Liai ej Ito-Itak Iturin Lom̧aļo̧ Ekilm̧ur, jān Gary Smith

Jānwode 8–14: “Inaaj Ilo̧k im Kōm̧m̧ani”

1 Nipai 1–5

Bok in Mormon eaar jino kōn juon bwebwenato in juon baam̧le ro raar lukkuun ioon apan̄ ko. Eaar waļo̧k ilo 600 BC, ak elōn̄ men ko jet kōn bwebwenato in me emaron̄ einļo̧k wōt baam̧le ko rainin. Baam̧le in raar jokwe ilo juon laļ eo eļap nana ie, ak Irooj eaar kallim̧uri er bwe eļan̄n̄e renaaj ļoor E, Enaaj tōl ļo̧k er n̄an kōjparok. Ilo iaļ eo aer ļo̧k, ekar wōr aer iien em̧m̧an im iien ko renana; raar en̄jake eļap kōjeraam̧m̧an im kabwilōn̄lōn̄ ko, ak raar bar kwaļo̧k aer iakwelel im jum̧ae. Ilo jeje ko rekwojarjar ejakut an kwaļo̧k juon bwebwenato in juon baam̧le eo ej kajjieon̄ in mour kake gospel eo: ro jinen im jemān rej kakkōt n̄an kwaļo̧k tōmak ilo baam̧le eo aer im inepata kōn kōjparok eo aer, ajri ro rej kālet n̄e rej tōmak jineer im jemeer, im būratōr ro rej ebanban im ellotaan—im jet iien joļo̧k an doon bōd. Ilo aolepen, ewōr kajoor kōn waanjon̄ak ippān baam̧le in ejjab wānōk kōn tōmak.

Ļōmņak ko n̄an Ekkatak ilo M̧weeo im ilo Kabun̄ in

1 Nipai 1–5

Naan eo an Anij eaar “aorōk eaar ļap” n̄an eō.

Juon ennaan eaorōk ilo Bok in Mormon ej kōn “aorōk eaar ļap” kōn naan eo an Anij (1 Nipai 5:21). Ilo am̧ riiti 1 Nipai 1–5, pukot wāween ko naan in Anij ej kajju ak jab kajju kōjeraam̧m̧an baam̧le eo an Liai (n̄an waanjon̄ak, lale 1:11–15; 3:19–20; 5:10–22). Ta eo jebta kein rej katakin eok kōn naan in Anij? Ta eo kwoj loe bwe eim̧we eok n̄an pukot jeje ko rekwojarjar?

Bar lale “As I Search the Holy Scriptures,” Hymns, no. 277; “Scriptures Legacy” (video), Gospel Library.

1 Nipai 2

Imaron̄ bōke im kōkajoorļo̧k naan in kam̧ool eo aō ilo aō oktakļo̧k n̄an Irooj.

Nipai ekar bun̄bun̄ kōn kajoor eo an ilo tōmak ilo Irooj, bwe eaar aikuj in jerbal n̄an bōk naan in kam̧ool eo an—āinwōt kōj aolep jej kōm̧m̧ane. Ta eo kwoj riiti ilo 1 Nipai 2 me ej kwaļo̧k unin an Nipai kar maron̄ bōk juon kam̧ool bwe naan ko an Jemān raar m̧ool? Etke Leman im Lemuel raar jab bōk kam̧ool in? Barāinwōt lale 3 Nipai 15:2–11). N̄aat eo kwaar en̄jake an Irooj kapidodoik būruwōm̧?

Bar lale “The Lord Commands Lehi’s Family to Leave Jerusalem” (video), Gospel Library.

1 Nipai 3–4

Anij enaaj kōpooj juon iaļ n̄an eō n̄an kōm̧m̧ane Ankilaan.

Ke Irooj eaar jiron̄ Liai im baam̧le eo an n̄an būki pileij ko jān Leban, Eaar jab leļo̧k tipdikin kōmeļeļe ko kōn kilen kōttōbraki. Menin ekkā an m̧ool kōn tōl eo jej bōke jān Anij, im āinwōt n̄e “epen men in” (1 Nipai 3:5). Ta eo ej im̧we eok kōn uwaak eo an Nipai n̄an kean̄ eo an Irooj ilo 1 Nipai 3:7, 15–16?

Ilo am̧ riiti 1 Nipai 3–4, lale men ko reppen Nipai ekar iooni. Elmen an kar Irooj “kōpooj juon iaļ” bwe Nipai en “kōtōprak men eo Ej [kean̄]”? Etke eaorōk bwe kwon jeļā ta eo Irooj ekar kōm̧m̧ane n̄an Nipai?

Juon iaan wāween eo ekajoor me Anij ekar kepooj kōj n̄an kōjparok kien ko An ej bwe eaar jilkintok Jisōs Kraist bwe en ad Rilo̧mo̧o̧r. Ļōmņak in riiti ennaan ko an Būreejtōn Dallin H. Oaks “Ta eo Ad Rilo̧mo̧o̧r Ekar Kōm̧m̧ane n̄an Kōj?” Liaona, Māe 2021, 75–77). Elmen an Jisōs Kraist kar kepooj juon iaļ n̄an kōj kajjojo? Jeļā bwe E ekar anjo̧ ioon elōn̄ men ko kōn kwe, ta eo kwoj en̄jake n̄an “ilo̧k im kōm̧m̧ani”?

Bar lale “Nephi Is Led by the Spirit to Obtain the Plates of Brass” (video), Gospel Library; Gospel Topics, “Pokake,” Gospel Library.

Kōjerbal bwebwenato ko im waanjon̄ak ko n̄an katakin pedped ko an gospel. Ilo am̧ keppopo n̄an katakin, ļōmņake en̄jake ko am̧ make me kwomaron̄ kobaiki rikam̧ool eo kein karuo n̄an bwebwenato ko ilo jeje ko rekwojarjar. N̄an waanjon̄ak, n̄āāt eo Irooj ekar kepooj juon iaļ bwe kwon kōm̧anm̧an An kilaan?

Aer Lan̄lōn̄ Ekar Obrak, jān Walter Rane

1 Nipai 4:1–3; 5:1–8

Keememej bwe jerbal ko an Anij remaron̄ letok n̄an eō tōmak n̄an pokake kien ko An.

Ke Leman im Lemuel raar jino ellotaan, eaar aolep iien pād Nipai im Liai n̄an im̧we im jipan̄ er. N̄e kwoj jino ellotaan, emaron̄ lukkuun jipan̄ n̄an riiti naan ko an Nipai im Liai. Elmen an Nipai im Liai kar kajjieon̄ jipan̄ ro jet kalōk aer tōmak ilo Anij? (lale 1 Nipai 4:1–3; 5:1–8; bar lale 1 Nipai 7:6–21). Ta eo kwaar ekkatak jān waanjon̄ok eo aer me emaron̄ jipan̄ eok tokālik n̄e kwoj tin ellotaan ak jum̧ae?

1 Nipai 4:5–18

“Iaar tōl kōn Jetōb.”

Ilo 1 Nipai 4:5–18, ta eo eaar kam̧weier eok kōn maron̄ eo an Nipai n̄an kile im ļoor Jetōb? Kwomaron̄ ekkatak enaan eo an Būreejtōn Russell M. Nelson “Revelesōn n̄an Kabun̄ in, Revelesōn n̄an Mour ko Ad” (Liaona, Māe 2018, 93–96) n̄an ekkatak eļapļo̧k kōn bōk revelesōn jān Irooj.

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjin ko.

Ļōmņak ko n̄an Katakin Ajri ro

1 Nipai 2:16

Emaron̄ wōr aō make naan in kam̧ool.

• Elmen an Nipai kar jeļā ke ta eo Jemān ekar katakin ekar m̧ool? Jipan̄ ajri ro nejum̧ lo uwaak ko n̄an kajjitōk in ilo 1 Nipai 2:16, 19. Remaron̄ bar m̧ōņōņō in ikkure kōn jeje ko an Nipai ioon būļak ko ak kein ekkatak ko jet innām kalōk men eo ippān kein ekkatak eo. Men in emaron̄ tōlļo̧k n̄an juon ekōnono kōn wāween an m̧akūtkūt kein jipan̄ kōj kalōk juon naan in kam̧ool.

• Kwomaron̄ kwaļo̧k n̄an ajri ro nejum̧ pija ko an ak kein katak ko me rej pinej jenkwan men ko remaron̄ pukot juon naan in kam̧ool, āinwōt juon kape in Bok in Mormon ak juon pija in Jisōs Kraist, juon tampeļ, ak rikanaan eo emour. Kajjitōk ippāer n̄an bōk juon im kwaļo̧k naan in kam̧ool ko aer kōn men eo. Kwomaron̄ bar jiron̄ ajri ro nejum̧ elmen am̧ kar bōk naan in kam̧ool eo am̧. Etke jej aikuj ad make naan in kam̧ool?

1 Nipai 3–4

Anij enaaj jipan̄ eō kōjparok kien ko An.

• Ļōmņak in kōjerbal juon ak elōn̄ļo̧k iaan kein katak kein n̄an jipan̄ ajri ro nejum̧ kōnono elmen an Anij kar jipan̄ Nipai bōk pileij gold ko: 1 Nipai 3–4; peij in m̧akūtkūt eo an wiik in; “Nephi’s Courage” (Children’s Songbook, 120–21); im “Jebta 4: The Brass Plates” (ilo Bwebwenato ko an Bok in Mormon, 8–12).

• Kwe im ajri ro nejum̧ maron̄ itok limoimi in ikkure jān 1 Nipai 3:2–7. Bōlen kwomaron̄ āinwōt Liai im kajjitōk ippān ajri ro nejum̧ n̄an jepļaakļo̧k n̄an Jerusalem n̄an būki pileij brass ko. Kajjitōk ippāer n̄an uwaake ilo naan ko aer āinwōt Leman im Lemuel ak Nipai. Ta jet men ko Anij ekar kean̄ kōj n̄an kōm̧m̧ane? (lale pija ko 103–15 ilo Bok in Gospel Pija ak Mosaia 18:8–10 n̄an ļōmņak ko). Elmen ad maron̄ āinwōt Nipai?

1 Nipai 3:19–21; 5:19–22

Jeje ko rekwojarjar eļap aer aorōk.

• Jeje ko rekwojarjar raar lukkuun aorōk n̄an baam̧le eo an Liai. N̄an kōmeļeļeik menin, kajjitōk ippān ajri ro n̄an jipan̄ eok kwaļo̧ke ak jerbale ta eo Nipai im ļōm̧aro jein raar kōm̧m̧ane n̄an bōk pileij brass ko: raar etal ettoļo̧k, kōjekdo̧o̧n gold im silver, im kar em̧ooj ilo juon kom̧laļ n̄an lo̧mo̧o̧ren mour ko aer. Innām kwon riiti 1 Nipai 5:21 im kōnono etke jeje ko rekwojarjar raar lukkuun aorōk n̄an baam̧le eo an Liai. Etke rej aorōk n̄an kōj? Elmen ad kōjparok jeje ko rekwojarjar āinwōt juon men eaorōk?

Nipai im baam̧le eo an raar kaorōk jeje ko rekwojarjar.

1 Nipai 4:6

Jetōb Kwojarjar enaaj tōl eō ilo aō pukot n̄an kōm̧anm̧an ankilaan Irooj.

• Ālkin etale ippān doon ilo 1 Nipai 3 elmen an Nipai im ļōm̧aro jein kar kajjieon̄ in bōk pileij brass ko, riit ippān ajri ro nejum̧ 1 Nipai 4:6 n̄an loe ta eo Nipai ekar kōm̧m̧ane bwe en tōprak. Innām ajri ro nejum̧ remaron̄ kōm̧m̧ane juon laajrak in men ko me Anij ekōņaan bwe ren kōm̧m̧ane. Elmen An Jetōb Kwojarjar jipan̄ kōj ilo jekjek kein?

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjin ko.

Iaar Pokake Ainikien Jetōb eo, jān Walter Rane