Mormon ej jeje ioon pileij gold ko

Jānwode 1–7: Bar juon Kallim̧ur kōn Jisōs Kraist

Kadkadin Peij ko an Bok in Mormon

M̧okta jān am̧ etal n̄an 1 Nipai jebta 1, kwonaaj loe bwe Bok in Mormon ejjab bok bajjōk. Ej kwaļo̧k kadkadin peij ko kōn juon bwebwenato ejjab āinwōt ko jet—ekoba loļo̧k ko an enjeļ ro, juon ļo̧o̧k in etto eo kar kalbwini bukwi iiō ilo juon to̧l, im juon ļaddik ekar ukote ļo̧o̧k eo kōn kajoor eo an Anij. Bok in Mormon ejjab baj juon bwebwenato in armej ro etto ilo Amedka. Ej pukot n̄an kareel aolep “bwe Jisōs ej RiKraist eo” (taitōļ peij eo an Bok in Mormon), im Anij Make eaar kwaļo̧k kilen kar je, kōjparoke, im kōm̧m̧an bwe en pād n̄an kōj. Iiō in, ilo am̧ riiti Bok in Mormon, jar kake, im mour kōn katak ko, kwonaaj karuwaineneik kajoor eo an Rilo̧mo̧o̧r ilo mour eo am̧. Im kwomaron̄ emakūt im ba, āinwōt an Rikam̧ool ro Jilu kar kōm̧m̧ane ilo naan in kam̧ool eo aer, “Ej juon men ekabwilōn̄lōn̄ [i]meja.”

Ļōmņak ko n̄an Ekkatak ilo M̧weeo im ilo Kabun̄ in

Taitōļ peij eo an Bok in Mormon

Ekkatak Bok in Mormon emaron̄ kōkajoorļo̧k tōmak eo aō ilo Jisōs Kraist.

Taitōl peij eo an Bok in Mormon ej letok eļapļo̧k jān baj juon taitōļ. Ilubwiljin men ko jet, ej kōlaajraki jet jibadbad ko kōn ļo̧o̧k in ekwojarjar. Pukot jibadbad kein ilo taitōļ peij eo. Kajjitōk ko āinwōt kein remaron̄ jipan̄ eok ilo am̧ kōļmenļo̧kjeņ: Etke elōn̄ ippād Bok in Mormon? Elmen an Bok in Mormon oktak jen bok ko jet?

Emaron̄ em̧m̧an kiiō n̄an kōm̧m̧ane an juon make ak baam̧le eo karōk n̄an riiti Bok in Mormon ilo iiō in. N̄āāt im ia eo kwonaaj riit? Elmen am̧ naaj karuwaineneik Jetōb ilo ekkatak eo am̧? Ewōr ke men eo eaorōk kwonaaj lale ilo am̧ ekkatak? N̄an waanjon̄ak, kwomaron̄ lali eoon ko me rej kadedeļo̧k jibabdbad ko kwoj loi ilo taitōļ peij eo. Kwomaron̄ kōm̧m̧ane juon laajrakin eoon ko me rej kalōk am̧ tōmak ilo Jisōs Kraist.

Bar lale 2 Nipai 25:26; Mosaia 3:5–8; Alma 5:48; 7:10–13; Hilamōn 5:12; 3 Nipai 9:13–18; 11:6–14; Moronai 10:32–33.

Juon kallim̧ur in kanaan. Būreejtōn Russell M. Nelson eaar ba, “Ij kallim̧ur bwe ilo am̧ kōļmenļo̧kjeņ kōn ta eo kwar riiti [ilo Bok in Mormon eo], wūntō ko an lan̄ renaaj peļļo̧k, im kwonaaj bōk uwaak ko n̄an kajjitōk ko am̧ make n̄an tōl mour eo am̧ make” (“Bok in Mormon: Eļan̄n̄e en kar Ejjeļo̧k Elmen Nej kar Mour eo Am?,” Liaona, No̧b. 2017, 62–63).

pija in jemenere

Kadkad in Bok in Mormon.; “Naan in Kam̧ool eo an Rikam̧ool ro Jilu”; “Naan in Kam̧ool eo an Rikam̧ool ro Ruwalitōk”

Imaron̄ in juon rikam̧ool kōn Bok in Momron.

Jetōb Kwojarjar emaron̄ kam̧ool n̄an eok bwe Bok in Mormon ej m̧ool, men̄e kwojjan̄in kar lo pileij gold ko āinwōt kar Rikam̧ool ro Jilu im Rikam̧ool ro Ralitōk. Ilo am̧ riiti naan ko aer, ļōmņak kōn an naan in kam̧ool ko aer rej kōjoor eo am̧.

Ta eo ej im̧we eok kōn wāween an rikam̧ool rein kwaļo̧k naan in kam̧ool eo aer kōn Bok in Mormon? Kōļmenļo̧kjeņ kōn elmen am̧ maron̄ kwaļo̧k naan in kam̧ool eo am̧ kōn Bok in Mormon—eļaptata kam̧ool kōn Jisōs Kraist. N̄an waanjon̄ak, antoone am̧ kōnono ippān juon m̧ōttam̧ eo ejjan̄in kar ron̄ kōn Bok in Mormon m̧okta. Ta eo kwon kar ba n̄an e? Elmen am̧ nej kar kajjieon̄ kareel eo m̧ōttam̧ n̄an riiti? Ļōmņak n̄an lale Kadkad in Bok in Mormon. Kwonaaj lo kōmeļeļe ko ijeņ me renaaj lukkuun jipan̄ kwaļo̧k n̄an ro m̧ōttam̧. Pija kein ilaļ remaron̄ bar lewaj ļōmņak ko:

• “Kadkad in Bok in Mormon”

• “Ta in Bok in Mormon? Juon Likio in Kōmeļeļe 60 Jōkōn Aitokan”

• “Juon Bwebwenato ilo Bok in Mormon”

Ļōmņak in kōm̧m̧ane juon laajrak in men ko kwomaron̄ kwaļo̧ke n̄an eo m̧ōttam̧ kōn Bok in Mormon. Kajjieon̄ kwaļo̧k kōn Bok in Mormon kōjerbal Book of Mormon app eo.

Bar lale Ronald A. Rasband, “Rainin,” Liaona, No̧b. 2022, 25–28; Gospel Topics, “Book in Mormon,” Gospel Library; “An Angel from on High,” Hymns, no. 13.

Josep Smith im Rikam̧ool ro Jilu rej jar ippān doon

Rikam̧ool ro Jilu rekar kwaļo̧k naan in kam̧ool kōn Bok in Mormon eo.

“Naan in Kam̧ool eo an Rikanaan Josep Smith”

Itok eo an Bok in Mormon eaar juon menin kabwilōn̄ļōn̄.

Eļan̄n̄e jabdewōt ej kajjitōk ippam ia eo Bok in Mormon eaar itok jene, ta eo kwonaaj kar ba? Elmen am̧ naaj kar kōmeļeļeik an pein Irooj boktok Bok in Mormon? Ilo am̧ riiti naan in kam̧ool eo an Josep Smith, lukkuun lale elmen an kar kōmeļeļeiki. Pedped ioon ta eo kwoj riiti, ta eo kwoj ļōmņak an Anij en̄jake kōn aorōk eo an Bok in Mormon?

Bar lale Ulisses Soares, “Waļo̧ktok eo an Bok in Mormon,” Liaona, Māe 2020, 32–35; Armej ro Rekwojarjar, vol. 1, The Standard of Truth, 21–30; Gospel Topics Essays, “Ukook eo an Bok in Mormon,” Gospel Library.

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin ko.

Ļōmņak ko n̄an Katakin Jodikdik ro

Taitōļ peij eo an Bok in Mormon

Riiti Bok in Mormon ej jipan̄ eō bōk tōmak ilo Jisōs Kraist.

• Kōm̧m̧an bwe ajri ro nejum̧ ren lale im jibwe juon kape in Bok in Mormon. Jipan̄ er jitōn̄ļo̧k taitōļ eo, Bar juon Kallim̧ur kōn Jisōs Kraist. Kwomaron̄ bar jipan̄ er pukote, ilo taitōļ peij eo, naan eo “Jisōs ej RiKraist eo, Anij Indeeo, ej kwaļo̧k E n̄an laļ ko otemjeļo̧k.” Jipan̄ er meļeļe bwe ej meļeļein bwe Bok in Mormon ej katakin kōj kōn Jisōs Kraist. Jiron̄ er ilo tukaduin wāween an kar Bok in Mormon kōkajoorļo̧k tōmak eo am̧ ilo Jisōs Kraist. Kwomaron̄ bar kajjitōk ippāer kōn bwebwenato ko em̧m̧an ippāer kōn Bok in Mormon. Al “Book of Mormon Stories” (Children’s Songbook, 118–19) emaron̄ kakeememej er kōn jet iaan bwebwenato kein.

Kadkad in Bok in Mormon

Bok in Mormon ej dekā in jabōn em̧ n̄an tōmak in ad.

• Peij in m̧akūtkūt eo an wiik in im pija in ilaļ remaron̄ jipan̄ ajri ro meļeļe naan ko an Josep Smith ilo Kadkad in Bok in Mormon: “Bok in Mormon [ej] dekā in jabōn em̧ n̄an tōmak in ad.” Emaron̄ in limo n̄an ekkal ak jin̄aik juon arch ippān juon dekā in jabōn em̧ ilo ilōn̄tata io̧lepen. Ta eo ej waļo̧k eļan̄n̄e dekā in jebōn em̧ in ej em̧m̧akūt? Ta eo en kar waļo̧k eļan̄n̄e eban kar wōr ippād Bok in Mormon? Kom̧ maron̄ riit ippān doon pārokōrāāp eo āliktata in kadkad in n̄an lale ta ko jet jej ekkatak n̄e jej bōk m̧ool eo an Bok in Mormon Elmen ad maron̄ kōm̧m̧an bwe Bok in Mormon en dekā in jabōn em̧ in ad tōmak ilo Jisōs Kraist?

juon arch ippān dekā in jabōn em̧ ej depdep ilo ijo jikin

Bok in Mormon ej dekā in jabōn em̧ eo an Kabun̄ in ad.

“Naan in Kam̧ool eo an Rikam̧ool ro Jilu”; “Naan in Kam̧ool ko an Rikam̧ool ro Ruwalitōk”

Imaron̄ in juon rikam̧ool kōn Bok in Momron.

• N̄an jipan̄ ajri ro nejum̧ meļeļe ta meļeļein erom̧ juon rikam̧ool, kwomaron̄ kōmeļeļeik er jet men kwaar loi me rejjan̄in kar. Innām kōtļo̧k bwe ren bar kōm̧m̧ane n̄an kwe. Menin emaron̄ tōlļo̧k n̄an juon oktak kōn armej ro 11 raar loe pileij gold ko jān ke Bok in Mormon ekar ukook. Ilo am̧ riiti naan in kam̧ool ko ippān doon, kwomaron̄ kōnono kaki etke rikam̧ool rein jilu rekar kōņaan bwe armej ro jet ren jeļā kōn naan in kam̧ool ko aer. Wōn ro jekōņaan ba n̄an er kōn Bok in Mormon?

“Naan in kam̧ool eo an Rikanaan Josep Smith”

Bok in Mormon kar letok n̄an kōj kōn kajoor eo an Anij.

• N̄an jipan̄ ajri ro nejum̧ jeļā elmen an Anij kar letok n̄an kōj Bok in Mormon, kwomaron̄ riiti jimettan in “Naan in Kam̧ool eo an Rikanaan Josep Smith” n̄an er. Kwomaron̄ bar kōjerbal “Jebta 1: Elmen Ad kar Bōk Bok in Mormon” (ilo Bwebwenato ko an Bok in Mormon, 2–4). Ajri ro nejum̧ remaron̄ m̧ōņōņō in ikkure jen bwebwenato eo ilo jidik iien.

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjin.

Josep ej būki pilej gold ko jān Moronai

Moronai ej Liļo̧k Pileij Gold ko,, jān Gary L. Kapp

Bok in Mormon ej dekā in jabōn em̧ eo n̄an tōmak in ad.