1 Nipai 16

Liaona eo im Lippo̧ņ eo Ebwilo̧k

Kappukōt jipan̄ eo an Irooj

Baam̧le ko an Liai im Ishmael raar ito itak ilo āne jem̧aden ium̧win elōn̄ iiō ko. Irooj ekar tōl er ilo m̧ōttan ko rem̧m̧an an āne eo. Raar aikuj in kakidudu im ain m̧ōn̄ā ko ilo iaļ eo ļo̧k. Ekar juon iaļ eo epen.

1 Nipai 16:14; 17:1, 4

Irooj ekar kallim̧ur n̄an tōl baam̧le ko n̄an juon āne em̧m̧an eļan̄n̄e raar kōjparok kien ko. Raar jab jeļā ekōjkan pukōt āne eo, bōtaab Irooj enaaj kar tōl er.

1 Nipai 2:20; 10:13; 17:13–14

Juon jibbon̄, Liai ekar bwilōn̄ n̄an lo juon ball brass nabōj in em̧ nuknuk eo im̧ōn. Ball eo kar ņa etan Liaona. Itulikin Liaona eo, juon m̧ade ekar jitōn̄ļo̧k iaļ eo kumi eo ekar aikuj in etal ie ļok. Jet iien raar elolo ennaan ko jān Irooj kar jei ioon Liaona eo. Menin ekar wāween eo Irooj ekar tōl er.

1 Nipai 16:10, 16, 26–29; Alma 37:38

Juon raan ke Nipai ekar kakidudu, lippo̧ņ steel eo an ekar bwilo̧k. Baam̧le ko raar jab maron̄ ebbōk m̧ōn̄ā kōn an ejjeļo̧k lippo̧ņ. Ļōm̧aro jein Nipai raar illu ippān im ippān Irooj.

1 Nipai 16:18–21

Raar aolep lukkuun m̧ōk im kwōle. Jet iaaer raar illu im ellotaan. Raar mijak bwe renaaj kar maron̄ kwōle. Jekdo̧o̧n Liai ekar ellotaan n̄an Irooj.

1 Nipai 16:19–22, 35

Nipai ekar kōm̧m̧ane juon lippo̧ņ kāāl im juon m̧ade jān wōjke. Ekar wōr an tōmak ilo Irooj bwe enaaj kar jipan̄ e kappok m̧ōn̄ā.

1 Nipai 16:23

Nipai ekar kajjitōk ippān Liai ia eo n̄an etal n̄an kakidudu ie. Liai ekar būrom̧ōj bwe ekar ellotaan. Ekar ukweļo̧k im kajjitōk ippān Irooj kōn jipan̄. Irooj ekar jiron̄ Liai n̄an lale Liaona eo. Juon ennaan kar je ioon. Baam̧le ko raar katak bwe Liaona eo ekar jerbal wōt n̄e rej ewōr aer tōmak ilo Irooj im pokake kien ko.

1 Nipai 16:23–29

Irooj jet iien ekar ukōt enaan eo ioon Liaona eo n̄an jipan̄ er ilo iien ito itak ko aer. Liaona eo ekar jipan̄ Nipai jeļā ia eo n̄an kakidudu ie. Ekar ebbōktok m̧ōn̄ā, im raar aolep m̧ōņōņō. Raar ukweļo̧k im kar kam̧m̧oolol Irooj.

1 Nipai 16:28–32