Tt kakabwaiaki n Arania
Oin karekean te nakoanibonga bon anganakira te kona ni kakabwaiaia aomata ibukin te Uea, ni karaoa aei n Arana.2
Tariu aika kam tangiraki, tooro aika raou n ana nakoanibonga te Atua, bon te tibwanga ae onoti nakoiu bwa a na taetae nakoimi n te tairiki aei. E korakora au karinerine ma au kakaitau ibukimi. Ngkana I marooro ma ngkami ao n ongora rongorongon ami onimaki, bon au koaua bwa e rikirake korakoran te nakoanibonga n te aonaba, ao kaain te kooram aika matoatoa ao taan taua te nakoanibonga aika kakaonimaki.
I nanon tabeua te tai n te tairiki aei, N na taetae nakomi ake kam kan katamaroa riki aron ami mwakuri n te nakoanibonga. Kam ataa te mwioko are kam riai ni kakaonimaki nakon tibwangami ni beku.1 Ma tao ko na bon titiraki bwa tera nanon ae ko na kamwakura nakoam aei nakoim.
N na waaki mai irouia riikan aika boou ibukina bwa ngaia tenaan kabanea n raraoma bwa tera nanon te kakaonimaki nakon tibwangaia n te nakoanibonga. Ngkami unimwaane ake kam a tibwa katabuaki e manena aei nakoimi. AoeE na ibuobuoki naba nakon te bitiobi ae boou.
E raoiroi bwa n na tarai bong ngke te riikan ngai. Aikai baika I tangiria ngkanne bwa N na kaman atai. Tao e na bon ibuobuoki n tibwangau n te nakoanibonga ake a tia n reke irou mangkekei—n reitaki ma ake I karekei ni bong aikai.
I katabuaki bwa te riikan ngai n te mwaanga ae uarereke n te aro are bon tii ngai te riikan ao tariu Ted bon tii ngaia te tia reirei. Bon tii ngaira te utuna n te mwaanga aei. E ka karaoaki te taromauri ni mwengara. Au tia kairiiri ngai ma tariu bon te aomata ae e atibwa rairaki are e a bon tibwa reke naba irouna te nakoanibonga. Ngai irou tibwangau ngkanne bon tii kabutan te toa are e bon karaoaki ni mwengara.
Ngke a mwaing au utu nako Utah, I kunea bwa I a mena n te uoote ae bubura ao e mwaiti iai riikan. N au moan taromauri, I taraia riikan—te tanganibuaka, taraana irou—e barongaaki aron mwanangaia ni kabutan te toa n aron kairakia ae mwaatai.
I rangi ni maaku bwa n te tabati are imwina ao I moantaai n roko n te tabo n taromauri bwa e aonga n ae akea ae norai. I uringnga bwa bon te Yalecrest Uoote i Salt Lake City, ao iai kaatibuna iaontano. I nako akuun te kaatibu ao n au tataro bwa N na atai kawaiu bwa I aonga n aki kabwaka ngke I a tekateka bwa N na kabuta te toa. E kaekaki au tataro aei.
Ma ngkai I a ataia bwa iai te kawai ae tamaroa riki n tataro ao n iango i nanon karaoan tibwangara n te nakoanibonga. E reke irou te mataata bwa bukin tera a weteaki aomata nakon te nakoanibonga. Oin karekean te nakoanibonga bon anganakira te kona ni kakabwaiaia aomata ibukin te Uea, ni karaoa aei n Arana.2
E reke mataatau iaon mwakurian aei tabeua te ririki imwin rikiu bwa te riikan. N aron te katooto, ngke I a riki bwa te ibonga ae rietata, I mwiokoaki bwa N na ninikira te toa n aia tabo kaara. I tuangaki bwa N na kabuta te toa. I aikoa iangoa waakin ao barongaan kabutan te toa, ma I tarai moaia kaara aikai n tatabemaniia. I noria bwa e mwaiti irouia aika tang. E taua bain au kabaraaki temanna te unaine, e taraai, ao e kabaibati n taku, “O, ko rabwa, ko bati n rabwa.”
E a tia te Uea ni kakabwaia tibwangau, au beku are karaoaki n Arana. Te bong anne are I tataro bwa e na kaoti te kakai ao I aikoa tataro bwa E na akea kabwakau n au itera. I tataro bwa a na namakina ana tangira te Uea aomata rinanon tibwangau. I reiakinna bwa aio kiingin te beku ao kakabwaiakiia aomata n Arana.
I ongo te rongorongo are e kauringai te aeka n tangira aei. Ngke e katokaki te roko n tabo n taromauri ibukin te aoraki ae COVID-19, e kariaia tibwangana te tari n ibuobuoki mairoun ana beretitenti n te kooram n unimwaane bwa e na kakabwaia man kabuta te toa nakon te aine are e buokia. Ngke e tarebonia bwa e na uota nakoina te toa, e aki tabwara ni kariaia, ibukina bwa e rawa ae e na mwanaga man mwenga n te tai ae kakamaku ibukina bwa tao e na bon okira arona waakin te taromauri.
Ngke e roko teuaei ni mwengan neiei n ingabongin te tabati, e tabeka ana bubuti neiei. A kona n nakon te auti are i rarikia bwa e aonga naba n toa kaain rarikina ae 87 ana rirki? N ana kariaia te bitiobi, e kariaia teuaei.
I nanon wiki, aika bati, ao ti tararuaira raoi man te tau raroa ao tabeua waaki ni kamanomano man te aoraki, koraki aikai a bobotaki ni katoa Tabati ibukin te botaki n toa. Bon tii teutana mwakon te karaki ao te ran—ma e bati te rannimata ibukin tamaroan ana tangira te Atua.
I nanon te tai, a manga okira te tabo n taromauri, te tari n ibuobuoki aei, ana utu, ao te aine are e buokia. Ma te aine are 87 ana ririki, kaain rarikira, ibukin tararuan marurungina, e teimatoa n tiku ni mwengana. Te tari n ibuobuoki aei—e ataia bwa tabena bon kaain rarikina ao tiaki te unaine aei—ni karokoa n te bong aei ao e teimatoa n kawaria ni katoa tabati, boki aika tabu ao mwakoron te kariki ae uarereke i nanon baina, e waakina karaoan te toa.
Ana beku n te nakoanibonga, n aron tibwangau n aia tabo kaara, e karaoaki n te tangira. Eng, e titirakina ana bitiobi te tari n ibuobuoki aei bwa antai riki ae kona ni buokia n te uoote. E rikirake nanona ni kan karaoa tibwangana n te nakoanibonga ngke e beku n aran te Uea ao n aron atakin te kawai are bon tii ngaia ae E ataia. I aki ataia bwa e tataro te tai n ibuobuoki aei, n aron are I karaoia, ibukiia naake e beku ibukiia bwa a na ataa ana tangira te Uea, ibukina bwa e karaoa tibwangana n aran te Uea, man tamaroan ana beku a nako raoi bwai kabane.
E kaoti mwiina ae tamaroa ngke I tataro ibukina imwain ae I anga kakabwaia n te nakoanibonga nakon temanna ae e aoraki ke e rootaki n te kainnano. E riki tetaina n te onaoraki ngke a kaumakai taokita aika aki taotaonakinnano—a kairoroai riki—a tua nakoiu—ni kawaekoa ao ni kararoaai bwa aonga ni karaoa aia mwakuri, nakon ae ti anganakiu tibwangau bwa N na anga te kakabwai n te nakoaibonga. I tiku, ao I anga te kakabwaia. Ao te teeinaine ane e uareeke are I kakabwaia n te bong anne, are a taku taokita bwa e na mate, e bon maiu. I kukurei n te tai aei bwa n te bong anne, I aki te roko ni karimoa au namakin ma I namakinna bwa e tangiria te Uea bwa e na kakabwaiaki te teeinaine. Ao I ataia bwa tera te kakabwaia: I kakabwaiaaki bwa N na kamarurungnga. Ao bon neienne.
E a tia n riki aei n taai aika mwaiti ngke I anga te kakabwaia nakon temanna ae e a kaani mate, ao e katobibiaki irouia ana utu n ana kainiwene, ni kantaninga te marurung man te kakabwaia. E boni ngae ngke e uarereke au tai, I tataro ntaainako bwa N na ataa te bwai are e tangiria te Uea bwa n na anga n Arana. Ao I bubuti ni kan ataia bwa tera ae E tangiria ibukin te aomata are N na kakabwaia ao tiaki nanou ke nanoia naake a mena i rarikira n te tai anne. I ataia bwa e ngae ngke e aki reke te kakabwaia are a tangiria ibukiia kaain aia utu ke temanna ae a tangiria, te Tamnei e anaa te nano n namakina butimwaean te rau ao tiaki te nanokawaki.
Te aeka ni kairaki aei are a tataro man aki mamatam ibukina bwa tamanuea a na kairaki n anga te kakabwaia are e tangiria te Uea ibukin te aomata aio. Eng, I a tia n ongo rongorongon kakabwaia ake a anganai te miimi ao te aomata naba are e karekea. E itiaki kanga ai aron te kiraati bwa, e roko te kakabwaia mairoun te Uea—kauring ao berita naba ake a taekinaki n Arana. Ana tataro ao ana aki mamatam te tamanuea e a kakabwaiaki iroun te Uea.
Ngke te bitiobi ngai, I reiakinna n au tai ni karaoi intawiu ibukin taraan taun temanna bwa N na tataro bwa n na ataa nanon te Uea ibukin te aomata, ao n karimoa ana kairiiri ao n aki kamangaoaki n oin au babaire. E matoa aei ngkane e tangiria te Uea, n ana tangira, bwa e na kona n kakabwaia temanna ma kaetana. E kainnanoa te tataromwaaka kinaakin are e tangiria te Uea ao are ko tangiria ao are e na tangiria te aomata.
I kakoaua bwa ti kona ni karaoa tibwangara n te nakoanibonga i nanon ara tai ni maiu ao tao imwin te maiu aei. E a nakon ara nanomwaaka n ukora nanon te Uea ao ara kekeiaki n ongo Bwanaana n te aro are ti na kona iai n ataa Nanona ibukin te aomata are ti buokia ibukina. Ti karaoi tibwangara n mwaneka aika uarereke. E na roko ni karaurau, ma e na bon roko. E berita aei nakoira te Uea:
“Bwa ane e kakaonimaki bwa aonga ni karekei nakoanibonga aika uoua aikai ake I a tia n taekin, ao kakorakoraan nakoaia, a katabuaki iroun te Tamnei ibukin kabouan rabwataia.
“A riki bwa natin Mote ao Aaron ao kanoan Aberaam, ao te ekaretia ao te abanuea, ao ake a rineaki iroun te Atua.
“Ao ni kabane naba naake a karekea te nakoanibonga aei a butimwaeai, e taku te Uea.”3
I kaota au koaua bwa e a tia ni kaokaki kiingin te nakoanibonga nakon te Burabeti Iotebwa Timiti. A kaoti ana toro te Uea mai karawa ni kaoka te nakoanibonga ibukin bwaai ake a taekinaki ake a wene i matara. E na ikotaki Iteraera. A na katauraoaki ana aomata te Uea nakon Manga Okina. E na teimatoa Kaokakin Bwaai. E na kaoti riki nanona te Uea nakon Ana burabeti ao Ana toro.
Tao ko namakinna ae ko aki botau nakon tibwangam ake e anganiko te Uea. Ngkana ko namakina aei, I kaoko bwa ko na tataromwaaka bwa ko anga n ataa taraam iroun te Uea. E kinako, E anganiko te nakoanibonga, ao rikirakem ma kakorakoraan tibwangam n te nakoanibonga e kakaawaki i Rouna ibukina bwa E tangiriko ao E onimakiniko bwa ko na kakabwaiaia aomata n Arana.
I kakabwaiako ngkai bwa ko na namakina Ana tangira ao Onimakinana n aran Iesu Kristo, amen.