Alma 53; 56–57

Juon Jarin Tariņae Edik

Ļaddik ro nejin riNipai ro rekar lōke Anij

RiNipai ro rekar pād ilo tariņae ippān riLeman ro im aikuj jipan̄. Antai-Nipai-Liai ro rekar kōņaan jipan̄. Ak rekar kōm̧m̧ane juon kallim̧ur n̄an Irooj n̄an jab ire. Ruo taujin ļaddik ro nejier rekar jan̄in kōm̧m̧ane kallim̧ur in. Ijjelo̧kin, ļaddik ro rekar kallim̧ur n̄an ire n̄an kōjparok baam̧le ko aer. Ļaddik rein kar ņaetaer ritariņae ro reperan.

Alma 53:8, 13–18, 22; 56:1–8

Ritariņae ro reperen rekar kālet rikanaan Hilamōn bwe en tōl er. Rekar juon kumi edik keidi n̄an jarin tariņae eo ekilep an RiLeman ro. Ak Hilamōn ekar jeļā bwe ritariņae rein reperan rekar m̧ool, peran, im tiljek. Ippān an Hilamōn tōl er, rekar etal im jipan̄ RiNipai ro.

Alma 53:19–22; 56:9–10, 17, 19

Ritariņae in riNipai rekar m̧ōk. Ak ke ritariņae ro reperan rekar itok, riNipai ro rekar m̧ōņōņō. Jarin tariņae eo edik ekar leļo̧k n̄an er kōjatdikdik im kajoor. Ippān doon, rekar kōpojak in ire ippān riLeman ro. Ro jinen im jemān ritariņae rein reperan rekar barāinwōt jipan̄ ilo aer bōktok m̧ōn̄ā im menin aikuj ko n̄an er.

Alma 56:16–17, 19–20, 22, 27

RiLeman ro rekar bōk elōn̄ bukwōn ko im likūt jarin tariņae ko aer ie. Ritōl ro an riNipai rekar kōņaan in kadiwōjļo̧k riLeman ro jān juon iaan bukwōn kein. Rekar kōm̧m̧ane juon karōk im kar kajjitōk ippān ritariņae ro reperan n̄an jipan̄.

Alma 56:18–30

Ritariņae ro reperan rekar kōtan n̄e rej ineeki m̧ōn̄ā ko n̄an riNipai ro rej jokwe ilo bukwōn eo epaake ijo. Ke riLeman ro rekar loe kumi jidikdik eo, rekar em̧m̧akūt jān bukwōn eo aer im liko̧rko̧re ritariņae ro reperan. RiLeman ro rekar ļōmņak enaaj kar pidodo kokak er.

Alma 56:30–36

Ritariņae ro reperan rekar ko jān riLeman ro. Innām juon jarin tariņae in riNipai ro ekar jino likwo̧rkwo̧re riLeman ro. RiLeman ro rekar kōņaan bōk ritariņae ro reperan m̧okta jān an riNipai ro tōpar er. RiNipai ro rekar loe ritariņae ro reperan rekar pād ilo jorrāān im kar m̧aaj ekkairirļo̧k n̄an jipan̄ er.

Alma 56:36–41

Ālkin jet iien, ritariņae ro reperan rekar jab maron̄ loe riLeman ro. Rekar jino ļōmņak eļan̄n̄e riNipai ro rekar tōpar er im kar ire.

Alma 56:42–43

Hilamōn ekar inepata. Ekar ļōmņak riLeman ro remaron̄ kajjieon̄ aujiidi er. Ekar kajjitōk ippān ritariņae ro reddik eļan̄n̄e renaaj etal im ire ippān RiLeman ro.

Alma 56:43–44

Ritariņae ro reperan rekar keememej ta eo ro jineer rekar katakin er. Ro jineer rekar katakin er n̄an lōke Anij im jab pere, kōnke E enaaj kōjparok er. Ļaddik rein rekar tōmak ilo Anij im kōņaan kōjparok kallim̧ur eo aer n̄an kōjparoke baam̧le ko aer. Rekar jiron̄ Hilamōn bwe er rekar pojak in etal im ire.

Alma 56:46–48

Hilamōn ekar bwilōn̄ kōn peran eo aer. Ekar tōl likļo̧k er n̄an tariņaeiki riLeman ro.

Alma 56:45, 49

Ritariņae ro reperan rekar loe an RiLeman ro im RiNipai kōpata. RiNipai ro rekar m̧ōk. Rekar itōn luuj ke ritariņae ro reddik rej itok.

Alma 56:49–52

Ritariņae ro reperan rekar ire kōn kajoor an Anij. RiLeman ro rekar mijak er im bōjrak jān aer ire. Ritariņae ro reperan rekar jipan̄ er wiini pata eo!

Alma 56:52–54, 56

Ilo pata eo, elōn̄ riNipai ro im rileman ro rekar mej. Hilamōn ekar inepata bwe jet iaan ritariņae ro reddik an remaron̄ barāinwōt mej. Ak ālkin pata eo, Hilamōn ekar bōne aolep. Ekar lukkuun em̧ōņōņō in loe bwe ejjeļo̧k juon iaan ritariņae ro reperan ekar mej. Anij ekar kōjparoke er.

Alma 56:55–56

Elōn̄ļo̧k ļaddik ro nejier rekar kobaļo̧k ippān ritariņae ro reperan. Rekar jipan̄ wōt riNipai ro ire. Ilo pata kein jet, ritariņae ro reperan aolepāer rekar ikkinejnej im metak, ak ejjeļo̧k juon iaer ekar mej. Rekar keememej ta eo jineer ekar katakin er. Rekar lōke Anij, im E ekar kōjparok er.

Alma 57:6, 19–27; 58:39–40