Mormon Rikanaan eo

Je Bok in Mormon

elōn̄ armej ro rej kōm̧m̧ani kein tariņae ko, im Mormon āinwōt juon ajri im jinen rej jutak turin juon tebōļ eobrak kōn jāje ko

Mormon eaar juon Rinipai me ekar tōmak ilo Jisōs Kraist. Ekar rūttoļo̧k ilo juon iien ke elōn̄ armej raar jab pokake kien ko an Anij. Armej ro raar ko̧o̧t im m̧an do̧o̧n kōn jāān im kajoor. Ekar lōn̄ tariņae ko.

3 Nipai 5:12–13; 4 Nipai 1:27–49; Mormon 1:1–3, 15, 18–19

Ammaron ej kōnono n̄an Mormon im jinen ke rej kallib mennin eddōk ko, im elōn̄ armej ro rej jerbal ilo meļaaj eo epaake

Ke Mormon ekar 10 an iiō, juon em̧m̧aan kar etan Ammaron eaar itok n̄an ippān. Ammaron eaar bōk eddo in lale ļo̧o̧k ko kōn bwebwenato eo an Rinipai ro. Ammaron ekar lōke Mormon im jiron̄ e kōn ļo̧o̧k ko kar ņooji ilo juon bat. Ammaron eaar ba bwe ke Mormon ekar 24, Mormon ej aikuj in jeje ta eo ekar loe kōn armej ro aer im kobaiki n̄an ļo̧o̧k ko.

4 Nipai 1:47–49; Mormon 1:2–4

Mormon jodikdik eo ej jar ilo bukin wōjke ko, im meram ej jepooļe aolepān peļaakin

Ke Mormon ekar rūttoļo̧k, ekar kemeemej ta eo Ammaron ekar kajjitōk ippān bwe en kōm̧m̧ane. Ke Mormon eaar 15 iiō rūtto̧o̧n, Irooj kar loļo̧k e. Mormon ekar katak kōn em̧m̧an eo an Jisōs.

Mormon 1:5, 15

Mormon jodikdik eo ej kōņak nuknuk in tariņae eo im ej lale jarin tariņae eo an Rinipai ro

Mekarta Mormon ekar dik, eaar lukkuun kajoor. Rinipai ro rekar kāālet e n̄an tōl jarin tariņae ko aer. Mormon ear iakwe armej ro kōn aolepān būruōn. Ekar kōņaan bwe ren pokake Anij im m̧ōņōņō.

Mormon 2:1–2, 12, 15, 19; 3:12

Mormon eo erūtto ej būrom̧ōj im ej jar, im āneo ebwil ej pād itulik

Mormon ekar kajjieon̄ in jipan̄ armej ro. Ekar jar kōn er raan n̄an raan. Armej ro raar jeļā bwe rekar kōm̧m̧ani men ko renana, bōtaab rekar jab ukweļo̧k. Ekar jab wōr ippāer kajoor eo an Anij n̄an jipan̄ er n̄an jidik. Kōnke ekar ejjeļo̧k aer tōmak, kabwilōn̄lōn̄ ko raar bōjrak. Rekar wōnmaanļo̧k wōt n̄an ire, im elōn̄ iaer rekar mej. Mormon eaar būrom̧ōj.

Mormon 1:13–14, 16–19; 2:23–27; 3:1–12; 4:5, 9–12; 5:1–7

Mormon ej jeje ioon im karōk pileij māāl ko

Ke Mormon eaar 24 iiō dettan, eaar etal n̄an bat eo ijo ļo̧o̧k ko kar ņooji ie. Ekar jino n̄an je bwebwenato ko im katak ko an armej ro ioon pileij māāl ko. Anij eaar jipan̄ e jeļā ta eo ej aikuj in je. Mormon ekar jerbale ļo̧o̧k eo ium̧win elōn̄ iiō ko. Rainin, ļo̧o̧k eo rej ņa etan Bok in Mormon.

Naan ko an Mormon 1:3–9; Mormon 1:3–4; 2:17–18

Mormon, lio pāleen, im ajri ro nejin rej em̧m̧akūt

Ālkin elōn̄ tariņae ko, Rileman ro raar m̧an enan̄in aolepān Rinipai ro. Mormon ekar jeļā bwe armej ro an enaaj kar m̧ōkaj aer jako. Ekar būrom̧ōj kōnke rekar jab ukweļo̧k im kar kajjitōk ippān Anij kōn jipan̄. Bōtaab ekar jar im kar kajjitōk ippān Anij bwe n̄an kōjparok piliej ko. Ekar jeļā bwe pileij ko renaaj kar pād ilo kōjparok kōnke ekar pād ie naan ko an Anij n̄an er.

Naan ko an Mormon 1:11; Mormon 5:11; 6:6, 16–22

Mormon ke ej juon em̧m̧aan erūtto ej leļo̧k pileij māāl ko n̄an ļeo nejin Moronai

Mormon ekar kōņaan bwe armej ro ren tōmak ilo Jisōs. Ekar kōjātdikdik bwe elōn̄ armej renaaj kar riiti bok eo ilo ilju im jekļaj. Eļaptata ekar kōņaan bwe baam̧le ko an Rileman ro ren juon raan riiti. Eļan̄n̄e ren kar, renaaj kar katak kōn Jisōs. M̧okta jān an Mormon kar mej, ekar leļo̧k rekoot eo n̄an ļeo nejin Moronai bwe en maron̄ pād ilo kōjparok.

Naan ko an Mormon 1:1–2; Mormon 3:17–22; 5:8–24; 6:6; 7; 8:1