“Moronai Rikanaan eo,” Bwebwenato ko an Bok in Mormon (2023)
Moronai Rikanaan eo
Bōk iakwe eo erreo an Jisōs Kraist.
Moronai eaar rikanaan in Nipai eo āliktata. Ekar ire ilo juon tariņae eļap ikōtaan Rinipai ro im Rileman ro Baam̧le eo an im aolep ro ekar jeļā kajier raar mej ilo pata eo. Armej ro ilo āneeo rekar lukkuun nana. Raar m̧an aolep ro raar tōmak ilo Jisōs Kraist. Moronai ekar tōmak ilo Jisōs. Ekar jab maron̄ kariabe bwe Jisos ej Rilo̧mo̧o̧r eo.
Jemān Moronai, Mormon, ekar je bwebwenato in armej ro aer ioon pileij māāl ko. M̧okta jān an Mormon kar mej, ekar liļo̧k piliej ko n̄an Moronai. Moronai ekar aikuj in ņooji n̄an kōjparok mour an make im pileij ko.
Mormon 6:6; 8:1–5, 13; Moronai 1:1–3
Mour eaar pen n̄an Moronai, bōtaab ekar tiljek wōt. Ekar je ta eo Mormon ekar katakin kake kōn iakwe-em̧ool, iakwe eo erreo an Kraist. Mormon ekar ba armej rej aikuj jar n̄an Anij kōn aolepān kajoor eo an būruier n̄an bōk iakwe in. Ekar ba Anij ej leļo̧k iakwe-em̧ool n̄an ro me rej m̧ool in ļoor Jisōs.
Moronai 7:32–33, 40–48; 10:20–21, 23
Moronai eaar iakwe Rileman ro men̄e jet iaer raar m̧an aolep ro ekar jeļā im kar kōņaan m̧an e. Ekar je elōn̄ men ko ioon pileij māāl ko n̄an jipan̄ Rileman ro ilo ilju im jekļaj. Ekar kōjātdikdik renaaj riiti ļo̧o̧k eo juon raan im tōmak ilo Jisōs bar juon alen.
Mormon 8:1–3; Moronai 1:1–4; 10:1
Moronai ekar karuwaineneik aolep armej ro rej riiti ļo̧o̧k eo n̄an ļōmņak kōn ewi jon̄an an Anij eo ej iakwe kar kea kōn ajri ro Nejin. Ekar karuwainene er n̄an jar im kajjitōk ippān Anij eļan̄n̄e ļo̧o̧k eo ej m̧ool. Ekar ba eļan̄n̄e ewōr aer tōmak ilo Jisōs im lukkuun kōņaan jeļā, Anij enaaj kōtļo̧k bwe ren jeļā m̧ool eo. Renaaj jeļā kōn kajoor eo an Jetōb Kwojarjar.
Kadkad In Bok in Mormon; Moronai 10:1–5
Moronai ekar kadedeļo̧k je ļo̧o̧k eo. Innām ekar kalbwin piliej māāl ko ilo bwidej. Jisōs eaar jiron̄ Moronai bwe bwebwenato eo kar je ioon pileij ko naaj juon kōjeraam̧m̧an mour ko an ajri ro nejin Anij ipeļaakin laļ in.
Elōn̄ iiō ko tokālik, Anij ekar jilkinļo̧k Moronai, āinwōt juon enjeļ, n̄an kwaļo̧k n̄an juon laddik edik kar etan Josep Smith ijo kar kalbwin piliej māāl ko. Josep kar kūr jān Anij bwe en juon rikanaan. Anij ekar jipan̄ Josep ukōte pileij ko bwe armej ren maron̄ riiti ta eo ekar jeje ioer. Ļo̧o̧k eo ej kiiō ņa etan Bok in Mormon.