baam̧le eo ej ekkatak jeje ko rekwojarjar

Kōjerbal Itok, Ļoor Eō—N̄an M̧weeo im Kabun̄

Bok in Katak in Ej N̄an Wōn?

Bok in katak in ej n̄an aolep ro rej kōņaan katak kōn Bok in Mormon—kajjojo armej, āinwōt juon baam̧le, im ilo kūlaaj ko an Kabun̄ in. Eļan̄n̄e kwojjan̄in kar emakijkij ekkatak jeje ko rekwojarjar m̧okta, bok in katak in emaron̄ jipan̄ eok jinoe. Eļan̄n̄e em̧ōj an wōr kadede am̧ juon iminene em̧m̧an kōn ekkatak jeje ko rekwojarjar, bok in emaron̄ jipan̄ eok kōm̧m̧an bwe en ļapļo̧k am̧ meļeļe en̄jake ko am̧.

Kajjojo Armej im Baam̧le ko ilo M̧weeo

Jikin eo em̧m̧an n̄an katak gospel in ej ilo m̧weeo. Rūkaki ro am̧ ilo m̧ōnjar eo remaron̄ jipan̄ eok, im kwomaron̄ bōk kōketak jān ward membōr ro jet. Ak n̄an mour ilo jetōb, kwe im baam̧le eo am̧ aikuj naajdik eo kajjojo raan jān, “em̧m̧an eo an naan in Anij” (Moronai 6:4; bar lale Russell M. Nelson, “Naan in Kōppeļļo̧k ko,” Liaona, Okt. 2018, 6–8).

Kōjerbal bok in ekkatak in ilo jabdewōt wāween me ejipan̄ eok. Laajrak in ej kwaļo̧k jet m̧ool ko indeeo loi ilo Bok in Mormon im elmokwot in ļōmņak ko im m̧akūtkūt ko n̄an jipan̄ eok make ekkatak jeje ko rekwojarjar, ippān baam̧le eo am̧, ak ro m̧ōttam̧, Ilo am̧ katak, ļoor im̧we eo an Jetōb n̄an lo m̧ool ko indeeo me ewōr tokjeer n̄an eok. Pukot ennaan ko an Anij n̄an eok, im ļoor im̧we ko kwoj būki.

Rūkaki ro im Rikatak ro ilo M̧ōnjar eo

N̄e kwoj katakin juon kūlaaj in Būraimere, jodikdik ak rūtto ilo Jabōt Jikuuļ kūlaaj, doulul eo an Priesthood eo an Aaron, kūlaaj eo an Doulul eo an Jiron̄ ro, em̧ōj kōketak eok n̄an kōjerbal laajrak ko ilo bok in katak in ilo am̧ kōppopo n̄an katakin. Itok, Ļoor Eō—N̄an M̧weeo im Kabun̄ ej juon laajrak in kein katak ko n̄an Jabōt kūlaaj eo am̧. Ļōmņak ko n̄an ekkatak ilo bok in katak in em̧ōj āje n̄an katak ilo m̧weeo im ilo kabun̄. Ilo am̧ kōppopo n̄an katakin, jino kake en̄jake ko am̧ make ilo jeje ko rekwojarjar. Kōppopo eo am̧ eaorōktata enaaj waļo̧k ilo am̧ riiti jeje ko rekwojarjar im pukot im̧we eo an Jetōb Kwojarjar. Kappukot m̧ool ko indeeo me remaron̄ jipan̄ eok erom̧ eļapļo̧k āinwōt Jemedwōj Ilan̄ im Jisōs Kraist. Itok, Ļoor Eō emaron̄ jipan̄ eok kalikkar jet iaan m̧ool kein n̄an meļeļe kobban jeje ko rekwojarjar.

Likūt wōt ilo ļōmņak bwe ekkatak gospel in, ilo ijo em̧m̧antata, ej ped ioļapļap in m̧weo im Kabun̄ in ej rie. Ilo naan ko jet, lukkuun eddo eo am̧ ej n̄an jipan̄ armej ro kwoj katakin kōn kijejeto ko aer n̄an katak im mour kake gospel in ilo m̧weeo. Leļo̧k n̄an er iien em̧m̧an n̄an kwaļo̧k en̄jake ko aer, ļōmņak ko, im kajjitōk ko kōn eoon ko ilo jeje ko rekwojarjar. Kajjitōk ippāer n̄an kwaļo̧k m̧ool ko indeeo rej loi. En̄in men eo eļap an aorōk jen baj lali katak ko.

Būraimere

Am̧ kōppopo n̄an katakin Būraimere ej ijjino ilo am̧ make ekkatak Bok in Mormon im ippān baam̧le eo am̧. Ilo am̧ kōm̧m̧an āindein, bōk im̧we ko an jetōb im en̄jake ko jān Jetōb Kwojarjar kōn ajri ro ilo Būraimere kūlaaj eo am̧. Jar kake, bwe Jetōb en maron̄ im̧we eok kōn ļōmņak ko n̄an jipan̄ er katak kōn gospel eo an Jisōs Kraist.

Ilo am̧ kōppopo n̄an katakin, kwomaron̄ in bōk im̧we ko jet jān am̧ etali laajrak in katak ko ilo bok in jipan̄ in. Kajjojo jekjek ilo Itok, Ļoor Eō—N̄an M̧weeo im Kabun̄ ewōr ie taitōļ jekjen “Ļōmņak ko n̄an Katakin Ajri ro.” Ļōmņaki ļōmņak kein āinwōt elmokwot n̄an jipan̄ eok en̄jake im̧we. Kwojeļā kajjien ajri ro ilo Būraimere kūlaaj eo am̧—im enaaj em̧m̧anļo̧k am̧ jeļā kajjier ilo am̧ iaio̧ ippāer ilo kūlaaj. Anij ebar jeļā kajjier, im Enaaj im̧we eok ilo wāween ko rem̧m̧antata ilo am̧ katakin im kōjeraam̧m̧an er.

Emaron̄ bwe ajri ro ilo kūlaaj eo am̧ em̧ōj aer kar kōm̧m̧ane jet iaan m̧akūtkūt ko ilo Itok, Ļoor Eō ippān baam̧le ko aer. Ej Em̧m̧an Wōt! Āliji em̧m̧an. Ļōmņak in karuwaineneik ajri ro n̄an kwaļo̧k n̄an doon ta eo raar ekkatak ilo m̧weeo—men̄e kwoj aikuj peek wāween ko n̄an an ajri ro bōk kuņaer men̄e raar jab katak ilo m̧weeo. Em̧m̧anļo̧k an ajri ro ekkatak n̄e m̧ool kein rej āliji ilo elōn̄ kain im wāween m̧akūtkūt ko. Eļan̄n̄e kwoj loe ke em̧m̧an m̧akūtkūt in ekkatak eo n̄an ajri ro, ļōmņak in bar āliji, eļaptata n̄e kwoj katakin ajri ro reddikļo̧k. Kwomaron̄ bar etale m̧akūtkūt eo an katak eo ļo̧k.

Ilo allōn̄ ko elōn̄ ļalem Jabōt ie, rej rōjan̄ rūkaki ro an Būraimere n̄an jeneji laajrak in jikejuuļ eo an Itok, Ļoor Eō ilo laajrak eo an Jabōt ļalem ippān juon ak elōn̄ elmokwot in ekkatak ko ilo “Appendix B: N̄an Būraimere—Kepooj Ajri ro Nejid n̄an Mour Ejjeļo̧k Jemļo̧kin ilo Iaļen Bujen eo an Anij..”

Jabōt Jikuuļ Kūlaaj ko an Jodikdik ro im Rūtto ro

Juon un eļap jej kuk ippān doon ilo Jabōt Jikuuļ kūlaaj ko ej n̄an jipan̄ im kōketak doon ilo ad kajjieon̄ in ļoor Jisōs Kraist. Juon wāween epidodo n̄an kōm̧m̧ane menin ej n̄an kajjitōk kajjitōk āinwōt “Ta eo Jetōb Kwojarjar ekar katakin eok wiik in ilo am̧ kar ekkatak Bok in Mormon jān Itok, Ļoor Eō?” Uwaak ko n̄an kajjitōk in emaron̄ tōlļo̧k n̄an kōnono ko ewōr tokjeer me rej kalōk tōmak ilo Jisōs Kraist im gospel in An.

Innām komi maron̄ kōnono kake pedped ioon elmotkwot in ekkatak ko ilo Itok, Ļoor Eō. N̄an waanjon̄ak, juon ļōmņak in ekkatak maron̄ lale Alma 36 im kōm̧m̧ane juon laajrak in naan ko me rej kwaļo̧k kōn jerbal eo an Rilo̧mo̧o̧r kōn ukweļo̧k. Kwomaron̄ kajjitōk ippān ro uwaan kūlaaj eo n̄an kwaļo̧k jabdewōt naan ko raar loe. Ak kwomaron̄ joļo̧k jidik iien kōm̧m̧ane laajrak eo ippān doon āinwōt juon kūlaaj.

Doulul ko an Priesthood eo an Aron im kūlaaj ko an Doulul eo an Jiron̄ ro.

N̄e Doulul ko an Priethood eo an Aron im kūlaaj ko an Doulul eo an Jiron̄ ro rej ippān doon ilo Jabōt, kōttōbar eo aer eoktak jidik jān Jabōt Jikuuļ kūlaaj eo. N̄an kakkobaba n̄an jipan̄ doon katak kōn gospel eo an Jisōs Kraist, kurup kein rej bar ippān doon n̄an kapilōk doon n̄an kadedeļo̧k jerbal in lo̧mo̧o̧r im mour ilo aiboojoj eo eutiejtata (lale Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 1.2). Rej kōm̧m̧ane menin ium̧win tōl eo an kūlaaj im doulul būreejtōnji ro.

Kōn un in, kajjojo kweilo̧k an doulul ak kūlaaj raikuj jino jen ippān juon membōr in būreejtōnji eo an doulul ak kūlaaj ej tōl ekōnono eo kōn kijejeto ko n̄an, n̄an waanjon̄ak, mour kake gospel in, jerbal in karejar n̄an armej ro rej pād ilo aikuj, kwaļo̧k gospel in, ak bōk kuņaad ilo tampeļ im jerbal in menmenbwij an baam̧le.

Ālkin iien kapilōk in ippān doon, juon rūkaki ej tōl kūlaaj eo ak doulul eo n̄an katak gospel in ippān doon. Ritōl eo erūtto ak membōr ro ilo kūlaaj ak doulul eo maron̄ in jitōn̄e n̄an katakin. Būreejtōnji eo an kūlaaj ak doulul, kōnono ippān ritōl eo erūtto, kōm̧m̧ani ijjitōn̄ ko.

Armej ro kar jitōn̄ er n̄an katakin raikuj kōppopo n̄an kōjerbal elmokwot in ekkatak ko ilo laajrak eo an wiik in ilo Itok, Ļoor Eō. Ilo kajjojo laajrak, pija in ej kwaļo̧k juon m̧akūtkūt me elukkuun jejjet n̄an jodikdik ro. Ijoke, jabdewōt elmokwot ko ilo laajrak in eaikuj jerbal āinwōt juon ekkatak n̄an jodikdik ro.

N̄an juon būrookraam̧ n̄an kweilo̧k ko an doulul im kūlaaj ko, lale appendix D.