armej ro rej m̧ōn̄ā leen wōjke in mour

Iakwe eo an Anij, jān Sabrina Squires

Jānwode 22–28: “Pojak kōn Jim̧we im kōn Kajoor in Anij”

1 Nipai 11–15

N̄e Anij ej leļo̧k jerbal eo eaorōk n̄an rikanaan ro An n̄an kōm̧m̧ane, emakijkij An leļo̧k jerbal in visōn n̄an rikanaan eo. Moses, Jon, Liai, im Josep Smith aolep raar bōk visōn ko āinwōt—visōn ko me rekar kōļapļo̧k kōļmenļo̧kjeņ ko aer n̄an jipan̄ er lo ewi jon̄an an ļap im lukkuun im̧weiir jerbal eo an Anij.

Nipai ekar bar lōn̄ an visōn in kōttōbar ilo mour in. Nipai eaar lo jerbal eo an Rilo̧mo̧o̧r eo, ro ineen Liai ilo āneen kallim̧ur, im armej ro āliktata ilo jerbal in an Anij. Ālkin visōn eo, Nipai ekar pojak n̄an jerbal eo epād im̧aan. Im riit kōn visōn in emaron̄ jipan̄ eok bar kepopo—bwe ebar wōr an Anij jerbal n̄an eok n̄an kōm̧m̧ane ilo aelōn̄ in kiin̄ eo An. Kwoj pād ilubwiljin “ro rekwōjarjar jān kabun̄ eo an Lamb eo” eo Nipai eaar loe, “ro raar ejjeplōklōk ioon aolepān mejān laļ; im raar pojak kōn jim̧we im n̄an kajoor in Anij ilo aiboojoj eļap” (1 Nipai 14:14).

Bar lale “Nephi Sees a Vision of Future Events” (video), Gospel Library.

Ļōmņak ko n̄an Ekkatak ilo M̧weeo im ilo Kabun̄ in

1 Nipai 11

Anij ekar jilkintok Jisōs Kraist āinwōt juon kōkaļļe in iakwe eo An.

Ke Nipai ekar kajjitōk ippān enjeļ eo kōn meļeļein wōjke eo Liai eaar loe, enjeļ eo eaar ba, “ej juon kakōļļe in iakwe eo an Anij.” Ilo m̧ool, e ekar kwaļo̧k n̄an Nipai jet kōkaļļeen ko im men ko jān mour eo an Rilo̧mo̧o̧r. Kappukot kōkaļļe kein im iien ko ilo am̧ riiti im kōļmenļo̧kjeņ kake 1 Nipai 11 Ta eo kwoj loe ejipan̄ me kwe meļeļe etke Jisōs ej menin kam̧m̧oolol eo eļap kōn iakwe eo an Anij?

Kwomaron̄ bar ļōmņak in aloje Pija in Baibōļ ko ilo Gospel Ļāibrāre me rejipan̄ men ko Nipai ekar loi. Elmen an kar Rilo̧mo̧o̧r jipan̄ eok en̄jake iakwe eo an Jemedwōj Ilan̄ n̄an eok?

Bar lale Susan H. Porter, “Iakwe an Anij: Mennin Kam̧ōņōņō tata n̄an Jetōb,” Liaona, Okt. 2021, 33–35.

1 Nipai 12–14

Imaron̄ in “pojak kōn jim̧we” im kajoor.

Nipai eban kar mour n̄an kam̧ool ta eo eaar loe ilo visōn eo an. Ta eo kwoj ļōmņak etke eaar aorōk bwe Nipai en jeļā men kein? Etke eaorōk bwe kwon jeļā kaki?” Kajjitōk kajjitōk kein kajjojo iien kwoj riiti jet men ko Nipai ekar loi ilo visōn eo an (lale 1 Nipai 12–14). Ta en̄jake ko kwoj būki kōn jerbal eo am ilo “jerbal eļap im … kabwilōn̄lōn̄ an Irooj”? 1 Nipai 14:7). Ta jet iaan men ko reļap im kabwilōn̄lōn̄ E ekar kōm̧m̧ane n̄an eok?

Ļōmņake eļaptata kallim̧ur eo ilo 1 Nipai 14:14 Elmen an kar Rilo̧mo̧o̧r kakūrm̧ool kallim̧ur in ilo mour eo am? (N̄an waanjon̄ak, lale David A. Bednar, “Kōn Kajoor in Anij ilo Aiboojoj Eļap,” Liaona, Okt. 2021, 28–30, eļaptata jekjen ko ruo āliktata.)

1 Nipai 13:1–9; 14:9–11

Ta “kabun̄ eo eļap im kajjōjō” me Nipai eaar loe?

Būreejtōn Dallin H. Oaks eaar kōmeļeļeiki bwe “kabun̄ eo eļap im kajjōjō” kar kōmeļeļeik jān Nipai ej pinej jenkwan “jabdewōt armej im doulul ko rej jum̧ae tōmak ilo Anij. Im bwe ‘kōm̧akoko’ eo me ‘kabun̄’ ej kappukot n̄an bōktok ro rekwojarjar eban āindein ilo dipioin āinwōt kōm̧akoko in pepe ko reriab.” (“Stand as Witnesses of God,” Ensign, Maj. 2015,32). Elmen an Rilo̧mo̧o̧r jipan̄ eok bōbrae—rōļak jān—ļōmņak in kōm̧akoko ko rebōd?

1 Nipai 15:1–11

Anij enaaj uwaake eō n̄e ij kajjitōk ilo tōmak.

Kwonan̄in ke kar en̄jake ke kwojjan̄in bōk revelesōn eo am̧ make—bwe Anij ejjab kōnono n̄an kwe? Ta kapilōk eo Nipai eaar leļo̧k n̄an ļom̧aro jein ke raar en̄jake wāween in? (Lale 1 Nipai 15:1–11.) Ekōjkan am̧ maron̄ kōjerbal kapilōk eo an Nipai ilo mour eo am̧?

pija in jemenere

1 Nipai 15:23–25

Jirōk likattōttōt n̄an naan eo an Anij ejipan̄ eō jum̧ae kapo ko an Setan.

Nipai emakijkij an m̧ōkaj an ba men ko n̄an ļōm̧aro jein. Ak ekar bun̄ būruwōn kōn ta eo ekar ba n̄an er ilo 1 Nipai 15:23–25. Ta ennaan eo an Nipai, im etke kwoj ļōmņak ekar kajoor an en̄jake kake?

Elder David A. Bednar ekar kwaļo̧k bwe “naan in Anij” emaron̄ in ilo jeje ko rekwojarjar, naan ko an rikanaan ro remour, im n̄an Jisōs Kraist Make. Ilo am ļōmņak ta meļeļein “jirōk likattōttōt” n̄an jeje ko rekwojarjar im naan ko an rikanaan ro remour? Ta meļeļe n̄an “jirōk likattōttōt” n̄an Jisōs Kraist? Kwomaron̄ lali uwaak ko rekkar n̄an kajjitōk kein ilo ennaan eo an Elder Bednar “A Kōm Ar Jab Eo̧ron̄ Er” (Liaona, Māe 2022, 14–16).

Elmen an jirōk likattōttōt n̄an naan eo an Anij jipan̄ eok jum̧ae kapo? Kanne tebōļ āinwōt in emaron̄ jipan̄ eok karōk kōļmenļo̧kjeņ ko am:

	… jipan̄ eō anjo̧ ioon tab in marok ko? (lale 1 Nipai 12:17)	… jipan̄ eō “n̄an jab ron̄jake” kōļmenļo̧kjeņ waan im juwa eo an laļin? (1 Nipai 12:18)
Elmen ad jirōk likattōttōt n̄an jeje ko rekwojarjar im naan ko an rikanaan ro remour …
Elmen ad jirōk likattōttōt n̄an Rilo̧mo̧o̧r …

Bar lale “The Iron Rod,” Hymns, no. 274; Jorge F. Zeballos, “Kalōk juon Mour Edipen ņae Rikapo eo,” Liaona, Okt. 2022, 50–52.

baam̧le eo ej riiti jeje ko rekwojarjar

Jeje ko rekwojarjar rej āinwōt juon aen in dāpdep me ej tōlļo̧k kōj n̄an wōjke in mour eo.

N̄an ļōmņak ko reļļapļo̧k, lale ennaan eo an allōn̄ in Liaona im N̄an Kōkajoorļo̧k Jodikdik Ro māākjiin ko.

Ļōmņak ko n̄an Katakin Ajri ro

1 Nipai 11:16–33

Jemedwōj Ilan̄ ekar jilkintok Jisōs Kraist kōnke Ej iakwe eō.

• N̄an katakin Nipai kōn iakwe eo an Anij, juon enjeļ ekar kwaļo̧k men ko n̄an Nipai kōn mour eo an Rilo̧mo̧o̧r. Kwomaron̄ kōm̧m̧an āinwōt n̄an ajri ro nejum̧—leļo̧k n̄an er pija in men ko Nipai ekar loe ilo 1 Nipai 11:20, 24, 27, 31, im 33 (lale Bok in Gospel Pija, nos. 30, 35, 39, 42, 57). Ilo am riiti eoon kein, jipan̄ ajri ro nejum̧ lo pija ko me rekkar n̄ani. Ta eo jaar ekkatak kōn Jisōs Kraist jān eoon kein im pija ko?

• Al juon al “He Sent His Son” (Children’s Songbook, 34–35) emaron̄ jipan̄ ajri ro nejum̧ en̄jake iakwe eo an Anij. Ālkin ami al, kajjitōk ippān ajri ro nejum̧ ta eo rej ekkatak jān al in. Ta ko jet jej ekkatak kōn iakwe eo an Anij jān 1 Nipai 11:22–23?

Kōjerbal pija ko n̄an jipan̄ ajri ro ekkatak. N̄e kwoj katakin ajri ro juon bwebwenato jen jeje ko rekwojarjar, jipan̄ er pijaik ļo̧k. Kōjerbal pija ko, pija in alooj ko, puppet ko, nuknuk ko, im ko jet.

1 Nipai 13:26–29, 35–36, 40

Bok in Mormon ej katakin m̧ool ko raorōk.

• N̄an jipan̄ ajri ro nejum̧ kaorōk m̧ool ko “realikkar im aorōk” ilo Bok in Mormon, kwomaron̄ jin̄aik juon pija im kajjitōk ippān ajri ro nejum̧ n̄an ukote ak kōm̧akūt m̧ōttan ko ilo pija eo n̄an kōm̧m̧an bwe en oktak. Kwomaron̄ kōjerbal menin n̄an katakin bwe men ko ilo Baibōļ raar oktak im kar jako. Riit ippān doon 1 Nipai 13:40 im kōnono kōn wāween an Bok in Mormon (“ļo̧o̧k kein ālik”) jipan̄ kōj meļeļe bwe “men ko realikkar im raorōk” raar jako jān Baibōļ eo (ļo̧o̧k ko “m̧okta”). Ta m̧ool ko “realikkar im raorōk” kwaar ekkatak jān Bok in Mormon?

• Video eo “The Book of Mormon—a Book from God” (Gospel Ļāibrāre) emaron̄ jipan̄ ajri ro nejum̧ lo unin an aōrōk Baibōļ im Bok in Mormon jim̧or. Ajri ro emaron̄ em̧m̧an ippāer ikkure jān video eo.

kape ko an Bok in Mormon eo ilo kajin ko roktak.

Bok in Mormon eo ej kōjepļaaktok m̧ool ko raar jako jān Bun̄ jān Tōmak eo.

1 Nipai 15:23–24

Jirōk likattōttōt n̄an naan eo an Anij ej jipan̄ eō anjo̧ jān kapo.

• Leļo̧k n̄an ajri ro nejum̧ jidik iien n̄an kwaļo̧k ta eo rej keememeje kōn visōn eo an Liai. Emaron̄ jipan̄ n̄an kōjerbal juon pija, āinwōt juon jen laajrak eo an wiik eo ļo̧k. Ta eo ekar dāpij armej ro jān aer tōpar wōjke eo? Ta eo ekar jipan̄ er tōpare? Kwomaron̄ kajjitōk ippāer n̄an pukot aen in dāpdep eo ilo pija eo. Riit ippān doon 1 Nipai 15:23–24 n̄an lale ta meļeļein aen in dāpdep eo im elmen an maron̄ jipan̄ kōj.

N̄an ļōmņak ko reļļapļo̧k, lale ennaan eo an allōn̄ in an eo Jera māākjin.

Visōn eo an Nipai kōn Meri im nin̄nin̄ Jisōs

Visōn eo an Nipai kōn Meri, jān James Johnson

peij in m̧akūtkūt: Naan eo an Anij ej letok n̄an eō kajoor n̄an anjo̧ jān kapo