Fa’a’ohipa i te Mai, pe’e mai—Nō te ’utuāfare ’e te fare purera’a

Nō vai teie nei mātēria ?

Teie rāve’a tauturu, nō te mau ta’ata ato’a ïa e hina’aro e ha’api’i mai nā roto mai i te Buka a Moromona—’ei ta’ata hō’ē, ’ei ’utuāfare ’e i roto i te mau piha ha’api’ira’a a te ’Ēkālesia. Mai te peu ’aita ’oe i tuatāpapa tāmau i te mau pāpa’ira’a mo’a nā mua a’e, e nehenehe teie rāve’a e tauturu ia ’oe ’ia ha’amata. Mai te peu ’ua mātau maita’i ’oe i te tuatāpapa i te pāpa’ira’a mo’a, e nehenehe teie rāve’a e tauturu ia ’oe ’ia fāri’i hau atu ā i te mau ’itera’a faufa’a.

Te ta’ata hō’ē ’e te ’utuāfare i te fare

Te vāhi maita’i roa a’e nō te ha’api’i mai i te ’evanelia ’o te fare ïa. E nehenehe tā ’oe mau ’orometua i te fare purera’a e pāturu ia ’oe, ’e e nehenehe ’oe e fāri’i i te fa’aitoitora’a nā roto mai i te tahi atu mau melo o te pāroita. Terā rā nō te ora mai i te pae vārua, e tītau ’oe ’e tō ’oe ’utuāfare i te mā’a i te mau mahana ato’a nā roto mai i « te parau maita’i a te Atua » (Moroni 6:4 ; hi’o ato’a Russell M. Nelson, « Mau parau ’ōmuara’a », Liahona, Novema 2018, 6–8).

’A fa’a’ohipa i teie rāve’a tauturu nā roto i te tahi huru ’o tē riro ’ei mea maita’i nō ’oe. Tē ha’apāpū nei te mau arata’ira’a ha’api’ira’a i te tahi mau parau mau mure ’ore e ’itehia i roto te Buka a Moromona ’e tē hōro’a mai nei i te mau mana’o ’e te mau ’ātivite nō te tauturu ia ’oe ’ia tuatāpapa i te mau pāpa’ira’a mo’a, ’o ’oe ana’e, ’o ’oe ’e tō ’oe ’utuāfare, ’aore ’o ’oe ’e te mau hoa. ’A tuatāpapa ai ’oe, ’a pe’e i te arata’ira’a a te Vārua nō te ’ite mai i te mau parau mau mure ’ore tei riro ’ei mea faufa’a nō ’oe. ’A ’imi i te mau poro’i a te Atua nō ’oe, ’e ’a pe’e i te mau muhumuhu tā ’oe e fāri’i.

Te mau ’orometua ’e te mau pīahi i te fare purera’a

Mai te mea e ha’api’i ’oe i te hō’ē piha Paraimere, hō’ē piha feiā ’āpī ’aore rā feiā pa’ari nō te Ha’api’ira’a Sābati, hō’ē pupu Autahu’ara’a a Aarona, ’aore rā hō’ē piha a te Feiā ’Āpī Tamāhine, tē fa’aitoitohia nei ’oe ’ia fa’a’ohipa i te mau arata’ira’a i roto i teie rāve’a tauturu ’a fa’aineine ai ’oe nō te ha’api’i. Mai, pe’e mai—Nō te ’utuāfare ’e te fare purera’a ’o te fa’anahora’a ha’api’ira’a ïa nō tā ’oe piha ha’api’ira’a i te sābati. ’Ua fa’ata’ahia te mau mana’o nō te ha’api’ira’a mai i roto i teie rāve’a tauturu nō te ’apora’a mai i te fare ’e i te fare purera’a. ’A fa’aineine ai ’oe nō te ha’api’i, ’a ha’amata nā roto i te fāri’ira’a i tō ’oe iho mau ’itera’a i roto i te mau pāpa’ira’a mo’a. E tupu tā ’oe fa’aineinera’a faufa’a roa a’e ’a ’imi ai ’oe i te mau pāpa’ira’a mo’a ’e ’a tītau ai ’oe i te fa’aurura’a a te Vārua Maita’i. ’A ’imi i te mau parau mau mure ’ore ’o tē tauturu ia ’oe ’ia riro hau atu mai te Metua i te ao ra ’e ia Iesu Mesia te huru. E nehenehe te Mai, pe’e mai e tauturu ia ’oe ’ia ’ite mai i te tahi o teie mau parau mau ’e ’ia māramarama i te mau pāpa’ira’a mo’a tā’āto’a.

’A ha’amana’o noa ē, te ha’api’ira’a mai i te ’evanelia, te mea maita’i roa a’e, ’ua fa’atumuhia ïa i ni’a i te ’utuāfare ’e ’ua pāturuhia e te ’Ēkālesia. E nehenehe e parau ē, tā ’oe hōpoi’a mātāmua ’o te pāturura’a ïa i te mau ta’ata tā ’oe e ha’api’i nei i roto i tā rātou mau tauto’ora’a, nō te ha’api’i mai ’e nō te ora i te ’evanelia i te fare. Hōro’a ia rātou i te mau rāve’a nō te fa’a’ite mai i tō rātou mau ’itera’a, mau mana’o ’e mau uira’a nō ni’a i te mau ’īrava pāpa’ira’a mo’a. Ani ia rātou ’ia fa’a’ite mai i te mau pāpaʼiraʼa moʼa tei ’itehia ia rātou. E mea faufa’a a’e te reira i te tāpo’ira’a i te tahi rahira’a mātēria.

Paraimere

E ha’amata tā ’oe fa’aineinera’a nō te ha’api’i i te Paraimere ’a tuatāpapa ai ’oe iho i te Buka a Moromona ’e tō ’oe ’utuāfare. ’A nā reira ai ’oe, ’a vai matara noa i te mau fa’a’itera’a ’e te mau mana’o pae vārua nō ’ō mai i te Vārua Maita’i nō ni’a i te mau tamari’i i roto i tā ’oe piha Paraimere. ’A pure tāmau noa, ’e e nehenehe te Vārua e fa’auru ia ’oe i te mau mana’o nō te tauturu ia rātou’ia ha’api’i mai i te ’evanelia a Iesu Mesia.

’A fa’aineine ai ’oe nō tē ha’api’i, e noa’a mai te tahi atu ā fa’aurura’a nā roto i te tuatāpapara’a i te mau mana’o ha’api’ira’a i roto i teie rāve’a tauturu. I roto i te arata’i ha’api’ira’a tāta’itahi i roto te Mai, pe’e mai—Nō te ’utuāfare ’e te fare purera’a tē vai ra te hō’ē tuha’a tei pi’ihia « Mau mana’o nō te ha’api’ira’a i te mau tamari’i » E nehenehe teie mau mana’o e riro ’ei mau mana’o tauturu nō te fa’atupu i tō ’oe fa’aurura’a. ’Ua mātau ’oe i te mau tamari’i i roto i tā ’oe piha ha’api’ira’a Paraimere—’e e rahi atu tō ’oe mātau ia rātou mai te mea e ’ohipa ’oe ’e ’o rātou i roto i te piha ha’api’ira’a. ’Ua ’ite ato’a te Fatu ia rātou, ’e e fa’auru ’oia ia ’oe i te mau rāve’a maita’i a’e nō te ha’api’i ’e nō te ha’amaita’i ia rātou.

’Ua rave a’ena paha te mau tamari’i i roto i tā ’oe piha ha’api’ira’a i te tahi mau ’ātivite i roto te Mai, pe’e mai ’e tō rātou ’utuāfare. ’Aita e fifi. E mea maita’i te nā ni’a-iho-fa’ahou-ra’a. E nehenehe e ani i te mau tamari’i ’ia fa’a’ite i te tahi ’e te tahi i te mea tā rātou i ha’api’i mai i te fare—noa atu ē, e fa’anaho ato’a ’oe i te mau rāve’a nō te mau tamari’i ’ia ’āmui mai, noa atu ’aita rātou e ha’api’i mai nei i te fare. E ’apo pāpū maita’i a’e te mau tamari’i i te mau parau mau o te ’evanelia, mai te mea e nā ni’a iho fa’ahouhia teie mau parau mau i te ha’api’ihia nā roto i te mau ’ātivite rau. ’Ia ’ite ana’e ’oe ē, e mea maita’i nō te mau tamari’i te hō’ē ’ātivite nō te fāri’i i te ’ite, e nehenehe e nā ni’a iho fa’ahou i te rave i te reira, mai te mea iho ā rā tē ha’api’i ra ’oe i te mau tamari’i ’āpī. E nehenehe ato’a ’oe e hi’o fa’ahou i te hō’ē ’ātivite i roto i te hō’ē ha’api’ira’a tahito.

I roto i te mau ’āva’e e pae sābati, tē fa’aitoitohia nei te mau ’orometua ha’api’i nō te Paraimere ’ia mono i te fa’anahora’a Mai, pe’e mai i tārenahia nō te pae o te sābati, i te hō’ē ’aore rā hau atu o te mau ’ātivite ha’api’ira’a i roto te « ’Api hi’u B : Nō te Paraimere—Fa’aineine i te mau tamari’i nō te hō’ē orara’a tā’ato’a i ni’a i te ’ē’a o te Atua nō te fafaura’a »

Piha Ha’api’ira’a Sābati nā te feiā ’āpī ’e nā te feiā pa’ari

Hō’ē tumu rahi e putuputu ai tātou i roto i te mau piha Ha’api’ira’a Sābati, o te pāturura’a ïa ’e te fa’aitoitora’a te tahi i te tahi ’a tūtava ai tātou i te pe’e ia Iesu Mesia. Hō’ē rāve’a ’ōhie nō te rave i te reira o te uira’a ïa i te hō’ē uira’a mai teie « E aha tā te Vārua Maita’i i ha’api’i ia ’oe i teie hepetoma ’a tuatāpapa ai ’oe i te Buka a Moromona i roto te Mai, pe’e mai ? » E nehenehe te mau pāhonora’a i teie uira’a e arata’i i te mau āparaura’a faufa’a rahi ’o tē patu i te fa’aro’o ia Iesu Mesia ’e i tāna ’evanelia.

I muri iho e nehenehe ’oe e ani i te tāu’ara’a parau tei fa’atumuhia i ni’a i te mau mana’o tauturu nō te tuatāpapara’a i roto te Mai, pe’e mai. ’Ei hi’ora’a, e nehenehe te hō’ē mana’o tuatāpapara’a e hōro’a mai i te mana’o ’ia ’imi i roto te Alama 36 ’e ’ia hāmani i te hō’ē tāpura nō te mau ta’o e ha’api’i nō ni’a i te ’ohipa a te Fa’aora i roto i te tātarahapara’a. E nehenehe ’oe e ani i te mau pīahi ’ia fa’a’ite mai ’e ’ia paraparau mai nō ni’a i te mau ta’o tei ’itehia mai ia rātou. ’Aore rā e nehenehe ’oe e rave i te tahi taime nō te hāmani ’āmui te piha ha’api’ira’a i te tāpura.

Te mau pupu Autahu’ara’a a Aarona ’e te mau piha Feiā ’Āpī Tamāhine

’Ia putuputu ana’e te mau pupu Autahu’ara’a a Aarona ’e te mau piha a te Feiā ’Āpī Tamāhine i te sābati, e mea ta’a ’ē ri’i tā rātou ’ōpuara’a i tā te hō’ē piha Ha’api’ira’a Sābati. Ta’a ’ē atu te tauturura’a i te tahi e te tahi ’ia ha’api’i mai i te ’evanelia a Iesu Mesia, e putuputu ato’a teie mau pupu nō te ’āparau ’āmui nō ni’a i te fa’aotira’a i te ’ohipa nō te fa’aorara’a ’e te fa’ateiteira’a (hi’o Buka arata’i rahi : Tāvinira’a i roto i te ’Ēkālesia a Iesu Mesia i te Feiā Mo’a i te mau Mahana Hope’a Nei, 1.2). Tē rave nei rātou i te reira i raro a’e i te fa’aterera’a a te mau peresidenira’a piha ha’api’ira’a ’e te pupu autahu’ara’a.

Nō reira, e ha’amata te rurura’a a te pupu autahu’ara’a ’aore rā te piha tamāhine, nā te hō’ē melo o te peresidenira’a pupu ’aore rā te piha e arata’i i te hō’ē ’āparaura’a nō ni’a i te mau tauto’ora’a, ’ei hi’ora’a, te orara’a i te ’evanelia, te aupurura’a i te feiā nava’i ’ore, te fa’a’itera’a i te ’evanelia, ’aore rā te ’āmuira’a i roto i te ’ohipa hiero ’e te ’ā’amu ’utuāfare.

I muri mai i teie taime nō te ’āpo’ora’a ’āmui, e arata’i te hō’ē ’orometua i te piha tamāhine ’aore rā i te pupu autahu’ara’a nō te ha’api’i ’āmui mai i te ’evanelia. E nehenehe te feiā fa’atere pa’ari ’aore rā, te mau melo o te piha ha’api’ira’a ’aore rā, o te pupu autahu’ara’a e fa’ata’ahia nō te ha’api’i. Nā te peresidenira’a piha tamāhine ’aore rā pupu autahu’ara’a e rave i teie mau ’ohipa, ma te ’āparaura’a ’e te feiā fa’atere pa’ari.

E fa’aineine te mau ta’ata tei fa’ata’ahia nō te ha’api’i, ma te fa’a’ohipara’a i te mau mana’o tauturu i roto i te arata’i ha’api’ira’a nō te hepetoma o te Mai, pe’e mai. I roto i te arata’i ha’api’ira’a tāta’itahi, tē fa’a’ite nei teie ītona i te hō’ē ’ātivite e tano ta’a ’ē maita’i nō te feiā ’āpī. Terā rā, e nehenehe e fa’a’ohipa i te hō’ē o te mau mana’o tauturu i roto i te arata’i ha’api’ira’a ’ei ’ātivite nō te ha’api’ira’a mai nā te feiā ’āpī.

Nō te hō’ē hōho’a tārena nō te mau rurura’a pupu autahu’ara’a ’e te piha tamāhine, hi’o te ’api hi’u D.