“Liai im Saraia rej Em̧m̧akūt jān Jerusalem,” Bwebwenato ko an Bok in Mormon (2023)
“Liai im Saraia rej Em̧m̧akūt jān Jerusalem,” Bwebwenato ko an Bok in Mormon
Liai im Saraia rej Em̧m̧akūt jān Jerusalem
Kakkōl eo an Irooj n̄an juon baam̧le
Liai im Saraia raar jokwe ilo Jerusalem ippān ajri ro nejierro. Liai ekar lo juon visōn jān Irooj. Ekar lo bwe juon Rilo̧mo̧o̧r enaaj kar itok n̄an laļ in juon raan. Irooj ekar barāinwōt kwaļo̧k n̄an e bwe Jerusalem enaaj kar kakkure.
Liai ekar jiron̄ armej ro kōn visōn eo an. Ekar jiron̄ er bwe Jisōs Kraist enaaj kar itok juon raan n̄an lo̧mo̧o̧ren laļ.
Liai ekar barāinwōt jiron̄ armej ro bwe Jerusalem naaj kar kakkure. Ekar kūr er n̄an ukweļo̧k.
Armej ro raar illu. Irooj ekar kōnono n̄an Liai bar juon alen ilo juon ettōņak. Liai ekar jeļā bwe e im baam̧le eo an reban kar ineem̧m̧an ilo Jerusalem. Raar aikuj em̧m̧akūt.
Liai im Saraia raar pokake Irooj. Raar em̧m̧akūt jān jikin kweilo̧k eo ippān baam̧le eo aer. Liai im Saraia ekar wōr emen nejierro ļaddik ro kar etaer Leman, Lemuel, Sam, im Nipai. Raar aikuj in ilo̧k jān m̧weo im̧weer im men ko m̧weier rem̧m̧an.
Baam̧le eo ekar ito itak ilo āne jem̧aden iturin Lom̧ao Ekūlm̧ūr Liai ekar kam̧m̧oolol Irooj kōn an kōjeraam̧m̧an baam̧le eo an. Ekar katakin baam̧le eo an n̄an ļoor Irooj im kōjparok kien ko An.
Leman im Lemuel raar ellotaan. Raar on̄ kōn m̧weo im̧weer im aolep men raar doori wōt. Raar jab meļeļe etke Irooj ekar kajjitōk ippāer n̄an em̧m̧akūt. Raar jab tōmak juon jikin kweilo̧k kileplep enaaj āinwōt Jerusalem maron̄ kar kakkure.
Leman im Lemuel raar ļōmņak bwe Liai ekar ļōkōm̧e visōn ko an. Ta eo eļan̄n̄e baam̧le eo aer ekar jōbwabwe ilo āne jem̧aden n̄an indeeo?
Nipai ekar kōņaan jeļā kōn e make bwe ta eo Liai ekar ba ekar m̧ool. Ekar jar im kar kajjitōk ippān Irooj.
Irooj ekar jilkinļo̧k Jetōb Kwojarjar eo n̄an jipan̄ Nipai tōmak naan ko an jemen. Nipai ekar tōmak Irooj im kar kwaļo̧k ta eo ekar katak ippān ļōm̧aro jein. Sam ekar ron̄jake Nipai im kar tōmak e, ak Leman im Lemuel raar jab ron̄jake.