Riaai e Mwananga Irarikin Taari ae Uraura, iroun Gary Smith

Tianuare 8–14: “N na Nako ao N na Karaoi”

1 Nibwaai 1–5

Ana Boki Moomon e moanaki ma rongorongon te utu ae koaua ngke a rinanon kaangaanga aika a bon riki. E riki inanon 600 IK, ma iai bwaai n te rongorongo aei ae e na bae n titebo nakoia utu ni boong aikai. Te utu aei e maeka n te aonaaba ae rikirake te buakaka iai, ma e berita te Uea nakoia bwa ngkana a Iriiria, E na kairiia nakon te kamanoaki. Inanon kawaia iai taai aika a nakoraoi ao iai taai aika a nakobuaka naba iai, a karekei kakabwaia aika a korakora ao kakai, ma iai naba aia uneaki ao ni ngurengure. E aki bati ni kakaoti ni koroboki aika a tabu kabwarabwaraan rongorongon te utu aika a kataia ni maiuakina te euangkerio: kaaro aika a korakai ni kaunga te onimaki inanon aia utu ao n raraoma ibukin kamanoaia, naati aika a baireia ngkana a na kakoauaia aia karo, ao aroia taari n rinanon te bakantang ao te itabaraaraa—ao n tabetai te ikabwarabure imarenaia. Iaon aio ni kabane, bon iai te mwaaka ni katotoon te onimaki n te utu ae aki kororaoi aio.

Iango ibukin Reiakinana n te Mweenga ao n te Taromauri

1 Nibwaai 1–5

Ana taeka te Atua a bon “rang kakawaki” irou.

Teuana te rongorongo ae ataaki raoi n Ana Boki Moomon ae “korakora bonganaia” bon ana taeka te Atua (1 Nibwaai 5:21). Ngkai ko wareka 1 Nibwaai 1–5, kakaei kawai ae ana taeka te Uea e kaineti ni kakabwaiaia ke n reke n te anga teuana nakoia ana utu Riaai (te katooto, tara 1:11–15; 3:19–20; 5:10–22). Tera ae a reireiniko kiibu aikai iaon ana taeka te Atua? Tera ae ko kunea ae kaunga nanom bwa ko na ukoukori koroboki aika tabu?

Tara naba “As I Search the Holy Scriptures,” Anene n Taromauri, nambwa 277; “Scriptures Legacy” (witeo), Gospel Library.

1 Nibwaai 2

I kona ni karekea ao ni kakorakora au koaua ngkai I rairaki nakon te Uea.

E kinaaki Nibwaai ibukin ana onimaki ae korakora iroun te Uea, ma e riai ni mwakuri ni karekea ana koaua—n aron naba ae ti bane ni karaoia. Tera ae ko warekia n 1 Nibwaai 2 are e kaotia bwa Nibwaai e kona ni karekea te kakoaua ae ana taeka tamana a koaua? E aera ngkai Raman ao Remuera aki karekea te kakoaua aei? (Tara naba 1 Nibwaai 15:2–11). Nningai ae ko namakina iai te Uea bwa e kamaraua nanom?

Taraa naba “The Lord Commands Lehi’s Family to Leave Jerusalem” (witeo), Gospel Library.

1 Nibwaai 3–4

Te Atua e na katauraoa te kawai ibukiu ni kakoroan nanon Ana kantaninga.

Ngke e tua te Uea bwa natin Riaai mwaane a na anai bwaatua buraati, E aki anga kaetieti aika onoti bwa a na kanga ni karaoia. Aio e teimatoa koauana ni kaetieti ake ti karekei mai iroun te Uea, ao ni kona n anganiira te namakin ae E tangira mai iroura te bwai ae “rangi ni kaangaanga” (1 Nibwaai 3:5). Tera ae e kaunga nanom n ana kaeka Nibwaai nakon te bwai are E tua te Uea n 1 Nibwaai 3:7, 15–16?

Ngkai ko wareka 1 Nibwaai 3–4, tarai aekan nako bwaai aika a kangaanga are e rinanona Nibwaai. E kanga te Uea ni “katauraoa te kawai” ibukin Nibwaai ni “kona ni kakoroa bukin te bwai are e [tua]”? Bukin tera e kakaawaki iroum ataakina bwa tera te bwai ae e karaoia te Uea ibukin Nibwaai?

Teuana te kawai ae korakora are E katauraoira iai te Uea ni kawakin Ana tua bon man kanakoan Iesu Kristo n riki bwa ara Tia Kamaiu. Iangoia ni wareka ana rongorongo Beretitenti Dallin H. Oaks “Tera Ae E a Tia Ni Karaoia te Uea Ibukira?” (Riaona,, Meei 2021, 75–77). E kanga Iesu Kristo n tia ni katauraoa te kawai ibukira ngaira n tatabemaniira nako? Ataakina ae E a tia n tokanikai iaon bwaai ni kabane ibukim, tera ae kairiko n namakina ae ko na “nako ao ni karaoia”?

Taraa naba “Nephi Is Led by the Spirit to Obtain the Plates of Brass” (witeo), Gospel Library; Gospel Topics, “Obedience,” Gospel Library.

Kabonganai karaki ao katooto n reirei taekan te euangkerio. Ngkai ko katauraoi n anga reirei, iangoi oin am taneiai ake a kona n anganiko te kauoua ni kakoaua nakon rongorongo ake inanon koroboki aika tabu. Te katooto, ningai ae e a tia te Uea ni katauraoa te kawai ibukim ni kakoroa nanon Ana kantaninga?

Their Joy Was Full (A Onrake n te Kimwareirei), iroun Walter Rane

1 Nibwaai 4:1–3; 5:1–8

Uringakin ana mwakuri te Atua e kona n anganai te onimaki n ongeaba nakon Ana tua.

Ngke a namakinna Raman ao Remuera bwa a na ngurengure ke n tangitang, aki toki ni mena irarikiia Nibwaai ao Riaai ni kaungaia ao n buoutokaiia. Ngkana ko namakina ae ko na ngurengure, e kona n ibuobuoki warekan aia taeka Nibwaai ao Riaai. A kanga Nibwaai ao Riaai ni kataia ni buokiia aomata tabeman ni katea aia onimaki iroun te Atua? (taraa 1 Nibwaai 4:1–3; 5:1–8; taraa naba 1 Nibwaai 7:6–21). Tera ae ko reiakinna ae e kona ni buokiko ngkana ko kaririiaki bwa ko na ngurengure ke n tangitang?

1 Nibwaai 4:5–18

“I kairaki iroun te Tamnei.”

N 1 Nibwaai 4:5–18, tera ae e nana nanom iaon konabwain Nibwaai n ataa ao ni iriira te Tamnei? Ko na bae ni kamatebwaia ana rongorongo Beretitenti Russell M. Nelson “Te Kaotioti ibukin te Ekaretia, Te Kaotioti ibukin Maiura” (Riaona,, Meei 2018, 93–96) n reiakina riki aron karekean te kaotioti mai iroun te Uea.

Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.

Iango ibukin Reiakinaia Ataei

1 Nibwaai 2:16

I kona ni karekea oin au koaua.

• E kanga Nibwaai n ataia bwa baike e reirei iaona tamana a koaua? Buokiia am ataei ni karekei kaekaan te titiraki aei n 1 Nibwaai 2:16, 19. A kona naba n tangiria ni korei baike e karaoi Nibwaai iaon buraoki ke bwaai riki tabeua ao ni katea rabwatan te bwai man bwaai akanne. Aio e kona ni kairi nakon te marooro bwa a kanga waaki aikai ni buokiira ni katea te koaua.

• Ko kona ni kaotii nakoia natim tamnei ke bwaai aika a tei n onea mwiin bwaai ake a kona ni ukori kakoaua iaona, n aron kaobiin Ana Boki Moomon ke tamnein Iesu Kristo, te tembora, ke burabeti aika maiu. Kaoia bwa a na rinea teuana ao n tibwauai aia koaua iaon te bwai anne. Ko kona naba n tuangiia natim bwa ko kanga ni karekea am koaua. Bukin tera ti kainnanoa ae bon oin ara koaua?

1 Nibwaai 3–4

Te Atua e na buokai ni kawakin Ana tua.

• Iangoia ni kabonganaa teuana ke ae bati riki ni bwaai n ibuobuoki aikai ni buokiia natim ni marooro bwa e kanga te Atua ni buoka Nibwaai ni karekei bwaatua buraati: 1 Nibwaai 3–4; te iteraniba n te waaki ni kakukurei n te wiiki aei; “Nephi’s Courage” (Aia Boki n Anene Ataei, 120–21); ao “Mwakoro 4: Bwaatua Buraati” (n Karaki man Ana Boki Moomon, 8–12).

• Ngkoe ao natim kam na bae n tangiria ni karaoa kain are n 1 Nibwaai 3:2–7. Tao ko kona ae aongkoa ngkoe Riaai ao ko tuangiia natim bwa a na oki nako Ierutarem n anaa te bwaatua aika buraati. Kaoiia bwa a na kaeka ni bon oin aia taeka bwa aongkoa ngaiia Raman ao Remuera ke Nibwaai. Tera tabeua bwaai ae e a tia te Atua ni tua nakoira bwa ti na karaoia? (tarai tamnei 103–15 inanon te Gospel Art Book ke Motiaea 18:8–10 ibukin iango). Ti na kanga n riki n ai aron Nibwaai?

1 Nibwaai 3:19–21; 5:19–22

Koroboki aika tabu bon kaubwai aika a rangi n tamaroa.

• A rangi ni kakaawaki koroboki aika tabu irouia ana utu Riaai. Ni kamataata aio, ko kona ni kaoiia natim ni buokiko ni karakina ke ni katea kaina bwa tera ae a karaoia Nibwaai ma tarina ni karekea te bwaatua aika buraati:Kaoiia ataei bwa a na buokiko n taekinna ke ni karaoia n te kaotioti te bwai are a karaoia Nibwaai ma tarina ni karekean bwaatua aika buraati: a mwananga n te kawai ae abwabwaki, a anganako aia koora ma aia tirewa, ao a karabaia n te nangananga ni kamanoi maiuia. Imwiina ko kona ni wareka 1 Nibwaai 5:21 ao ni marooro iaona bwa bukin tera koroboki aika tabu a rangi ni kakawaki irouia ana utu Riaai. Bukin tera a kakawaki nakoira? Ti na kanga ni kawakin koroboki aika tabu n ai aron te kaubwai?

Nibwaai ao ana utu ataa manenan koroboki aika tabu.

1 Nibwaai 4:6

Te Tamnei ae Raoiroi e na kairai ngkai I ukoukora ana kantaninga te Uea.

• Imwiin te uaia n rinanoa 1 Nibwaai 3 e kanga Nibwaai ma tarina ni kataia ni karekea te bwaatua aika buraati, warekia ma natim 1 Nibwaai 4:6 ni kunea bwa tera ae e karaoia Nibwaai n anganna te konaa n tokanikai n tokina. Imwiina a kona natim ni korei ni karinanii bwaai ake e tangiria te Atua bwa a na karaoia. E na kanga te Tamnei ae Raoiroi ni buokiira inanon kaangaanga aikai?

Ibukin iango riki tabeua, taraa te beeba ni kaongora n te namwakaina aio n te Rao maekatiin.

I Ongeaba ni Bwanaan te Tamnei, iroun Walter Rane