1 E tā’u tamaiti, ’a fa’aro’o mai na tō ’oe tari’a i tā’u nei mau parau ; ’e tē fa’a’ite pāpū atu nei ho’i au ia ’oe na, mai te mea e ha’apa’o māite ’oe i te mau fa’auera’a a te Atua, e manuia ïa ’oe i ni’a i te fenua.

2 ’Ua hina’aro vau ’ia rave ’oe mai tā’u ho’i i rave, i te ha’amana’ora’a i te fa’atītīra’ahia tō tātou mau metua ; i vai na rātou i roto i te fa’atītīra’a, ’e ’aita roa e ta’ata i ti’a ’ia fa’aora ia rātou, maori rā ’o te Atua nō Aberahama, ’e te Atua nō Isaaka, ’e te Atua nō Iakoba ; ’e nāna ho’i rātou i fa’aora i roto i tō rātou mau ’ati.

3 ’E i teienei, e tā’u tamaiti e Helamana, inaha, tē vai ’āpī noa nei ā ’oe, ’e nō reira, tē a’o atu nei au ia ’oe ē, ’a fa’aro’o māite mai ’oe i tā’u nei mau parau ’e ’a ha’api’i ho’i i tā’u nei parau ; ’ua ’ite ho’i au ē, ’o rātou ’o tē ti’aturi i te Atua, e pāturuhia ïa rātou i roto i tō rātou mau tāmatara’a, ’e tō rātou mau fifi, ’e tō rātou mau ’ati, ’e e fa’ateiteihia rātou i te mahana hope’a ra.

4 ’E ’eiaha ’oe e mana’o ē, ’ua ’ite au i te reira nā roto iā’u iho—e’ita nā roto i te pae tino nei, nā roto rā i te pae vārua, e’ita ho’i nā roto i te ’ā’au ta’ata nei, nā roto rā i te Atua.

5 I teienei, inaha, tē parau atu nei au ia ’oe na, ’āhiri ē ’aita vau i fānauhia i te Atua ra, ’aita ïa vau i ’ite i teie nei mau mea ; nā te Atua rā i fa’a’ite mai i teie nei mau mea iā’u nei, nā roto i te vaha o tāna melahi mo’a, ’e ’eiaha nā roto i te tahi maita’i i roto iā’u iho nei.

6 ’Ua hāhaere noa ho’i au ’e te mau tamaiti a Mosia, i te tītaura’a ’ia ha’amou i te ’ēkālesia a te Atua ; inaha rā, ’ua tono mai te Atua i tāna ra melahi mo’a nō te tāpe’a ia mātou i ni’a i te ’ē’a e haerehia ra.

7 ’E inaha, ’ua parau mai ra ’oia ia mātou mai te reo o te pātiri, ’e ’ua ’āueue ihora te fenua tā’āto’a i raro a’e i tō mātou ’āvae, ’e ’ua topa ana’e ihora mātou pā’āto’a i raro i te repo, ’e ’ua tae mai ra ho’i te mata’u o te Fatu i ni’a ia mātou.

8 Inaha rā, ’ua parau mai ra te reo iā’u : ’A tia. ’E ’ua ti’a a’era vau i ni’a, ’e ’ua ’ite atu ra i te hō’ē melahi.

9 ’E ’ua parau mai ra ’oia iā’u : Noa atu ē ’ua hina’aro ’oe iho na i te pohe, ’eiaha rā e ’imi fa’ahou i te rāve’a ’ia ha’amou i te ’ēkālesia a te Atua.

10 ’E i muri a’era, ’ua topa fa’ahou ihora vau i raro i te repo, ’e nō te ārea e toru ao ’e e toru ru’i te maoro ’aita roa i ti’a iā’u ’ia hāmama i tō’u ra vaha, ’e ’aita ato’a ho’i i ti’a iā’u ’ia fa’a’ohipa i tō’u nā rima ’e nā ’āvae.

11 ’E ’ua parau mai ra te melahi i te tahi atu ā mau mea iā’u, ’o tei fa’aro’ohia e tō’u ra mau taea’e, ’aita rā vau i fa’aro’o i te reira ; inaha ho’i i tō’u fa’aro’ora’a i te mau parau—Noa atu ē ’ua hina’aro ’oe iho na i te pohe, ’eiaha rā e ’imi fa’ahou i te rāve’a ’ia ha’amou i te ’ēkālesia a te Atua—’ua ro’ohia ihora vau i te mata’u rahi ’e te māere, penei a’e ’o te pohe au, ’ua topa ihora vau i raro i te repo ’e ’aita atu ra vau i fa’aro’o fa’ahou.

12 ’E ’ua ha’amāuiuihia vau i te māuiui mure ’ore, ’e ’ua ahoaho roa ihora tō’u vārua ’e ’ua ha’amāuiuihia nō tā’u ato’a ra mau hara.

13 ’Oia ïa, ’ua ha’amana’o ihora vau i tā’u ato’a ra mau hara ’e mau ’ohipa ’ī’ino, ’e ’ua ha’amāuiuihia ihora vau i te mau māuiui o hade ra ; ’oia ïa, ’ua ’ite ihora vau ē, ’ua fa’aru’e atu vau i tō’u ra Atua, ’e ’aita vau i ha’apa’o i tāna ra mau fa’auera’a mo’a.

14 ’Oia ïa, ’e ’ua taparahi na vau i tāna mau tamari’i e rave rahi, ’oia ho’i ’ua arata’i ’ē atu vau ia rātou i te pohe ; ’oia ïa, ’e ’ua rahi roa atu ho’i tā’u mau ’ohipa ’ī’ino i rave, ’e iā’u ho’i i mana’o ai nō te haere atu i mua i te aro o tō’u ra Atua, ’ua ha’amāuiui-rahi-hia tō’u vārua i te ri’ari’a fāito ’ore.

15 ’E ’ua mana’o vau i roto iā’u iho, ’āhiri e ti’a iā’u ’ia ti’avaruhia ’e ’ia ha’amouhia ho’i i te vārua ’e te tino ato’a ho’i, ’ia ’ore au ’ia fa’ati’ahia atu i mua i te aro o tō’u ra Atua, ’ia ha’avāhia nō tā’u ra mau ’ohipa i rave.

16 ’E i teienei, e toru ao ’e e toru ru’i ’ua ha’amāuiuihia vau, ’oia ïa i te mau māuiui nō te hō’ē vārua i fa’ahapahia.

17 ’E i muri a’era, ’ua nā-reira-hia vau i te ha’amāuiui-rahi-hia, ’e ’ua ahoaho roa vau i te ha’amana’ora’a i tā’u ra mau hara e rave rahi, inaha, ’ua ha’amana’o vau i te fa’aro’ora’a i tō’u metua tāne i te tohura’a atu i te mau ta’ata nō ni’a i te taera’a mai o te hō’ē ta’ata, ’o Iesu Mesia, te Tamaiti a te Atua, ’ei tāra’ehara nō tō te ao nei.

18 I teienei, ’a feruri ai au i teie nei mana’o, ’ua ti’aoro ihora vau i roto i tō’u iho ’ā’au : E Iesu ē, te Tamaiti a te Atua, ’a aroha mai iā’u nei, tei roto ho’i au i te au ’ava’ava ’e ’ua ru’uru’uhia ho’i te mau fifi mure ’ore nō te pohe i ni’a iā’u.

19 ’E i teienei, inaha, i tō’u ferurira’a i te reira, ’aita vau i ha’amana’o fa’ahou i tō’u māuiui ; ’oia ïa, ’aita vau i ahoaho fa’ahou i te ha’amana’ora’a i tā’u ra mau hara.

20 ’Auē ho’i te ’oa’oa ’e te māramarama fa’ahiahia tā’u i ’ite ; ’oia ïa, ’ua ’ī roa tō’u ’ā’au i te ’oa’oa, ’e ’ua rahi te reira mai te fāito ato’a o tō’u ra māuiui !

21 ’Oia ïa, tē parau atu nei au ia ’oe na, e tā’u tamaiti, ’aita roa e mea e tuea i te mamae ri’ari’a i tō’u ra mamae. ’Oia ïa, ’e tē parau fa’ahou atu nei au ia ’oe na, e tā’u tamaiti, ’aita roa e mea e tuea i te ’oa’oa ’e te au maita’i i tō’u ra ’oa’oa.

22 ’Oia ïa, ’ua mana’o vau ē, tē ’ite ra vau, mai tā tō tātou metua tāne ra ’o Lehi i ’ite, i te Atua i te pārahira’a i ni’a i tōna ra terōno, ma te ha’a’atihia ’e te mau pupu melahi e’ita e hope ’ia tai’o, i te hīmenera’a ’e te ’āruera’a i tō rātou ra Atua ; ’oia ïa, ’e ’ua hia’ai atu ra tō’u vārua ’ia pārahi ato’a i reira.

23 Inaha rā, ’ua pūai fa’ahou tō’u nā rima ’e tō’u nā ’āvae, ’e ’ua ti’a a’era vau i ni’a i tō’u ’āvae, ma te fa’a’ite atu i te mau ta’ata ē, ’ua fānauhia vau i te Atua ra.

24 ’Oia ïa, mai te reira mai taime ē tae roa mai i teienei, ’ua rave au i te ’ohipa ma te fa’aea ’ore, ’ia ti’a iā’u ’ia fa’afāriu mai i te mau ta’ata ’ia tātarahapa ; ’ia ti’a iā’u ’ia arata’i mai ia rātou ’ia fāri’i i te ’oa’oa rahi ’o tā’u i fāri’i ; ’ia ti’a ato’a ia rātou ’ia fānauhia i te Atua ra, ’e ’ia fa’a’īhia ho’i i te Vārua Maita’i.

25 ’Oia ïa, ’e i teienei, inaha, e tā’u tamaiti, ’ua hōro’a mai te Fatu i te ’oa’oa rahi iā’u nei i te hotu nō tā’u ra mau ’ohipa.

26 Nō te parau ho’i tāna i fa’a’ite mai iā’u nei, inaha, e rave rahi tei fānauhia i te Atua ra, ’e tei tāmata mai tā’u i tāmata, ’e tei ’ite mata ’e te mata mai tā’u ho’i i ’ite mata ; nō reira ’ua ’ite rātou i teie nei mau mea ’o tā’u i parau iho nei, mai tā’u ho’i i ’ite ; ’e te ’ite ’o tā’u i fāri’i nō ’ō mai ïa i te Atua ra.

27 ’E i tauturuhia na ho’i au i roto i tō’u mau ’ati ’e tō’u mau pe’ape’a e rave rahi ; ’oia ïa, ’e i roto i te mau huru fifi ato’a ; ’oia ïa, ’ua fa’aora te Atua iā’u mai roto mai i te fare tāpe’ara’a, ’e te mau ru’uru’ura’a, ’e te pohe ; ’oia ïa, ’e te ti’aturi māite noa ra vau iāna, ’e e fa’aora ā ’oia iā’u nei.

28 ’E ’ua ’ite au ē, e fa’ati’a mai ’oia iā’u i ni’a ’ia tae i te mahana hope’a ra, ’ia pārahi i pīha’i iho iāna ma te hanahana ; ’oia ïa, ’e e ’ārue atu vau iāna ē a muri noa atu, ’e nāna ho’i tō tātou mau metua i arata’i mai i rāpae i ’Aiphiti, ’e ’ua horomi’i atu ’oia i te mau ta’ata ’Aiphiti i roto i te miti ’Ute’ute ; ’e ’ua arata’i ’oia ia rātou nā roto i tōna mana i te fenua i fafauhia ra ; ’oia ïa, ’e ’ua fa’aora ’oia ia rātou i te ha’afaora’a ’e i te fa’atītīra’a i terā taime ’e i terā taime.

29 ’Oia ïa, ’e ’ua arata’i ato’a mai ’oia i tō tātou mau metua i rāpae i te fenua ra nō Ierusalema ; ’e nā roto i tōna ra mana mure ’ore ’ua fa’aora ato’a ’oia ia rātou i te ha’afaora’a ’e te fa’atītīra’a i terā tau ’e i terā tau, ē tae roa mai i teie nei mahana ; ’e ’ua tāmau māite au i te ha’amana’o i tō rātou fa’atītīra’a ; ’oia ïa, ’e e mea ti’a ato’a ia ’oe ’ia tāmau i te ha’amana’o i tō rātou fa’atītīra’ahia mai tā’u ho’i i nā reira.

30 Inaha rā, e tā’u tamaiti, e ’ere te reira ana’e ; e mea ti’a ho’i ia ’oe na ’ia ’ite, mai tā’u i ’ite ē, mai te mea e ha’apa’o ’oe i te mau fa’auera’a a te Atua, e manuia ’oe i ni’a i te fenua nei ; ’e e mea ti’a ho’i ia ’oe ’ia ’ite ē, ’e mai te mea ’aita ’oe e ha’apa’o i te mau fa’auera’a a te Atua, e tāpū-’ē-hia atu ’oe mai mua atu i tōna ra aro. I teienei, ’ua au ho’i teie i tāna ra parau.