Ettōņak eo an Liai, jān Steven Lloyd Neal

Jānwode 15–21: “Itok im M̧ōn̄ā Leen”

1 Nipai 6–10

Ettōņak eo an Liai—kōn aen in dāpdep eo, tab in marok eo, m̧weeo ekilep im ļap, im wōjke eo ej make “wōt kaiijoļjoļ tata” leen—ej juon kūr eim̧we n̄an bōk kōjeraam̧m̧an in iakwe eo an Rilo̧mo̧o̧r kōn pinmuur in en̄taan eo. Bwe Liai, kōn menin, visōn in ej kōn baam̧le eo an: “Kōn men eo iaar loe, ewōr unin aō lan̄lōn̄ ilo Irooj kōn Nipai im barāinwōt kōn Sam. … Bwe lo, Leman im Lemuel, ij kanooj mijak kōn kom̧” (1 Nipai 8:3–4). Ke em̧ōj an Liai kōmeļeļeik ettōņak eo an, eaar akweļap n̄an Leman im Lemuel n̄an “eo̧ron̄ naan ko an, bwe Irooj en tūriam̧o kake er” (1 Nipai 8:37). Men̄e elōn̄ alen am̧ ekkatak ettōņak eo an Liai, tōre in ļōmņak kōn an kar Liai kōm̧m̧ane—ļōmņak kōn juon eo kwoj iakwe. Ilo am̧ kōm̧m̧ane, jokne eo an aen in dāpdep eo, kauwōtata eo an m̧weeo ekilep im ļap, leen eo ej make wōt kaijoļjoļ enaaj bōk juon meļeļe ekāāl. Ilo am̧ meļeļe eļapļo̧k kōn “aolep en̄jake ko [an] ro jinen im jemen rejouj” ro raar bōk visōn in ekabwilōn̄lōn̄.

Ļōmņak ko n̄an Ekkatak ilo M̧weeo im ilo Kabun̄ in

1 Nipai 7:6–21

Imaron̄ jeo̧rļo̧k an ro jet bōd.

Ta eo eim̧we eok kōn waanjon̄ak eo an Nipai ilo 1 Nipai 7:6–21? Elmen ad jeraam̧m̧an n̄e jej “m̧ool ilo jeo̧rļo̧k” an doon bōd? Video eo “The Lord Delivers Nephi from His Rebellious Brothers” (Gospel Library) emaron̄ in lukkuun jipan̄ ilo am̧ ekkatak.

1 Nipai 8

Jirōk likattōttōt ilo naan ko an Anij ej tōlļo̧k eō n̄an Rilo̧mo̧o̧r im jipan̄ eō en̄jake An iakwe.

Ettōņak eo an Liai ej letok juon kūr n̄an lale kopād ia ilo iaļ eo am̧ make n̄an erom̧ āinwōt Kraist. Būreejtōn Boyd K. Packer ekar ba: “Kopād ie; kōj aolep pād ie. Ettōņak eo an Liai ak visōn eo kōn aen in dāpdep eo ewōr ie aolep men otemjeļo̧k juon … Armej ro Rekwojarjar rej aikuji n̄an meļeļe mālijon̄ an mour” (“Lehi’s Dream and You,” New Era, Jān. 2015, 2).

Ilo am̧ ekkatak, ļōmņak in kanne juon jaat āinwōt in.

Kōkaļļe jān ettōņak eo an Liai	Meļeļein	Kajjitōk ko n̄an kōļmenļo̧kjeņ
Kōkaļļe jān ettōņak eo an Liai Wōjke im leen (1 Nipai 8:10–12)	Meļeļein	Kajjitōk ko n̄an kōļmenļo̧kjeņ Ta eo inaaj kōm̧m̧ane n̄an kūr tok ro jet n̄an bōk m̧ōttan iakwe eo an Anij?
Kōkaļļe jān ettōņak eo an Liai Reba eo (1 Nipai 8:13)	Meļeļein	Kajjitōk ko n̄an kōļmenļo̧kjeņ
Kōkaļļe jān ettōņak eo an Liai Aen in dāpdep eo (1 Nipai 8:19–20,30)	Meļeļein	Kajjitōk ko n̄an kōļmenļo̧kjeņ
Kōkaļļe jān ettōņak eo an Liai Tab in marok eo (1 Nipai 8:23)	Meļeļein	Kajjitōk ko n̄an kōļmenļo̧kjeņ
Kōkaļļe jān ettōņak eo an Liai Em̧ eo ekilep im ļap (1 Nipai 8:26–27,33)	Meļeļein	Kajjitōk ko n̄an kōļmenļo̧kjeņ
Kōkaļļe jān ettōņak eo an Liai	Meļeļein	Kajjitōk ko n̄an kōļmenļo̧kjeņ

Kwomaron̄ bar lale eoon kein ilaļ n̄an ekkatak eļapļo̧k kōn kurup in armej ro emān Liai ekar loe: 1 Nipai 8:21–23, 24–28, 30, im 31–33. Ta oktak ko kwoj keememeji ikōtaan kurup kein? Etke jet armej raar etal ālkin aer tōpar wōjke eo im edjon̄e leen (lale eoon 24–28)? Ta eo kwoj katak jān en̄jake in?

Bar lale Kevin W. Pearson, “Pād Iturin Wōjke e,” Kweilo̧k eo Eļap, Eprōļ 2015, 114–16; “Lehi Sees a Vision of the Tree of Life” (video), Gospel Ļāibrāre.

Kōtļo̧k an rikatak ro kwaļo̧k make ta eo rej loe. Ļōmņak in karuwaineneik rikatak ro n̄an lali jeje ko rekwojarjar ilo iien ko aer make kōn m̧ool ko rej loi. N̄an waanjon̄ak, kwomaron̄ karuwaineneik er n̄an lali eoon in jipan̄ ko ilo jaat eo ilōn̄ ilo er make ak ilo juon kurup edik. Renaaj keememej im m̧ōņōņō kōn m̧ool ko rej loi.

Common Thread, jān Kelsy im Jesse Barrett

1 Nipai 10:2–16

Rikanaan ro etto raar jeļā kōn jerbal eo an Jisōs Kraist im kar kam̧ool kōn E.

Etke kwoj ļōmņak Irooj ekar kōņaan baam̧le eo an Liai—im kōj aolep—n̄an jeļā m̧ool ko kar loi ilo 1 Nipai 10:2–16? Ļōmņak elmen am̧ maron̄ jipan̄ ro kwoj iakwe karuwaineneik Rilo̧mo̧o̧r n̄an mour ko aer.

1 Nipai 10:17–19

Anij ekar kwaļo̧k m̧ool eo n̄an eō kōn kajoor eo an Jetōb Kwojarjar. 

Elmen am̧ uwaak n̄e kar kajjitōk ippam̧ n̄an mour kōn juon pedped in gospel kwojjab meļeļe kake? Ilo eoon kein ilaļ, keememej oktak ko ikōtaan uwaak eo an Nipai n̄an visōn eo an Liai (lale 1 Nipai 10:17–19; 11:1) im uwaak eo an Leman im Lemuel (lale 1 Nipai 15:1–10). Ta m̧ool ko Nipai emeļeļeiki me kar tōl e n̄an uwaak āinwōt an kar kōm̧m̧ane?

N̄an ļōmņake waanjon̄ak eo an Nipai, kōm̧m̧ane juon laajrak in pedped ko an gospel kwoj kōņaan jeļā em̧m̧anļo̧k. Ta eo kwomaron̄ kōm̧m̧ane n̄an lo uwaak ko n̄an kwe make? (Bar lale “M̧ool Enaaj Kanemkwoj Eok” ilo N̄an Kōkajoorļo̧k Jodikdik Ro: Kōm̧m̧ani Kālet ko Reim̧we, 30–33.)

Āinwōt an kar Nipai loe e make bwe naan ko an jemān raar m̧ool, jemaron̄ kōm̧m̧an āinwōt n̄e jej ron̄ naan ko an rikanaan ro im rijilōk ro raan kein. Ta eo rikanaan ro im rijilōk ro rej katakin ilo kweilo̧k eo eļap ej kab m̧ōjļo̧k? Kwaar ke bōk juon kam̧ool an juon make kōn ta eo raar kwaļo̧ke?

Bar lale 1 Nipai 2:11–19; Katak im Bujen Ko 8:1–3; “Search, Ponder and Pray,” Children’s Songbook, 109; Gospel Topics, “Revelation,” Gospel Ļāibrāre.

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjin ko.

Ļōmņak ko n̄an Katakin Ajri ro

1 Nipai 8

Jirōk likattōttōt n̄an naan eo an Anij ej tōl eō n̄an E im ej jipan̄ eō en̄jake An iakwe.

• Ajri ro nejum̧ emaron̄ limo ippāer jin̄a juon jin̄a kōn visōn eo an Liai ilo ami riiti 1 Nipai 8 ippān doon. Kōtļo̧k bwe ren kwaļo̧k pija ko aer, im jipan̄ er lo ta kōkkaļļe ko rej bōk jenkwaer ilo ettōņak eo (lale 1 Nipai 11:21–22; 12:16–18; 15:23–33, 36 im peij in m̧akūtkūt eo an wiik in). Kajjitōk ippāer n̄an kwaļo̧k jon̄an uwaak ko wōt n̄e remaron̄e n̄an kajjitōk in: Ta eo jej ekkatak jān visōn eo an Liai?

• Ewōr ke jabdewōt men ippam̧ me emaron̄ pinej jenkwan aen in dāpdep eo ilo visōn eo an Liai, āinwōt juon baib ak juon aļaļ? Kōtļo̧k an ajri ro nejum̧ dāpiji ilo am̧ tōlļo̧k er ipeļakin ruum̧ eo n̄an pijain Rilo̧mo̧o̧r eo. Etke aen in dāpdep eo eaorōk ilo visōn eo an Liai? Lale 1 Nipai 8:20–24, 30). Ekōjkan an aen in dāpdep eo ej jutak kōn naan an Anij?

• Kajjitōk ippān jet iaan ajri ro nejum̧ n̄an riiti 1 Nipai 8:10–12 im kōmeļeļeiki ta eo Liai ekar loe. Kajjitōk ippān ro jet n̄an riiti 1 Nipai 11:20–23 im kōmeļeļeik ta eo Nipai ekar loe. Etke enjeļ eo ekar kwaļo̧k n̄an Nipai nin̄nin̄ Jisōs n̄an katakin e kōn iakwe eo an Anij? Kōnono ippān ajri ro nejum̧ kōn elmen aer kar en̄jake iakwe eo an Anij ilo mour ko aer. Juon al āinwōt “I Feel My Savior’s Love” (Children’s Songbook, 74–75) emaron̄ jipan̄ er ļōmņake waanjon̄ak ko.

1 Nipai 10:17–19; 11:1

Anij ekar kwaļo̧k m̧ool eo n̄an eō kōn kajoor eo an Jetōb Kwojarjar.

• Elmen am̧ maron̄ jipan̄ ajri ro nejum̧ meļeļe ta eo Nipai ekar kwaļo̧ke ilo 1 Nipai 10:19? Bōlen kwon nukwij juon pijain Rilo̧mo̧o̧r ak bar juon kein ekkatak ilowaan juon būļan̄kōj im kajjitōk ippān ajri ro nejum̧ n̄an erļo̧ke. Ilo am̧ riiti 1 Nipai 10:19, remaron̄ kotak pāier n̄e rej ron̄ naan ko “erļo̧ki” im “Jetōb Kwojarjar.” Innām ren kwaļo̧k juon en̄jake iien eo Jetōb Kwojarjar ekar jipan̄ er loe m̧ool eo.

• Kajjitōk ippān ajri ro nejum̧ n̄an kōnono kōn wāween aer maron̄ lo uwaak ko n̄an juon kajjitōk. Ta eo Nipai en kar ba eļan̄n̄e juon ekar kajjitōk ippān ewi wāween an lo uwaak ko n̄an juon kajjitōk kōn gospel eo? Rōjan̄ ajri ro n̄an kappukote ilo aer riiti 1 Nipai 10:17–19; 11:1.

• Ajri ro nejum̧ renan̄in ke kar en̄jake ke Jetōb Kwojarjar ekar jipan̄ er jeļā bwe men ko rekar m̧ool? Kōtļo̧k bwe ren kwaļo̧k en̄jake ko aer. Ta eo jen kar ba n̄an eo m̧ōttad eo ej ļōmņak eban maron̄ bōk uwaak ko jān Jetōb Kwojarjar? Ta eo remaron̄ loe ilo 1 Nipai 10:17–19 im 11:1 me emaron̄ jipan̄ eo m̧ōttad?

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjin eo.

Wōjke in Mour, jān Avon Oakeson