia.
I kakaitau n tainako ibukin aia banna ni katoto au karo nakoia aia kariki n taai aika a na roko. E bon kangaanga bwa kona wareki mwaitin bitaki n te maiu n aki toki ibukin aia mwakuri n onimaki ni kaeka nakon te karawawata ae korakora.
I kaoia ni kabane ake a namakina te rawawata, ni kabane ake iai aia kangaanga ma te nanokokoraki, ni kabane ake a titiraki bwa tera ae e na riki imwina ngkana ti mate, bwa kam na onimakina Kristo. I berita bwa ngkana iai nanom ni kakoaua, ngkanne waaki inanon te onimaki ao iriira ana wirikiriki te Tamnei, ko na karekea te kimwareirei n te maiu aei ao n te maiu ae e na roko.
Ai korakorara ingaingau nakon te bong are N na kaitibo iai ma mwaneu ae Ann. I ingainga nakon te manga ikotaki ae kakukurei ma tamau, are e a tia ni mate 30 te ririki n nako. I kakoaua n te kimwarerei are e reke ni maiuakinan te onimaki, ni kakoaua n akea noorakina, ma ataakina man mwaakan te Tamnei ae Raoiroi bwa Iesu Kristo e maiu. Ma nanou ao tamneiu ni kabane, I rineia bwa N na iriira Iesu Kristo ao ana euangkerio are e a tia ni kaokaki. Aio are e kakabwaia aron nako maiu. I ataia bwa Iesu Kristo, Natin te Atua, ara Tia Kamaiu ao te Tia Kabooira. N aran Iesu Kristo, amen.