Beberuare 12–18: “Ti Maiuakina te Kukurei”

2 Nibwaai 3–5

Ni warekan 1 Nibwaai, ko na bae n iangoia bwa Nibwaai e rangi n anaa te nano. “Korakora rabwatana” n te maiu n rabwata ao te maiu n tamnei (1 Nibwaai 2:16), e taraa n aki bwerengaki n taian kataaki aika e kaitarai. Ma anne te bwai ae ti kaantaningaia. Ma ngkai ana onimaki Nibwaai e kororaoi, ana taeka n 2 Nibwaai 4 e kaotia bwa aomata ake a rangi ni kakaonimaki n tabetai a namakina ae e “kai nanoia” ao a “kai rotaki” n taian kariiri. Ikai ti nora temanna ae e kekeiaki, ae e tangiria ni kukurei, ma e “tang nanona ibukin [ana] bure.” Ti kona n namakina te aro aei ao te kantaninga n nanomatoa nakon are imwiina: “Ma e ngae n anne, I ataia bwa antai ae I onimakinna” (taraa 2 Nibwaai 4:15–19).

Ngkai Nibwaai ao ana aomata a reiakinna bwa a na maiu “ni maiuakina te kukurei” (2 Nibwaai 5:27), a reiakinna naba bwa te kukurei e aki waekoa rekena ke n akea te tai n nanokawaki. E bon roko man katukan ara onimaki iroun te Uea, “ ae bwaan [ara] raoiroi” (2 Nibwaai 4:35).

Iango ibukin Reiakinana n te Mweenga ao n te Taromauri

2 Nibwaai 3:6–24

E rineaki Iotebwa Timiti iroun te Atua bwa e na kaoka te euangkerio.

E tibwaua te taetae ni burabeti Riaai ma natina ae Iotebwa are e anga Iotebwa ae kaain Aikubita. Te taetae ni burabeti aei bon ibukin te “tia mamata ae rineaki,” nakon te tai ae na roko ae Iotebwa Timiti. Tera te bwai ae e taekinaki ni kiibu 6–24 ae e na karaoia Iotebwa Timiti ni kakabwaiaia ana aomata te Atua? Iangoia bwa e kanga ana mwakuri Iotebwa Timiti n tia n riki bwa te bwai ae “moan te kakawaki” nakoim. Ko kona ni karekei tabeua iango man te witeo iaon taekan Iotebwa Timiti n te “Prophets of the Restoration” collection in the Gospel Library. Iangoi titiraki n aron aikai, ao iangoia n rawei am kaeka:

• Tera ae ko ataia man te bwai are e reiakinna Iotebwa Timiti ibukin Tamara are i Karawa ao Iesu Kristo?

• E na kanga ni bitaki maium ibukin te bwai ae kaokia te Uea rinanon te Burabeti Iotebwa Timiti?

• E na kanga aron maium ngke arona bwa akea Kaokan bwaai?

Teuana te bwai ae moan te kakawaki ni mwakoron ana mition Iotebwa Timiti bon karokoan Ana Boki Moomon. Tera ae ko reiakinna man te mwakoro aei iaon bukin kakawakin Ana Boki Moomon? Ni koauana, ko kona ni kakaei bukiia inanon kiibu 7, 11–13, 18–24.

Taraa naba Joseph Smith Translation, Genesis 50:24–38 (in the Bible appendix); Gospel Topics, “Joseph Smith,” Gospel Library; “Praise to the Man,” Anene n Taromauri, no. 27.

Ana Burabeti te Uea,, iroun David Lindsley

2 Nibwaai 4:15–35

“O te Uea, I a tia n onimakiniko.”

E taku Nibwaai bwa e na “korei bwaai ake a kaineti ma tamneiu” (te kibu 15). Ngkai ko wareka are e koreia inanon 2 Nibwaai 4:15–35, titirakiniko, “Baikara bwaai ake a kaineti ma tamneiu?” Iangoi ni korei, n aron are e karaoia Nibwaai, ao tibwaia ma aomata ake ko tangiriia.

N norakina bwa e kanga Nibwaai ni karekea te rau ngke e rootaki n te rawawata ao te ingainga n nano ni kona ni buokiko ngkana e reke iroum aeka n namakin naba aikanne. Taraia inanon kiibu 15–35 ibukin kibu n taeka aika a na uota te rau nakoim. Iai ae ko ataia riki ae na kona ni karekea te rau inanon kibu n taeka aikai?

Taraa naba Ronald A. Rasband, “Bwaai Ake a Kaineti ma Tamneiu,” Riaona, Nob. 2021, 39–41.

2 Nibwaai 5

I kona ni karekea te kukurei man maiuakinan ana euangkerio Iesu Kristo.

Tera ae nanonaki bwa ko na kukurei? E koreia Nibwaai bwa ana aomata a “maiuakina te kukurei” (2 Nibwaai 5:27). Ko na bae n taratarai rinerine aika a karaoi Nibwaai ao ana aomata ake a buokiia ni kakukureia (taraa, ibukin te katooto 2 Nibwaai 5:6, 10–17). Tera ae konaa ni buokiko ni katea te maiu ni kukurei n aroia ana aomata Nibwaai?

2 Nibwaai 5:20–21

Tera te maraia are e toka i aoia Reimwanaite?

N ana tai Nibwaai te maraia are irouia Reimwanaite bon te “teweaki nako mai matan [te Uea] … ibukin aia bure” (2 Nibwaai 5:20–21). Nanona bwa Tamnein te Uea e a anaaki man maiuia. Imwiina ngke Reimwanaite a butimwaea ana euangkerio Iesu Kristo, “aikoa manga iraki n ana kamaraia te Atua” (Aramwa 23:18).

E taekinaki naba n Ana Boki Moomon bwa te kanikina are te kun ae bwatabwata e roko iaoia Reimwanaite imwiin maenakoia Nibwaite mai irouia. Aron ao kaotin te kanikina aio e tuai bwanin iai te mataata. Te kanikina e kaokoroia Reimwanaite mairouia Nibwaite. Imwiina, ngke Nibwaite ao Reimwanaite n tatabemaniia nako a rinanon taai ni buakaka ao n raoiroi, e moanna n aki bongana te kanikina.

Burabeti a kamataoaa n ara bong bwa te kun ae bwatabwata bon tiaki kanikinaean te aki tangiraki ke te maraia. E taekinna Beretitenti Russell M. Nelson: “I kakoaua bwa arom imatan te Atua e aki baireaki man karan kunim. Te akoaki ao te aki akoaki iroun te Atua e bon katan iaon am anganano nakon te Atua ao Ana tua ao tiaki man karan kunim” (“Kariaia te Atua Bwa Boton Ara Iango,” Riaona, Nob. 2020, 94).

Ngke e reirei Nibwaai, ao “akea ae totokoia ngkana e nakoina, ae bwatabwata ke ae mainaina, te toro ke ae inaomata, te mwaane ke te aine; … ti tebo aroia ni kabane imatan te Atua” (2 Nibwaai 26:33).

Taraa naba “Till We All Come in the Unity of the Faith” (witeo), Gospel Library.

Ibukin iango riki tabeua, taraa te beeba ni kaongora n te namwakain aio n te Liahona ao Ibukin Kakorakoraia Kairake maekatiin.

Iango ibukin Reiakinaia Ataei

2 Nibwaai 3:6–24

Iotebwa Timiti bon te burabeti.

• Iangoia bwa ko na kanga n reireiniia am ataei taekan te mwakuri ae tamaroa are e a tia te Atua ni kakoroa bukina rinanon Iotebwa Timiti. Ni waakinana, ko kona ni buokiia am ataei ni kakaea te taeka “tia mamata” inanon 2 Nibwaai 3:6 ao kabwarabwaraa bwa a atongaki burabeti bwa taan mamata bukina bwa e buokiia Tamara are i Karawa bwa a na kona n noori bwaai aika tiaki kona n noori. Tibwauaia bwa bukin tera ngkai ko kakatonga ngkai iai te tia mamata ae kaira te Ekaretia.

• Te Gospel Art Book iai inanona tabeua tamnei aika ko kona ni kabonganai n anga reirei iai iaon te mwakuri ae karaoia te Atua rinanon Iotebwa Timiti (tarai tamnei 89–95). Kariaia am ataei bwa a na tibwaua te bwai ae ataia n tamnei aikanne. Bukin tera ngkai e aranaki Iotebwa Timiti bwa “te tia mamata ae e rineaki”? Tera ae karaoia Iotebwa Timiti ae “moan te kakawaki”? (kibu 7).

2 Nibwaai 4:15–35; 5

I tangirii “ana bwai te Uea.”

• Tera ae e kakukureira? Iangoia ni bootaki ni wareki kiibu man 2 Nibwaai 4 ni kakaea te bwai ae kakukureia Nibwaai ke ni karaoia bwa e na kukurei iai (tarai kiibu 15–16, 20–25, 34–35). N ana rongorongo “The Things of My Soul,” Unimwaane Ronald A. Rasband e tibwauai itiua “ana bwai te Uea” aika a kakawaki nakoina (Riaona, Nob. 2021, 39–41). Tao kam kona ni bootaki n rinanon ao ni maroroakin “ana bwai te Uea” aika a kakawaki nakoim.

• 2 Nibwaai 5 e kabwarabwarai naba bwaai are e buokiia Nibwaite ni maiu “imwiin maiuakinan te kukurei” (te kibu 27). Ko kona ni katauraoi tabeua taeka ke tamnei ake a tei ibukin bwaai aikai ao buokiia am ataei ni kabotaui nakon kiibu inanon te mwakoro 5. Tabeua katooto n aron te utu (kibu 6), ana tua te Atua (te kibu 10), booki aika tabu (kibu 12), te mwakuri (kiibu 15 ao 17), tembora (kibu 16), ao nakoa n te Ekaretia (kibu 26). A kanga bwaai aikai ni uota te kukurei nakoira?

2 Nibwaai 5:15–16

Te tembora bon Ana auti te Uea.

• Ngkana ko wareka 2 Nibwaai 5:15–16 nakoia am ataei, a kona n ae ao ngkoa a buoka Nibwaai ni katea te tembora. Ko kona naba ni kaotia nakoia tamnein kateitei aika kakaokoro, n raonaki ma te tembora. A kanga tembora ni kaokoro man kateitei ake tabeua? Tibwauaia imarenami bukin kakawakin te tembora nakoimi (taraa naba “I Love to See the Temple,” Children’s Songbook, 95).

Taai nako a kona n riki bwa taai n reirei. Tai iangoia ae te anga reirei nakoia am utu bon te bwai ae ko kakaraoia tetaina n te wiiki n tain kanakoan te reirei. Iangoa reiakinaia am utu bwa kanga te bwai ae ko kakaraoia n taainako.

Ibukin iango riki tabeua, taraa te beeba ni kaongora n te namwakaina aio n te Te Rao maekatiin.

Ana Tembora Nibwaai, iroun Michael T. Malm