Alma 46–50

Taitōļ in Anemkwoj eo

Bōbrae jim̧we eo n̄an tōmak ilo Anij

Amelakaia ekar juon riNipai eineea, ekajoor. Ekar kōņaan erom̧ kiin̄. Ekar kallim̧ur n̄an leļo̧k kajoor eo n̄an armej ro rekar jipan̄ e. Elōn̄ armej rekar kōņaan e im kar kajjieon̄ kōm̧m̧an bwe ro jet ren ļoor e. Amelakaia ekar tōl armej ro n̄an kōm̧m̧ani men ko renana. E im rikaļoor ro an rekar kōņaan in m̧an armej ro rekar katakin kōn Jisōs Kraist.

Alma 45:23–24; 46:1–10

Kapen Moronai ekar juon ritōl an jarin tariņae ko an riNipai ro, ekar tōmak ilo Jisōs. Ekar jeļā bwe riNipai ro rekar jeraam̧m̧an bwe rekar kōjparok kien ko an Anij. Ekar lukkuun illu bwe Amelakaia ekar tōlļo̧k armej ro jān Anij, kajjieon̄ erom̧ juon kiin̄, im kajjieon̄ kōmetak armej ro.

Alma 46:9–11, 13–15, 18

Moronai ekar kekkōļ nuknuk eo an. Ekar jeje ioon bwe armej ro raikuj keememej Anij eo aer, anemkwoj eo aer, im baam̧le ko aer. Innām ekar likwōje ilo alal eo im ņa etan taitōl in anemkwōj. Moronai ekar jar kōn kōjeraam̧m̧an eo an Anij. Ekar kwaļo̧k n̄an RiNipai ro taitōļ in anemkwoj eo im kar kajjitōk ippāer n̄an kobaļo̧k ippān n̄an tariņaiki Amelakaia.

Alma 46:12–20, 23–24, 28

Armej ro rekar kōņak nuknuk in tariņae ko aer im ettōrļo̧k n̄an ippān Moronai. Rekar pojak in ire kōn Anij im m̧ōko m̧weer, baam̧le ko, im anemkwoj. Rekar kōm̧m̧an juon bujen, ak kallim̧ur eaorōk, ippān Anij bwe renaaj aolep iien ļoor E. Innām rekar pojak in ire ņae Amelakaia.

Alma 46:21–22, 28

Jarin tariņae eo an Moronai ekar kilep. Amelakaia ekar mijak. Ekar kajjieon̄ ko ippān rikaļoor ro an. Ak elōn̄ iaer rekar inepata bwe Amelakaia ekar ire kōn un ko rebōd. Elōn̄ rekar jab maron̄ bar ļoor e. Jarin ritariņae ro an Moronai rekar kabōjrak ro rekar ļoore wōt Amelakaia, ak Amelakaia im jejjo ro rekar rōļo̧k raar ko.

Alma 46:29–33

Amelakaia ekar etal n̄an āne eo ānen riLeman ro. Ekar kōņaan bwe riLeman ro ren jipan̄ e ire RiNipai ro. Innām enaaj lōn̄ juon an jarin tariņae ekilep, kajoor. Ekar kōm̧m̧an bwe elōn̄ iaan riLeman ro ren illu ippān riNipai ro. Kiin̄ eo an riLeman ro ekar ba n̄an aolep riLeman ro ren kōpojak in ire ippān riNipai ro.

Alma 47:1

Kiin̄ eo ekar kōņaan Amelakaia. Ekar kōm̧m̧an bwe Amelakaia en juon iaan ritōl ro ej bōk eddo in jarin ritariņae ro an riLeman ro. Ak Amelakaia ekar kōņaan elōn̄ļo̧k kajoor.

Alma 47:1–3

Amelakaia ekar kōm̧m̧ane juon karōk n̄an irooj ioon riLeman ro. Ekar bōk eddo in aolep jarin tariņae eo an riLeman ro. Innām ekar kōm̧m̧an bwe rijerbal ro an ren m̧an kiin̄ eo im riab kake wōn ekar kōm̧m̧ane.

Alma 47:4–26

Amelakaia ekar kōtan ke ellu bwe kiin̄ eo emij. RiLeman ro rekar kōņaan Amelakaia. Ekar m̧areiki lerooj eo im erom juon kiin̄. Ekar kōņaan in irooj ioon riNipai ro barāinwōt. Ekar kōnono nana kōn riNipai ro bwe riLeman ro ren maron̄ illu ippāer. Ejjab etto, elōn̄ riLeman ro rekar kōņaan in ire ipper.

Alma 47:25–35; 48:1–4

Tōre eo Amelakaia ej bōk kajoor jān riab, Moronai ej ko̧pooje riNipai ro n̄an lōke Anij. Ej likūti taitōļ in anemkwoj eo ioon aolep tawōr ilo āne eo n̄an kakeememej er kōn kallim̧ur eo aer. Jarin ritariņae ro an Moronai rej barāinwōt kōpooje bukwōn ko n̄an tariņae. Rej kalōk wo̧o̧l ko im ro̧n̄ in tariņae ko n̄an kōm̧m̧an bwe bukwōn ko rej kōjparok im kajoor.

Alma 46:36; 48:7–18

Ke riLeman ro rekar itok n̄an ire, rekar jab maron̄ deļo̧n̄e bukwōn ko an riNipai ro. Rekar bōjrak ippān wo̧o̧ļ ko im ro̧n̄ in tariņae ko jarin tariņae ko an Moronai rekar kalōki. Elōn̄ RiLeman ro rekar mej ke rekar jodiki riNipai ro. Amelakaia ekar lukkuun illu. Ekar kallim̧ur n̄an m̧an Moronai.

Alma 49:1–27

RiNipai ro rekar kam̧m̧oolol Anij kōn an jipan̄ im kōjparoke er. Rekar kōm̧m̧an bwe bukwōn ko aer aaet ren kōjparok im kalōk elōn̄ļo̧k bukwōn ko. Pata eo ippān riLeman ro ekar wōnm̧aanļo̧k wōt, ak Anij ekar jipan̄ Moronai im jarin tariņae ro an kōjparok wōt riNipai ro. RiNipai ro rekar m̧ōņōņō. Rekar pokake Anij im tiljek wōt n̄an E.

Alma 49:28–30; 50:1–24