Waki Nakon te Tia
Tiaki n aron mwaitin bwaai aika ti rinanona inanon maiura ma arora are ti riki iai.
Ngkai I wareka ana boki Makuri ao ana reta Bauro, I mimii iroun Bauro bwa e kanga ni kaungaki nanona man te tangira ao te kakaitau ni beku, n anga reirei, ao ni kakoaua ibukin Iesu Kristo. E kanga te aomata ni kona ni beku ma te tangira ao te kakaitau, ai moarara riki inanon korakaina ae korakora? Tera ae kaunga nanon Bauro bwa e na beku? “I kakorakoraai ni biri nakon te tia ni kani karekea te kaniwanga are te weteaki ma i eta iroun te Atua inanoni Kristo Iesu.”1
Ni biri nakon te tia bon te kakaonimaki n reitinako iaon te “kawai ae eti man irariki are e na kairingkami nakon te maiu ae akea tokina”2 ma ara Tia Kamaiu ao Tamara are i Karawa. Bauro e noora marakina bwa “akea uani marakini bong aikai i rarikin te neboaki are e nang kaotaki i nanora.”3 Ana reta Bauro nakoia i Biribi are e koreia ngke e kabaeaki n te karabuuti, bon te reta ae kakimwareirei ao ni kaukurei ao te kaunganano nakoira ni kabane, riki inanon te tai ae kangaanga ni kananououa. Ti bon bane ni kainnanoa reken te ninikoria mairoun Bauro: “I atongi baikai ni kabane ba te kabuanibai ngkai moaniban te raoiroi atakini Kristo Iesu are au Uea: are I kabua au bai ni kabane i bukina, ao I atongi ba mange, ba e aonga n reke Kristo i rou.”4
Ngkai ti taraa ana mwakuri n ibuobuoki Bauro, ti kairaki iroun te tamnei ao n tabekaki rake man oin ara “Bauro” inanon ara bong, are e beku naba, e anga reirei ao ni kakoaua ma te tangira ao te kakaitau ribuakon taian kangaanga ake a kaitarai inanon maiuia ao inanon maiua aika a tangiraki irouia. Te taneiai are I karekea ruaiwa te ririki n nako e buokai n ataa kakawakin te biri nakon te tia.
N 2012, ngke I nakonako inanon tain te maungatabu ni kabuta n ira aia bowi taan kairiiri n au moan tai, I a rang rootaki n te namakin ae e roko iaou ao te aki tau. N au iango iai te bwanaa ae aki toki n okioki, “Tiaki ngkoe kaain ikai! Iai te kairua ae kakaiaki ae e a tia ni karaoaki!” Ngke I nakonako ni kataia ni kakaea au tabo n tekateka, e noorai Unimwaane Jeffrey R. Holland. E kawarai ao e taku, “Edward, e tamaroa te kaitibo ma ngkoe ikai,” ao e karaua ni bobooa ubu. Kanga I a manga riki bwa te ataei ae uarereke! Ana tangira ao ana inga e anganai te namakin ae tamaroa are e buokai n namakina ae I butimwaeaki, tamnein te aro n itaritari. N te bong are imwiina, I tarataraa Unimwaane Holland ni karaoa naba te bwai are e karaoia nakoiu n te bong are mai imwaaina, e riinga taban Unimwaane Dallin H. Oaks, are bon ana tiinia!
N te tai anne I namakina ana tangira te Uea rinanoia mwaane aika ti kamatoaia bwa burabeti, taan mamata, ao taan karekei kaotioti. Unimwaane Holland, rinanon ana akoi, are bon anuana raoi, e buokai n tokanikai iaon karimoaakin arou i bon irou ma au namakin n aki tau. E buokai ni katurua au iango iaon te mwakuri ae tabu mani kakukrei are I a tia ni weteaki nako iai—ni kairiia tamnei nakon Kristo. Ngaia, n aron Bauro are ngkoa, e kairai bwa N na biri nakon te tia.
Kamimiina, Bauro e tuangiira bwa ti na waaki rake ngke e weteira bwa ti na mwanuokin baike a mena imwiira—maakura ake ngkoa, ara taratara ake ngkoa, ara kairua ake ngkoa, ao nanokawakira ake ngkoa. E kaoiira, n aron ara burabeti ae tangiraki, Beretitenti Russell M. Nelson, nakon “te kawai ae boou, ao ni mimitong.”5 Ana berita te Tia Kamaiu e bon koaua: “Ba ane e kani kawakina maiuna ao e na boni kabua: ma ane kabua maiuna i bukiu ao e bon karekea.”6
Inanon au moan maroro n te maungatabu ni kabuta, I tibwa ana taneiai tinau ngke e reireinai bwa N na mwakuri inanon ara tawaana. “Tai manga tanrikaaki,” e taku. “Tarai taai aika a na roko ni baike ti na teimatoa ni karaoia.”7
Ni karokoa tokin maiuna, ngke e tabe ni keiaki Tinau ni kaitara te aoraki ae te kaentia, e maeka ma ngai ao Naume. Te tairiki teuana I ongo maikeikena n tang inanon ana ruu. E a korakora riki marakina, e ngae ngke e a tia n nima ana kabanea ni bwatin ae te morphine tii uoua te aoa imwaina.
I rin n ana ruu ao ni maikeike n tang ma ngaia. I tataro ni kabaibati bwa e aonga n reke karauan nanona man marakina. Ao ngkanne e a manga karaoa aekakin are e a tia naba ni karaoia n te tawaana ririki aika a nako: e toki ao e reireinai. I aki kona ni mwaninga ubuna n te tai anne, mamaarana, rotakina, ao korakaina n te maraki, n taratara ma te nanoanga nakon natina ae rootaki n te nanokawaki. E moangare rinanon rannimatana, e kainetai n tarai kanoan matau, ao e taku, “Aei tiaki man am babaire ke temanna riki, ma man ana babaire te Atua ngkana e na nako te maraki aei ke e na aki.”
I tekateka n aki karongoa. E tekateka naba n aki karongoa. Te ururing anne e teimatoa n uringaki inanou. N te tairiki anne rinanon tinau, te Uea e reireinai te reirei are e tiku inanou n aki toki. Ngkai tinau e kamataata butimwaean ana kantaninga te Atua, I uringa bukin korakain Iesu Kristo n te Onaroka are Ketetemwane ao iaon te kaibangaki i Korokota. E taku: “Nooria I a tia n angani ngkami au euangkerio, ao aio [au] euangkerio are I a tia n angani ngkami—bwa I roko nakon te aonaba ni karaoa nanon Tamau, ibukina bwa e kanakomaiai Tamau.”8
I kaoka au iango iroun ara burabeti, Beretitenti Nelson n ana titiraki nakoira n te maungatabu ae nako. E titiraki Beretitenti Nelson: “Ko tauraoi ngkoe ni kariaia te Atua bwa boton am iango inanon maium? Ko tauraoi ngkoe ni kariaia te Atua bwa temanna ae te kabanea ni kakawaki n anaananom inanon maium? … Ko kariaia Bwanaana bwa e na riki … bwa te moanibwai iaon bwaai aika uaiakinaki rekeia? Ko tauraoi ni karaoa am kantaninga bwa e na anaaki nako nanon Ana kantaninga?9 E na tia ni kaeka tinau ma te namakin ae matoatoa ni kangai “eng,” ao tabeman kaain te Ekaretia aika a kakaonimaki ni katobibia te aonaaba a na kaeka naba n te namakin ae matoatoa ae “eng.” Beretitenti Nelson, ko rabwa ibukin kairakira iroun te tamnei ao n tabekiira rake ma titiraki n taeka ni burabeti aikai.
N aki maan nako, iai au maroro i Pretoria, Aberika Maiaki, ma te bitiobi are tauna buuna ao natina te aine ae i ikawai n te bong naba anne. Maiuia a rootaki man te buti n aoraki ae te coronavirus. I titiraki bwa e uara. Ana kaeka Bitiobi Teddy Thabete e kakorakora riki kamatoaan nanou n irii taeka ao reirei mairoun ana burabeti te Uea, taan mamata, ao taan karekei kaotioti. Ana kaeka Biitobi Thabete bwa iai n taainako te kantaninga ao te raunnano n ataakina bwa te Tia Kamaiu e na uota iaona marakiia Ana aomata, bwa E ataia bwa e na kangaa ni buokiia.10 Ma te onimaki ae korakora e kakoaua “I kakaitau ibukin te babaire ni kamaiu, te babaire ni kakukrei.” Ngkanne e a titirakinai: “Tiaki aio are e kataia n reireiniira ara burabeti n te maungatabu ae nako?”
Ngkai kangaangan te maiu ae mamate e na roko iaora ni kabane n te kawai teuana ke te anga teuana, ti na katurui ara iango iaon ara kouru “ni waki[rake] nakon te tia,” are te “kaniwanga are te weteaki mai eta iroun te Atua.”10
Au kakao nakoira ni kabane bwa ti na aki bwarannano! Ti weteaki bwa ti na “kaki rawawatara ni kabane ma te bure ae kai nimitira, ao ti na botumaka ni biri n te kabobirimaka ae kamenaki i maira, ao ti na taratara Iesu are te tia karika ara onimaki ao te tia karokoa.”11
Tiaki n aron mwaitin bwaai aika ti rinanona inanon maiura ma arora are ti riki iai. Iai te kimwareirei ni biri nakon te tia. I kakoaua bwa are E tokanikai iaon bwaai ni kabane e na buokiira ngkana ti tararake n taraia. N aran Iesu Kristo, amen.