“Bar Jepļaak n̄an Jerusalem,” Bwebwenato ko an Bok in Mormon (2023)
“Bar Jepļaak n̄an Jerusalem,” Bwebwenato ko an Bok in Mormon
Bar Jepļaak n̄an Jerusalem
Iaļ eo n̄an piliej brass ko
Baam̧le eo an Liai im Saraia raar ito itak ilo āne jem̧aden. Ilo juon ettōņak, Irooj ekar jiron̄ Liai kōn jeje ko rekwojaarjar kar jeje ilo ioon piliej brass ko. Raar pād ippān juon em̧m̧aan kar etan Leban ilo Jerusalem. Irooj ekar ba baam̧le eo an Liai raar aikuji bōk piliej brass ko ippāer ilo iaļ eo aer.
Irooj ekar jiron̄ Liai n̄an jilkinļo̧k ļōm̧aro nejin bar ļo̧k n̄an Jerusalem n̄an bōki piliej brass ko. Ļōm̧aro jein Nipai raar ellotaan. Raar jiron̄ Liai ekar juon men epen n̄an kōm̧m̧ane. Raar jab kōņaan etal.
Ekar juon men elukkuun pen n̄an kōm̧m̧ane, bōtaab Nipai ekar kōņaan pokake. Ekar jeļā Irooj enaaj kar jipan̄ e im ļōm̧aro jein. Nipai ekar jiron̄ Liai bwe enaaj kar bar ro̧o̧l n̄an Jerusalem im bōki piliej brass ko.
Leman, Lemeul, Sam, im Nipai raar bar jepļaakļo̧k n̄an Jerusalem. Ke raar tōparļo̧k ijo, raar jokāālet bwe Leman enaaj kar ilo̧k n̄an im̧ōn Leban im kajjitōk kōn piliej brass ko.
Ke Leman ekar kajjitōk kōn pileij brass ko, Leban ekar kūr e juon riko̧o̧t. Leban ekar ba enaaj kar m̧an Leman.
Leman ekar ko im kar jiron̄ ļōm̧aro ro jatin ta ekar waļo̧k.
m̧aan ro jemjān jemjatin emen raar ba. Leman, Lemuel, im Sam raar kōņaan ro̧o̧lļo̧k n̄an ippān jemeer im jinier ilo āne jem̧aden, bōtaab Nipai ekar ewōr juon an ļōmņak. Ekar ba remaron̄ kōm̧m̧an juon jānij ippān Leban n̄an bōk pileij brass ko. Raar ro̧o̧lļo̧k n̄an m̧weo im̧weer ilo jikin kweilo̧k eo im bōk aolep gold im silver ko aer n̄an jānij.
Ke raar kwaļo̧k gold im silver ko n̄an Leban, ekar kōņaan aolepāer. Bōtaab ekar jab wōt kōņaan leļo̧k n̄an er pileij brass ko. Ijello̧kin, ekar jiron̄ rijerbal ro an n̄an m̧an jemjān jemjati ro bwe en maron̄ būki gold im silver ko aer.
Jemjān jemjati ro emen raar ko n̄an kōjparok mour ko aer im door gold im silver itulik. Rijerbal ro an Leban raar jab maron̄ jibwe er. Jemjān jemjati ro raar tiliekek ilo juon ro̧n̄.
Ālkin aolep men kein reppen, Leman im Lemuel raar illu ippān Nipai. Raar den̄ļo̧ke Nipai im Sam kōn juon aļaļ.
Ejjab to, juon enjeļ ekar itok im kar kajjitōk etke raar den̄ļo̧ke Nipai. Enjeļ eo ekar ba bwe Nipai ekar kāālet n̄an tōl er. Innām enjeļ eo ekar jiron̄ er n̄an bar ro̧o̧lļo̧k n̄an Jerusalem. Irooj enaaj kar kōpooj juon iaļ n̄an er n̄an bōk pileij brass ko.