E tangiriia Natina te Atua
I tangiria n tibwauai teniua kawai aika katauaki are Tamara are i Karawa e kaota Ana tangira ibukira aika Natina.
Tariu ao mwaneu, I kimwareirei ma ngkami inanon ana euangkerio Iesu Kristo. I uota te tangira mairouia membwa aika tia n rootaki n te kanganga iaon Biribin ao n atonga ae kangai ibukiia, Mabuhay!
Ni ingabongin te Itita aio, I kakoaua te Kristo ae maiu, are E uti man te mate ao bwa ana tangira ibukira ao ibukin Tamara are i Karawa e itiaki ao akea tiana. N te bong aei, I tangiria ni kaatuua ana tangira Tamara are i Karawa ao Iesu Kristo ibukira ni kabane, are e kaotaki rinanon Ana mwakuri ni Kamaiu Natina, Iesu Kristo. “Ba E tangiria aomata te Atua n te aro are E anga Natina ae te rikitemanna.”(Ioane 3:16).
Ngke e titirakinaki te burabeti are Nibwaai iroun te anera ibukin ataakin te Atua, e kaeka Nibwaai, “I ataia ae e tangiriia natina ” (taraa 1 Nibwaai11:16–17).
Te kibu man Ana Boki Moomon: Ana Tetamenti teuana Iesu Kristo ae mwaaka roiroi ni kabwarabwaraa ana tangira te Tia Kamaiu ae kororaoi: “Ao te aonnaba ibukin buakakaia, a na taraia bwa te bwai ae akea bongana; … a bwainikirinna, … a oreia, … a bawareia ao e kariaia, ibukin ana tangira n akoakoi ma ana taotaonaki n nano ae korakora nakoia natiia aomata.” (1 Nibwaai 19:9). Ana tangira te Tia Kamaiu nakoia aomata ni kabane bon te mwaaka ni kamarurung ibukin bwaai aika E karaoi. Ti ataia bwa bon titebo ma Ana tangira Tamara are i Karawa ibukira, bukina bwa te Tia Kamaiu e reirei ma te nanorinano bwa Ngaia ao te Tama “bon tii temanna” (taraa Ioane 10:30; 17:20-23).
Ti na kanga, ngkanne, ni kabooa mwiina ao ni kaota ara kakaitau ibukin Aia tangira ae aki kakaonoti? E reireiniira te Tia Kamaiu n te kakao ae akea ae na tiku ma iai: “ngkana kam tangirai ao kam na tou mwiin au tua” (Ioane 14:15).
E reirei Beretitent Dallin H. Oaks, “Ana tangira te Atua ae aki kakaonoti ao e kororaoi a kaotaki n taian kakabwaia ni bairen Ana euangkerio, n raonaki ma te koaua bwa ana kakabwaia aika moamoa a katauaki ibukia ake a ongeaaba n Ana tua.”1
I tangiria n tibwauai teniua kawai aika katauaki are Tamara are i Karawa e kaota Ana tangira ibukira aika Natina.
Te Moan, Te Reitaki ma te Atua ao Utu A kaota Ana tangira
Ara reitaki ae moan te kakawaki ma te Tama ao Natina ao ma oin ara utu, ibukina bwa reitakira mangaiia akea tokina. Te baire ni kakukurei bon te kaotioti ae kakukurei n Ana tangira te Atua ibukira. Ma maata aika a mwannanoa ana baire te Atua, ti na motinnanoia bwa ti na rineia ni kanakoa te tano ma te bwaa aika mena inanora ake a boutoka te nano n tatauti ao n onea mwiina n maiura aika kateaki iaon te reitaki are akea tokina. Iangoana, e kona n aranaki “te keniken n tamnei.” Ni karaoan ara keniken n tamnei, ti na riai moa ni kakaea te Atua ao ni Weteia (taraa Ieremia 29 12-13).
Kakaeakina ao Weweteakina e na moanaki te waaki ao ni katauraoa te marena ni katea ao ni kamaatoatoa ara reitaki ae akea tokina. E karababaa ara tarataraa n tamnei ao ni buokira ni kamatoaira iaon bitakin te bwai are ti kona n taua taekana, nakon are te maaku ibukin bwaai ake ti aki kona n taua taekaia. Kamatebwaian maiun ao ana mwakuri te Tia Kamaiu, Iesu Kristo, e na kona ni karekea iroura noorakin kanganga tabeua n te nooraba ae akea tokina.
Bwaai aika a katabetabeira a kona n totokoira man namakinan ana tangira te Atua n ara bobotaki n ara utu ao mwakurina nako. A na namakin te tina bwa bwaai ake a maiu man te iti a taonanako te itoman n ana utu e a roko ma aron katokana. N tain te amwarake n te tairiki ao n tain te utu tabeua, e wewete neiei “katikui Tareboon; tia bane ni itaramata ngkai.” E taku neiei bwa aio ai te katei ae boou ibukin aia utu ao anne are kakorakora aia itoman bwa utu ngaiia ngkana iai aia tai ni maroro. Ngkai a kukurei ni bonganan Nakomai, Irirai ni uaia ni maroro ni kabane bwa te utu.
Te Kauoua, E Kaota Ana Tangira nakoia Natina man Weteakiia Burabeti
Ara aonnaba ae ngkai e a kaonaki ni bwaai aika karika te kanganga inanon “te buaka n taian taeka ao te aki rau ibukin kakaokoron taian iango” (Iotebwa Timiti—Rongorongo 1:10). E kauringira Bauro bwa “tao bon iai… taetae aika bati i aonnaba” (1 I-Korinto 14:10). Engaa mai buakon bwanaa ae a mataata raoi ao ni manena n totokoan te mangaongao? Bon bwanaia ana burabeti te Atua, taan mamata ao taan kaotioti.
I uringa raoi, bwa imwiin te korokoro inanon 2018 n okiu nakon te mwakuri, I mena n te tabo are a tetei iai taian kaa n ana etekuata te Ekaretia. N te tai ae karina, I ongo bwanan Beretitenti Russell M. Nelson ni wewete, “Taniela,Taniela.” I biri nakoina, ao e titirakinai bwa I uara.
I taku “I a marurung raoi, Beretitenti Nelson.”
E anganai te reirei ao e rabwatai. I namakinna inanou ana mwakuri ni koaua te burabeti n ibuobuoki nakon “temanna.”
Beretitenti Nelson e a tia ni mwananga nakon aaba aika mwaiti n te aonnaba. Inanon au iango, e aki ti ibuobuoki nakoia ngaa, ma e buobuoki nakoia ngaa n “tatabeman.” Ni karaoan aio, e tibwaua ana tangira te Atua are irouna nakoia Natina.
N te tai ae nako ana taeka Beretitenti Nelson ea tia n riki bwa oin te korakora ao te kairiri nakoia kain Biribin. N aiaron naba aaba ni kabane n te aonnaba, inanon 2020 kaain Biriribin a rang korakora rootakiia n te buti n aoraki ae te COVID-19, ao aiarona naba ma rebwetauan te warekeno, mwaeiein te aba, ang aika korakora, ao te ieka ae urubwai.
Ma, n aron te boua ae ota ni kaota nangiroon te maaku, te maroaa, ao te bwara n nano, e roko ana taeka te burabeti. A raonaki n te wewete ibukin te aki mamatam ao te tataro ao te reirei bwa ti na mwananga n aki tabe ma te buti n aoraki. E tuangira bwa ti na karaoi mweengara bwa taabo ni katantan n te onimaki. E weteia kaain te Aro n taabo nako ni karineia ni kabane Natin te Atua ao ni karimoa te Atua ni maiura.2
N aron naba te anai nano n ana kakoaua Beretitenti Nelson n te witeo iaon mwaakan te kakaitau ao a na kabanea n tataro e roota aon Biribin ni kabane.3 N te burawinti ae Leyte, e kaotaki te witeo n te tai n taromauri irouia aro aika kakaokoro, ao e taekinaki naba inanon mwakoron ana kabwarabwara te tama. Te aono ni Biribin ma te aonnaba ae bwanin, a kakabwaiaki n namakina ana tangira te Atua rinanon ana taeka ana burabeti ae rineaki.
Te Kateniua, Kaetakira e Kona n Riki bwa Kaotakin Ana tangira te Atua nakoia Natina
N tabetai Te Atua e kaota ana tangira man kaetakira. Bon te kawai ni kauringira bwa E tangirira ao bwa e ataira bwa antai ngaira. Ana berita ni kakabwaia n te rau e uki nakoia ake a nakonako ma te ninikoria ni kawain te berita ao a tauraoi ni kaetaki.
Ngkana ti mataata iaon kaetakira ao ti butimwaia, e riki bwa te korokoro n tamnei. Irarikina, antai aika kan koreaki? Ma nakoia naake a kainnanoia ao ni motinanoia ni karekea, e kona n riki bwa te bwai ni kamaiu. Te Uea, e kaetiia naake e tangiriia. Booki aika tabu a taekina aio (taraa E bera12:5–11; Ereman 12:3; Reirei ao Berita aika Tabu 1:27; 95:1). Kaetakira anne, ke te korokoro n tamnei, e na karika te bitaki ae kainnanoaki inanon maiura. Ti na ataia tariu ma mwaneu, bwa e katamaroa ao ni kaitiaki nanora.
Iotebwa Timiti, te burabeti ibukin Kaokan bwai, e kaetaki. Imwiin buan 116 baan Ana Boki Moomon aika tia n rairaki iroun Iotebwa, te Uea e uaia n anga kaetakin temanna ao e kaota te tangira ngke e kangai: “Ko na riai n aki maaka riki te aomata nakon te Atua. … Ko na riai n tia ni kakaonimaki. … Noria, ngkoe ae Iotebwa, ao ko a tia n rineaki. … Uringa, bwa te Atua e nanoanga; ngaia are, raira nanom” (Reirei ao Berita aika Tabu 3:6–10).
Inanon 2016, ngke I karaoa au mwakuri ni mitinare i Little Rock, Arkansas, I tuanga te Tari Cava bwa e na nikira te batia iroun mwaneu ae ikawai ae maeka n te atimwakoro iaon Biti. Ana kaeka bon tiaki te bwai ae I kantaningaia. “Beretitenti Wakolo,” e kaeka n ae mamara, “mwanem e a tia ni mate ao e taunaki 10 te bong n nako.” I bon nanokawaki ao I bon un naba teutana bwa au utu a bon aki kan kaongoai.
Te bong are imwiina ngke e tabe kaain abau n reireiniia mitinare, e roko te iango aei inanou: “Taniela, baika ko rinanona aikai boni ibukin tamaroam ao rikirakem. Ko a tia n reirei tibwaakin am koaua ibukin Ana Mwakuri ni Kamaiu Iesu Kristo, Ngkai maiuakinna.” I kauringaki bwa “e a kabwaia te aomata ae E boaia [ra] te Atua; ma ngaia are [ti na] aki ribaa …kaetakira iroun teuare Moan te Mwaaka” (Iobi 5:17). Bon te korokoro n tamnei ibukiu, ao e bon waetata mwiina.
Ngke I rinanon namakin ake I rinanoi, I weteaki bwa N na anga au kabanea ni iango nakon te maroro. Ibuakon bwaai tabeua, I tibwauai reirei ake I a tibwa tia n reiakin: te moan, I a tia ni kaetaki iroun te Tamnei are Raoiroi ao I tangiria bwa bukina bon tii ngaia ae I ongo; te kauoua, ibukin ana karea n nanoanga te Tia Kamaiu ao n anga bon ngaia, N na aki manga tarai au kanganga bwa taian kataaki ao kanganga ma bon au taneiai ae I reireinaki iai; ao te kateniua, ibukin maiuna ae e kororaoi ao akea kairuana I aki manga tarai kabwakau ao au aki konabwai bwa mamarau ma ai anga n rikirake. Te namakin aio e buokai n ataia bwa te Atua e kaetai bwa bukina e tangirira.
I kainna. Tamara ae akea tokina ao Natina, Iesu Kristo, a kaota Aia tangira man karaoakina bwa e na kona n reke iroura te itoman ae akea tokina ma Ngaiia ao kaain ara utu, man weteakin ara burabeti ni boong aikai n reirei ao ni ibuobuoki nakoira, ao man kaetakira ni buokira n reiakin bwaai ao n rikirake. E na kaitauaki te Atua ibukin te bwaintangira ae akea kabotauana iroun Natina ae mimitong,”4 ara Uea ae e a tia ni uti. N aran Iesu Kristo, amen.