A Aki Kona n Tokanikai; Ti Aki Kona ni Bwaka
Ngkana ti katea aara iroun Iesu Kristo, ti aki kona ni bwaka!
Ara burabeti ae tangiraki, Beretitenti Russell M. Nelson, e taku n ara kabanea ni maungatabu ae nako: “N taai ni kangaanga aikai are e taetae ni burabetiaki iroun te Abotoro Bauro, Tatan e aikoa manga kataia ni karabai ana kaikoaki iaon ana babaire te Atua. Angiin iango aika buakaka a taotira n te aonaaba. Mangaia are, te kawai ae kona teimatoa iai n te maiu n tamnei bon te babaire ni kariaia te Atua bwa boton ara iango inanon maiura, n reiakiniira n ongo bwanaana, ao ni kabonganai korakorara ni buoka ikotakiia Iteraeral.”1
Ngkai ti iangoa ana kakao te burabeti n reiakiniira n ongo bwanaan te Atua, a baireaki nanora ke a matoatoa? Ti na uringa te reirei are e reke n Iakobwa 6:6: “Eng, ngkana kam ongo bwaanana n te bong aio, ao tai kamatoai nanomi; bwa bukin tera ngkai kam mate?” Ti na baireia ni kariaia te Atua bwa ngaia boton ara iango inanon maiura.
Ti na kanga ni kariaia te Atua bwa ngaia boton ara iango inanon maiura ma tiaki teuare e buakaka? N Reirei ao Berita aika Tabus 6:34 ti warekia, “Mangaia are, tai maaku, ngkami te nanai ae e uarereke; karaoa ae raoiroi; kariaia te aonaba ma moone ni ikotaki ni kaaitaraingkami, bwa ngkana ko kateitei i aon au bwaa, a aki kona n tokanikai.” Bon te berita ae rangi ni kakawaki. E ngae ngke aonaaba ma moone a na ikotaki ni kaitaraira, a aki kona n tokanikai ngkana ti rineia ni kariaia te Atua bwa boton ara iango ni katea maiura iaon Ana bwa.
Ngke e taetae nakoia Ana reirei, e anga reirei Iesu Kristo iaon te mwaane ae wanawana ao te mwaane ae nanobaba, are e koreaki ni Mataio mwakoro 7 n te Nu Tetemanti. Angiina ibuakomi kam a tia n ongo kunan te Moanrinan “Te Aomata ae Wanawana ao te Aomata ae Nanobaba.”2 Ngkana e reke am tai ni kabootaui aua kiibun te anene, ko na kunea bwa te kibu 1 ao 2 bon ti te arona ma te kibu 3 ao 4. Te mwaane ae wanawana ao te mwaane ae nanobaba a katea te auti. A tangiria ni katauraoi ibukiia aia utu ma te mweenga ae mano ao e kamwengaraoi. A tangiria ni kabane bwa a na maiu ma te kukurei n aki toki n aia utu, n ai aromi ao ngai. Te kangaanga are e katobibia bon ti te arona: “Te karau e bwaka, ao te ieka e roko.” Ti aneneia onoua te tai ngke ti anenea te kuna anne. Tii te bwai ae kaokoro bwa te mwaane ae wanawana e katea ana auti iaon te bwaa ao te auti e teimatoa n tei, ngkae te mwaane ae nanobaba e katea ana auti iaon te tano ao e bwaka ana auti. Mangaia are, te tabo ibukin aan maiura n tamnei e rangi ni kakawaki, ao aei e na iai mwiin te babaire ae na otinako n te kabane ao n akea tokina.
I kantaningaia ao n tataro bwa ti na bane ni kunea ao n tiku iaon te kateitei ae koaua ngkai ti katea maiura ibukin taai aika a na roko. Ti kauringaki n Ereman 5:12: “Ao ngkai, natiu mwaane, uringnga, uringnga bwa bon i aon te bwa are ara Tia Kabomwi, are Kristo, natin te Atua, are kam na riai ni katea iai aami; bwa ngkana te riaboro e kanakoa te ang mai irouna ae korakora, eng, ana kanoa i buakon te ukeuke n anti, eng, ngkana ni kabane te atibu ae bwaka mai karawa ao te angibuaka ae korakora a bwaka iaomi, bon akea korakoraia iaomi ni katikingkami nakon marawan te nanokawaki ao te maraia ae aki totoki, ibukin te bwa are ko kateaki iaona, are bon aan te kateitei ni koaua, aan te kateitei are ngkana aomata a kateitei iaona ao aki kona ni bwaka.”
Anne ana berita te Atua! Ngkana ti katea aara iaon Iesu Kristo, ti aki kona ni bwaka! Ngkana ti teimatoa ni kakaonimaki ni karokoa te toki, te Atua e na buokiira ni katea maiura iaon Ana bwaa, “ao mataroan moone e na bon aki tokanikai ni kaitara[ira]” (Reirei ao Berita aika Tabu 10:69). Ti na bon aki kona ni bitii bwaai aika a na riki n taai aika a na roko, ma ti kona n rineia bwa ti na kanga ni katauraoi ibukin bwaai aika a riki.
Tabeman mai buakora a na kona n iango, “E tamaroa te euangkero, ngaia ti riai ni kaakia inanon maiura tao ti tetaina n te wiiki.” Te nanako n taromauri te taina n te wiiki e aki tau ni kateitei iaon te bwaa. E riai maiura ae bwanin ni kaonaki n ana euangkerio Iesu Kristo. Te euangkerio tiaki iteran maiura, ma maiura ni koaua bon iteran ana euangkerio Iesu Kristo. Iangoia raoi. E koaua anne? Maiura ae mamate bon tii iteran te babaire ni kamaiu ae bwanin ao te karietataaki.
Te Atua bon ngaia Tamara i Karawa. E tangiriira ngaira ni kabane. E atai ara konabwai n te kawai ae tamaroa riki nakon ae ti bon kinaira. E aki tii ataa rongorongon maiura. Te Atua e atai naba rongorongo aika a uarereke inanon maiura.
Taiaoka iriira te burabeti Beretitenti Nelson n ana taeka n reirei ae wanawana. N aron ae koreaki n Reirei ao Berita aika Tabu 21:5–6:
“Bwa ana taeka kam na karekei, n aron ae bon man oin wiiu, ma te taotaonakin nano ao te onimaki ni kabanea.
“Bwa man karaoakin bwaai aikai mataroan moone e na bon aki tokanikai i aomi; eng, ao te Uea ae te Atua e na kamaenakoa mwaakan te roo mai moami, ao ni ioioa karawa ibukin kabwaiami, ao mimitongin arana.”
Bukina anne, a aki kona n tokanikai, ao ti aki kona ni bwaka!
I kakoaua nakoimi bwa e na manga oki Kristo te kauatai n aron are E karaoia n te moan tai, ma n te tai aei te kauatai n te neboaki ao n te mimitong. I kantaningaia ao n tataro bwa N na tauraoi ni butimwaia, ngkana tao n iteran te rabuna aei ke n te itera are teuana. Ngkai ti bukamaru n tain te Itita ae kamiimi aei, au kantaninga, rinanon ana Mwakurui ni Kamaiu Iesu Kristo ao mwaakan Mangautina (taraa Moronaai 7:41), N na kona ni waerake ao ni kaitibo ma au Tia Karikibwai ao ni kangai, “Ko rabwa.” N aran Iesu Kristo, amen.