“Tiankōm,” Bwebwenato ko an Bok in Mormon (2023)
Tiankōm
Kōjparok armej ro an
Tiankōm̧ ekar juon ritōl ilo jarin tariņae eo an Kapen Moronai. Ekar kajjieon̄ kōjparok bukwōn ko an riNipai ro jān riLeman ro.
Amelakaia ekar juon riNipai eo ekar erom̧ kiin̄ an riLeman ro. Ekar kōņaan bōk eddo ioon riNipai ro barāinwōt. Ekar m̧an riNipai ro im wiini elōn̄ jikin ko.
Alma 47:1, 35; 48:1–4; 51:23–28
Jarin ritariņae ro an Tiankōm̧ rekar etal n̄an kabōjrake jarin tariņae eo an Amelakaia jān aer jodiki bukwōn ko an riNipai ro.
Jarin tariņae ko rekar ire ium̧win juon raan likio. Tiankōm̧ im jarin tariņae eo an rekar ire kōn eļap kajoor im kapāāl jān jarin tariņae eo an Amelakaia. Ak ejjeļo̧k juon iaan jarin tariņae ko rekar wiin. Ke ekar jino marok, jim̧or jarin tariņae ko rekar bōjrak aer ire bwe ren maron̄ kakkije.
Alma 51:31—32
Ak Tiankōm̧ ekar jab kakkije. E im rijerbal eo an kitliekek im etal n̄an kāām eo an Amelakaia.
Tiankōm̧ ajedikdikļo̧k n̄an em̧ nuknuk eo an Amelakaia. Ekar m̧an Amelakaia m̧okta jān Amelakaia maron̄ ruj. Innān Tiankōm̧ ekar ro̧o̧l n̄an kāām eo an im ba n̄an ritariņae ro bwe repojak in ire.
Ke RiLeman ro rekar ruj, rekar loe bwe Amelakaia ekar mej. Rekar barāinwōt loe bwe Tiankōm̧ im jarin tariņae eo an rekar pojak in ire ippāer.
RiLeman ro rekar lukkuun mijak im kar ko. Karōk eo an Tiankōm̧ ekar kōm̧m̧an bwe riLeman ro ren lukkuun mijak in bar jodiki bukwōn ko an riNipai ro. Tiankōm̧ ekar kiiō wōr an iien n̄an kōm̧m̧an bwe bukwōn ko an riNipai ro ren ļapļo̧k aer kōjparok. Ekar ļap an jerbal n̄an kōjparok armej ro an. Ekar maron̄ in dāpij wōt kōjparok eo an bukwōn ko an riNipai ro.